Masasabi ko na umuunlad ang wikang Filipino sa panahon
ngayon sapagkat ang ating wika ay tinatangkilik na nang nakakarami at alam na ang kahalagan nito, ginagamit na rin ng ibang lahi o mga dayuhan na dumarayo sa Pilipinas ang ating wika. Marami ng dayuhan ang nais matuto ng wikang Filipino dahil dito mas nakikilala na at umuunlad ang ating wika. Isa pang dahilan ay ang paggamit ng ating mga kapwa Pilipinong nagtatrabaho at naninirahan sa iba't ibang panig ng daigdig at naibabahagi nila ang ating wika sa ibang lahi na may kagustuhang matuto.
Ang ating wikang Filipino ay may katangiang malalim na kaalaman at
malawak na karunungan. Ang wikang ito ay mahiwaga at mabisang kasangkapan sa pag-unlad ng ating bansa kung ito ay ating hahasain at puspusang pairalin sa iba't-ibang larangan. Kung mahusay nating magagamit ito sa ating buhay at iba-iba pang mga aspeto nito ay masasabi ngang magbubunga ito ng kaunlaran at karunungan. Ang wika ay ang instrumento sa pagpapaunlad ng kultura at sining sa isang bayan o bansa. Samakatuwid napakahalaga ng wikang Filipino sa iba't ibang larangan sapagkat ito ang nagbibigay buhay, diwa at ang nagpapakilala sa ating bansang Pilipinas.
Ito ang sumasalamin sa kultura, kaugalian, paniniwala, kaalaman at
karunungan ng mga mamayan, at nagbabatid nang kakayahan ng mga tao, ito ang daluyan ng ating komunikasyon, ito’y larawan na nagpapakita ng ating pagkakakilanlan kung paano tayo tatanawin at ituturing ng mga tao sa labas ng bansa. Wikang Filipino ang kaluluwa ng Pilipinas, ang karunungan nito ang susi sa pambansang pag-unlad sa iba't-ibang aspeto para sa iisang minitmithing tagumpay.