Asignatura: Sanaysay at Talumpati Gawain Blg.: 5 Petsa: Abril 10, 2021 Guro: Alfe S. Lito
Ang Aking Talambuhay
Ang buhay ko'y nagsimula sa isang napakasayang pamilya. Busog sa
kasimplehang natatamasa sa buhay. Ika-31 ng Disyembre, taong 1999 ako ipinanganak ng aking ina sa bahay pagamutan ng aming probinsya at ngayo'y nakatira kasama ang aking ama sa maunlad na lungsod ng Claver. Kwento pa nga ng mga magulang ko sa akin na hindi maipaliwanag na paghihirap at sakit ang naramdaman ng ina kong nagluwal sa aking ng araw na iyon. Ang aking pangalan naman ay kombinasyon ng tatlong mahahalagang taong nagmahal sa akin ng lubos. Ang unang pantig na "Ju" ng aking pangalan ay nagmula sa pangalan ng aking ama na Zosimo Jr., habang ang pantig namang "Da" ay kinuha sa pangalan ng babaeng kapatid ng aking ina na si Tiya Aida at ang panghuling pantig na "Leen" ay mula sa pangalan ng aking ina na Aileen, na kung pagtatagpiin ay nagiging "Judaleen", Judaleen B. Bayogbog. Sa hanapbuhay mayroon ang aking ama at iyon ay ang pamamasada, nagawa niya tustusan ang lahat ng aming pangangailangan sa araw. Mula pagkain, pananamit at ilan pang mga personal na pangangailangan ay kanyang natugunan. Pagkaraan ng apat na taon ay nagkaroon ako ng kapatid na lalake at masasabi kong siya ang mas nagpabuo ng aking buhay kabataan. Sa bata kong edad, nagawa kong tumayo bilang isang mabuting nakakatandang kapatid sa kanya at iyon din sa tulong ng paggabay sa akin ng aking mga magulang. Umaapaw na kaligayan ang nadarama ko sa mga panahong iyon sapagkat dama ko rin na nasisiyahan ang aking kapatid sa aking mga ginawa. Ilang buwan lang ang lumipas matapos maisilang ang aking kapatid na lalaki, kami ay nilisan ng aking ina at nagtungo ng Maynila upang magtrabaho roon. Sa murang edad, nadama ko ang nanunuot sa kalamnang kalungkutan at pangungululila sa aking ina. Alam kong lahat ng tao, alam na ibang-iba kung mag-alaga ang isang ilaw ng tahanan at aminin man natin o hindi, hindi iyon kayang tumbasan ng haligi ng tahanan. Sa tulong ng aking Lola Asyon, ina ng aking ama ay pansamantalang nakakalimutan namin ng aking kapatid ang aming nadaramang pangungulila. Sa panahon ding ito, natuto akong bumilang at bumasa ng alpabetong Filipino at iyon ay sa tulong ng matandang kapatid ni Tatay na si Mama Epay. Pagkaraan ng ilang buwan ay sumunod kami ng aking ama at ng aking kapatid doon sa Maynila sapagkat ani Nanay, nakahanap siya ng trabaho para kay Tatay at mataas naman daw ang sahod. Mabigat ang loob kong iwan sina Lola Asyon at Mama Epay ngunit nananaig naman ang pananabik kong makita at makasamang uli ang aking ina at ang paglisan kong iyon kasama ang aking pamilya ang siyang unang desisyong pinagsisihan ko ng lubos sapagkat ang paglisan namin ang siyang nagdulot ng sobrang kalungkutan ni Lola Asyon at siyang naging isa sa mga dahilan nito kung bakit siya pumanaw sa ating mundo at iwanan kami. Siguro magaling lang akong magtago ng aking tunay na nararamdaman sapagkat walang luhang umagos mula sa aking mga mata sa panahong iyon pero alam ko sa sarili ko kung gaanong pagsisisi at kalungkutan ang nadarama ko sa mga araw na iyon. Dito ko unang nadama kung paano kasakit ang mawalan ng mahal sa buhay na kahit ilang bagong damit pa o laruan pa ang bilhin at ibigay sa akin ay hindi ako nitong magagawang mapasaya sapagkat buhay ng taong pumalit at tumayong ina ang nawala sa akin. Panahon ay lumipas at ako'y pinag-aral ng aking mga magulang sa Kinder at masasabi kong hindi ko iyon nagustuhan at kaunti lang ang aking natutunan. Tanging nagpapasigla lang sa akin upang pumasok ay ginagawan ako ng masarap na baong sandwich ni Mama Epay na kasama pang orange juice. Ayaw na ayaw ko sa mga kaklase ko kasi dahil sa pagiging tahimik ko'y lagi nila akong ginagawang katatawanan at inaaway ng wala namang tamang dahilan. Sa araw ng pagtatapos ko, abot hanggang langit ang aking pagkatuwa sapagkat hindi ko na makikita ang mga kaklase kung may pagkasalbahe. Kasabay ng aking pasasalamat ang dalanging sa pagpasok ko ng bagong yugto ng pagtamo ng karunungan ay magkaroon na sana ako ng maraming kaklaseng mababait at hindi mapagsamantala. Dumating ang panahong aking inaasam at iyon ay ang pumasok sa bagong paaralan. Ako'y ipinasok nila Tatay sa Elementarya ng Daywan na ilang metro lang ang layo mula sa aming tinitirhan. Naging maganda ang aking unang araw sa eskwela bilang mag-aaral sa unang baitang at dininig ng Panginoon ang aking dalangin na magkaroon ng mababait na mga kaklase ngunit bagong hamon naman ang ibinigay Niya sa akin sapagkat masungit ang bagong guro ko. Naaalala ko pa nga na pinalo ako nito sa kamay ng minsang hindi ako nakapagputol ng aking kuko at hindi ako pinauuwi hanggat hindi ko nababasa ng maayos ang Abakada. Inaamin kong hindi talaga ako ganoon kagaling sapagkat hindi ko nga pinag-igian din ang aking pag-aaral noong nasa Kinder pa lamang ako. Panay pa nga ang ngiwi ko sa tuwing ikinukumpara pa kaming mahihina sa matatalino naming kaklase ng aming guro sa loob ng klase na akin namang isinawalang bahala sapagkat ang isip ko sa mga araw na iyon ay puro mga nakakaligalig na telenobela lang ang laman tulad ng Saido, Mulawin at Kamandag. Sa loob ng tatlong na taon masasabi kong sobrang ganda ng takbo ng aking buhay. Ang pagkakaroon ko ng markang 79 ay nagpamulat sa akin na mag-aral na ng tutohanan at naging isa na sa mga mahuhusay na mag-aaral ng aming paaralan. Gaano man kasaya ang ating buhay ay mayroong darating na unos na susubok sa ating katatagan at naranasan ko iyon, isang pangyayaring hindi ko inakalang mararanasan ko at ng aking kapatid. Kami ay iniwan ni Nanay na bitbit ang kanyang puso at nakakasiguro ako ang taong nasaktan ng labis sa mga panahong iyon ay ang aking ama. Walang Judaleen at Jovanie ang umiiyak sapagkat hindi ipinadama sa amin ni Tatay na kami ay wala ng inang mag-aaruga pa sa amin. Sa pagkakaroon ng wasak na pamilya, walang mintis na itinatanong sa akin na nakadama ba ako ng matinding galit sa aking ina at natapos ang anim na taon kong pag-aaral sa elementarya na yaon ang sumasalubong sa aking katanungan mula sa mga taong nakakakilala sa akin na siyang ikinagising ko at napagtanto na talagang likas na makulit at minsan nawawalan ng sentido komon ang mga tao. Natural na magbunton ng galit sa aking ina sapagkat paano niya nagawa kay Tatay ang ganoong bagay gayong hindi naman siya naghihirap saka hindi naman kami sakit sa ulo ng aking kapatid para sukuan niya kami at lisanin. Gustong-gusto ko siyang sumbatan at ipaalam sa kanya kung paano ako naiiinggit sa mga kaklase kong kasama ang kanilang ama at ina tuwing pagtatapos ng markahan, na paano kalungkot ang maglakad patungo ng entablado't kunin ang aking diploma na hindi buo ang pamilya at paano ko natiis at hindi pinansin ang mga nakakaawang tingin ng mga tao sapagkat ako'y iniwanan ng ina. Gustong-gusto kong isumbat sa kaniya ang lahat ng iyon at madama rin niya ang nadarama kong pait at sakit mula nang iwan niya kami. Itanong sa kanya kung ano bang pagkukulang namin at nakakaya niyang iwan kami sa ere. Ang aking galit ay nawala mula nang tumungtong ako ng sekondarya na kung saan mayroong isang guro na nagpagising sa akin at binago ang aking paniniwala. Ani niya hindi nararapat na isumpa at magalit abot langit sa ating mga ina sapagkat bukod sa dugo nilang nanalaytay sa ating kalamnan, sila ang nagsilang sa atin at naging mahalagang instrumento upang matuklas at makita kung gaano kaganda ang mundo. Simula noon, kinalimutan ko na ang galit na aking nadarama sa aking ina at pinag-igian na lamang ang aking pag-aaral para naman masuklian ko ang napakaraming sakripisyong nagawa ng aking ama sa aming magkakapatid. Habang ako'y nagtapos ng apat na taon sa Junior High, ang aking kapatid naman ay nagtapos din sa elementarya at sa panahong iyon, nagkaroon na kami ng komunikasyon ng aking ina at masayang- masaya sa naabot naming magkapatid. Ganunpaman, naroon pa rin ang lungkot sapagkat lumakad akong papuntang entablado na tanging ang ama ko lang ang kasama. Dahil sa naabutan ako ng K-12, nagpatuloy ako sa pag-aaral sa Mataas na Paaralang Pambansa ng Claver bilang mag-aaral ng senior high at ang kinuha ko namang strand ay Humanities and Social Sciences. Masasabi kong hindi ko pinagsisihan ang napili kong strand sapagkat bukod ito ay naayon sa kursong gusto kong pag-aralan pagkarating ng tersarya ay napagtanto kong ang rami ko pa palang pagkukulang at kakayahang dapat linangin para sa ikakaunlad ng aking sarili. Kaya ang dalawang taong nalalabi ko sa sekundarya ay nakatutok ang aking puso't isipan sa pag- aaral at tuwing walang pasok ay nagtratrabaho ako bilang tindera ng malapit naming kamag-anak na siyang may-ari ng isa sa mga sikat na panaderya sa aming lungsod. Nakakapagod ngunit balewala lang sa akin sapagkat nangingibabaw ang hangarin kong makapagtapos ng pag-aaral at magkaroon ng propesyonal na trabaho sa hinaharap. Para sa akin, malaya ang taong mangarap na kasing tayog ng ibong agilang lumilipad sa himpapawid at nasa sarili natin kong paano natin ito isasagawa at makamit. Nakapagtapos ako ng senior high at nakatanggap ng parangal. Hindi mapaliwanag na kasiyahan ang nadarama ko sa araw ng aking pagtatapos. Hindi lang diploma ang aking natanggap kundi nakatanggap pa ako ng medalya bilang isa sa mga mahusay na mag-aaral ng aming paaralan. Sa suot kong toga, buong pagmamalaking lumakad ako papuntang entablado kasama ang aking amang maliwanag ang mukha ng dahil sa kasiyahan. Hanggang sa matapos ang araw na iyon hindi nawaksi ang abot sa mata kong ngiti sapagkat isa ito sa malaking tagumpay na aking natamasa. Ngayon at nasa tersyarya na ako, hindi mabilang na hamon na ang aking kinaharap upang maipagpatuloy ang aking pag-aaral at tuparin ang aking pangarap. Minsan natatagpuan ko ang aking sariling umiiyak dahil sa hirap at minsan naman ay nagtatalon sa galak dahil nalampasan ko ang lahat ng hamon bilang isang mag-aaral sa tersyarya. Kasabay ng pagtitiyaga at determinasyon sa pag-aaral ay kailanman hindi ko rin nakaligtaan ang magdasal sa Panginoon. Buong puso kong dinarasal na sana gabayan niya ako at tulungang makamit ang mga hangarin ko para sa aking sarili at sa aking mga magulang. Ako si Judaleen Bagnol Bayogbog, second year student at kasalukuyang nag-aaral sa Surigao State College of Technology Claver Extension na kumukuha sa kursong BSED-Major in Filipino, ito ang aking talambuhay.