1

Shakawn Kungdawn Ai Lam Sut Nga Ai

Shakawn Kungdawn 147:1 “Yehowa hpe shakawn kungdawn mu. Kaning rai nme law,
anhte a Karai Kasang hpe mahkawn mangoi na mai kaja nga ai; Dai gaw ngwi pyaw ai lam
rai nga ai. Shakawn Kungdawn ai lam sut nga ai”.
Ga hpaw: Chyum laika hta, Karai Kasang hpe shakawn kungdawn ai ngu ai gaw, hkungga la
ra Karai Kasang hpe shagrau ai, Karai Kasang a hpung shingkang hte mai kaja ai lam ni hpe
sakse hkam ai lam re. Dai majaw, Shakawn kungdawn ai lam gaw, Karai Kasang a mam hta
mai kaja dik ai hkungga nawng jau ai lam rai mali ai.
(1) Hpa majaw Karai Kasang hpe shakawn kungdawn ra a ta?: Karai Kasang a hpung
shingkang arawng sadang hte mai kaja ai lam gaw kaga hpa hte mung n bung ai sha galu kaba
dik ai wa re ai majaw re. Hpa hte mung shadawn n dang hkra, hpung shingkang hku mung,
myit chye myit chyang hku mung, arawng sadang hku mung, tsaw ra myit hku mung, matsan
dum lama ai lam hta mung, shaman chyeju jaw ai hta mung galu kaba dik ai wa re ai majaw
re. Kaga mungkan a hpara ni hte n bung ai, nga yawng danghta hpe hpan da ai wa, hpan da ai
mungkan hpe yu lahku bau sin makawp maga nga ai wa, nga yawng danghta a madu, chyeju
madu asak daju re ngu ai hpe kam sham ai majaw, shinggyim masha ni aten shagu hta Karai
Kasang hpe shakawn kungdawn ai re.
(2) Karai Kasang gaw mai kaja dik ai wa re ai majaw shakawn kungdawn ra ai re:
Karai Kasang hpe nawku kam sham ai ni, tinang a asak hkrung lam hta Karai Kasang a mai
kaja ai chyeju ni hpe hkam la, hkam sha lu ga ai majaw shakawn kungdan ra ai re. Karai
Kasang a bau sin makawp maga ai chyeju sali wunli hta shim lum ai hku hkrung nga lu ai,
yubak a shabrai si ai kaw na lawt lu ai, dinghta sak hkrung lam hte htawm hpang prat sak
hkrung lam ting a matu pahkam lu ai sak hkrung lam lu la ai majaw, Karai Kasang gaw mai
kaja nga ai ngu ai sakse lu la ai majaw, shakawn kungdawn ra ai lam re.
Shinggyim masha lu la ai sakse gaw, dai ni asak hkrung nga lu ai nan Karai Kasang a
chyeju re, ngu ai hpe dum dat ai hte rau, chyeju dum ai lam hpe myit masin hte hpaw shadan
dan mayu wa ai, n- gup aga hku nna, mahkawn mangwi ai hku nna, sat lawat hku nna, asak
hkrung lam ting hku nna, shakawn kungdawn wa ai re.
Bai Yesu gaw, chyeju hte hpring ai wa re. Shi a sadi sahka hte chyeju gaw, htani
htana anga nga ai. Moi prat, ya na prat, htawm hpang prat agrin nga ai. Moi na ji woi jiwa ni
hpe sakse madun ai sakse, dai ni anhte kaw mung hkam la lu shangun nga ai. Htawm hpang
na ni mung hkam la lu na re ngu ai hpe myit dum ai shaloi chyeju dum wa ai hte, Karai
Kasang hpe shakawn kungdawn ai hkungga nawng wa ai re.
(3) Gara HKu Shakawn kungdawn na: Krai Kasang gaw myit masin hpe ahkyak dik hku
yu ai Karai re. Dai rai nna, chyeju dum chye ai myit masin hte kabu gara Karai Kasang hpe
shakawn kungdawn ra ai. Hkrang shala ai ladat hku nna gaw, makhkawn yu ngwi hku nna,
madum sumpyi ni hku nna, asak hkrung lam hku nna, hkrang shapraw sak hkrung lam hpe
gaw gap sa wa ai lam ni hku nna shakawn ai, ngu nna chyum laika hta ladat amyu myu mu lu
ga ai. Gara ladat hku hkrang shapraw nna shakawn kawn, shakawn ai lam gaw myit masin
kaw nna rai ra ai; kabu gara ai lam hte rai ra ai; Karai Kasang a hpung shingkang n pu sit
shang let Karai a man hta shakawn kungdawn ai lam rai ra ai; Karai Kasang hta myit mada
shara hte sak hkrung lu ai kaw shakawn kungdawn ai lam rai ra ai; Karai Kasang a hpung
shingkang dan hkung na matu shakawn kungdawn ai lam rai ra ai.
(4) Shakawn Kungdawn Ai A Chyeju Akyu Ara Hpa Baw Rai Na Rai Ta?: Shakawn
Kungdawn 50:23 hta “shakawn kungdawn hkunga jaw ai wa gaw, nye a arawng shapraw ai
wa re” ngu tsun ai re. Dai majaw, shakawn kungdawn hkungga jaw nga ai wa (sh) shakawn
 2

kungdawn nga ai wa gaw, Karai Kasang a daru magam hpung shingkang hpe shadan
shadawng nga ai wa re. Dai rai nna, shakawn kungdawn nga ai wa lu la ai akyu ara langai
gaw, Karai Kasang a arawng sadang hpe shadan shadawng lu ai wa tai lu ai chyeju re.
Bai nna “shi hkan sa ai lam yawng yaw yu ai wa hpe Karai Kasang a hkye hkrang la
ai lam ngai madun na we ai” ngu tsun ai re. Tinang a asak hkrung lam ma hkra hpe Karai
Kasang gara hku lakawn wa nga nga ai ngu ai hpe galoi mung myit sumru yu nna, dai myit
sumru la lu ai hpe asak hkrung lam hku nna, hkrang shapraw asak hkrung ai. Dai zawn asak
hkrung ai ni hpe Karai Kasang gaw hkye la ai chyeju kahtap jaw na. Yu maya shinggyim
masha ni n lu la ai asak hkrung lam de, Karai Kasang lakawn wa na re. Ya lu la da sai
Hkristan asak hkrung lam hta grau nna, Yesu Hkristu hte bung pre ai asak hkrung lam de woi
lakawn wa na re. Mi moi de n lu la yu shi ai chyeju ni madu la lu ai asak hkrung lam de anhte
hpe woi lakawn wa na re. Yesu baw tai ai asak hkrung lam hta lam shagu hta rawt jat galu
kaba wa ai shinggyim masha ni, shinggyim amyu ni anhte tai wa na re.

Ga Hpungdim: Karai Kasang gaw shakawn kungdawn hkungga jaw ai wa hpe sharawng
awng ai, Karai re. Shakawn kungdawn ai ni yawng, Kaman lila shakawn kau ai n re ai sha,
tinang a myit masin kraw lawang ma hkra hte Karai Kasang hpe shakawn kungdawn jang, dai
ni shinggyim masha ni hku nna myit yu yang, ja gumhpraw hku, hpaji degree hku, arawng
sadang hku n lu la mai ai, Karai Kasang jaw ya yang chyu sha hkam la lu mai ai (i) Karai
Kasang a hpung shingkang shadan shadawng lu ai ni (ii) Karai Kasang a chyeju daju tai lu ai
ni (iii) masha ni hpe Karai Kasang a mau hpa chyeju lam tsun dan lu ai ni sha n rai; Karai
Kasang a chyeju hta asak hkrung lu ai shinggyim masha ni tai lu na de woi lakawn lu ai
sasana sara ni tai lu ai ni (iv) Karai Kasang a chyeju hpe ginlen jaw lu ai masha/ amyu ni
anhte tai nga lu la ga ai law. To God Be The Glory!

Lahpai Awng Li (Ph.D)

Professor, MIT.