“Pakkio’ Bunting” (versi pendek):

============================
Ia dende'.. ia dende..
Nia' tojengmi daeng bunting
Bunting salloa kutayang, salloa kuantalai
Nampako ri ujung bori', ri cappa' pa'rasangangku
Na kupanragiangko berasa' ri mangko' kebo'
Ku pammueang rappo ri palakko’
Ku pannaroangko pole, kalomping ri talang bulaeng
Kutongko' intang, kubelo-belo jamarro'

Bunting manai' mako mae

Ri Balla'na matoannu, matoang kamase-masenu
Ipara' kasiasinu, sari'battang matunanu
Sikatutuiko tope daeng bunting
Numasassa' mole-mole
Tenamo antu, parekanna maloloa
Nai' ngaseng maki mae..!
***

“Pakkio’ Bunting” (versi agak panjang):

=================================
Iya dende… iya dende… nia tojemmi daeng bunting
bunting salloa nitayang, sallowa niminasai
kukanroa ri nabbiya kupalaka ri batarayya

Nampaki riujung boritta daeng bunting, ri cappa parallakkengku

naku kella kellaki guru, kukellainta sunggu ri kaisilangnganga

Naruppaiki jama’ daeng bunting, nabuntuliki’ agama

naku erang maki antama’ ri dallekanna tuka’ ballakku
nianrongia kayu bang, nicoccorangia kama’
nibaringanga doangang patampulo.

Naku panai’ tommaki poeng daeng bunting, ri paladang atehaya

ni rinring pangngompo’, ni dego dego rokko’ nijajariya samiallah.

Naku paonjo’ tommaki pole daeng bunting,

dasere’ nijaling sujju’, nialanroi empo tahiya’
naku sungkeang tommaki pole daeng bunting
pakkebbu’ nibarisallang

Naki tulusu’mo nai’ mammempo daeng bunting

nammempo tommo pole daeng bunting, anak guru mangngajita
na’lonjo’ sulengkamo pole daeng bunting, anak guru sarapatta

Sallo salloki ammempo daeng bunting

nia’ tommi daeng ngimang, niwakkelanga appa’nikka
ana’ ana’na tumakkayya, cucunna tu madinaya
tau lannyinga ri junnu’, tangkasaka ri satinja
tau assayya gau’na nitarimayya pappala’na

Jari nakanamo sabbina, kalabini malabbiritta daeng bunting

lani nikkamaki’ anne daeng bunting, ri dallekanna adaka
tumannappukia ada’ gallarrang tumabbicaranta

Jari lebbakki’ ninikka daeng bunting

nierang maki’ antama’, ampabattui nikkata
ri bili’ kaisilangnganga ri kasoro’ isilang
ri pa’lungang sunduseng ri tappere’ waistabaraking
ri timbao mata bulang, pakkalli’ mata bintoeng

Tappa kicini’mamo ilalang daeng bunting

baine anrong anatta kalabini malabbiritta
sangkontu sanrapang mami iya daeng bunting
anak bidadariyya, naroko’ pakeang nalimpo passarimanang

Appalampa kelommami bunting baineya

nakana kelonna…oh daeng, sungguma anne ri itungku
te’nemi pa’maikku, kugappa tommi lebanga ri minasangku…

Nakana pole kelonna bainea…

oh daeng, sikatutuiki tope kisipakainga’ mole mole
tenamo anne parekanna maloloa…

Nakana tossing kelonna bunting bura’nea…

oh andi’, bulaennako atingku intannako pa’maikku
belo belonako nyawaku parammatanako matangku
manna batara andi’ malla’ ngaseng mallaggasi.

Nakana pole bunting bura’nea…

bosi timurung dinging palate la’lakanna sunniaya
gau’ ri Ali pangngssengang ri Fatimah

Naki kanang tommo pole daeng bunting

nikka bateng, ma’nassana katojenganta nikanaya isilang
Kitinro sampappa’mamo sallang daeng bunting
naki sorong lima gadutta ri kananna ti’ring dada
naki buang ribarambang pa’nakkukanta sossoranta ri nabbiya

Antemami kamma daeng bunting

katurungang nampa nisanda’ labangang
nampa niolo ka tujui nabbi kipare’ oloang
Natamparang pepe’mamo sallang daeng bunting
na biseang taibani
sombala’ kapasa’mamo sallang daeng bunting
nasannampi bombang nataena kekke’na
linopi anging nataena galluru’na

Na kacinikang tommo sallang daeng bunting

kassi’ kebo’na madinah
namammumba tommo sallang daeng bunting
taka’ mangngalialia

Kimabborong borong sarre daeng bunting

ki ma’mana’ unti jawa
sembang katupa’, roliki lappa’ lappatta
pinruang tujuh pintallung tassalapangngi patampulosse’re

Nipa’lamungang tommaki’ sallang daeng bunting

unti te’ne ri dallekang ballatta
kimanai’ kimanaung namate’ne pa’maitta
ikatte sipammanakang

Bunting nai’maki’ mae, ri balla’na matoanta

matoang tuna, ipara’ kamase mase…
***

“Pakkio’ Bunting” (versi panjang):

=============================
Ia dende - ia dende, nia tojemminjo mae
bunting salloa kutayang , salloa kuminasai
bura’ne bura’nena buranea
nampako ri ujung borikku, ri cappa pa’rasanganku
naku ruppaiko cini’, kutimbarangkiko pangngai

Nampako kuasseng nia’, na kuitungko labattu

Ku u’rangi memang, berasa’ ri mangko’ kebo’
Kummata memang, rappo bau’ ri palakko’
Kunnanro memang, kalomping ri talang bulaeng
ku itungko intang, kubelo - belo jamarro’

Intang macora, nasingarri dallekannu

bulaeng tino’ angsuloi paccini’nu
lakukapeangko anne, sumanga’nu mabellayya
lakukiokangko pole, tubunu ‘lampa salayya
Kutannang konne, tope talakka’ ri aya’

Lakka’ tope tamalakakko ikau;

sangkontu sanrapammamako bulang sampuloangappa’
nasusung pale, natinriang wari-wari
wari-wari kapappasang, pale mannuntunga bangngi
nisaelenu kau tamalla’junu nicini’ ma’mole-mole.

Kukio’ daeng jakonjo, kukanro anak karaeng

nutuli manai’mo mae ri balla’na matoannu, rituka’na ipara’nu
matoang tuna, ipara’ kamase-mase
manngonjo tongmakonne tuka’ tallu anronna, patampulo baringanna
manjappa tongko pole, coccorang nita’bu-ta’bu

Nutuli manai’, mannyorong pakke’bu nigiring-giring

Manngonjo tongko dasere’ nijaling kawa’, nialanro bassikalling
Mattete tongko pallangga ri batang rappo
Mannoso’ tongko padongko nitau-tau
nutilimo kalawu’ rawanganna timbaonu
ammempo ri benteng polonnu

A’lapara’ tappere’ bo’dong, anjo’jo’ kairi kanang

mansuro-suro rapannu, mampattuju sangkammannu
naremba-rembako pole, ana’ rara patampulo
nisarimanangko pole, lonrong beru ma’bakka’
benteng polong kansako, kanako benteng
pakkai’-kai’ topena pasikaiki bajunna.

Nai’ manaung tunibarang baranginnu

assuluk antama ata ma’ballak-balla’nu
numa’jarang, numattedong, numa’jangang rassi lerang
nakutumbangangi pole palampang ase berunu
nakatepokangi padongko’ ase toanu

Tamanraikko ri ambong nukoasa

Takalaukko ri Jawa nakulumannyang
tamakbotorokko numammeta
assare-sareko sallang ri matoang kasiasi
appiturummako pole, ri ipara’ kamase-mase
nai’ tuannu, sa’la’ dasere’ dalle’nu
kuminasaijakonjo sunggu, kutinjakiko matekne

Nusunggu tojeng, numate’ne tojeng todong

La’bu bannang ri jawa, mala’buang umuru’nu
Luara’ tamparang, luaranngang nawa-nawanu
tinggi Bawakaraeng, matinggiampa tuannu
le’ba’ gentung tinbaonu, le’ba’ tantang pakkallikku

Timbao nikida-kida pakalli’ niura’ tallu

Le’ba’ basami ba’ra’nu, le’ba’ gusu’ langiriknu
tattanngi pole, capparu pa’minyakannu
nutulimo antama’ ri bili’ kammayya liku
kammayya kallanngang rapa’
mannosok badang, mannimba’ bangkeng paciko.

Nukana-kanami sallang saraka ri pamminangang

Tappau’-pau’mi pole bunga-bunga ri katingroannu
nusipoke-poke genre, nusita’ba’ rappo toa
nusipattoa-toai, nusipa’loa-loai, nusipacammo-cammoi
sitanro takkang, sibuccu’ pa’dengka-dengka

Lino-linopi anging, pakkeke mappasisa’la’

Numammana’-mana’ sarre, numa’borong unti jawa
pinruang tuju, pintallung tassalapangi
manai’ngasemmi mae angrong guru ningainu
gallarang nipanggalikinnu, kapala nipaemponu

Battungasemmi pole, bija pammanakannu,

bella-bella ambani-bani, ca’di-ca’di, lompo-lompo
ana’-ana’ tau toa, nipanai’mako ri pangka-pangka bulaeng
nipaempomako ri tappere’ paramadani
baji’ nangai Nabbi, napaujia Allah Ta’ala

Sipokok bu’ne tantanna je’ne’ matannu

Sipoko’ camba pammatti’na iloro’nu
Kupattannangang makonne, anggoro’ ri kantironnu
Kupa’lumangangko pole, lemo tanning ri dolangang
nakacinnai somba, napammattikang iloro’ bate salapang
Bunting nilekkako paleng tunipalele bellokang
Nierang ri bori maraeng, pa’rasangang nampa nuonjo’
bori’ nampa nula’baki, nukamma todong jonga
mattoa ri sampa’ manngayyanngang tunimalo

- Nakana Kelonna Daeng Bunting Bura’nea:

“nampa a’lampa ri ballakku, naku joli pakkebukku,
naku gulung tapperekku, naku a’nia’ ri lalang pa’mai,
barang nasarea sikalabine, dalle Karaeng Allah Ta’ala
ku lingka lammantang puli, ri borong-borong pa’daserang,
dalle nipajului battu ri Allah Ta’ala.”

- Nakana Kelonna Daeng Bunting Bainea:

“Takunjunga sallo lolo, karunrung balu baine,
tammamonea tope taero’na tau toaku.”

- Nakana Pole Kelonna Daeng Bunting Bura’nea :

“kadde’ kucini’ Batara, kudupai allo-allo
najo’jokangku lebanga ri pa’maikku.”

- Nakana Kelonna Daeng Bunting Bainea:

“kadde’ nania’ erokku, tea saju’ ri sa’bea,
tea salasa ri baju moncong buloa.”

- Nakana Pole Daeng Buting Bura’nea:

“nampako maccu’la’ lebong, nakurompong-rompong memang,
lompoko naik, kutambai pa’rompongku.”

- Nakana kelonna Daeng Bunting Bainea:

“Apa kicini’ ri nakke, nakke leleng nake kodi,
nakke karo’ba’, nakke caddi simbolengku”

- Nakana Pole Daeng Bunting Bura’nea:

“mannu le’leng mannu kodi, mannu caddi simbolennu,
titti’ matangku, kala’busang panngaingku.”

- Nakana Tosseng Kelonna Daeng Bunting Bainea:

“Sikatutuiki tope, manna ni sassa’ ma’mole-mole
tenamontu parekanna maloloa, manna nupake
pangngasengang “lolo mapulanayya”
Naik ngaseng maki mae…

Doangang Punna La Naungko Ri Butta

================================
 I kau Butta kuonjo'
Palewanga' Tallasakku
Eranga' mange
Ri Kaminang Mate'nea
Doa Ketika Akan Menjejakkan Kaki Ditanah Rantau

(Wahai tanah yang aku injak

Luruskanlah jalan hidupku
Bawalah aku
ketempat yang paling baik)

Doangang Punna A'jappa

=====================
Bunga ribireang kukangkang
Bunga bulang kusoeang
Bunga ni ngaia ri lino
i nakke ngaseng pata
saba' Allahu Ta'ala

(Bunga biraeang yang ku genggam

Bunga bulan yang kuayunkan
Bunga yang disukai didunia
Saya semua yang punya
Karena Allah semata)

Doangang Punna Lattinro

=====================
Kupantinromi tubuku
kukalimbu' sahada'ku
Patampulo malaeka'
Anjagaia' i lalang tinro
Saba' Allahu Ta'ala

(Saya sudah menidurkan tubuh saya

dengan berselimut syahadat
Empat puluh malaikat
yang menjagaku didalam tidur
Karena Allah semata)

Doangang Punna Ambangung Tinro

==============================
Kukangkangmi anne linoa
Kupasapu ri rupangku
Kuerang kale
Butta salama' kuonjo'
Lanri Allahu Ta'ala

(Dunia ini sudah kugenggam

Sudah kuusapkan keseluruh tubuhku
Aku membawa diriku
Menginjak tanah yang selamat
Karena Allah semata)

Doangang Sollana Ni Kamaseangko

==============================
I nakke minne Ana' I lalang mate'ne
Napinawanga' pammuji
Ata - Karaeng
Mammuji Mangngamaseang aseng ri nakke
Barakka' La Ilaha Illallah

(Saya adalah anak yang berbahagia

Yang selalu diikuti oleh pujian
Baik hamba maupun raja
Semua mengasihi dan menyayangi saya
Berkah Allah semata)

Doangang Pa'bongka Setang

========================
Kau setang kau longga'
Pali'-palili kalennu
Lammaloi yukkung
Baja' bassia
Panggala-gala Buttayya
Hu.. Kumpayakum

(Kau setan kau tinggi

Singkirkan dirimu
Yukkung akan lewat
Baja besi
Benguat tanah
Jadilah, maka jadilah)

Doangang Parampa' Nassu

=======================
Limbu'bu'jintu pa'mai'nu
Bombangjintu nassunu
Kulappa' na kuonjokang
Tamammoterang

(Perasaanmu itu hanya debu

Marahmu hanya ombak
Akan kulipat dan kuinjak
Sampai tidak kembali)

ARU TUBARANI I
Ata karaeng
Tabe’ kipammopporang mama’
Ri dallekang labbiritta
ri sa’ri karatuanta ri empoang matinggita

Inakke mine karaeng

Lambara’ tatassa’la’na Gowa
Nakareppekangi sallang karaeng
Panngulu ri barugayya
Nakatepokangi sallang karaeng
Pasorang attannga parang

Inai-inaimo sallang karaeng

Tamappattojengi tojenga
Tamappiadaki adaka
Kusalagai sirinna kuisara parallakkenna
Berangja kunipatebba pangkulu’ kunisoeyang

Ikau anging karaeng naikambe leko’ kayu

Mirikko anging namarunang leko’ kayu
Iya sani madidiyaji nurunang
Ikau je’ne’ karaeng naikambe batang mammayu
Solongko je’ne’ namammayu batang kayu
Iya sani sompo bonangpi kianyu

Ikau jarung karaeng naikambe bannang panjai’

Ta’leko jarung namminawang bannang panjai’
Iya sani lambusuppi nakontu tojeng

Makkanamamaki mae karaeng

naikambe mappa’jari
Mannyabbu’ mamaki karaeng
naikambe mappa’rupa

Punna sallang takammaya

aruku ri dallekanta’
Pangkai jerakku tinra’ bate onjokku
Pauwang ana’ ri boko pasang ana’ tanjari
Tumakkanayya karaeng natanarupai janjinna

Sikammajinne aruku ri dallekanta

Dasi nadasi nana tarima panngaruku
Salama’…
***

ARU TUBARANI II
Tabe kipammoporang mama’ karaeng
Ridallekang malabbiritta
Risa’ri karatuanta riempoang matinggita

Tojeng… tojeng-tojeng karaeng

Inakke mine karaeng ata mattojeng-tojengta
Appau mamaki karaeng naikambe mappa’jari
Anjo’jo’mamaki karaeng naikambe mappa’rupa

Tojeng… tojeng-tojeng karaeng

Inai-nai mami sallang karaeng
Lampa teteki riada’
lampa onjokki ri kontu tojeng
Kupannepokangi sallang balembeng ri barugaya

Tojeng… tojeng-tojeng karaeng

Ikattemi antu karaeng
Minasa allo banngiku
panrannuang masungguku
Ikatte anging karaeng naikambe leko’ kayu
Ammirikko anging namarunang leko’ kayu
Ikatte je’ne karaeng naikambe batang mammayu
Solongko je’ne namammayu batang kayu
Ikatte jarung karaeng na ikambe bannang panjai’
Anta’leko jarung namamminawang bannang panjai’

Tojeng… tojeng-tojeng karaeng

Punna sallang takammaya aruku ridallekanta
Pangkai jerakku tinraki bate onjokku
Pauangi ana’ riboko pasangi ana’ tanjari
Tumakkanayya karaeng tana rupai janjinna
Dasi na dasi nakitarimai panngaruku
***

ARU TUBARANI III

Cini-cini mami sallang karaeng
Buleng-bulengna mangasa
Jangang tani pakkurua
Bukkuru’ tani kadoa

Iya-iyannamo sallang karaeng

Rewanngang na inakke
Tampa tetea ri ada’
Kupolong tallu pokeku attannga parang
Kupolong appaki selekku a’bangkeng romang

Iya-iyanamo sallang karaeng

Rewanngang na inakke
Iya-iyannamo sallang karaeng
Baraniyanngang na inakke
Sekre lipa’ kuruwai warakkanna Parangtambung
Sekre lipa’ kuruwai timboranna Bulussari

Nani cini bura’nena bura’neya

Tanrinna tau lolowa
Dampenna ana’ raraya
Tena jail kawang tana katto
Benteng tannga tana ambi’
Tena todong bili’ tanna pantamai

Kamma tommama sallang karaeng

Layang-layang nionjong attannga parang
Nari’bakkang ana’ ratite
Nalollong ana’ mariang
Nampa kukana sallang karaeng
Inakke minne buleng-bulengna Mangasa
***