1

Wudang A Daru Magam Atsam

(The Power of the Cross)

Chum ga ni: - I Korinhtu 1:18 “Kaning rai n me law, dai wudang a sumtu aga lachyum gaw sum mat
hkrum ai ni a matu, angawk angak ga rai nga ai; rai ti mung, dai gaw hkye hkrang la hkrum ai anhte a
matu mara, Karai kasang a atsam rai nga ai.” Mahte 16:24 “ Bai, Yesu gaw, shi a sape ni hpe, Ngai
hpang de sa wa mayu ai wa kadai rai ti mung, tinang a hkum hpe nyet kau lu na, rai nna, shi a wudang
hpai let, ngai kaw hkan nang ru ga.”

Ga Hpaw: Wudang lam hku n rai yang, asak jan mau n lu la mai ai (No Cross no crown).

Wudang

Mungkan labau hta wudang hpe Hpinisi mung ni jai lang hpang ai ngu ka matsing da ma ai. Yesu
a aten hta Roma ni masha hpe zingri zingrat di sat ai shaloi jai lang ai re. Shanhte a htung hta zingri sat
hkrum na wa gaw tinang a wudang tinang hpai nnna, tinang hpe zingri sat na shara du hkra adup gayet
zingri hkrum let hpai ra ai re. Gumshem dik ai hku mara jaw ai lam rai nna, n kau mi nhtoi law law jen da
hkrum let si mat wa ra ma ai. N kau mi rai n si shi yang kalang ni myi ni sa malawk sha, hkum shan ni a
achye sha hkrum rai, tsin yam tsin dam kaba hkam sha let si hkrum ra ma ai. N hkru n shawp dik ai lagut
damya ni hte , mungdan hpe gumlang ai ni hpe wudang hta jen sat ai hku ari jaw chye ma ai.

Yesu Hkristu shinggyim hkum hkrang dagraw ai aten hta wudang ngu ai gaw- yuk ai lam, manu n
dan ai lam, matsat shabat re ai lam, myit mada shara n nga mat ai lam, duhka tsin yam hte si htum ai lam
ngu chye na hkam la ma ai.

Rai tim, Karai kasang gaw yesu Hkristu hku nna mungkan shinggyim masha ni he hkye
hkrang la ai shaloi wudang hpe jai lang let, hkrung rawt ai hpung shingkang madun ai shaloi, wudang hte
seng ai lam ni gaw, yuk ai lam kawn hpung shingkang rawng ai lam, manu n dan ai kawn manu dan dik ai
lam, matsat shabat re ai lam kawn chyoi pra san seng ai lam, myit mada shara n nga mat sai kawn myit
mada shara hte hpring ai lam, duhka tsin yam hte si htum ai kawn ngwi pyaw sim sa lam hte mungkan
hpe awng dang ai asak hkrung lam ni hpe shabyin dat sai re. Wudang gaw kam sham ai Hkristan ni a
masat dingsat, masat kum la tai wa ai re.

wudang a atsam marai

(1) Wudang gaw Yubak a shabrai si ai tsin yam hpe madun dan nga ai re (The Cross expresses the
depth of sin): - Yubak a shabrai gaw si mat ai rai nga ai (Roma 6:23).
(i) YUbak a majaw Karai kasang hte daw hka mat wa ai. Dai gaw asak hkrung lam a sai lam hte daw hka
mat ai lam rai nna, Karai kasang chyeju jaw da ai asak hkrung lam hte shai mat wa ai. Hkrang bung sumla
a manu, sari sadang ni hkrat sum mat wa ai. Dai rai nna, wenyi si ai lam, hkum hkrang si ai lam, wenyi
hte hkum hkrang lahkawng yan si ai lam ngu ai si hkrung si htan a mayam tai mat wa ai. Jahtum e htani
htana ngarai hkrat na re ( Yuda 7; Mahte 25:41; Shingran 20:14).
(ii) Yubak gaw Karai Kasang a ntsa tawn ai myit jasat galai shai mat wa shangu ai. Karai Kasang a ga n
madat mat ai hte mahku mara kanawn mazum lam n galaw mat ai. Karai a man de sit shang na malai hkrit
myit hte makoi mat ai. Karai hte tsan ai de shanang sa mat wa shangun ai re ( Ningpawt ninghpang 2: 25;
3:7-8).
 2

(iii) yubak gaw shinggyim masha hte shingra tara hpe dingnye hkrum sha shangun ai. “Num sha hpe
mung, Adam hpe mung, Aga hpe mung dingnye hkrurm shangun ai re. (NIngpawt Ninghpang 3: 16-18).
(iv) Yubak gaw shinggyim masha ni hpe ‘Ngai ngu ai tinggyeng a mayam’ tai nga shangun ai (Roma
6:17). Dai gaw tinang ai myit chye myit chyang, myit nsam, myit masin, ra marin ai lam ma hkra hpe
karai a sharawng awng ai lam hte nhtan shai mat wa shangu ai re. Karai hte mung, shinggyim masha
shada mung, hpan da ai mung kan hte mung mang hkang shabyin ai shinggyi masha tai mat wa shangu ai
re.
(v) Yubak gaw shinggyim amyu ru sai ma hkra kaw kap mat wa shangun ai. Yubak hta shangai wa ai ni
tai mat wa shangun ai re.

(2) Wudang gaw Karai Kasang a kaba la ai tsaw ra myit hpe madun dan nga ai re (The cross shows
the love of God): Kasha shingtai hpe jaw kau ai kaw du hkra mungkan da hpe tsaw ra ai lam madun ai re
(Yawhan 3:16). Nang ngai anhte hpe tsaw ra ai majaw, malai jam jau hkam si hkanm ya ai re. Nang mara
kawn lawt na matu re. Nang tsin yam tsindam kaw lawt na matu re. Nang machyi makaw kawn lawt na
matu re. Nang matsan chyaren ai kawn lawt na matu re. Nang yubak a mayam, hkum sai shan a mayam,
tsa dan a mayam, mungkan ga a mayam tai ai kawn lawt na matu re. Dai daram nang hpe tsaw ra la ai
Karai a tsaw ra myit gaw na, prat ting hpe tsaw ra myit hta galai shai wa shangun nga ai re.

(3) Wudang lam hku nna sha hkye hkrang la hkrum lu ai re (The cross is the only way of salvation).

Wudang lam hku nna, Yesu jaw ai chyeju gaw – mara raw dat ya ai, dinghpring wa lu shangun ai,
san seng chyoi pra wa shangun ai, K.K a kasha tai lu shangun ai, k.K hte ading tawk htinglu htinglai lu ai,
K.K a man de aten shagu sit shang lu ai, mungkan a jum hte nhtoi tai lu shangun ai, myit mada shara hte
tut nawng asak hkrung nga lu shangun ai, mungkan hpe awng dang shangun ai, sumsing mungdan hta
htani htana ning ngai nga lu na pahkam jaw ya ai re.

(4) Wudang gaw Karai a chyeju hte hpring ai asak hkrung lam ningnan hpe jaw ya nga ai re (The
cross gives a new dynamic life).

Wudang hpai ai Yesu, Wudang ntsa jen sat hkam ai Yesu hpe jahpoi asawng, anu zingri sat ai ni
hkye hkrang la ai chyeju n lu la ai. Yubak a shabrai si ai kawn n lawt lu ai. Nga-rai kaw htani htana jam
jau hkrum na re.

Wudang ntsa na damya langai mi gaw Yesu hpe ‘Nang gaw Hkristu n rai nni? Na hkum dai hte
an hpe mung hkye la mi,ngu nna shi hpe roi wu ai. Langai wa chyawm gaw, nang mung daw dan ai ndai
hte wa hkrum da ninglen, karai kasang hpe pyi n hkrit nni? An gaw tinang a mara majaw hkrum ging ai
hte maren daw dan ai hkrum ga ai; ndai wa chyawm gaw n sun n ang ai lam hpa mung galaw wu ai n rai,
nga nna dai wa hpe daru let htan wu ai. Shing nga nhtawm, shi gaw, Yesu e, nang na a mungdan hta du
wa yang, ngai e dum rit law, ngu nna hpyi wu ai. Shaloi Yesu gaw, Ngai nang hpe teng teng tsun de ga,
Dai ni jang nang ngai hte rau hparadisu e nga na rai nga ai, ngu nna shi hpe htan wu ai ( Luka 23: 39-43).
Dai ni anhte ni mung, wudang hta jen sat hkam let hkye la ai Yesu hpe ganing ngu na? “nang na a
mungdan hta du wa yang, ngai e dum rit law, ngu nna hpyi ai wa” teng sha asak lu la na re.

Ga hpungdim – Tsaw ra ai hpu nau ni, na a prat hta “yuk ai lam kawn hpung shingkang rawng ai lam lu
la mayu ai rai yang, manu n dan ai kawn manu dan dik ai lam lu la mayu ai rai yang, matsat shabat re ai
lam kawn chyoi pra san seng ai lam lu la mayu ai rai yang, myit mada shara n nga mat sai kawn myit
 3

mada shara hte hpring ai lam lu la mayu ai rai yang, duhka tsin yam hte si htum na kawn ngwi pyaw
simasa lam hte mungkan hpe awng dang ai asak hkrung lam lu la mayu ai rai yang wudang hpe dap mada
dat u, wudang hta jen sat hkam let hkye la ai yesu hpe hpyi shaga dat u. Na asak hkrung lam teng sha
Karai Kasang a hpung shing npu hta lak lai shai ai, hkik hkam galu kaba ai asak hkrung lam tai wa na re.

Ginlen shalai ai,

Lahpai Awng Li
Professor, MIT.