TARIAN CISADANE

KARYA : SUTANANDIKA

HIRUP TEH LALAKON NU DIGURAT KU NASIB

GURATAN-GURATAN SALIN RUPA KANA DALUANG

NGANTEURKEUN URANG TI PAPADA URANG

KAJABANING LANGIT MULANG KAKALANGGENGAN

WALUNGAN CISADANE

BAHEULA MAH CIGEDE

JADI TULANG TONGGONG NAGRI

NU NGARANNA TARUMANAGARA JEUNG PAKUAN PAJAJARAN

GIRICIK CAINA NGAGURAT NA BATU-BATU

NGAGURAT PRASASTI BATUTULIS

NU NGEMBARKEUN WARTA:

SRI BADUGA MAHARAJA NGAWANGUN SUSUKAN, JALAN NU DIBALAY KU BATU

LEUWEUNG SAMIDA, SANGHIYANG TALAGA RENA MAHAWIJAYA

CIKARACAK NGAGURAT BATU

DIWEWENGKON CIARUTEUN JEUNG PASIR KOLENGAKAK

NGEMBARKEUN TAPAK GAJAH AIRAWATA

CIRINING KAKAWASAN TARUMANAGARA NU RAJANA PURNAWARMAN.

CIBURIAL NGAGGURAT BATU KATELAH PRASASTI TUGU:

RAJA KAMI PURNAWARMAN

NU PANGHEULANA NUNGGKULAN CAAH

NGAGALI 6.122 TUMBAK SUSUKAN UNTUK KESEJAHTERAAN RAKYAT SUNDA

DI HULU CISADANE BUDAK ARULIN

PENCA KELID NGARANNA

GEUS TEU PATI KADENGE KELIDNA

LEUWIH SURUP SILAT CIMANDE DINA CEULI JALMA AYEUNA

PENCA JANG AWAKNA

TALEQ RUHANINA

TEU MASAGI LAMUN ULIN TEU MAKE TALEQ, TALEQ TEU DIKELIDAN

DUANANA CIRINING JALMA ANU SAMPURNA

CISADANE NGOCOR KA BASISIR

HARENGHENG DI BATAVIA PEDAH SI PITUNG JEUNG SI JIIH

DUA JAGO PENCA JADI ULON-ULON NGALAWAN PENJAJAH BALANDA

POTONG BINCURANG NA DIBATEK SIKUNA

CISADANE WALUNGAN CICIREN PARADABAN

NU DIGURAT DINA BATU-BATU JADI PRASASTI

NU NGAJENTREKEUN LAMBARAN NASKAH SAJARAH

NU DIEMBARKAN DI SAWALA JEUNG SAKOLA SANGKAN SISWA KAWANGUN KARAKTERNA

JALMA-JALMA NUSANTARA

MAJU TEKNOLOGINA

SEUEUKUT SENINA

BADIS TEU BEDA JEUNG EUFRAT, TIGRIS, NIL, GANGGA, JEUNG HUANG HO

CISADANE

9.000 TUMBAK MASIH KENEH JADI PANGUPA JIWA

NU MELAK LAUK ATAWA PAMAYANG

CAINA DISURUPUT 26 PARUSAHAAN NAGARA NU NGARANNA PDAM

TAPI CISADANE BANJIR CIMATA

TEU DIRAGANGAN TAPI DIRUNTAHAN

SARAH-SARAH NGAMBANG NGALANGKANG PAJURIWET JEUNG LIMBAH-LIMBAH CAI NU WARNA-

WARNI

TI PAUSAHAAN ASING ATANAPI PRIRIBUMI

CISADANE MOTAH AMARAH

GUNUNG PASIR BULISTIR

TATANGKALAN BEAK DITUARAN

CENAH MAH KAMAJUAN, PANGWANGUNAN, KADANG BAJUNA OGE ECO MAKE WISATA

LAUKNA PARARAEH

KU RUPA-RUPA RACUN JEUNG RUNTAH NU DIBALANGKANGKEUN KASARAKAHAN MANUSA

TUMPUR ARELOT SENGGAL KANCRA NEPIKA KEUYEUPNA

TEU KURANG BARUDAK NU SUKA BUNGAH KOKOJAYAN KUDU JADI PAREPEH, PAEH DIGULUNG CAAH TI
GIRANG SABAB TANGKAL ILANG MUSNA, NYESAKAEUN CIMATA
BOA-BOA WALUNGAN INDIKATOR PARADABAN GEUS SALIN RUPA

JADI GAMBARAN RUSAKNA KARAKTER MANUSA

JEUNG SARAKAHNA PANGWANGUNAN

TANPA NGARIKSA LINGKUNGAN.

CISADANE, 06 NOVEMBER 2021