Maivan Biazai: Salai Marau

http://www.freewebs.com/khiteng/biazaai.htm

[Theihternak: A tanglei biazai pawl hi Salai Marau

sakmi maivan inn chungin lakmi an si. An zapi tein Salai
Marau ngeihmi an si caah hman duh ahcun amah sinah
nawl hal awk a si lai. A m-cakuat khuaivah@yahoo.com
ahhin chimh khawh a si. – C. Van Lian Tu, May 2009]
+++

Na Dinh Hmun
Salai Marau

Zaan thlatang bang

Lei cul ceu dawh lakah
Arfi tia kei ceunak cu
Hmuh awk ttha si hlah hmanh seh
Thlatang vawlei in a tlau ni
Thlakhat ah nikhat tik ah
Vanlai arfi kei cu
Na caah
Ceucin kai tim ko.

Din tikhur bang

Zapi thlanhmi lakah
Hran thawl chung kei dinti cu
Chim awk tlak si hlah hmanh seh
Na hngat din tikhur a reu tik
Tthal ling khua khen tik zongah
Hran thawl chung ti kei cu
Na caah
Ti hal riamtu si kai tim ko.

1
Ngun thap chonmi
Duh cuai run lian sin ah
Arfi relnak kei deu cu
Chim ningzak si ko hmanh seh
Hakkohnak nih run a zelh tik
Dawtnak mangttam a tlun tik zongah
Deu chung kei dawtnak cu
Na caah
Dinh hmun ttha si aa tim ko.

+++

Khuaruahhar Lo Ding Vawlei

Salai Marau

Thingthei pumkhat ruangah

Rul a paw a lawnnak le
Minung sual kan si cu
Zeidah ka khuaruah a har leen.

Aa tthen leeng val hna nih

Zawltling le nganbawm hmang in
Zunn hla an lawi hna cu
Zeidah ka khuaruah a har leen

Ka ttum raan cuang leeng nih

Ngun hnah ukmi vawlei ah
Val dang ttang aa pom cu
Zeidah ka khuaruah a har leen.

2
Mang tum siangrun tual cu
Chim lei hrang thlichia ruangah
Li ral ka liam ko cu
Zeidah ka khuaruah a har leen.

+++

Saantlai Lo Dawtnak
Salai Marau

Kai ruahnak ah
Nga phunthling leennak
Rili pi bang a kau le thukmi
Kei dawtnak hna cu...
Velhle thiam val pa ann toi ah
Uitlak tlonnak
Cirhti hmanh a rak tia lo mu...

Kei nunnak in
Midong these rawnah
Nai dinhnak caah kan sak piakmi
Ka deu thlam te cu...
Kaa chim chuak val pa ngun toi ah
Zil thli dai bang
Na thlan hmanh an daih ter lo mu...

+++
Dawtnak
Salai Marau

Ni ral in
Thla liam hmanh seh...

3
Cun kum zong liam in
Caan thar ser hna hmanh seh.

Dawtmi...
Kan karlak ah zilthli zong
Hrang hlah seh.

+++

Saan A Tlai Lomi

Salai Marau

Ka tlanh khawh lo cirhti

An kulh hauhruang thap nih fekkaw
khuktthi tia lo sakhi kei ca
Cirhput rialti dai kihnak cu
Saan a rak tlai lo ti...

Ka ttawh khawh lo pardawh

Zaangfah ngei lo Khuaingal hraang kaw
Sivai ngei lo, khuaivah kei ca
Hlung hliarmar tizu thlumnak cu
Saan a rak tlai lo ti....

Ka co khawh lo phun sang

Sui ngun ukmi vawlei sikaw
Chaw ttha ngei lo, chiahrin kei ca
Zuamcawh khawh lo kei dawtnak cu
Saan a rak tlai lo ti...

+++

4
Lungsaknak
Salai Marau

Ka dawt......
Hakkohnak in a khatmi,
Vawlei lakah,
Zaang dernak lung he,
Na um lio i,
Na kam in, kei nih
Hnangamnak
Kan pek khawh lo zongah,

Ka dawt..........
Zuam cawhnak in a khatmi,
Pawngkam lakah,
Teinak parborh he,
Na um lio ah,
Na kam in, kei nih,
Lawmhpinak,
Kan pek khawh lo zongah,

Ka dawt.......
Duhtlinlonak in a khatmi,
Sining lakah,
Zawtfah dam lonak he,
Na um lio ah,
Na kam in, kei nih,
Lungtthawnnak,
Kan pek khawh lo zongah,

Ka dawt....
Zuunngeihnak in a khatmi
Mitthli lakah

5
Mithmai chiate he
Na um lio ah
Na kam in, kei nih
Annkaa nem
Kan pek khawh lo zongah

Kan karlak ah....

Tlangza dan liam in le
Mitdong rili chong hmanhseh
Lungsaknak le
Ruahchannak he
Zingnu sin thlaca cam usih.

+++

Timhcia Mei-inn
Salai Marau

Na mitfang ah,
Kei kan dawtnak cu,
Sullam ngei lo si ko seh.

Na rual hawi sinah,

Kei tuahsernak cu,
Zahpi awktlak si ko seh.

Na pawngkam nun ah,

Kei zawnruahnak cu,
Chankal tak cangmi si ko seh.

Ni nikhat,
Caan caankhat ah,

6
Na sin in,
Dawtu an tlau tik,
Nautatnak mit nih an in kulh tik,
Bawm chung vate na si tik.

Na kam ah,
Nuamhnak ni tlan ter ding le
Vanlai arfi zong kamh ding in
Mei inn kai van ko.

+++

Dawh Khun Kei Ca

Salai Marau

Parza run lakah,

Rim hmui cem par si hlah hmanh,
Khuaivah hna caah,
Tlanh khunmi par na si.

Raan cuang na mui nih,

Vahnit sen bang cer hlah hmanh,
Vaal zaa rual caah,
Cat lo cirhti put na si.

Na annkaa rem nih,

Khuaihliti bang thlum hlah hmanh
Mitsir veng val caah,
Fianh khawh lo sullam rak ngei.

+++

7
Duhnak
Salai Marau

Aa khat kho lomi

Tuanbia pahnih
Aa pehtonh kho lomi
Ruahnak pahnih.

A kong fianh cawk loin a tampi

Duhnak
A kong chim khawh loin a thukmi
Duhnak

Cu vialte
A khat lo, a pehtonh lomi
A kong um, a kong um lomi
Dihlak in kan duh.

Duhnak timi cu
Ka caah
A thlum
A thak
A thur
Sihmanhseh
Kaa hnek khawhlo a um lo.

+++

Zaan Khat Kong

Salai Marau

Zaangfahnak a ngei lomi

Ralkap kedan

8
Cungah a pil kho lomi
Rasen buh
Dawtmi sin in lungthiang tein a chuakmi
Tthennak bia
Cun
Cu thinglung dihlak ruangah
Zaankhat cu ding rih lang.

+++

Rak Um Hlah Sehlaw

Salai Marau

Ti um hlah sehlaw
Nga a um hnga lo.
Thli um hlah sehlaw
Nunnak a um hnga lo.
Ruahchannak um hlah sehlaw
Zuam duhnak a um hnga lo.
Asinain
Keimah um hlah ninglaw
Vawlei a zei a poi hnga lo.
Nain
Pakhat nu te rak um hlah sehlaw
Ka nun zei san a tlai hnga lo.

+++

A Mah Ruang
Salai Marau

A hnit ruangah
A vok ka ttih lo.

9
A ruh ruangah
A kei ka ttih lo.
A par ruangah
A hling ka ttih lo.
A mui ruangah
A velhle ka ttih lo.

+++

Ka Ttah Hla
Salai Marau

Zoh cim lo raan cuang na mui ttial he

An sak biak run chung ttheng cung ah
Rang zirziar hmaikhuh puanzaar toi i
Ttial ririai nang mitmu khuah nih
Zoh rem lonak thimfang tia um lo.

Na khundim ni, mopa maw rual ti'n

An remh nan run inn tual zawn i
Conglawmh kut zattial tlai tu zaa sin
Pang sirsiar na annkaa dawh nih
Cat lo tlangcung cirti put na hluan.

Zeihngal lo khuktthi rual hawi hna i

Sungkhun vawlei an ti lio ah
Mit thli dor he zattial kan tlaih kha
Mithli ukmi nang mitmu cu
Vacek ti reu takmi nga te bang.

Hei cuan tuah lang muisung ka dawt ti'h

Na co val ttha ttang nem tangah
Zoh rem lonak tthim tia um lo

10
Sianlo dawt khun mangttha ti lo le
Ka caah zei biafang dah um ti.

+++

Zeidah San A Tlai Hnga?

Salai Marau

Khuaisik vurtlap tangah

Zing ni ceu linhnak cu
Zeidah san a tlai hnga?

Chum khuhmi vawlei caah

Thlataang ceunak cu
Zeidah san a tlai hnga?

Velhlei ukmi vawlei caah

Zaan mang tonnak hna cu
Zeidah san a tlai hnga?

Hlawt cangmi kei caah

Mitthli fim hna cu
Zeidah san a tlai hnga?

Zohchuknak mit tangah

Kei dawtnak hna cu
Zeidah san a tlai hnga?

+++

11
Ciam (Thih)
Salai Marau

Ka sianlo
Ka sazuk no te
Ka remh tlintling cungah
In thlim ai ing.
Na ta tilim no,
Ka ngen phunca
Ralhran duh ai ri.

Sianlo dawtkhun
Ka ta tilim no aw ti'n
Tlintling cungin
Zatlang cul ttahhla lawh ai maw
Zeitin mawh hnga,
A ta tilim no,
Aa ngen phun caah,
Lei dai ciam hnu cun...

+++

Na Nunnak Cu Ka Nunnak
Salai Marau

Mi liangluang nih
Ciam ser tuan maw
Leidai tangah.

Aa daw leng le vaal hna nih

Ttian riangmang tawn hna maw
Mitthli rual he...

12
Van ninu ceu bel nih
Hmun zungzal maw
Vanraang toi ah.

Minu te,
Nang le kei cu....
Leidai tang ciamser
Nunnak bang si hlah usih.
Cun.....
Mithli rual he
Ttianzaai reel
Aa daw leeng le vaal bang si hlah usih.

Pum pumkhat ah
Ruahnak pakhat ah
Timhmi pakhat ah
Nunnak pakhat ah
Na nunnak cu ka nunnak.

A hmun lomi
Caan le sining ruangah
Aa thlengmi si hlah usih mu..
Iang Hlei Khun Minu te...

+++

CAAN
Salai Marau

Mah ngeihmi thingthei nakin

Mi ngeihmi thingthei a thaw deuh.
Hmaika ah 'caan' aa hun tikah
A sunlawinak hmuh khawh a si lo.

13
A liam hnu ceu ah chir thahnem lo
Khuazung cul in kawl le
Zatlang nuamhhmun zong cul usih
A liam cangmi "Caan"
Hmuh khawh a si ti lo.

Hung kir tthan ho, ti'n

Au leen zongah zeisaan tlai ti hlah
Ann-kaa lehrul um ti lo.

A luan liomi tiva

Voihnih tan khawh si phung hlah
A liam ciami caan
La bang zelh awk tha hin hlah
Maw...
"Caan..... caan..."

+++
Khuaruah Harmi
Salai Marau

"O" timi cafang cu

mirang saya nih "Zero" a ti
Kanaan(math) saya nih, "Circle" a te ve
Cutikah
Hngachiapa te cu a lu aa kheuh.

ka nu nih
Tainamkawng le arsa ei ti cu
Rul cannak a ka ti
Ka pa nih
Zeithilpaoh hi
Na tuah hlan in ruat hmasa, a ti ve

14
Cutikah
Kei cu ka lu kai kheuh.

(Kaung Htant ttialmi chungin ka lak bang)

+++

THIH
Salai Marau

Vate pakhat,
Rawl kawlnak ah
A thi...
A nunnak caah a si.
Sihmanh sehlaw
Bawm chung i zuat va
zei ruangah si lo
Bawm chung sawh ah thih cu
A va poi dah!

Minung pakhat
Pawpi, Miphun, Pathian caah
A thi....
A thih phu hrim a si.
Sihmanh sehlaw
Paw ca silo
Miphun ca silo
Pathian ca si lo
A sawhsawh ah
Thihnak ton cu
A va poi dah!

[Kaung Thant tialmi chungin lak bangmi a si.]

15
+++

Nunnak
Salai Marau

Ka ttawh khawh lo par ruangah

Ka mitthli a tla.
A hmun lomi thil ruangah
Ka hak a kau.
A dih colh dingmi lawmhnak ruangah
Nuamnak ka kawl.

Tthutdan um lo huham ruangah

Thisen a luang.
A dong lo lam cungah
Kar hlan a si.
Tei khawh lo ral hmun ah
Ral tuk a si.
Di riam kho lo thinlung nih
Hmunhma a kawl peng

Cucu
Nu paw chungin
Harnak phunkip he
Kan chuah hnawhmi
Nunnak!

+++

16
Vawlei
Salai Marau

Ni cu a chuak i
A liam tthan.
Caan cu a thar i
A tthing tthan.
Nunnak cu pinpalo in a cang i
pingpalo ah a kir tthan.

Ser thil dihlak

An hmun cio ah an kir.
"O" pum bang
Umnak bon ah.

Cucaah
Vawlei cu a pum i
Pakpalawng a rak sinak a lang

+++

CHRISTMAS THLA HUNG CHUAH CUN

Salai Marau

- A dai bikmi zaan in

Zai hla sak thawng rung awn
Hlau maw, Innkil sapang tar nupa tiang in...
Hngah hlang Christmas thla rung chuah cun.

- A thiangbikmi zaan in
Ianghlei vanmi run rim hung hmui
Tuai hna, dai lo lungzaa rual hna cu.......
Hngahhlang Christmas thla run chuah cun.

17
- A kik bikmi zaan in
Hnger khun zaai phur zilthli hna nih
Dong hna, ser hmelchunh thil hna cu...
Hngahlang Chrsitmas thla hung thar cun.

+++

Na Caah...
Salai Marau

Mithli hi
Biafang si hna sehlaw
Na caah
Ka thlakmi mithli hna hi
Zei biafang nih dah a zawh ti hnga.

Zuamnak hi
Mit hmai ttha hmuhnak si sehlaw
Na caah
Van lai arfi hmanh
Na hmai hun dingin kan kamh hnga

Pekchanhnak hi
Ngun hnah si hna sehlaw
Na caah
Kai pekchanh ngamnak hi
Zei ngunsawm val nih a dirh ngam hnga.

Tuar-innak hi
Teinak si hna sehlaw
Na caah

18
Ka tuar-in ngamnak hi
Zei ral lian nihdah a kham khawh hnga

+++

Lam
Salai Marau

Vam awng thli nih

Vampang Calender a chawih
Van khuari nih
Ningttih a hruai
Asinain
Vampang Suimilam te cu
A kal kel a kal peng ko.

Mi cu chukcho an kal
Thli cu
Hmunkip hawih in a hrang
Asinain
Tiva te cu
A luan kel in a luang peng ko.

Nunnak chungah
Rel cawk lo harnak
Lungdonghnak nih a heel
Asinain
Kai siammi lam te cu
Ka zulh kel ka zulh peng ko lai.

+++

19
Duhnak Kong
Salai Marau

Nanghe tling tling khat

Puan zuun khat
Hrawmnak dingah
Thingparsang aw theng na ngen maw?

"Dawtnak" timi sullam tlinnak ah

Hawi bang...
Aw hla dawh tlem kho hlah ning
Kei thiam tawk
"Vaw hla' aw te zonghi
Kei nih kan lungkek kuai tiangin ka sakmi le
Ka thinlung dihlak pekin ka sakmi
Hla a rak si.
Lung ka sak piak hram tiin...

+++

Lakhruak Biazaai
Salai Marau

Na mui hoi lai le

Tlemcia biafang tlinh awk ah...
A hlat bikmi lam in
Ka hung ra.

Fingrei cah hlan in

Kai thawh ko nain...
Ka kehlan maw a fum tuk
Caan hme a liam a awl khun.

20
Phurh cawk lo dawtnak mang hna he
Ka hngah hlang dawt khun cu
A co val run toi ah sem a rak cawi ai.

Ruahchannak mitthlam hna

A ne um loin ka suah cangmi dawtnak thinlung hna
Ho leengnu ca hmanh ah a tang ti lo.

Khawi maw...
Dawtnak rawl dumtti dingin le
Duhbia phai tti dingin
Khawimaw ka dawt, ti'n
Ka hram zawn ah
Ka kam ah
Hnemtu an um ti lo.

+++

Duhnak Vanchia
Salai Marau

Kan Duhnak biazaai phai lai ruah ah

Nan rundai zalam ka zawh zawn
Samsawm nak hna cu
Zaan dap ruah nih
Ciarh in surh dih tawn hna
Tongh khawh mui lakah

Hmanhseh......

Nangvang ah
Zeitin khuari vangtam ka kianh hnga

21
Nangvang ah
Zeitin Doral lian zong ka kianh lai.

Nang ttangnem dor khawhnak ah

Biazaai zaa he ttim zaa hlawi in
duhtin cuai zawn ah
A khat lomi
Sining pahnih ruangah
Ttah-ha mangh a tam.

Hmanhseh....

Phoihcia biar
Zeitin kaih leen ser nolh ti hnga
Ttemcia tlah
Zeitin phoih leen ser nolh ti lai.

Nain...
Sunghno nupa ngeenmi
Ngunsawm ruangah...
Tu cu...
Zaangmang an ttian
Khuadi an lo

+++

Hringtu Ka Nu
Salai Marau

Nuamh zaa hmum ah

Duhtin cuai in
Ka vah zawn ah
Zaan khua ttim tiang

22
Hngilh zai rel lo'n
Mitthli dor he
Thlazaa cam piaktu
Hringtu Ka Nu

Sunghno runtoi chuak'n

Sunghno ttangnem tthen'n
Tlangza liam zawn ah
Hrinfa ngaih in
Sik dap tlakmi
Hramh caar khi bang
Lu zamsai tiang
Par dih cangmu
Hringtu Ka Nu

Ka nu
Capar tonh lo na si.
Na'n
Kei caah
Nanghlei capar tonhtu um hlah.

Ka nu
Na mui zong a chia ko
Nain
Kei mit ah
Na mui ho nih iang kho hlah.

Ka nu
Na sam a par
Na hmai sawng
Na lung a lo
Cu vialte cu
Keimah kong

23
Na ruah ruangah a si lo maw?

+++

Sunghno Nu Dawtnak
Salai Marau

Nihchuak ah ka rak ruahmi,

Sunghno nu chimhhrin bia,
A tu ahcun....
Ka hnakhaw nih,
Theih a duh bikmi biafang an si cang.

Chung a rak pil ter lotu,

Sunghno nu chuanrawl hna,
A tu ahcun...
Ka awr nih,
Ei a duh bikmi chuanrawl a si cang.

Run hlumh ka huam lo bikmi

Sunghno nu sakhnem run,
A tu ahcun....
Ka thinlung nih,
A ngeih bikmi rundawh a si cang.

+++

Thli Sawhsawh Te
Salai Marau

Nunnak le thihnak ah
Bia a khiak khotu cu
"Thaw" timi thli sawhsawh te a si.

24
"Na thaw paam"
tiin ka rak ti tawnmi
Ka nu chimhhrinnak bia hna
A ngai tiah cun
Ka thihnak, ka nunnak ah
Bia a rak khiak khotu
"Thaw" timi thli sawhsawh te a rak si ve.

+++

Duhnak Fek
Salai Marau

Catlap rang cung i

suai chommi palep nih
zeitin ..?
thla sarh in
a zuan khawh hnga..

Cirh lak a pil cangmi

ka thinlung
suiluchin a chinh tertu ruahchannak,
na tang nem ka phak hnu cun
zeitin...?
ka chuah khawh ve ti hnga..

+++

25
Philh Khawh Lomi
Salai Marau

Ti ngahrang kan dawi lio i

Na samfa in na cheu mi arti met
Bancang hnah in na tuammi ka chungcaw

Na run in kan leen zawn i

Na suiter la in na temmi na kuak zual
Na mit sen dih in na chemmi nan thingthu

Nan thing kan ceh zawn i

Lakphati sen he na kan pekmi na thanthling ril
Thlan tipi a daih tertu na ann nem

Cu hna cu
Tlang tlangkua, Van kil deng zong phan ninglaw
Ka philh kho hnga maw?

(Valentine's Day hrangah...)

+++

Ingsa (Homework) Taktak

Salai Marau

Sam sawm ainak ciar in

nan run hlei ka panh zawn ah
Na tum vairang ca rel thawng nih
nan run hlei hlang ngam loin
ka um a tam.

26
Kei rat that cem chuah in,
nangsin kan duhnak ann dor thla lai
ka ti zawn ah
nan uico bo thawng nih
kai lung thulh a tam.

Nangmah duh ruang,

Nan uico chim lo,
nan ra, nan vok tiang in
ka zah hna.

Nang nih na uiho langh in

na ka mirh sawhmi zong
kei ca'h cun
zaan khua mawt tiang
hngilh thiam an ka tuah.
Sullam phunphun a ka tuak ter.
ka caah cun
ingsa taktak a rak si.

+++

Nungak Leen
Salai Marau

Tapchak ah ngaknu a thu

Tapti khat in val rual kan i kulh
Biaphong an deng kan deng cio
Ann dawh an hlawi kan hlawi cio
BIazaai an reel kan reel cio
Asinain
Ngaknu i a tlangval pa te cu
Tapchak ah daiziar a to.

27
+++

Thong
Salai Marau

Chim a pit,
van a sang
khua a mui,
Ruahnak a bi.

Cun... Cun..
ka kiangah theihlo minung lawngte
ka hnu, ka hmai ah thir vampang

Awngkua in khua ka cuan

Leng i, a per dedet mi Pithlung vate
Ka lungchungah
Pitlung tluk lo minung sinak
Thong...thong tlak hi..

(Malaysia i laimi thongtlami philhlonak he)

+++

Duhnak Hrut
Salai Marau

Hi duhnak kongah mihrut ka si nak

A senci thawl te hi ka hawikom a si peng lai maw?

Zah phek tha lo lawng pakhat

Riahnak a ngei lomi riaklang va

28
Sullam ngei lo ka biazaai

Duhnak konga ruahchannak

A mui hmanh kai fiang ti lo.
Ka caah,
Duhnak cu vamkam hau kulh bang a si.

Si a vang
Lu a ri
Nuamhnak a tlau
Duhnak kongah mihrut pa.

+++

Zeidah A Thar Um Ti
Salai Marau

Ka tum leeng sin in

Lung kop lo
Thennak ann dor tlak hnu
Ka caah
Mitthli dor he
Sunghno run panh ti lo cun
Zeidah a tang ti hnga.

Ka sunh bikmi mang sung sin'n

A caah...
Kei.....cu..
Neh kai ai cang rua
Puan bang suk awk nih that ttung lo.

Dawtnak par dum chungah

Dawtnak rim a hmui ti lo.

29
Ka caah
zei dah a thar ti hnga.

+++

Tahfung
Salai Marau

Ka cung i na tahfung nih

A leenglang umtu
Ngol a ka fial.
Cucaah
Na tahfung ah
Ka tling lo.
Na cuai kheeng ah
Ka khiing a ner.
Sihmah sehlaw
Mit hmuh khawh lomi
Thinlung in
Na caah
Ka nunnak tiang
Ka rak in pek ngamnak hna cu
Na ka tahnak
Tahfung tangah
Na zoh duh lomi
Cirhcet bang a rak si.
Cucaah
Kei cu..
Ka hnu na ka chit i,
Na tahfung tling dingmi
Val na kawl.
+++

30