ENERO 1, 2021– BIYERNES

Oktaba sa Pagkatawo sa Ginoo

PANGILIN NI SANTA MARIA NGA INAHAN SA DIOS

Solemnidad

World Day of Peace

Sa pinakaunang adlaw sa tuig atong gisaulog ang pangilin sa Inahan sa Dios, ang Mahal nga Birhen
Maria. Pinaagi niini, gitudloan kita sa Simbahan nga aduna kitay Inahang Langitnon nga mopangga, mo-
amoma ug mobantay kanato. Sa kalipay ug kasakit, si Maria anaa uban kanato. Kon kita maluya, masubo
ug mahadlok, sangpiton nato ang Mahal nga Birhen kay siya man ang gitahasan sa Dios nga mahimo
natong inahan ug manlalaban.

Sa pagsaulog ning solemnidad, gitudloan usab kita sa paghimo kang Maria nga modelo sa atong kinabuhi
matag adlaw sa tibuok nga tuig. Gitawag kita nga mahisama kang Maria sa iyang pagkamasinugtanon sa
Dios, pagkamaampoon, pagkamapaubsanon, pagkasimple, pagkamahigugmaon ug pagkamaalagaron.
Ning modernong panahon, kanus-a ang mga tawo gidani sa kalibotanong panghunahuna, kagustohan,
ug mga butang, si Maria maoy nindot nga pahimangno nga ang tinuod nga kalipay makaplagan dili sa
kalibotanong kahilayan kondili diha sa pagtuman sa kabubut-on sa Dios.

Ang bag-ong tuig maghatag kanato og kahigayonan sa paghimo og bag-ong sinugdanan. Kini ang
magdasig sa mga tawo sa paghimo og mga panaad (New Year’s Resolutions) aron maghimo’g kabag-
ohan sa kinabuhi. Ug hinaot unta nga ato kining tumanon aron kita mausab ngadto sa kaayo, kabuotan
ug katarong.

Si Pope Francis adunay listahan sa mga New Year’s Resolution nga angay natong sundon ug buhaton.
Kini ang mosunod:

1. Ayaw panglibak.

2. Ayaw usiki ang pagkaon.

3. Hatagi og panahon ug pagtagad ang uban.

4. Pili-a ang simple nga palaliton.

5. Duola, ubani ug tabangi ang mga kabos.

6. Hunonga ang paghukom sa isigkaingon.

7. Higalaa ug respetoha ang mga tawo nga adunay lahi nga hunahuna ug pagbati.
8. Paghimo og pagtahan sa kinabuhi, sama sa kaminyoon.

9. Himoong batasan ang pag-ampo ug pagpangayo og tabang ngadto sa Dios.

10. Pagmalipayon subay sa kalipay sa ebanghelyo

Ang pag-usab sa kaugalingon dili sayon nga buhaton. Adunay panultihon, “Bad habits die hard.” Apan,
bisan malisod, dili kini imposible tungod kay aduna may Dios nga motabang kanato sa pagbuntog sa
atong mga kahuyang. Sa iyang sulat sa taga Galacia, si San Pablo nagpahinumdum: “Gipadala sa Dios ang
Espiritu sa iyang Anak nganhi sa atong kasingkasing . . . Busa dili na kamo ulipon kondili mga anak na.”
Pinaagi sa mga sakramento, madawat nato gikan kang Kristo ang grasya nga makapausab ug makasantos
sa atong kinabuhi.

Sa pagsugod ning bag-ong tuig, atong bati-on ang panalangin gikan sa basahon sa Numeros:

“Panalanginan ug bantayan unta kamo sa Ginoo! Magmaluluy-on ug magmahinatagon unta siya

kaninyo! Kahimut-an unta kamo sa Ginoo ug hatagan kamog kalinaw!” Amen.

Bishop Abet Uy

PASIUNA

Malipayon ug Malinawong Bag-ong Tuig kanatong tanan!

Sa atong pagsugod sa bag-ong tuig kinahanglan nato ang kalinaw sa atong kasing-kasing, sa matag
pamilya, sa atong nasud og sa tibuok kalibutan. Apan sayod kita nga magmalahutayon lamang kini kung
magmatinumanon kita sa mga mando sa Ginoo sama sa gibuhat ni Birhen Maria.

Busa karong adlawa, atong pasidunggan ang atong Mahal nga Inahan, si Birhen Maria, isip Inahan sa
Dios. Hinaut nga pinaagi sa iyang panig-ingnan, mahanaw ang panagbingkil, nga ang paghigugma-ay ug
kalinaw mao ang maghari dinhi niining kalibutan.

Unang Pagbasa Nm. 6: 22-27

Atong madungog karon nga ang Dios mao ang Hari sa kalinaw nga maoy mububo kanato sa tanang
grasya nga atong gikinahanglan.
ANG PAGBASA GIKAN SA BASAHON SA NUMEROS (Nm. 6.22-27)

Ang GINOO miingon kang Moises, “Ingna si Aaron ug ang iyang mga anak nga ingnon ninyo niini
pagpanalangin ang mga Israelita:” “Panalanginan ug bantayan unta kamo sa GINOO!” “Magmaluluy-on
ug magmahinatagon unta siya kaninyo!” “Kahimut-an unta kamo sa GINOO ug hatagan kamo’g kalinaw!”
Ug miingon ang GINOO, “Kon ilang ibungat ang akong ngalan agi’g panalangin alang sa katawhan sa
Israel, panalanginan ko sila.”

ANG PULONG SA GINOO.

SALAMAT SA DIOS.

SALMO RESPONSORYO

(Ps. 67:2-3, 5, 6, 8)

T. Bendisyonan unta kita sa Dios diha sa iyang kaluoy.

Kaloy-an unta kita sa Dios ug bendisyonan kita; ipadan-ag unta kanato ang iyang nawong. Mahibaw-an
unta ang iyang dalan dinhi sa yuta; ug diha sa tanang mga nasod, ang imong kaluwasan.

T. Bendisyonan unta kita sa Dios diha sa iyang kaluoy.

Maglipay unta ang mga nasod ug magsadya kay nagamando ka sa kanasuran diha sa katarong; imong
agakon ang mga nasod dinhi sa yuta.

T. Bendisyonan unta kita sa Dios diha sa iyang kaluoy.

Daygon unta ikaw sa katawhan, O Dios; ang tanang kalungsoran magdayeg unta kanimo! Bendisyonan
unta kita sa Dios, ug sa tanang kautlanan sa yuta mahadlok unta kaniya!

T. Bendisyonan unta kita sa Dios diha sa iyang kaluoy.

Ikaduhang Pagbasa Gal. 4: 4-7

Si Jesus mao ang katumanan sa plano sa Dios. Mianhi siya kanato pinaagi ni Birhen Maria, pinaagi kaniya
natuman ang plano sa Dios sa iyang gitakda nga panahon.

ANG PAGBASA GIKAN SA SULAT NI SAN PABLO NGADTO