Villanueva, Czarae Jana D.

Ma’am Luwalhati Briones

BS Psychology 3-A Sikolohiyang Pilipino

Anu-ano ang mga nakikita mo na mga patunay na may Sikolohiyang Pilipino?

Bawat bansa sa buong mundo ay may kaniya-kaniyang wika, kultura, paniniwala, at

katangian na sumasalamin sa sariling pagkakakilanlan ng bawat isa. Unibersal ang siyensiya
gayon din ang sikolohiya at ang sikolohiyang nabuo sa ibang bansa ay maaaring hindi
umangkop para sa iba pang mga bansa. Dahil dito, mahalagang ikonsidera ang reyalidad na
nagaganap sa loob ng Pilipinas at pag-aralan ang mga teyoryang naaangkop sa totoong
karanasan ng ating bansa. Ang pag-aaral ng sikolohiya ay komplikado dahil ito’y patungkol sa
pag-aaral ng isip at kung paano ito nakakaapekto sa kilos ng isang tao, ngunit may mga parte
ng pag-aaral sa sikolohiya na hindi maiuugnay sa kultura at mga karanasan natin bilang isang
Pilipino. Dahil dito, nabuo ang Sikolohiyang Pilipino na masasabi kong angkop sa ating kultura
gayon din ang paggamit ng wikang Filipino upang lubos na maunawaan ng mga mamamayan
ang tungkol sa sikolohiya na sinala at binusisi base sa kasaysayan ng Pilipinas.

Bilang isang mag-aaral ng kursong sikolohiya, masasabi kong napakaraming patunay sa

ating paligid ang nagpapakita na may Sikolohiyang Pilipino. Ilan na rito ay makikita sa iba’t-
ibang aspeto ng buhay na konektado sa ating pag-iisip at kilos gaya ng tradisyon, panitikan,
paniniwala, sining, pag-uugali, at ang wika mismo. Halimbawa, tradisyon na ng mga Pilipino ang
pagkakaroon ng mga pista at salo-salo. Pati na rin ang tradisyon ng ilang kababayan na pag-
aalay sa mga rebulto na tila hindi normal para sa mga dayuhang bansa. Sa panitikan, na kung
saan napapaloob ang mga salawikain, bugtong, epiko, alamat, atbp, makikita ang pagiging
malikhain ng mga Pilipino sa pamamagitan ng mga simbolismo na makikita sa paligid na
maiuugnay sa mga ito. Pagdating naman sa paniniwala, ang bawat probinsiya ay may kaniya-
kaniyang kwento tungkol sa multo, engkanto at aswang. Kasama na rito ang mga albularyo na
tila ba’y may angking kakayahan upang maitaboy ang masamang espirito. Maraming paniniwala
ang mga Pilipino na hindi nabigyan ng malalim na pagpapakahuluhan at interpretasyon sa
unibersal na sikolohiya. Gayon din sa sining, na kung saan bawat obra maestra ay may
tinatagong kwentong hinukay sa kanuno-nunoan na tanging mga Pilipino lang ang
makakaunawa. Isa rin ay ang pag-uugali, gaya ng pagmamano sa nakakatanda at pagsasabi
ng “po” at “opo”. Isama na rito ang bayanihan, utang na loob, pagiging malapit sa pamilya,
mahusay na pakikitungo at pagtanggap ng bisita, at pagkakaroon ng takot sa Diyos. At ang
panghuli ay ang wika natin mismo, na kung saan maraming salitang Filipino ang walang
katumbas sa ibang wika na patunay rin na natatangi ang wika natin. Dahil dito, masasabi kong
maraming bagay ang hindi pa nadidiskubre sa larangan ng unibersal na sikolohiya at ang mga
halimbawa ay iilan lamang sa maraming patunay na mayroong Sikolohiyang Pilipino na
talagang sumasalamin sa ating kultura.

Ang pag-usbong ng Sikolohiyang Pilipino ang siyang patunay na ang bansang Pilipinas
ay natatangi dahil may sarili itong pagkakakilanlan. Ito ay nakaugat sa ating kasaysayan at hindi
mabubuo ang sikolohiyang unibersal kung hindi mapag-aaralan ang sikolohiya ng iba’t-ibang
tao sa iba’t-ibang bansa. Bagaman gumagamit tayo ng banyagang konsepto tulad ng mga
teyorya ng mga kilalang personalidad sa larangan ng sikolohiya, malaking bagay pa rin ang
pagkakaroon ng sikolohiya na naaayon sa tunay na kalagayan ng ating bansa. Ito rin ang
magsisilbing aydentidad ng mga Pilipino bilang parte ng Pilipinas. Talaga nga namang mas
mainam pag-aralan ang mga teyorya na mauunawaan ng komunidad at mga bagay na
nasasalamin sa reyalidad na nagaganap sa loob ng bansa at hindi lamang limitado sa
karanasan ng mga dayuhan.

Mga Sanggunian:

Pe-Pua, R. (1982). Sikolohiyang Pilipino (Filipino Psychology). University of the

Philippines Press Printery.

Mercado, L.N. (2016). Ang Kahalagahan ng Sikolohiyang Pilipino. Mula sa

akosibebelz.weebly.com