Sinulat ni: Ken Abante at ng mga kaibigan sa Campus Ministry Office
Mahal naming Panginoon:
Sa aming pagtatapos, bigyan Mo kami ng biyaya ng kamalayan na makita Ka sa lahat, at mabatid na ang lahat ay nakapaloob sa nag-uumapaw na pagmamahal Mo.
Biyayaan Mo kami ng biyaya ng pagpapakumbaba, nang maikintal sa aming isip na ang aming kaganapan ay bunga ng Iyong Mapagbigay na Kamay, at sa pamamaraang ito, magpasalamat nang taos puso sa Iyo:
Sa aming pagtatapos, nagpapasalamat kami sa aming mga guro na nagsilbing Tinig Mong nagbunyag ng Iyong Salita. Biyayaan Mo kami ng katapatan upang ibahagi rin ang Iyong Salita sa aming kapwa
Nagpapasalamat kami sa mga pinuno ng pamantasan na nagsilbing Paningin Mong umaasa’t nangangarap para sa amin at sa bayan Linangin Mo kami sa Iyong Banal na Pag-asa nang lumabay lamang ang aming mithiin para sa bansa
Nagpapasalamat kami sa aming mga magulang na nagsilbing Bisig Mo na yumakap sa amin sa kahirapan o ginhawa. Bigyan Mo kami ng lakas upang mayakap din namin ang aming kapwa na lugmok sa karalitaan
Nagpapasalamat kami sa aming mga kaibigan na nagsilbing Puso Mo na nagpaalab ng aming mga damdamin sa saya’t inspirasyon. Gawaran Mo kami ng tatag ng loob upang tahakin ang landas ng katarungan
Nagpapasalamat kami sa tahanan namin sa Ateneo, kung saan nananahan ang Iyong dalisay na Pagmamahal at tumatahan ang lahat ng nababalisang puso.
At sa aming pagtatapos, ‘wag sana kaming mangamba ‘pagkat-- Ano nga ba ang kapanatagan sa kasalukuyan, kapayapaan sa kinabukasan at pagpapalaya sa nakaraan, sa kasiguruhan na Kami’y minahal, minamahal at mamahalin Mo sa kabuuan ng panahon?