Papaano na ang Edukasyon ngayong 2020?

Tuwing buwan ng hunyo, halos lahat ng mga magulang ay nagsisipag handaan na,
inaasikaso lahat ng ating pangangailangan. Bagong papel, notebook, lapis, balpen at bag
nakahanda na bago pa sumapit ang buwan ng hunyo ngunit nagdaan na ang buwan tila mas
problema pa ng marami ay ang kanilang pang araw-araw?. Marami ang nangangamba kung
makakapagpatuloy pa ba, hindi alam kung papaano sasabay sa salitang “new normal”. Wi-Fi,
data, cellphone at laptop mayroon ka ba niyan?. Balita na sa radio, tv at internet na gagamit ng
modular distance learning ang halos lahat sa mga paaralan, masisigurado ba nito ang
pagkatuto ng mga mag-aaral?

Hunyo, ito ang palatandaan ng panibagong pasukan. Noon, halos lahat ng mag-aaral
nanabik makilala kung sino sino ang kanilang bagong kamag-aral. Nanabik ipakita ang
kanilang bagong uniporme, gamit, bag at sapatos na bili ng kanilang mga magulang. Lahat ng
ito’y nagbago ng magkaroon ng pandemya, ni isang bagong lapis, bagong papel, bagong
notebook wala kang matatagpuan. Masisilayan mo ang kalungkutan sa bawat mukha ng mga
mag-aaral. Iba iba ang ating mga pinagdadaanan, baka ang isa sa atin nawalan na ng mahal sa
buhay o hindi alam kung saan kukuha ng pang araw araw. Baka nga isa sa mga magulang nila
ay nawalan na ng trabaho dulot ng paglugi ng mga negosyo sa pandemya. Sino bang
magnanais na mahinto sa pag-aaral ang kanilang mga anak? nangangamba lamang ang lahat
para sa kaniya kaniyang kalusugan dahil sa banta sa ating kapaligiran. Dagdag pa ang
problema kung saan kukuha ng pantustos sa pag-aaral ng kanilang mga anak lalo na kung
hindi lamang iisa at walang trabahong inaasahan.
Isa sa 16 o 1.3 milyong bata sa Pilipinas ang hindi pa rin nakakapag-aral, ayon sa datos
ng Save the Children’s Global Childhood Report noong 2019. Kung noong 2019, 1.3 milyong
bata sa pilipinas ang hindi nakakapag-aral siguradong malaki ang itataas ng bilang nito sa
taong 2020 kung magpapatuloy ang ganitong paghihirap. Papaano masusuportahan ng ibang
mga magulang ang pangangangailangan ng kanilang mga anak kung noon palang ay hirap na
sila sa pagtataguyod rito. Ang ibang mga mag-aaral noon, nagsasariling kayod ng sagayon ay
masuportahan ang kanilang pag-aaral. Sa kanilang murang edad ay kinakailangan nilang
magtrabaho sa umaga o gabi ng sagayon ay may makain at pang-aral. Papaano ang boses ng
mga mahihirap na pamilya, handa ba sila sa edukasyon ng new normal kung ang halaga ng
kanilang pangunahing kagamitan sa pag-aaral ay kulang pa sa kanilang pang araw-araw.

Ayon sa nakapanayam ng Dobol B sa News TV, binanggit ni Albay Representative Joey

Salceda na ang mga datos ay nagpapakita na 17% lamang ng mga mag-aaral na Pilipino ang
may internet access sa bahay habang 3.74% lamang ang may mga sariling cellphone na
maaaring kumonekta sa internet. Idinagdag niya na ilan lamang sa 5% ng mga mag-aaral ang
may access sa internet na sapat para sa mga aktibidad sa pagkatuto sa online. Kung aanalisahin
maliit na bilang ang 5% kung ang mga resources na ito ang gagamitin para sa “new normal”.
Marami ang mahihirapan at nangangambang matigil sa pag-aaral kung sa ganitong paraan
magpapatuloy ang bagong mukha ng edukasyon sa Pilipinas.

Ayon sa report ni bonz.magsambol@rappler.com sa kanyang nakapanayam nasi Aika*,

na guro ng pampublikong paaralam ng elementarya sa Laguna, Mula sa kanyang 42 na mga
mag-aaral noong 2019, 20 lamang ang nagpahayag ng interes sa pag-enrol habang inihayag
ng Department of Education (DepEd) na ang pagbubukas ng klase para sa taon ng paaralan
2020-2021 sa Oktubre 5 ay gagamit ng blended approach sa pag-aaral tulad ng pakikitungo
ng ibang bansa sa pandemya. Ayon kay Aika, ang karamihan sa mga mag-aaral at mga
magulang ay nabanggit ang kanilang mga dahilan sa hindi pagpasok ng paaralan sa Oktubre.
Ang kanilang kawalan ng pag-access sa internet at teknolohiya sa bahay, walang trabaho
upang maibigay para sa pamilya, at kaligtasan - takot na mahawa sa COVID-19. Sinabi pa ni
Aika na ang pag-aaral sa panahong ito ng pandemya ay para lamang sa mga may kakayanan.
"'Yung bills nila tumambak dahil sa lockdown so ang priority nila ay makahanap ng work.
Kung baga sa ngayon hindi nila priority ang edukasyon" dagdag niya.

Sa pangambang ito nakaisip ng paraan ang kagawaran ng edukasyon bilang

pangsuporta sa mga walang kakayanan na makisabay sa blended approach. Ang DepEd ay
magpapatupad ng blended / distance learning, na pinagsasama ang printed at offline na mga
digital modules, online, at pagtuturo sa TV at radyo batay sa pagsisimula ng klase sa Oktubre 5.
Isang paraan pa ng pag-aaral ngayong may pandemya ang modular distance learning. Dito,
ang mga magulang o guardian ang tatayong guro ng bata. Kung saan, linggo lingo sila
pupunta sa eskwelahan para kunin ang printed copy ng mga learning modules. Sa paraan ng
pag-aaral na ito mas pag-iisipan talaga ng mga mag-aaral kung ano gagawin nila dahil ito’y
self-learning. Kaya para sa mga primary levels kinakailangan ng mga ito ang gabay ng mga
magulang o ng kanilang guardian. Ang mga magulang naman na hindi makakapunta sa
eskwelahan hahatiran ng modules ng mga guro. Sa pag-aaral ng mga estudyante malaki ang
magiging papel ng mga magulang at mga kaanak, para naman sa mga estudyanteng parehong
magulang ang nagtatrabaho o di kaya’y walang kakayahan magturo tutulungan sila ng mga
“para-teacher”. Sila ay ang mga volunteered parents na magtatake over kung sakaling walang
magtuturo sa mga bata.

Sakabila ng lahat ng kakulangan nating magpundar maging ng gobyerno gumagawa

parin ng paraan at hakbang ang kagawaran ng edukasyon upang sagayon ay maabot lahat ang
mga estudyante at walang mapag-iwanan. Sabi nga nila, edukasyon ang isa sa mga
pinakamahahalagang maaaring maipasa ng mga magulang sakanilang mga anak. Kahit anong
hirap ang pinagdadaanan ng lahat patuloy parin ang buhay matutong maging matapang,
madiskarte at mapagsumikap sakabila ng problema at bantang ating kinakaharap. Lagi lamang
pakakatandaan na susi ang edukasyon sa bawat pinto ng oportunidad. Kung tayo ay mayroon
nito, magagawa nating buksan ang ating puso at isipan na pagsikapan ang tagumpay na
gustong makamtan. Isa itong hagdan upang maakyat natin ang mga bundok na humaharang
sa ating pagkatagumpay at ito ay isang sandata laban sa lahat ng kahirapan na mararanasan sa
pagkamit ng pangarap. Wala man tayong kakayanan sa ngayon upang ibigay ang
pangangailangan sa pag-aaral magtiwala lamang sa panginoon at may darating na tulong at
biyaya upang lahat ng bata ay makapag-aral at walang mapag iwanan. Nawa’y sanay matapos
na ang banta sa ating kapaligiran ng sagayon ay mabawasan ang problemang pinapasan ng
lahat!