॥ ಅದ್ವೈತರಸಮಂಜರೀ ॥

ಶ್ರೀ ಗಣೇಶಾಯ ನಮಃ ॥

ಶ್ರೀ ಗುರುಭ್ಯೋ ನಮಃ ॥

॥ ಅದ್ವೈತರಸಮಂಜರೀ ॥

ಅಖಂಡಸತ್ಯಜ್ಞಾನಾನಂದಾಮೃತಸ್ಯಾತ್ಮಸ್ತವ-
ಸ್ತವಾದಿಕಂ ಕಥಂ ಕುರ್ಯಾಂ ಕರಣಾಗೋಚರತ್ವತಃ ॥ (1)
ಸ್ವಭಕ್ತಲೋಕಾನುಜಿಧೃಕ್ಷಯೈವಯಾ
ಸಮಸ್ತಲೋಕಾನುಗತಾ ವಿರಾಜತೇ ।
ಅಕಾದಿರೂಪೇಣ ಶುಕಾದಿವಂದಿತಾಂ
ನಮಾಮಿ ತಂ ಶ್ರೀಲಲಿತಾಂ ಸ್ವದೇವತಾಮ್ ॥ (2)
ಗಜಮುಖಮುಪರಿಷ್ಟಾನ್ಮಾನವಾಂಗಂ ತ್ವಧಸ್ತಾ-
ನರಪರಪರಮೈಕ್ಯಜ್ಞಾಪನಾಯಭ್ಯುಪೇತ್ಯ ।
ಪರಿಲಸತಿಪರಸ್ತಾನ್ಮೋಹಜಾಲಾನ್ಮಹೋಯ-
ತ್ತದಿಹ ಮಮ ಪುರಸ್ತಾದಸ್ತು ವಸ್ತುಪಶಸ್ತಮ್ ॥ (3)
ವಟತರುನಿಕಟೇ ಶ್ರೀದಕ್ಷಿಣಾಮೂರ್ತಿರೂಪಂ
ಯದಧಿವಸತಿ ಸಚ್ಚಿನ್ಮುದ್ರಯಾ ಭದ್ರಯಾರ್ಥಮ್ ।
ಪರಮಮಮೃತಮಂತೇವಾಸಿನಾಂ ಸಂಪ್ರದಾತುಂ
ತದಿಹವರದಮೇಕಂ ಭಾವಯೇ ಭಾವಶೂನ್ಯಮ್ ॥ (4)
ಯತೀಂದ್ರಮಂಡಲಂ ಧ್ಯಾಯನ್ನಖಂಡರಸಮಂಡಲಮ್ ।
ಅದ್ವೈತರಸಮಂಜರ್ಯಾಃ ಕುರ್ವೇದ್ಯ ಸುವಿಕಾಸಿನೀಮ್ ॥ (5)
ಅಬದ್ಧಾಽಪಿ ಸುಬದ್ಧೈಷಾ ಸತಾ ಬದ್ಧಸುದೃಷ್ಟಿನಾ ।
ಭವೇತ್ಸಂತೋಷವಂತೋ ಹಿ ಸಂತಸ್ಸಂತಿ ಸಮೇಕ್ಷಣಾಃ ॥ (6)
ಪಾದಶೂನ್ಯಪತಗಾಯಿತಸ್ಯ ಮೇ ಖೇರತ್ವಮತಿದುರ್ಲಭಂ ಖಲು ।
ತದ್ವಿದೋಽಪಿ ತದವಾಪ್ತುಮಿಚ್ಛತ- ಸ್ಸಾಹಸಂ ಸಹತು ಸೌಹೃದೀಜನಃ ॥ (7)
ಅದ್ವೈತಮೇವ ಪರಮಾರ್ಥತಯಾ ವಿವೇಕ್ತು-
ಮಂಗೀಕೃತದ್ವಿಪನರಾಕೃತಿಸನ್ನಿವೇಶಃ ।
ಅದ್ವೈತಗೋಚರಮಶೇಷವಿದೋಷಮಂತ-
ರಾವಿಷ್ಕರೋತು ವರದೋ ಮಮ ವಿಘ್ನರಾಜಃ ॥ 1॥

ಅಜ್ಞಾನವಿಸ್ಫುರದನೇಕವಿಧಾತ್ಮಭೇದ-
ಮಜ್ಞಾನಮಾಶ್ರಿವತಸ್ಸುಲಭಾ ನ ಮುಕ್ತಿಃ ।
ಆದರ್ಶಗೇಹಮಮಿತಃ ಪ್ರತಿಬಿಂಬಿತಾಂತ-
ರ್ದ್ವಾರಂ ಗತಸ್ಯ ನ ಬಹಿರ್ಗತಿರರ್ಭಕಸ್ಯ ॥ 2॥
ಶಾಂತ್ಯಾದಿಸಾಧನವತಾ ಪುರುಷೋತ್ತಮೇನ
ಸಂಪ್ರಾಪ್ಯತೇ ನಿಜಪದಂ ವರದೇಶಿಕೋಕ್ತ್ಯಾ ।
ಚೋರೈರಣ್ಯಸರಿಣೀಂ ಗಮಿತೇನ ಪುಂಸಾ
ದೇಶೋ ನಿಜೋ ಹಿ ತದಭಿಜ್ಞಗಿರೈವ ಗಮ್ಯಃ ॥ 3॥

ಭೂಮಾ ಭವಾನಿತಿ ಗುರೂಪನಿಷದ್ವಚೋಭಿಃ

ಕರ್ತ್ರಾತ್ಮತಾ ಗಲತಿ ಸಿದ್ಧ್ಯತಿ ಭೂಮಭಾವಃ ।
ರಾಜಾತ್ಮಜಸ್ಯ ನಿಜತತ್ವನಿಬೋಧನೇನ
ವ್ಯಾಧಾತ್ಮತಾವಿಗಲನಾದಿವ ರಾಜಭಾವಃ ॥ 4॥

ಕೂಟಸ್ಥನಿತ್ಯಸುಖಬೋಧತನೋಃ ಪ್ರತೀಚೋ
ಬಂಧೋ ವಿಮೋಚನಮಿತಿ ಭ್ರಮ ದುರ್ವಿಲಾಸಃ ।
ವಂಧ್ಯಾಸುತಸ್ಯ ವಪುರಾದಿಗುಣಪ್ರಪಂಚ-
ಸ್ತತ್ಪಂಚತಾಽಪಿ ಸುತರಾಂ ಪರಿಕಲ್ಪನೈವ ॥ 5॥

ಆಪಾತತಃ ಪ್ರತಿಭಯಾ ಜಗದಸ್ತಿವಾದಃ

ಸತ್ಯಂ ನಿರೂಪಣವಿಧೌ ನ ಹಿ ಕಿಂಚಿದಸ್ತಿ ।
ಭೀರೋರ್ವಿಭಾತಿ ಪರಿತಸ್ತಿಮಿರಂ ಪಿಶಾಚ-
ಸ್ತತ್ರೈವ ದೀಪಕಲಿಕಾಽಽನಯತೇ ಕಿಮಸ್ತಿ ॥ 6॥

ಚಿಜ್ಜ್ಯೋತಿರೇವ ಜಗದಾತ್ಮತಯಾ ಚಕಾಸ್ತಿ

ವಸ್ತ್ವಂತರಂ ಕಿಮಪಿ ನಾಸ್ತಿ ವಿಚಾರ್ಯಮಾಣೇ ।
ರಜ್ಜ್ವೌ ಭ್ರಮಾಧಿಕರಣಾದಪಿ ರಜ್ಜುಸರ್ಪ
ತತ್ವಾಂತರಂ ಭವಿತುಮರ್ಹತಿ ಕಿಂ ಕಥಂಚಿತ್ ॥ 7॥

ವಿಶ್ವಂ ಸಮಸ್ತಮಪಿ ವಿಭ್ರಮಮಾತ್ರಮೇತ-

ದಾತ್ಮೈವ ಸನ್ನಯನನ್ಯಸುಖಪ್ರಕಾಶಃ ।
ಸ್ಫೂರ್ತ್ಯೈವ ವಿಶ್ವಮಪಿ ಸತ್ಯಮಿತೀರ್ಯತೇ ಚೇತ್
ಕೋ ನಾಮ ಶುಕ್ತಿರಜತೇನ ಧನೀನಭಾವಿ ॥ 8॥

ನಾಸ್ತಿ ಪ್ರತೀತ್ಯವಸರೇ ನ ಪುರಾ ನ ಪಶ್ಚಾ-

ದಾಶ್ಚರ್ಯಮೇತದವಭಾತಿ ತಥಾಽಪಿ ವಿಶ್ವಮ್ ।
ಯದ್ವಾ ಕಿಮದ್ಭುತವಿವೇಹ ಮಹೇಂದ್ರಜಾಲಂ
ಮಾಯಾವಿಕಲ್ಪಿತಮಿತಿ ಪ್ರತಿಭಾಸತೇ ಹಿ ॥ 9॥

ಏಕೋಽಪಿ ಸನ್ನಯಮನೇಕತಯಾ ವಿಭಾತಿ

ಭೂಮಾ ಸ್ವಕಲ್ಪಿತತಮಃ ಪಟಲಾನುಷಂಗಾತ್ ।
ಇಂದುರ್ದ್ವಿತೀಯರಹಿತೋಽಪಿ ಚ ಸದ್ವಿತೀಯ-
 ಭಾವೇನ ಭಾತಿ ಪುರುಷಸ್ಯ ನಿಜಾಕ್ಷಿದೋಷಾತ್ ॥ 10॥

ಆಲೋಕ್ಯತೇ ಭುವನಚಕ್ರಮಲಾತಚಕ್ರ-
ಮತ್ಯಂತವಿಭ್ರಮವಿಜೃಂಭಿತಮಸ್ಥಿರಂ ಚ ।
ದೈವಾತ್ ಭ್ರಮಸ್ಯವಿರತೌ ಸಮುಪಸ್ಥಿತಾಯಾಂ
ನಾಲೋಕ್ಯತೇ ಕಿಲ ಪುರೇವ ಪುನಸ್ತದೇವ ॥ 11॥

ಗಂಧರ್ವಪತ್ತನಮಿದಂ ಜಗದವ್ಯವಸ್ಥಂ
ಚೈತನ್ಯನಾಮನಿ ವಿಹಾಯಸಿ ನಶ್ಚಕಾಸ್ತಿ ।
ವಿದ್ಯೋತತೇ ಯದಿ ಚ ವಿದ್ಯುದಿವಾತ್ಮವಿದ್ಯಾ
ಸದ್ಯಸ್ತಿರೋಭವತಿ ಸರ್ವಮಿದಂ ತದೈವ ॥ 12॥

ಆರೋಪಿತಸ್ಯ ಜಗತಃ ಪ್ರವಿಲಾಪನೇನ

ಚಿತ್ತಂ ಶಿವಾತ್ಮಕತಯಾ ಪರಿಶಿಷ್ಯತೇ ನಃ ।
ಶತ್ರೂನ್ ನಿಹತ್ಯ ಹತಯಿಂತುರಧೋನಿಪ್ರಾತಾತ್
ಗಂಧದ್ವಿಪೋ ಭವತಿ ಕೇವಲಮದ್ವಿತೀಯಃ ॥ 13॥

ಅದ್ಯಾಸ್ತಮೇತು ವಪುರಾಶಿತಾರಮಾಸ್ತಾಂ
ಕಸ್ತಾವತಾಪಿ ಮಮ ಚಿದ್ವಪುಷೋ ವಿಶೇಷಃ ।
ಕುಂಭೇಽಪಿ ನಶ್ಯತಿ ಚಿರಂ ಸಮವಸ್ಥಿತೇ ವಾ
ಕುಂಭಾಂಬರಸ್ಯ ನಹಿ ಕೋಽಪಿ ವಿಶೇಷಲೇಶಃ ॥ 14॥

ಸಂಕಲ್ಪಮಾತ್ರಸವಿಕಲ್ಪಿತಮೂರ್ತಿವಿಶ್ವಂ
ವಿಶ್ವಂ ಚ ಸತ್ಯಮಿತಿ ಮೂರ್ಚ್ಛಿತಮಂದಬುದ್ಧಿಃ ।
ಚಿಂತಾಪ್ರಕರ್ಷಜನಿತಾಂ ವನಿತಾಂ ವಿದಿತ್ವಾ
ಶೈವೇತಿ ವಲ್ಗತಿ ಯಥಾ ಚಿರವಿಪ್ರಯುಕ್ತಃ ॥ 15॥

ಸ್ವಸ್ಯೇ ಮಯಿ ಸ್ವರಸಸತ್ಯಸುಖಾವಬೋಧೇ

ವ್ಯಾಮೋಹನಾಜ್ಜಗದಿತಿ ವ್ಯಪದಿಶ್ಯತೇ ಯತ್ ।
ಅನ್ಯತ್ರ ಕುತ್ರಚಿದದೃಷ್ಟಮರೂಪರೂಪ-
ಮಸ್ಥಾನಚಿತ್ರಮಿತಿ ನಿಶ್ಚಿನುಮಸ್ತದೇತತ್ ॥ 16॥

ಆಧ್ಯಾಸಿಕಸ್ಫುರಣಭೇದತಿರೋಹಿತೋಽಪಿ
ಚಿದ್ಧಾತುರೇಕರಸತಾಂ ನ ಜಹಾತಿ ಜಾತು ।
ನಾನಾಚರಾಚರವಿಚಿತ್ರವಿಚಿತ್ರಿತೋಽಪಿ
ಚಿತ್ರಃ ಪಟೋ ನ ಪಟಭಾವಮಪಾಸ್ಯತಿ ಸ್ವಮ್ ॥ 17॥

ಸಚ್ಚಿತ್ ಸುಖಾತ್ಮಕಮಖಂಡಿತಮಾತ್ಮತತ್ತ್ವಂ
ಮನ್ಯೇತ ಕಶ್ಚಿದಹಮಿತ್ಯತಿನಿಶ್ಚಿತಾರ್ಥಮ್ ।
ದೇಹೇಂದ್ರಿಯಾದಕಮಪಿ ವಿಭ್ರಮವಾಸನಾಭಿ
 ವ್ಯಾಪ್ತೋ ಮಮಾಹಮಿತಿಯದ್ವದವಿದ್ವದಾತ್ಮಾ ॥ 18॥

ವಿಶ್ವಂ ಮೃಷಾ ವಿರಸಮಿತ್ಯವಧಾರ್ಯ ಧೈರ್ಯ-

ಮಾಸ್ವಾದ್ಯತೇ ಮುನಿಭಿರಂತರಸೌ ರಸಾತ್ಮಾ ।
ಸಂತಾಪಜಂ ಮರುಮರೀಚಿರಸಂ ನಿರಸ್ಯ
ಸಂಸೇವ್ಯತೇ ಸುಮತಿಭಿಸ್ಸುರಸಿಂಧುಪೂರಃ ॥ 19॥

ಏಕಾಂತಸನ್ನಿಹಿತಮೀದೃಶಮಾತ್ಮತತ್ತ್ವಂ
ಲೋಕಾ ವಿಮೂಢಮತಯೋ ಬತ ನಾದ್ರಿಯಂತೇ ।
ಆಕಾಶಗೋಚರಮಶೇಷಜಗತ್ಪ್ರಕಾಶಂ
ಘೂಕಾ ನ ಭಾಸ್ಕರಮುದೀಕ್ಷಿತುಮುತ್ಸಹಂತೇ ॥ 20॥

ಆನಂದವಿಸ್ಫುರಣರೂಪಮಪಿ ಪ್ರಪಂಚ-
ಮನ್ಯಂ ವಿಭಾವ್ಯ ಪರಿತಾಪಮುಪೈತಿ ಮುಗ್ಧಃ ।
ದೀಪಾದಿಷು ಸ್ವವಪುಷಃ ಪರಿದೃಶ್ಯಮಾನಾಂ
ಛಾಯಾಂ ವಿಗಾಹ್ಯ ಪರಿಮುಹ್ಯತಿ ಕಿಂ ನ ಬಾಲಃ ॥ 21॥

ಮಾಯಾ ಸ್ವಕೀಯವಿಯದಾದಿವಿಕಾರಜಾಲೈ-
ರ್ನಾತ್ಮಾನಮನ್ಯಥಯಿತುಂ ಪ್ರಭವತ್ಯಸಂಗಮ್ ।
ಆಧಾರಪುಷ್ಕರಪಲಾಶಕಮಂಬುಧಾರಾ
ಸ್ವೀಯೈಃ ಕಿಮಾರ್ದ್ರಯಿತುಮರ್ಹತಿ ಶೀಕರೌಘೈಃ ॥ 22॥

ಆಭಾಸಮಾತ್ರತನವೋ ಜಗತೀವಿಕಲ್ಪಾ
ಮಾಂ ನ ಸ್ಪೃಶ್ಯಂತ್ಯಪಿ ವಿಮುಕ್ತಸಮಸ್ತಸಂಗಮ್ ।
ಆರೋಪಿತಾ ಮಲಿನತಾದಿವಿಚಿತ್ರಧರ್ಮಾ
ಲಿಂಪಂತಿ ಕಿಂ ನು ವಿಮಲಂ ವಿಯದಂತರಾಲಮ್ ॥ 23॥

ಸ್ವಪ್ನಸ್ಸುಷುಪ್ತಿರಥಜಾಗ್ರದಿತಿ ಹ್ಯವಸ್ಥಾ-
ಸ್ತಿಸ್ರೋಽಪಿ ಶಶ್ವದುದಯಾಸ್ತಮಯೈರುಪೇತಾಃ ।
ನಿರ್ಮೋಕರಾಜಯ ಇವೋರಗರಾಜಭೋಗೇ
ಮಯ್ಯೇವ ಸಾಕ್ಷಿಣಿ ವಿಭಾಂತ್ಯನುವರ್ತಮಾನೇ ॥ 24॥

ಸ್ವಪ್ನಃ ಪ್ರಜಾಗ್ರದಿತಿ ಶಬ್ದಕೃತೋ ವಿಶೇಷೋ

ಮಾಯಾಮಯತ್ವಮುಭಯೋರಪಿ ತುಲ್ಯಮೇವ ।
ಪ್ರತ್ಯಗ್ಪರಾಗಿತಿ ನಾಮಕೃತೋ ವಿಕಲ್ಪಃ
ಸತ್ಯಾವಬೋಧಸುಖತಾಂ ತು ತಯೋಸ್ಸ್ವರೂಪಮ್ ॥ 25॥

ಸರ್ವೇಂದ್ರಿಯೋಪರಮಶಾಂತಜಗದ್ವಿಕಲ್ಪಾಃ
ಸ್ವಾನಂದಮಾತ್ರಪರಿಶೇಷಿತಚೈತ್ಯಬೋಧೇ ।
ತೇ ಜಾಗ್ರತೋಽಪ್ಯನುಭವಂತಿ ಸುಷುಪ್ತ್ಯವಸ್ಥಾಂ
ಕ್ರೀಡಂತಿ ಯೇ ಸತತಮಾತ್ಮನಿ ಸತ್ಯಬೋಧೇ ॥ 26॥

ಕರ್ತೇತಿ ಕಾಯಿಕವಿಚೇಷ್ಟಿತದರ್ಶಿನೋ ಮಾಂ

ಗೃಹ್ಣಂತಿ ಚೇತ್ ಕಿಮು ಯಥೈವ ತಥಾ ಭವಾಮಿ ।
ಪಾರಿಪ್ಲವೋಽಯಮಿತಿ ಪಾಮರಧೀಗೃಹೀತ-
ಶ್ಚಂದ್ರಸ್ತಥಾ ನಹಿ ಚಲಾಂಬುದಸನ್ನಿಕೃಷ್ಟಃ ॥ 27॥

ಮಿಥ್ಯಾ ಸಮುಲ್ಲಸತು ನಾಮ ಜಗದ್ವಿಚಿತ್ರ-

ಮೇತಾವತಾ ವಿಮಲತತ್ವವಿದೋ ನ ಹಾನಿಃ ।
ಸ್ವಪ್ನೇ ಭಯಂಕರಗಜಾದಿನಿರೀಕ್ಷಣೇಽಪಿ
ನ ಸ್ವಾಪ್ನಕತ್ವಮನುಸಂಧಧತೋಽಸ್ತಿ ಭೀತಿಃ ॥ 28॥

ಅತ್ಯಂತಮೇತದಸದಿತ್ಯಪಿ ಚಾವ್ಯವಸ್ಥಂ
ಮಯ್ಯಾತ್ಮದೃಷ್ಟಿರನುವರ್ತತ ಏವ ಲೋಕಮ್ ।
ನಾಸ್ತ್ಯತ್ರ ವಕ್ತ್ರಮಿತಿ ನಿಶ್ಚಿತವಾನಪಿ ದ್ರಾ-
ಗಾದತ್ತ ಏವ ಮುಕುರಂ ಮುಖದರ್ಶನಾಯ ॥ 29॥

ಉದ್ಬೋಧಿತೋಽಪಿ ಕಬಲೇ ಕಬಲೇ ಜನನ್ಯಾ

ನಿದ್ರಾಲಸಶ್ಶಿಶುರಿವಾವಿದಿತಾನ್ಯಭಾವಃ ।
ಆಲೋಕಯನ್ನಪಿ ಬಹಿರ್ಜಗದಿಂದ್ರಜಾಲ-
ಮಂತಃ ಕಯಾಪಿ ಕಲಯಾ ನ ಪರಿಚ್ಯುತೋಽಸ್ಮಿ ॥ 30॥

ದೃಶ್ಯೇ ಸ್ಫುಟೀಭವತಿ ನೇಕ್ಷ್ಯತ ಏವ ಭೂಮಾ

ಭೂಮ್ನಿ ಸ್ಫುಟೀಭವತಿ ನೇಕ್ಷ್ಯತ ಏವ ದೃಶ್ಯಮ್ ।
ದ್ವೀಪಾಂತರೇ ಸ್ಫುರತಿ ಭೂಮಿರಿಯಂ ನ ದೃಶ್ಯಾ
ಭೂಮಂಡಲೇ ಸ್ಫುರತಿ ತಚ್ಚ ತಥಾ ನ ದೃಶ್ಯಮ್ ॥ 31॥

ಬೋಧೇ ಶನೈರುಪಚಯಂ ಪ್ರತಿಪದ್ಯಮಾನೇ

ವಿಚ್ಛಿದ್ಯತೇ ಹೃದಿ ತದಾ ವಿಮಲಂ ಭ್ರಮೋಽಪಿ ।
ಚಂದ್ರೇ ಕಲಾಭಿರನುವಾಸರಮೇಧಮಾನೇ
ಮಂದೀಭವತ್ಯಪಿ ಯಥೈವ ಮಹಾಂಧಕಾರಃ ॥32॥

ಬ್ರಹ್ಮಾನುಭೂತಿರಸನಿರ್ಭರಿತೇ ಮುನೀಂದ್ರೇ
ಕರ್ಮಾನುಬಂಧವಿಧಯೋ ವಿಮುಖೀಭವಂತಿ ।
ಸಿದ್ಧೋಪದರ್ಶಿತರಸಾಯನಪಾನತೃಪ್ತೇ
ಕಿನ್ನು ವ್ಯಪಾಕವಿಷಯಾ ವಿಧಯಃ ಕ್ರಮಂತೇ ॥ 33॥

ಸರ್ವಾತ್ಮತಾಮುಪಗತೋಽಪಿ ಮುನಿಸ್ಸಮಾಧಿಂ
 ಪೂರ್ವಾನುವೃತ್ತಮಯತೇ ಸಮಯಾಪನುತ್ಯೈ ।
ಪರ್ಯಾಪ್ತಸರ್ವವಿಭವಃ ಕ್ಷಿತಿಪೋಽಪಿ ಕಾಲ-
ನಿರ್ಯಾಪಣಾಯ ಜುಷತೇ ಚತುರಂಗಲೀಲಾಮ್ ॥ 34॥

ಆತ್ಮಜ್ಞಮಸ್ತಮಿತಸರ್ವವಿಧಿಪ್ರವೃತ್ತಿ-
ಮಾನಂದಯಂತಿ ನಿಗಮಾಭಿಮತಾ ನಿಷೇಧಾಃ ।
ವ್ಯಾಪಾರಮಾತ್ರವಿಮುಖಸ್ಯ ಮಹಾಲಸಸ್ಯ
ಮಾಶಬ್ದಕವ್ಯವಹೃತಾನಿ ಮನೋಹರಾಣಿ ॥ 35॥

ತತ್ತ್ವಾನುಚಿಂತನಪರೋ ಮುನಿಸಾರ್ವಭೌಮಃ
ಸ್ವಚ್ಛಂದತೋ ವ್ಯವಹರನ್ನಪಿ ನಾನುಯೋಜ್ಯಃ ।
ಸಾಮ್ರಾಜ್ಯಮೇತ್ಯ ಹಿ ಯಥಾರುಚಿ ವರ್ತಮಾನೋ
ರಾಜಾ ಪ್ರಜಾಭಿರನುಯೋಕ್ತುಮಶಕ್ಯ ಏವ ॥ 36॥

ಪ್ರಾರಬ್ಧಜಾಮಧಿಕಸಂಪದಮಾಪದಂ ವಾ
ಭುಂಜಾನ ಏವ ಪುರುಷಃ ಪರಿಶುದ್ಧಿಯೇತಿ ।
ಕಿಂ ವಾಽಽಹಿತುಂಡಿಕಗೃಹೀತತನುರ್ಭುಜಂಗ-
ಸ್ತತ್ಕ್ಲೃಪ್ತದಂಡನವಿಧಿಂ ಪರಿಹರ್ತುಮೀಷ್ಟೇ ॥ 37॥

ಪೂರ್ವೋತ್ತರಾರ್ಜಿತಶುಭಾಶುಭಕರ್ಮಭಿಸ್ಸ್ವ-
ಸಂಪದ್ವಿಪಶ್ಚ ನ ಭವೇತ್ ಪರಮಾರ್ಥದೃಷ್ಟೇಃ ।
ಜಾತ್ಯೋಷರಸ್ಯ ಧನವರ್ಷಜಲಾಭಿಷೇಕೈ-
ರತ್ಯೋಷ್ಮಣಾ ಚ ನಹಿ ಸಸ್ಯವಿವೃದ್ಧಿಹಾನೀ ॥ 38॥

ಪ್ರಾರಬ್ಧಕರ್ಮಪರಿಪಾಕವಶಂವದೋ ನ
ಕ್ಲಿಶ್ನಾತಿ ನಿಶ್ಚಿತಪರಾವಧಿರಾತ್ಮವೇದೀ ।
ಗ್ರಾಮಾಂತಮಾರ್ಗಪರಿಮಾಣವಿದಧ್ವನೀನೋ
ಮಧ್ಯೇಪಥಂ ನ ಹಿ ವಿಷೀದತಿ ದುಃಖಿತೋಽಪಿ ॥ 39॥

ಅಂತರ್ಬಹಿಶ್ಚ ಪರಮಾರ್ಥತಯಾನುಪಶ್ಯನ್
ನ ಕ್ಲಿಶ್ಯತಿ ವ್ಯಸನಮುತ್ಕಟಮಪ್ಯುಪೇತಃ ।
ಧೀರಃ ಕಿಲಾಹಮುಖೇ ವಿಜಯೈಕದೃಷ್ಟಿಃ
ಪ್ರತ್ಯರ್ಥಿಭಿಃ ಪ್ರಮಥಿತೋಽಪಿ ನ ವಿಕ್ಲವಸ್ಸ್ಯಾತ್ ॥ 40॥

ಪ್ರಾಪಂಚಿಕಸ್ತು ವಿಭವಃ ಪರಮಾದ್ಭುತೋಽಪಿ

ಧೀರಂ ನ ರಂಜಯತಿ ದೃಷ್ಟತದೀಯತತ್ವಮ್ ।
ಸ್ತ್ರೀವೇಷಭೂಷಿತತನುಃ ಪುರುಷೋ ವಿಲಾಸೈ-
ಸ್ತಜ್ಞಂ ಯುವಾನಮಪಿ ಮೋಹಯಿತುಂ ಹಿ ನಾಲಮ್ ॥ 41॥
ಅಂತರ್ನಿರಂತರನಿಗೂಢನಿಜಾತ್ಮತತ್ವೋ
ನ ಪ್ರಾಗಿವ ವ್ಯಸನಿತಾಂ ವಿಷಯೇಷು ಧತ್ತೇ ।
ಭಾಗ್ಯಾತ್ ಕುತಶ್ಚಿದಪಿ ಲಬ್ಧನಿಧಿರ್ಮನಸ್ವೀ
ಕಿಂ ಪೂರ್ವವತ್ ಕೃಪಣತಾಮುರರೀಕರೋತಿ ॥ 42॥

ಅಧ್ಯಾಸ್ಥಿತಸ್ವಮಹಿಮಾನಮಲಕ್ರಿಯಾ ವ-
ದಾಧ್ಯಾತ್ಮಿಕಾಶ್ಶುಭಗುಣಾಸ್ಸ್ವಯಮಾವಿಶಂತಿ ।
ಸ್ವಾಧೀನಿತೇ ಸುಹೃದಿ ರಾಜನಿ ತಸ್ಯ ಭೃತ್ಯಾ
ಏತೇಽಪಿ ಚ ಸ್ವಯಮುಪೇತ್ಯ ತಮಾಶ್ರಯಂತೇ ॥ 43॥

ಅಜ್ಞಾನಮೇವ ನ ಕುತೋ ಜಗತಃ ಪ್ರಸಂಗೋ

ಜೀವೇಶದೇಶಿಕವಿಕಲ್ಪಕಥಾಽಪಿ ದೂರೇ ।
ಏಕಾಂತನಿರ್ಮಲಚಿದೇಕರಸಸ್ವರೂಪಂ
ಬ್ರಹ್ಮೈವ ಕೇವಲಮಹಂ ಪರಿಪೂರ್ಣಮಸ್ಮಿ ॥ 44॥

ಇತಿ ಶ್ರೀಮತ್ಪರಮಹಂಸ ಪರಿವ್ರಾಜಕ ಸದಾಶಿವ ಬ್ರಹ್ಮೇಂದ್ರ ವಿರಚಿತಾ

ಅದ್ವೈತರಸಮಂಜರೀ ಸಂಪೂರ್ಣಾ ॥