AMAH CHIBAI BUK TURIN KAN LO KAL A NI

Khaw chhak mi fingte’n Jerusalem an lo thlen khan, “Khawiah nge Judate Lal lo piang chu? Khaw
chhak lamah a arsi kan hmu a, amah chibai buk turin kan lo kal a ni” (Mt2:1-2) an ti a.

He thu hian tun hnai mai hian min khawih ve tlat mai a. Min chhandamtu pian cham lawm tura kan
inbuatsaih mup mup lai hian, Pathian chibai bukna tak taka min khalh luttu a nih beiseiin, kan thupui
hi a hnuaia point ṭhen hrang hrang hmang hian kan zir ho dawn a ni.

Pathian chibai buk:

Mt 2:2 thu a ‘Chibai buk’ tih hi sapṭawng Bible ṭhenkhat chuan ‘to pay homage’ (NRSV), mizo
ṭawngin – vantlang hriata zahna thuk tak lan tir; tih te, ‘to worship’ (NKJV,LB,etc) – Pathian
chawimawina; zahna thuk tak nena hlan, inphah hnuaina rilru leh inpumpekna nena Pathian hma a
tluk luhna, etc tihte a ni a. Ṭawng bungrua kan neih hleih dan azirin a hrilhfiahna hi a inang lo nual
thei ang.

Mi nazawngin a an hrilhfiah mai theih loh ‘ mihringin a siamtu Pathian hnena zahna leh inpumpekna
duhawm ber a hlan’ dan hi khawchhak mi fing ten ‘Isua chibai buk an duh zia’ leh ‘chibai bukna nun
an neih thuk dan’ aṭangin kan zir ang a. Mathaia bung 2 aṭang hian kan duh lai chang, kan thu zir
tifiah tur thu ṭhenkhat kan thlang chhuak dawn a ni.

i) Khawchhak lam ata mi fingte Jerusalem khuaah an lo kal a (Mt 2:1)

‘Khawchhak lam ata’ (from the east) tih hian mi fingte lo kalna ‘hlat leh hlat loh’ chungchang hi
rinthu mai lo chuan a hrilhfiah zo lo. Amaherawh chu, he thuin chiang taka min hrilh chu;

- Isua chibai buk tur hian tha leh zung sengin an thawk chhuak.

- Kalsan neiin ‘Isua chibai buk turin’ an inpe.

- Inhlanna - ṭawngkam dangin; mahni inkalsanna thuk tak nen chibai buk tur-a(Isua) hi an pan a ni.

ii) “Khawiah nge Judate Lal lo piang chu?” (Mt 2:2)

Mi fing ten Jerusalema tute maw an zawhna a ni. A thu ang ngau ngau chuan a ho viau a, mahse he
thu/zawhna hian ‘Isua chibai buk tura mi fingte tih tak tak zia’ hai rual lovin min hrilh a ni.
- Chibai buk an tum ber hi an la hmu mai lo. A awmzia chu an rilruin a beisei chhanna hi an la tawng
fuh lo. Chuvang chuan an kiang vela mite ‘puihna’ beiseiin ‘zawhna’ hial an siam a, an mamawh
chhanna hmu tur hian a zawn hian an zawng a ni.

- An rilru leh thlarau lam duhthusam tawng tur hian an ‘ṭhu thluang’ ngawt lo va, mi hriat lovin a
rukin an dap hek lo va, ‘an duh luatna’ hian a lang a pauvin a dap tir em ni? Tihte pawh a ngaihtuah
theih hial mai.

- An beisei hmu chhuak tur hian, tihtak zetin a kawng awm thei apiang an dap a ang hle a ni.

iii) An ro bawmte an hawng a, a hnenah chuan lawman – rangkachak te, beraw te, murate an pe a
(Mt2:11)

He lai thu a kan chhinchhiah bik atan ka duh chu – naute hnena an thilpek phena thu awm ‘Isua
chibai buk tura an rilru an lo buatsaih lawk dan’ hi a ni.

Isua chibai buk tur hian eng tiang taka hla aṭanga lo kal nge an nih kan hriatpui kilkel lo va. Tin, an lo
chhuah ṭan dan leh khualzin kawng an zawh laia bul an ṭan dan pawh kan hre hek lo. Amaherawh
chu thil pakhat hriatpui theih kan nei, chu chu – An hmu dawn nge dawn lo tih pawh an hriat hma(?)
hauh khan, an hmuh hun hun a ‘thilpek tur’ an lo ruahman lawk vek tawh a ni. Chu chuan thil
pawimawh kentel dang a neih a, chungte chu;

- Isua chibai buk tur hian bul ṭanna dik a pawimawh.

- Kan inbuatsaih lawk dan hian ‘chibai kan buk tura’ chunga kan rilru put dan min tarlan sak ṭhin.

- Isua tana an neih hlu ber zing ami an serh hrang hian, chibai an buk tuma hi an dah chungnun zia,
an mahniah ‘hmun laili’ (centrality) Isuan a chan zia a tarlang chiang viau a ni.

Tichuan, he tiang khawp a inbuatsaihna leh riru pu chung hian mi fingte khan Jerisalem khua an lo
lut a – “Khawnge Judate Lal lo piang chu?….AMAH CHIBAI BUK TURIN KAN LO KAL A NI” an ti ta a ni.

Heroda Chibai buk tum dan:

A thu kan bel em em nain, mifingte leh Heroda chibai buk tum dan khaikhinna hi kawng hnih khat
tarlang tel i la, Heroda chuan;

- A nihna (self-image)humhim tum ranin, Isua chibai buk tumnaah hian a inrawlh a.
- Tisa thil takin Isua hi dawr a tum a, mahni dinhmun phet (kalsan) duhna rilru kan hmu lo.

- Isua Lalna leh thuneihna pawm hauh si lovin chibai buk ve a tum a.

- Isua ni lovin, mahni laili-ah (celtral-ah) indah ranin Isua a beisei.

Khawikhawmna:

Heroda inbuatsaihna anga inbuatsaihna hian – tumah Krista hnen min hruai thleng ngai lo va;
Pathian chibai buk kan tum dan pawh hian ‘Pa lungawina’ chu sawi loh, keimahni lam lungawina
takngial pawh hi min thlen zo lo a ni. Mi fingte’n, “Amah chibai buk turin kan lo kal a ni” an tih hi
chuan - inpekna tluantling (commitment) a keng tel a, inhlanna (submission) te, mahni inkalsan nun
(self-denial) te, tihtakzetna (sincerity) te, beiseina tluantling (full expectation) te, Isua laipui a dahna
(centreality of Christ) te a keng tel a ni.

Rilru tak takin – “Amah chibai buk turin thutlukna ka siam a ni” ti ve thei i la, chu thutlukna leh
inbuatsaihna chuan ‘kan chhandamtu’ lungawina hi a thlen ngei ang.