HNAM HMASAWN TURA MITIN MAMAWH

- Samuel Lalmalsawma Sailo

"Fool me once, shame on you. Fool me twice shame on me" tih hi a awmzia
chu kan man nghal thuak vek awm e. ‘’Vawi khat pawh min bum chuan I
zak lo hle tihna ani anga, mahse vawi hnih min bum theih erawh chuan
keimah hi zak zawk tur ka ni’’ tih lam sawina ani. A awmzia takah chuan,
bum nawn theih a awm kha thil zialo tak ani reng ani. Democracy ram kan
ni a, ram hruaitu leh hruaitu dang pawh kan thlang thin. Hmanni lawkah
pawh kan ram hruaitu kan thlang a nih kha. Kan thlan hnuah mipui te
bawk hian kan sawisel leh thin a, an thutiam ah an ding lo te pawh kan ti
thin a, bum niah kan inngai thin. Sorkarin manifesto leh policy tha tak tak
pawh duang mahse, kan hriatthiam loh vang leh kan thlir thui thiam loh
vangin an nih tur ang an ni phalo fo. A chunga sap thufing ang khian, bum
reng theih a mipui kan awm chuan a thiamlo zawk chu mipui kan nih mai
hmel. Politician an ni a, an theih angin ram that dan tur an ngaihtuah
bakah, an tlin zel dan tur pawh an ngaihtuah ang. Amaherawhchu, mipui
ten thil tha zawk leh tluan tling zawk tur kan hriat si loh chuan, kan
hriatthiam tawk lekin an in zawrh a ngai thin reng a. A tha zawnga
hruaitute nawr kal tur leh kan thatna tur zawk hre tur chuan kan in zir a,
kan in chhiar zau a ngai a, policy tha deuh pawh rawn pharh se, kan
hrethiam pha lo chu ani deuh der mai thin ani.

Hnam fing leh upa zawk tih takah, sap ho nge nge kan ti leh thin ani ber a.
An thufing chhak chhuah te hi a dik thin bakah a ril em em thin a. Lehkha
chhiar zau leh inzir peih ten thufing tha tak an han phuah chhuah hi chuan
awmzia an neih that em em bakah, depth ti mai ila, awmzia ril tak an nei
thin. Bible thufing ang chiah chu ni pha lo mahse, Bible thufing atanga
chhuak awm tak tak ani fur mai thin. Tunlai khawvel mi hlawhtling te , Bill
Gates, Elon Musk, Mark Zuckerberg, Jack Ma leh Jeff Bezos te pawh hian
lehkhabu tha an chhiar nasat zia hriat tur a tam hle mai. Bill Gates phei
chuan mi chhiar ve atan a duh, recommended books a tichhuak thin lehnghal.
Heng lehkhabu tha te hian Bible chang eng enge maw behchhan hi an nei
duh viau lehnghal. Kan tawn ve phak loh te leh thil harsa an lo pumpelh
tawh dan thlengin an ziak thin. Ziaktu ropui tak tak kawm ve pha lo mah
ila, an thuziah atangin kan kawm ve phak thei a, an ngaihtuahna leh tawn
hriatte kan tawm pui theihna tha ber leh awlsam ber chu an thuziak chhiar
hi ani.

Mizo mipuiten hmasawn tura kan tih makmawh chu lehkhabu tha chhiar
hi a ni ta ber maiin a hriat. Fiction hi chu thawnthu bu aia chung deuhah
han dah ta ila, chu ai maha that zawk hmel chu non-fiction chhiar tam hi
anih a rinawm. Kan ngaihdan pawmpui sa kher loh pawh han chhiar ila,
”Alo ni thei ngei mai a” han tih tur hi a tam thin hle. Chuvang chuan
lehkhabu tha chhiar hi in tihhmuh atana tha ber te zing ami ani a,
hmasawn tur a ke penna pawimawh tak ani bawk. Han chhiar han chhiar
ila, thu tha tak tak leh ropui tak tak te pawh hi Bible ah ngei hian tawi fel
tak hian alo inkhaikhawm fel leh et zel a. Hei hian, Bible hi lehkhabu tha,
finna leh hriatna zawng zawng chunga awm anih zia ati lang chiang thin
bawk ani.

Isua Krista naupan lai chanchin hi ziak a tam vak lo anih hmel a.
Jerusalem a Kalhlen Kut an kal tuma a nu leh pa ten an zawn thuah khan,
'...zirtirtute zinga thua an thu lo ngaithlaa lo zawtin an hmu ta a. Tin, a thu hria
apiang chuan a hriatzia leh a chhanzia chu mak an ti hle a.' (Luka 2:46,47) tiin
kan hmu anih kha. A naupan tet lai pawh khian a hriatzia sawi lan ani
tawh a, tichuan hun a kal zel a, kum 30 anih bawr velah rawng a bawl tan
anih kha. Heti khawp a thu nung leh thu tha hril tur hian, mihring ang tho
a piang leh seilian ni si ah chuan, nasa taka in zir bakah, chhiar zau hle a
mamawh a rinawm. Tehkhin thu hriat awlsam tak tak hmanga thu ril tak
tak leh awmze nei tak tak a hrilhfiah thin khan a ngaihtuahna zau zia leh
thiam zia pawh a tilang reng ani. Chuvang chuan, he ze tha tak mai, in
chhiar zauna hian bul tan tha thei ila a duhawm em em ani.

Mizo mipui te pawh hi in chhiarin, in zir zel peih ila chuan hma
kan sawn nasat hle a rinawm. Tunah rih hi chuan common sense (a tla
chawpa remhriatna) hmangin I ti mai teh ang, tlachawp dinhmun a tha ber
a kan ngaih angin kan kal zel a ang thin. Chhia leh tha hriatna ringawt
hmanga rorel tam takte hi chuan kum tam a daih lo zel zawng anih hmel.
Thui thlir thiam tur chuan kan hmaa mi ten engtin nge an lo tih tawh, eng
angin nge hetiang buaina hi an lo hmachhawn tawh tih hi kan inchhiar
zauna atanga hriat chi a nih hmel hle bawk a. Kum za chuang Kristian-a
kan inchhal hnu pawhin kan la intodelh lo a, sualna hrang hrang leh
rinawm lohna ten bu an la khuar nghet hle. Kan hnam kal hmang fuh lo
leh her rem ngai tam tak a awm anih hmel a, heng fu lo leh her rem ngai te
hrechhuak tur pawhin, kan in zira, kan inchhiar zau a pawimawh em em
bawk ani.

Chutichuan, heng zawng zawngin a chawh tak ber chu lehkhabu tha
chhiar hnem ani mai hian a hriat a. Amaherawhchu, chhiar mai a tawk tlat
loa, a taka kan tih a, kan nunpui ngei a ngai zawk dawn alo ni a. Kristian
Thalai pawla tel zawng te hi Bible thu rawn reng chungin, kan
ngaihtuahna tizau turin chhiar zau deuh deuh ila, kan ram hi Kristian ram
hmasawn chak leh entawn tlak takah kan chhuah theih ngei a beisei awm
ani.