“Ayuda”

Ang “ayuda” ay salitang Kastila na nagmula sa latin na adiūtāre. Ito rin ang salitang ginagamit ng

mga Chavacano na nangangahulugang “tulong” sa wikang Filipino, “bulig” sa mga Ilonggo, “tabang” sa

mga Bisaya at “help” naman sa Ingles.

Naging popular ang salitang ayuda nang ginamit ito bilang tawag sa mga tulong na ibinibigay ng

lokal na pamahalaan sa bawat tahanan na kanilang nasasakupan simula noong nagkaroon ng pandemya.

Marahil ay napakasarap pakinggan ang salitang “ayuda” sa panahon ng pandemya sapagkat napagagaan

nito ang ilang isipin ng ating mga kababayan kung paano malalampasan ang mga pagsubok dulot ng

pandemya. Ang salitang ito ay malawakan na ring nagagamit na tawag sa anumang tulong na ibinibigay

at tinatanggap ng mga Pilipino. Ito man ay “ayuda” mula sa kaibigan, kapit-bahay, Sangguniang

Baranggay, Munisipyo at sa mga pribadong grupo na nais magbigay ng kahit na anong uri ng tulong sa

kapwa.

Bagamat matagal nang isinasagawa ang mga pagtulong na ito bago pa man magkaroon ng

pandemya, ay hindi kailanman o madalang itong tawagin bilang isang “ayuda” at naging popular lamang

ang salitang ito nang magsimulang magkaroon ng pandemya sa bansa. Higit na nabigyan ito ng malalim

na kahulugan sa panahon ng pandemya sapagkat sa kabila ng mga negatibong dulot ng Covid-19 ay

tanging “AYUDA” ang ating inaasahan. Ayuda mula sa Diyos, mula sa gobyerno, mula sa kapamilya at

kaibigan, maging ayuda mula sa iba’t ibang bansa. Angkop gamitin ang salitang “ayuda" sa panahon ng

pandemya sapagkat malapit ang kahulugan nito sa konteksto at sitwasyon pinaggagamitan.

Entry by:

JAKE ARMAN A. PRINCIPE

Southern Luzon State University
Lucban, Quezon