Alima

Kada buntag gajud sa ako pagmata

An ako mahuna-hunaan isa ra,
Na unta jaoy ako lima ka alima.
Tag isa si Gab sanan si Isabella
Isa isab para kay Micayla
Apil rakan sab sa ako bana.

An isa ka alima para sa ako

Kay bagan arang ko na man kahago,
Sin paluma-luma man lagi pagmenyo
Aton kaw kuman sige kaw nagyango-ngo.
Apan dili rakan ko magsuko-suko
Kay an tanan tinujuan man sab nako.

Pero bisan duha ra an ako alima

Sa kahamok trabaho ini nakakaya.
Areglar sa mga anak sanan sa bana
Salamat sab nakahimu pa pag eskwela,
Tungod sa suporta ng Ginoo ug pamilya
An tanan nahimu sa ako duha ka alima.

-sjm

Baro

Umay tagkinahanglan sa tawo,

Para kita maporma sanan mahitso.
 Hamok kwarta sanan gana na baro,
Amu ba ini ang tagkinahanglan nato
Para kita matawag na dato?

Pormado paggawas sa ato bayay

Pero ang pamatasan purya saway,
Dili ganahan permi magkagidlay
Bisan way panhinlo sa panimayay,
Saho sab basta may badlis na ang kilay.

Pagmata tawo kay iton baro nimo,

Bisan unhon pa nimo pagpasigarbo
Isa ra ka pintik sa ato Ginoo,
Mawaya tanan an imu libo-libo
Busa ibana ang Ginoo sa imu pag-asenso.

-sjm

Siki

Hamok dayan ang dapat pasingdan

Nagsanga-sanga ang pinanawan
Waya makadto sa sakto na dayan
Mayaot na gusto ang aja tagtuman
Nakadto sa dili marajaw na nuan.

Angay pilpilon jaon na siki

Kay sa pagkatagam dili magsilbi
 Sa kalapukan ganahan magpermi
Sa kalimpyo dili man mukugi
Kay ang lipa ipahid ra sa haligi.

Bangon na tawon siki!

Panaw na sa sakto na agi
Sa paglingi dili magsige
Kay ang kagahapon dili na mabali
Busa paningkamot sa imu sarili.

-sjm

Wayong

Hamok klase sa wayong,

Jaoy hilom, jaoy bujong.
Usahay sab jaoy lipay
Sa isig katao makapanghimantay,
Jaoy man sab marajaw
Sutaa lamang pagdajaw.

Ang wayong na magtakiling

Di makita ang kasing-kasing
Angay na muatubang
Bisan hataas ang suwang
Kay ang kagwapa waya man sa hitsura.

Pahumutan, pagwapahan
Ang wayong amu ra man
 Importante ang batasan
Na makita sa silingan
Ang wayong bisan unhon amu ra man.

Bujong

An tawo na bujong
Sa sikreto dili kahunghung
An tsismis permi tagsukyong
Kung muuagi kaw grabe makasuyong
Amu gajud jaon ang tawo na bujong.

Sa facebook ra sija bujong

Pero ting oral kay maghunghung
Sa reporting dili ka suyayong
Kay lagi abtik raman sa sumbong
Ija mga klasmet ganahan sija magsabong.

Ugsa ajaw gajud pangamigo

Inin bujong na mga tawo
Ikaw lagi ang masantos
Sa ila batasan kaw mag-antos
Kagana pusposan nan inin sapatos.