Şəxsiyyət haqqında nəzəriyyələr onun tipologiyasının
əsası kimi. Şəxsiyyət—keçmjşin şüursuz meyillərinin və gələcəyə şüurlu canatmaların indiki zamanda ifadə vasitəsidir. Bu baxımdan şəxsiyyətin tipologiyası insanın özünüifadə vasitələrinin də tipologiyasını, alətlərin də fərqləndirilməsini nəzərdə tutur. Şəxsiyyət tipologiyası real zaman rejimində psixikada şüursuzluqla şüurun vəhdətini yaradan vasitələrlə bağlı təsəvvürlərimizi yetərincə dolğun əks etdirir. Fəlsəfi və metodoloji yanaşmadan aslı olaraq müəllimlər psixikada gah şüursuzluğa, gah da şüura üstünlük verməklə müxtəlif mövqelər tutublar. Çox vaxt şüursuzluqla şüur arasında mübarizə bir tərəfin qələbəsi ilə bitir. Şəxsiyyət nəzəriyyələri arasında insan psixikasının həm şüursuz, həm də şüurlutendensiyalarının rolunu nəzərə alanlar da var. Bunlardan hər biri sonucda şəxsiyyətin ya Freydsayağı, ya da vuntvari yozumuna söykənməklə şüurlu-şüursuz dilemmasını ya birincinin, ya da ikincinin xeyrinə həll edib. İnsan psixologiyasının bütün bəlli fenomenləri arasında yalnız ikisi müstəsna rol oynayır: yaradıcılıq və şəxsiyyət. Yaradıcılıqda insanın şüursuz və şüurlu meyillərinə həmişə yer var, lakin burada onlar əməkdaşlıq etməkdən çox rəqabət aparır. Şəxsiyyət isə alətlər dəsti kimi, vasitə kimi özündə şüursuzluğun bütün dərinliyini və şüurun hüdudsuzluğunu istənilən başqa bir insan fenomenində daha çox birləşdirə bilər. Əgər şəxsiyyət ifadə vasitəsidirsə, onda şəxsiyyət nəzəriyyələri də psixoloji fenomenlərin müxtəlif ifadə üsullarını, təzahürlərini təsvir edir. Bu müddəa belə bir hipotez irəli sürməyə imkan verir ki, psixoloq-alimlərin işləyib hazırladıqları çoxsaylı şəxsiyyət nəzəriyyələri mahiyyətcə müxtəlif şəxsiyyət tiplərinin, yaxud özünüifadə üsullarının təsvirindən başqa bir şey deyil. İnsanın şəxsiyyətində altı strukturlayıcı element var: İblis, Şeytan, Qeyri-Mən, Mən, Peyğəmbər və Allah.