ANG KAHULUGAN NG ADBIYENTO

AT PAGPAPALIWANAG NG MGA TANDA

Isasagawa ang pagsisindi pagkatapos ng Ikalawang Pagbasa at bago awitin ang

Aleluya.

TAGAPAGPADALOY:

ADBIYENTO
Panahon ng pagninilay ang paanyaya ng Adbiyento. Pagpapalalim ng ating
pananampalataya sa misteryo ng pag-ibig ng Diyos na naging tao. Pagkilala at
pagtatalaga ng ating mga sarili kay Hesus na laging sumasaatin mula noon
hanggang sa kanyang muling pagbabalik.
Kaya, inaanyayahan tayong magsimulang ayusin ang ating mga ugnayan sa
Diyos, sa ating kapwa, sa lipunan at kalikasan. Magsimula tayong magsuri ng
budhi at magbalik-loob sa Diyos.

ANG KORONA NG ADBIYENTO

Isang magandang pamamaraan para sa pamilya at mga Munting
Sambayanang Kristiyano na makapanalangin ng sama-sama sa harap ng korona ng
Adbiyento bilang paghahanda na rin sa makabuluhang pagdiriwang ng araw ng
pasko.
Natural na hugis bilog at kulay luntian ang korona ng adbiyento.
Nagpapahayag ito ng walang hanggang pag-ibig ng Diyos sa ating lahat. May apat
na kandila ang Adbiyento. Sa Unang linggo, sisindihan ang isang kandila ng
pamilyang itinalagang magsindi na siyang kakatawan sa mga pamilya ng ating
sambayanan. Sa pagdating ng ikalawang linggo, dalawang kandilang kulay lila ang
mayroon nang sindi. Sa ikatlong linggo, ang dalawang kandila na kulay lila at ang
isang kandila na kulay rosas ang may sindi, at apat na kandila ang may sindi sa
huling linggo.
Ipinapahiwatig ng mga kulay ng kandila na kulay lila ang pag-aanyaya sa
ating lahat na maghanda ng sarili, maging tapat sa pagsisisi at pagbabalik-loob
upang maging karapat-dapat tayo sa pagdating ng Panginoon na mananahan sa
ating mga puso. Samantala, ipinag-aanyaya ng kulay rosas na punuan ng galak at
pag-asa ang ating mga puso sa pagsalubong sa nalalapit at di-mapipigilang
pagdating ng araw ng pasko ng pagsilang ng ating manunubos.
Halina sambayanan ng mga dukha, kaisa ng ating paring-lingkod, samahan
natin ang mga nakatalagang magsindi ng kandila, upang bigyang liwanag ang
Unang kandila ng Adbiyento.

1
 RITU NG PAGSISINDI NG KANDILA NG ADBIYENTO

UNANG LINGGO

AAWITIN: Halina Hesus, Halina

PARI: Naghahanda ang buong sambayanan ng Diyos sa pagsilang ng

ating Panginoong Hesukristo na Siya nating PAG-ASA at
lakas sa lahat ng panahon lalo na sa mga panahong humaharap
tayo sa mga matitinding suliranin at pagsubok sa buhay.
(Sandaling katahimikan)

Manalangin tayo.

O Diyos ng Dakilang Awa, ipagkaloob mo po ang iyong

pagbabasbas sa aming lahat na natitipon ngayon sa harap ng
korona ng adbiyento. Sama-sama naming inihaharap ang aming
sarili, pamilya, MSK, lipunan at buong kalikasan sa pagsisindi
ng Unang Kandila sa korona ng Adbiyento taglay ang aming
mga pusong patuloy na umaasa sa Iyong pagliligtas hanggang
sa mga huling panahon at Paghuhukom.

Maging dakilang tanda nawa itong korona at ang liwanag ng

kandila ng aming matibay na pananalig at pananampalataya sa
pangako mong pagliligtas. Hindi na sana magtagal pa ang
hinihintay naming pagdating ng Iyong Anak para saklolohan at
tulungan kami at hanguin sa dinaranas na hirap at sakit ang
marami naming mga kababayan sa kasalukuyan, at gawin
kaming iisa tulad ng panalangin ng Iyong Anak. Hinihiling
namin ito sa ngalan ni Hesukristong aming Panginoon.

BAYAN: Amen.
(Sisindihan ang isang kandila na kulay lila at darasalin ang sumusunod:)

AMA: O Diyos ng liwanag, halina at maging aming tanglaw at gabay

sa pagsasabuhay ng Mabuting Balita bilang sambayanang
nabubuklod sa Iyong liwanag at alab ng Iyong pagpapala,
patuloy nawa kaming mapuspos ng Pag-asa na magkakaroon ng
pagkakaisa sa pananampalataya ang lahat ng Kristiyanong

2
 mananampalataya sa humahanap sa Iyo sa iba’t-ibang
pamamaraan.

INA: Halina at manahan ka sa aming puso upang manatili kaming

tapat sa pagmamahal at paglingap sa lahat ng uri ng tao na
bagama’t iba sa uri at paraan ng aming pagsamba at pagkilala
sa Iyo, ay kapatid namin dahil sa kaligtasan at pagtubos Mo sa
tao. Ibuhos mo sa aming lahat ang biyaya ng pagkakaisa na
kailangan namin sa pagpapanatili ng kapayapaan sa
sambayanang aming kinabibilangan habang aming pinanabikan
ang Iyong nalalapit na pagdating.

(MGA) ANAK: Aming Hesus na dumarating sa biyaya at kapangyarihan ng

Diyos, masdan ang aming puso na umaasa sa Iyong pagsapit.
Halina at tuparin ang Iyong pangakong ganap na kaligtasan
para sa lahat. Amen.

AAWITIN: Halina Hesus, Halina

3
 RITU NG PAGSISINDI NG KANDILA NG ADBIYENTO

IKALAWANG LINGGO

AAWITIN: Halina Hesus, Halina

PARI: Naghahanda ang buong sambayanan ng Diyos sa pagsilang ng

ating Panginoong Hesukristo na Siyang kadluan ng tunay na
kahulugan ng ganap na PAG-IBIG lalo na sa panahong
pinaghaharian ang ating lipunan ng pagkakabaha-bahagi at
salungatan dahil sa magkakaibang pananaw. Dumalangin tayo
sa Ama na puspusin tayo ng biyaya ng pag-ibig na kaloob ng
Espiritu at papaghariin ito sa ating mga puso.

(Sandaling katahimikan)

Manalangin tayo.

O Diyos ng Dakilang Pag-ibig, ipagkaloob mo po ang iyong

pagbabasbas sa aming lahat na natitipon ngayon sa harap ng
korona ng adbiyento. Sama-sama naming inihaharap ang aming
sarili, pamilya, MSK, lipunan at buong kalikasan sa pagsisindi
ng Ikalawang Kandila sa korona ng Adbiyento taglay ang
aming mga pusong nagnanais na makamtan ang walang maliw
Mong pag-ibig.
Maging dakilang tanda nawa itong korona at ang liwanag ng
kandila ng aming matibay na pananalig at pananampalataya sa
pangako mong pagliligtas. Hindi na sana magtagal pa ang
hinihintay naming pagdating ng Iyong Anak para saklolohan at
tulungan kami at ilapit sa Iyong puso ang aming lipunan na sa
kasalukuyan ay pinaghaharian ng pagkapoot sa kapwa. Maging
instrumento nawa kaming lahat na nagkakatipon ngayon sa
pagpapadama ng Iyong pag-ibig sa gitna ng hidwaan at
salungatan bilang paghahanda namin sa aming sarili sa
pagharap sa Iyong Anak sa Kanyang maluwalhating
pagbabalik. Hinihiling namin ito sa ngalan ni Kristong aming
Panginoon.

BAYAN: Amen.

4
(Sisindihan ang isang kandila na kulay lila at darasalin ang sumusunod:)

AMA: O Diyos ng liwanag at pag-ibig, halina at tanglawan kaming

lahat nang naririto ngayon ng liwanag ng Iyong pag-ibig at
hayaang makita namin ang aming pananagutan sa kawalan ng
pag-ibig na naghahari sa daigdig.

INA: Magsimula nawa sa aming naririto ngayon ang pagpapadama

ng pag-ibig sa mga taong alipin ng hinanakit at poot dahil sa
kahinaan ng aming kapwa. Habang pinaghahandaan namin ang
pagdating ng Iyong Anak, matutunan nawa naming maging
tapat sa pagmamahal upang sa Iyong muling pagparito ay
siyang magpagindapat sa pagsapit namin sa paraiso.

MGA ANAK: Aming Hesus na dumarating sa biyaya at kapangyarihan ng

Diyos, puspusin ang aming puso ng pag-ibig habang hinihintay
namin ang iyong pagsapit. Halina at tuparin ang Iyong
pangakong ganap na kaligtasan para sa lahat. Amen.

AAWITIN: Halina Hesus, Halina

5
 RITU NG PAGSISINDI NG KANDILA NG ADBIYENTO

IKATLONG LINGGO

AAWITIN: Halina Hesus, Halina

PARI: Naghahanda ang buong sambayanan ng Diyos sa pagsilang ng

ating Panginoong Hesukristo na Siyang GALAK sa puso ng
sambayanan ng Diyos na nagdiriwang sa di mapipigilang
pagsapit ng Manunubos.

(Sandaling katahimikan)

Manalangin tayo.

O Diyos ng Dakilang Awa, ipagkaloob mo po ang iyong

pagbabasbas sa aming lahat na natitipon ngayon sa harap ng
korona ng adbiyento. Sama-sama naming inihaharap ang aming
sarili, pamilya, MSK, lipunan at buong kalikasan sa pagsisindi
ng Ikatlong Kandila sa korona ng Adbiyento taglay ang aming
mga pusong nagagalak sa katuwaan ng nalalapit mong
pagdating sa aming buhay.

Maging dakilang tanda nawa itong korona at ang liwanag ng

kandila ng aming matibay na pananalig at pananampalataya na
kaming lahat ay iyong buong galak na hahanguin sa wakas ng
panahon dahil sa kaligtasan na sa amin ay Iyong ipinangako.
Hindi na sana magtagal pa ang hinihintay naming pagdating ng
Iyong Anak para saklolohan at tulungan kami at palitan ng
kaligayahan ang kaloobang batbat ng sakit at pangamba bunga
ng kasalanan at sugat na dulot ng masamang takbo ng lipunan.
Hinihiling namin ito sa ngalan ni Hesukristong aming
Panginoon.

BAYAN: Amen.

(Sisindihan ang isang kandila na kulay rosas at darasalin ang sumusunod:)

AMA: O Diyos ng liwanag, halina at pasiglahin ang aming sugatan at

nagdaralitang pusong kapos sa kaligayahan dahil sa kagagawan

6
 at kahinaan ng aming kapwa-tao na nahirati sa makamundong
uri ng pamumuhay na siyang dahilan ng kawalan ng
katiwasayan ng ng aming buhay.

INA: Manahan ka po sa aming puso na mga natitipon ngayon upang

mapalitan ng kagalakan ang aming takot na kumilos para sa
pagkakaisa namin na Iyong tinawag upang maging Iyong anak.
Palitan mo ng tuwa ang pader ng sigalot sa gitna namin nang sa
gayon ay masimulan na namin dito sa lupa ang buhay na ganap
na ipinangako Mo sa amin.

ANAK: Aming Hesus na dumarating sa biyaya at kapangyarihan ng

Diyos, puspusin ang aming puso ng galak samantalang
nananabik kami sa Iyong di-mapipigilang pagdating. Halina at
tuparin ang Iyong pangakong ganap na kaligtasan para sa lahat.
Amen.

AAWITIN: Halina Hesus, Halina

7
 RITU NG PAGSISINDI NG KANDILA NG ADBIYENTO

IKAAPAT NA LINGGO

AAWITIN: Halina Hesus, Halina

PARI: Naghahanda ang buong sambayanan ng Diyos sa pagsilang ng

ating Panginoong Hesukristo na Siyang tagapagdulot at
tagapagpanatili ng KAPAYAPAAN sa buong daigdig
hanggang sa Kanyang muling pagparito sa wakas ng panahon.

(Sandaling katahimikan)

Manalangin tayo.

O Diyos ng Dakilang Awa, ipagkaloob mo po ang iyong

pagbabasbas sa aming lahat na natitipon ngayon sa harap ng
korona ng adbiyento. Sama-sama naming inihaharap ang aming
sarili, pamilya, MSK, lipunan at buong kalikasan sa pagsisindi
ng Ikaapat na Kandila sa korona ng Adbiyento taglay ang
aming mga tiwasay at payapang puso bunga ng katiyakan sa
nalalapit mong pagdating sa aming buhay.

Maging dakilang tanda nawa itong korona at ang liwanag ng

kandila ng aming matibay na pananalig at pananampalataya sa
pangako mong pagliligtas. Ang katiwasayan, payak na
pamumuhay, pagpapahalaga sa dayalogo, at buháy na kultura
ng kapayapaan ng mga kapatid naming katutubo ay magsilbi
naming inspirasyon sa pagpapanatili ng kapayapaan sa
pagtupad namin sa Iyong pangarap na kami ay maging Iisa.
Hindi na sana magtagal pa ang hinihintay naming muling
pagbabalik ng Iyong Anak upang lingapin kami, at puspusin ng
kapayapaan ang Iyong sambayanan na ngayon ay nagtitiwalang
palagi mong sasamahan. Hinihiling namin ito sa ngalan ni
Hesukristong aming Panginoon.

BAYAN: Amen.

(Sisindihan ang isang kandila na kulay lila at darasalin ang sumusunod:)

8
AMA: O Diyos ng liwanag, nawa’y dumating ka na sa piling ng Iyong
mga anak na sa Iyo ay naghihintay. Pagharian mo kami ng
tunay at ganap na kapayapaan na masasalamin sa likas na anyo
ng sangnilikha.

INA: Buksan ang aming mga puso at isipan upang katulad Mo, ang
katutubong kultura na mapagmalay at mapagmalasakit ay
aming dibdibang maisabuhay upang magsilbi kaming
tagapaghatid ng kapayapaan lalo sa mga panahon ng kaguluhan
at kabiguan ng taong sumunod sa Iyong kalooban.

MGA ANAK: Aming Hesus na dumarating sa biyaya at kapangyarihan ng

Diyos, punuan kami ng tuwa at galak habang abot-kamay na
namin ang paghahari mo sa daigdig. Halina at tuparin ang
Iyong pangakong ganap na kaligtasan para sa lahat. Amen.

AAWITIN: Halina Hesus, Halina