Dina hiji acara, urang sok ningal aya jalma anu kapapancénan ngatur acara, anu ilahar sok disebut panata acara atawa MC (Master of Ceremony). Pancénna purah nyusun runtuyan acara, nangtukeun sarta ngahaturanan saha-sahana anu midang atawa cacarita dina éta acara. Sagédéngeun panata acara, aya deui anu disebut panumbu catur atawa sok katelah modérator. Ieu ogé pancénna méh sarua, purah ngatur lumangsungna hiji acara. Bédana, panumbu catur mah ilaharna sok dipaké dina acara sawala atawa diskusi. Éta anu dua téh urang sebut baé girang acara, nyaéta jalma anu miboga pancén ngatur lumangsungna hiji acara. conto téks omongan anu sok dihaturkeun ku panata acara atawa panumbu catur 1. Ngahaturanan: Salajengna sim kuring ngahaturanan Sadérék Syifa Rahmawati kanggo maoskeun ayat suci Al Qur’an. Sumangga dihaturanan! 2. Nganuhunkeun: Hatur séwu nuhun ka Pupuhu Panitia, kersana Bapa Drs. Galih Sundana anu parantos ngadugikeun biantara laporanana. 3. Nepikeun koméntar: Sabilulungan, sipat silihrojong. Sipat urang Sunda nu kalintang éndahna. Pamugi kawih anu nembé dihaharingkeun sing nyerep kana angen, sing nitih kana ati sanubari. Dina enggoning diajar urang salamina tiasa silihrojong, silihasih ku pangarti, silihasah ku kabisa, silihasuh ku kaweruh. 4. Mungkas acara: Bapa miwah Ibu, kalih hadirin sadaya anu sami rawuh! Acara Paturay Tineung parantos lekasan. Ti sim kuring, rupina sakitu nu kapihatur. Hapunten bilih aya basa anu kirang merenah. Bobo sapanon carang sapakan, luhur saur bahé carék, mugia kersa ngahapunten. Billahitauik wal hidayah wassalamu’alaikum wr. wb. A. GIRANG ACARA Nu kaasup Girang acara teh aya 2 nyaeta : 1. Panata Acara Panata acara nyaeta jalma anu ngatur susunan hiji acara jeung mingpin atawa ngiringkeun jalanna hiji acara, ti mimiti bubuka nepi ka panutup acara. Dina istilah anu geus umum, panata acara teh hartina sarua jeung MC (Master of Ceremony). Aya sawatara hal anu perlu diperhatikeun ku panata acara sangkan hiji acara bisa sukses. Hal anu perlu diperhatikeun diantarana nyaeta pasemon panata acara kudu gumbira jeung someah, pilihan kecap anu merenah, lentong atawa intonasi anu pas, sarta lafal oge kudu merenah. 2. Panumbu Catur ( Moderator ) Panumbu catur nyaeta jalma anu miboga tugas mingpin jeung ngarahkan lumangsungna hiji acara saperti sawala atawa diskusi, ti mimiti bubuka acara nepi ka panutup acara. Tugas utama panumbu catur dina acara saperti sawala nyaeta ngatur jeung ngarahkeun guneman atawa debat supaya arahna jelas, henteu ka mana-mana.