*GARAI MUDZIMBA*

Gara mumhango iwe gozhomhini unongoti chimhini pinimini kumeso kusingandivoni

sokwechidambani
Gozhomhini gara mumhango chomudzimu chikuwaniremo, ko wati dacha ndoraizodei
mudziva mvura risingamwi?
Zenze minini sechimainini chomukonikoni hamva heroko bhinya nomupini kana uchiti
korona ndibabamunini
Kusaziva: kuti zuva rimwe rovodze nyama nechaimbohwi hachifambisi chinamanenji
chofambisa
Chakazovuya ichi ndiMandivonerepi hachivonekwi chichiri koko - garai mudzimba!

Bhasopo yakavudzwa usina meso, iwe meso dzvutu chiri mumusakasaka chisingazvihwiri
Inoputire shoka nokudarika mabvi haunei nayo unomirira imbunde hudyu, nokukodzve
chirebvu tevere magoxhwe namagwiriri
Mhoro dununu vhiri redanda, zvishoma-zvishoma uchin’yura hautirimuki, hautyi hauna
nevhundu uri nhiriri
VeChiNdevere vakati ‘hindava’ shumo vashaiwa - uri garakara chati homu chareva
hauchevukiri
Kukundwa here nedhanana rakahi chera mwena kunovuye vivi rikachera! Bodo bodo
korona yakavuya garai mudzimba!

Madandabvu ijakwi nejorovera unongoti hairambigwi sadza inhamo youmwe

Van’yafa gumi nefararira unoti ndezvemidzimu yavo inovusimbe kwedu inogwa imire
Gotokoto rakazoziva chirugu rasunugwa, zvakare kurumwa nesikidzi rambira mumba
Pazhe pane zvipindikiti, siyai mufaro wembwa wokuvonekwa nomuxhwe kutsvikidza.
Garai mudzimba!

O’zviya makorokoto kukosora ukapfira - kwakazovuya korona gosogwa risina garagwa

Pahuro rinotsveta chimimino sepechigayo, zvikukutu hauchaminyi chero madangwa
Mhino kutotegavozve sedzechitavira kufema tsvo - wokufema wopisazve mweya
sowakakangwa
Muviri kupisa unoti imboko iri mubhodho neziya kuwanda kukunda mutubwi
usakapungugwa
Ndozvipindikiti zvapazhe izvi chigumegume zhira yoruware - garai mudzimba!

Mbariro dzomusoro inotemeran’ya kure yokurova nedzungumupengo botsakupenga

Kukangwa kworuninga hauruhwi nechidzivabwema chayo korona nyangoti mapino fenenga
Zvinozipa nezvinoshirikida rurimi harucharevi gwasungwa ndare nayo yedu iyi masunga
N’yhasi nokumusoro kudira nokudurura ndomharadzano -panobve mharadzano ndopazhira
Chitete chinenge chakupinza hino muchikobvu, wenyemba mugutso uri kugwizi -
tichimboti garai mudzimba!

Vemakuhwa venhete hana sexharani chimbomirai kuvanga nawo muchimakushan’ya

Reva guhwa nowako munda saVaChifuse, iti bere rapedza makavhu usiyane nenharaunda
Zvigezanomupeta vokwaChitekero - kwekumwira kwasiyana, chishanduraivo mamwiro
Zvikurungire wako mupeta kwako kudumba, udane ngome zevezeve uri kuchikuva usiyane
nemhomho
Usatenda kunokoreswa zvinopisa somugwaku, korona inhopi ine goko garai mudzimba

Dzvin’yu chairo wani harizambi mushana kure nebako nemivo hama garai mudzimba
Benzi rinoimba ndikwaro wani kukunda rinomanya nebani vehama garai mudzimba
Rinorema detenu ndorine mhunzi, nyangodya zvokupara shunyidzanai garai mudzimba
Nheve inorema yosvika hakuna vusiku vusingaidzi, seri kwezhara maguta garai
mudzimba
Vane dzimba navasina dzimba garai mudzimba, hakuna nenji risina kumusha, ichainda
korona garai mudzimba

A.D.N.O.S