THLOHPUI RORELIN LE!

Kan thalaite chuan Mizo hla aiin sâp leh hnam dang hla an ngaina a. Mizo thawnthu aiin hnam dang
thawnthu chu changkâng tlatin an hria a. Hei hi a chhan bulpui ber chu nu leh paten kan fate rilru
kan tihkhawloh vang a ni.

English medium-ah kaltirin, Mizo tawng an thiam loh pawhin english an thiam chuan kan lâwm tâwk
a. Mizo thawnthu aiin sâp thawnthu kan ngaihsantir a. A tawpah chuan kan fate hian Mizona
thinlung an nei lo tial tial leh si a. Chutah chuan nu leh pate chuan, ‘Engmah hre lo, hnam thil pawh
hre lo, aia upa zah nachang pawh hre lo’ tiin kan sawisêl leh ta mek!

Nu leh pa, mahni fate hriat tura Mizo thawnthu chhiarsak thin hi engzât tak awm ang i maw!? Kan
faten an hriat theih nana zirtir tur khawp Mizo hla thiam nu leh pa hi engzât nge awm ang i!? A thiam
zingah pawh zirtir peih engzât nge awm ang i!?

Hnam lungphùm hi thil dang a awm vak lo. Kan thawnthu te, kan thu leh hla te hi a ni mai. A hranpaa
intih Mizo viau a, incheina leh tihdan tharthawh vêl ai hian, kan hla mawi tak tak thiam te, kan
thawnthu hriat te hi kan hnam lungphùm innghahna atan a nghet zâwk a ni.

Lehkhabu chhiar peih kan awm ta mang lo. Chhiar peih turin nu leh pain kan zir bawk si lo. Fate
entawn tura lehkhabu chhiar thin nu leh pa hi Mizoram-ah hian engzât nge awm ang aw!? Lehkhabu
kan chhiar peih tawh loh chinah hian thil tak tak hriatna leh mi tak tak ni tura invawn leh inzirna
lamah hian kan tlahniam ta deuh em tih te hi i ngaihtuah ngai em?

Hla lehlin chu mawi ta zâwk riauva hriatna kan neih a, kan Mizo hla phuahtute hla phuah, Mizo ril
rem ngei mai aia sâp hla leh hla dang changkâng ta riauva hriatna hian kan hnam lungphum hi a sawi
nghîng tih kan ngaihtuah ngai em?

Choâk-in Arawn emaw a intih tlat a, a ngaihtuahna pawh a Choâk tawh loh chuan chu Choâk chu a
ral a ni mai lo’m ni?

Kan hnam damna tura tih tur tam tak zingah - Mizo thu leh hlaa kir leh hi pawimawh tak pakhat a ni
ngei ang.
En ta che u - kan zai thiam leh hla phuah basa ngam pakhat chuan a rin dan danin hla a phuah tâk
vak hi! Heti êm êm hi chu a ni êm êm tur a ni lo a ni!

Thlohpui rorelin, bu i lêt hial teh ang u khai. Zonun zia chawi san te kan ti a, kan chawi san tur ber
pawh kan hre tawh si lo! Kan khawlo zo mai dawn e!

- Hriatpuia Pa Kolasib