ISHENGERO RY’INGENZI

28. MUNYONYO.2021

IMIGANI 2.1-22

Umwigisha : Pacifique IBONAVYOSE

Ndabakiriye mwese, ndabakirira muri kino gitabo mu migani kabiri abashitsi n’abasangwa
karibu mwese muri kino kibanza, muri uno mwanya wambere wo guhimbaza, ariko imbere
y’uko nsoma nuko muri kino gitondo Imana yaduteye iteka ntangere kuba muri kino
kibanza. Twaje guhimbaza Imana, Imana yuzuye ubwenge bwakabura rugero Imana irimwo
ubwenge yahishuye muri Kristo Yesu ariwe bwenge bukiza, ubwenge burimwo agakiza kose
kabonekera mu Mwana wayo yarungitse akaza kudupfira nkuko bahejeje kubiririmba ko
yajondamitswe umutwe n’ivyaha vyacu. Dusome :

« mwana wanje niwemera amajambo yanje, ukabika amabwirizwa yanje muri wewe,
bigatuma utega ugutwi ubwenge, ugashira umutima kugutahura, mbere niwahamagara
ubwenge, ugashira ijwi hejuru uririra ugutahura, niwaburondera nk ifeza, ukabusesangura
nk’uwurondera inzahabu zanyegejwe, niho uzotahura kwubaha Uhoraho ukwari kwo ;
ukaronka ukumenya Imana. Kuko Uhoraho atanga ubwenge, mukanwa kiwe havamwo
ukumenya no gutahura. Abikira abagorortsi ubwenge buroranye, niwe nkinzo yabagenda
batunganye kugira ngo arinde inzira zimanza ziroranye kandi azigame urugendo
rwabayoboke biwe. Niho uzotahura ubugororotsi n’imanza ziroranye, n’ibitunganye mbere
n’inzira nziza yose. Kuko ubwenge buzokwinjira mu mutima wawe, kandi ukumenya
kuzohimbara ubugingo bwawe. Amakenga azoguteramira, ugutahura kuzokuzigama ngo
bigukize inzira y’ikibi n’abantu badadika bata inzira zo kugororoka ngo bagendere mu nzira
z’umuzimagiza, banezerererwa gukora ikibi, bahimbarwa n’ibibi vyabo. Inzira zabo
ziragoramanze, n’ingendo zabo n’izinguzingu. Kandi ngo bigukize umugore
w’umusambanyikazi mbere bigukize umugore w’umunyamahangakazi, ahemanisha
amajambo yiwe. Yataye umukunzi wo mu buto bwiwe, yibagiye isezerano ry’Imana yiwe
kuko inzu yiwe ihengamiye mu rupfu kandi inzira ziwe zija mubapfuye. Abaja iwe ntaho
bazokwigera bagaruka namba kandi ntibashikira inzira z’ubugingo. Niho uzogendera mu
nzira z’abantu bameze neza, ukitondera inzira z’abagororotsi. Kuko abagororotsi
bazokwibera mu gihugu kandi abatunganye bazokwamayo. Ariko abanyavyaha
bazoherengetezwa mw’isi, kandi abaguranyi bazorandurwa muriyo »

Reka nsenge : Mana wadukoranije hano, ndasenga ngo utuzibure amatwi y’imitima yacu
kugira ngo twumve ivyo ubwenge bwawe. Amaso y’imitima yacu uyahumure kugira tubone
ubwiza n’agaciro k’ubwenge bwawe muri Kristo Yesu. Amina.

Igitabo c’imigani gisa nkaho kiba kigoye gatoya kubera ivyiyumviro bigenda birinjiranamwo
ariko, iyumuntu yicaye afashijwe na Mpwemu arashobora kubona ico Imana iriko irashaka
kuvuga kandi iki gitabo kivuga ubutumwa bwiza bwa Kristo, iki gitabo ni ubutumwa bwiza
bwa Kristo bwuzuye. Rero muri ino ndwi ndiko ndagerageza kugira tuzoronke umugisha muri
kino gitabo, wo guhimbaza Imana biciye muri Kristo Yesu muri kino gice narabonye y’uko ico
Imana ishaka kutuganiriza kwari uko ubwenge buhari. Ubwenge burahari, ubwenge ni ubwo
kwipfuzwa, ubwenge buraronderwa kandi Imana irabutanga kubantu bayo. Kandi abo
yabuhaye barama. Ndiko ndasoma nagerageje gucamwo ibice bibiri, kuva kumurongo wa
mbere gushika kuwindwi, aho hari impanuro yo kurondera ubwenge n’agaciro kabwo naho
buva. Igice gisigaye kuva kuri munani gushika kuri ibiri na kabiri, ni ivyamwa vy’abafise ubwo
bwenge, ni ivyamwa vy’ababurondeye. Tuje kucambere, umwanditsi wa kino gitabo agomba
kudufasha, gutazira muri kino gitondo atweretse agaciro k’ubwenge. Usomye kuva
kumurongo wa mbere gushika kuwa gatatu, turabona yuko ubwenge ari ikintu kidasanzwe,
arakoresha amavuga avuga ngo : niwemera amajambo yanje, niwabika mu mutima
amabwirizwa yanje, niyo watega ugutwi ivyagezwe vyanje, niwashira umutima kw Ijambo
ryanje, niyo wahamagara ubwenge ukaburirira cane, ukaburondera, uzoburonka. Turiko
turasoma ngaha turabona yuko buronderwa, ubwenge bwose n’umutima wose n’inguvu
zose. Turavye amavuga yakoresheje. Kandi isezerano nuko mu murongo wa gatandatu
nuwindwi, Imana irabutanga. Imana niyo nyene bwo kandi yama yiteguriye kubutanga minsi
yose. Tukigeze ngaha, umuntu yokwiyumvira ati : mbega kurondera ubwo bwenge
n’umutima wose mbega bifise akamaro akahe ? nta muntu numwe ashobora kurondera
ikintu kiretse gusa iyaba azi akamaro kaco, iyaba azi ico aza gukuramwo. Je mu minsi iheze
narataye karangamuntu, iyo karangamuntu twarayirondeye turayibura, noneho jewe
ndavuga, uwo tubana ndamubwira nti : je ko ndondeye gatoya nkabura, wewe shishikara
urondera. Ararondera hose muga ntiyigeze ayitora. Ikibazo ni kubera iki twarondera iyo
karanga muntu ? igituma niki ? karangamuntu irafise ico imaze mu buzima bw’umuntu iyo
umuntu ayifise, afita sécurité, iyo umuntu ayifise yumva kwari mu mwidegemvyo, agandana
amahoro nituze mu mutima kuko abapolisi iyo baguhagaritse udafise karangamuntu,
ucutangura kujugumira, ariko iyo uyifise, ugenda wumva ufise umwidegemvyo. Ugenda
wumva atacogukomanga, ubuzi uti aho baza kumbariza « wewe uva hehe he, uri uwo kwa
nde, uri uwahe, uba hehe ? » uba ufise ico uza kwerekana. Rero hariho icatuma tuyirondera,
uwo twubakanye yagira ati azogenda ntazogaruka, canke nzoja kumukura muri prison, nanje
nagendana ubwoba nkavuga nti, hazohava hambabirako. ninako bimeze k'ubwenge,
ubwenge nta muntu ashobora kuburondera atazi agaciro kabwo, atazi ico bumaze. Uyu
mwanditsi ariko atubwira ngo ni ubwo kurondera, ni ubwo kwipfuza, nubwo guhamagara,
mugabo agaciro kabwo kumurongo wa kane ngo karuta ifeza n’inzahabu. Kandi ngo ico
bumaze ni uko buduhesha kumenya Imana. Kumurongo wa gatanu nuiwagatandatu :
kuyikunda, kuyitinya. Uku kuyitinya si kwakuntu muhura nakayabu gacarutse mw’ijoro
usanzwe utinya, canke n’ikindi kintu ugaca ugomba kumera nk’uwinyegeza, oyaye. Uku
gutinya Uhoraho duheshwa n’ubwenge, mw’Ijambo ryayo, ni ukwubaha, ni ugukunda, ni
ukwizigira aho usanga umuntu agendana ico Imana iri, kubera ubwenge bwabi muhesheje.
Ubu bwenge bubonekera mw’Ijambo ry’Imana, niko umwanditsi w’imigani yatubwiye. Ati
bubonekera mw’Ijambo ry’Imana kandi umuntu abukunda wese akunda ijambo ryayo.
Ntushobora kuvuga ngo urakunda ubwenge nkubu ariko aravuga umwanditsi w’imigani
atubwira ati bubonerwa mw’Ijambo ry’Imana muri kino gitabo. Iki gitabo rero cose ni
ubwenge bw’Imana.

Ico bwama : bwama ubugingo, nsomye umurongo wumunani, turabona yuko burama
kwirinda kubantu babufise, burazana umunezero wo gutinya Uhoraho, umurongo wicumi,
burakurinda umurongo wa cumi na gatatu gushika kuwa cumi nagatanu. Ubu bwenge buva
ku Mana burakurinda abagenzi babi, buguhesha kumenya ingene ubana nabantu babi mu
buryo buhesha Imana icubahiro. Ikindi naco, burakiza, bukiza umugore w’ikirara n’umugore
w’umunyamahanga. Inzira ziwe zigondeye mu rupfu, inzira ziwe zija mu mahonero, abaja
iwe, batigera basubira kugaruka. muyandi majambo, ubu bwenge buva ku Mana budukiza
ihengamiro ribi ry’umutima. Yatanze ikigereranyo kimwe c’umugore, nk’igiserukira
ihengamiro ribi ry’umutima w’umuntu. Ivyifuzo vy’amaso, ivyipfuzo vy’umubiri, uruhendo
rw’ubu bugingo, ubu bwenge burabidukiza. Abadafise buno bwenge, ubutumwa bwiza ni
ugucirirwako urubanza umurongo wa mirongwibiri na rimwe na mirongwibiri na kabiri.
Abantu badafise buno bwenge, amaherezo yabo ni kuzimu, bazoja aho batazogaruka, abafise
buno bwenge buzobahesha kuba mu gihugu ibihe bidashira baruhutse. Ubu bwenge bwama
akaruhuko, muri bino bihe no mubizoza. Ikibazo ni mbega urabufise ? niwavuga uti ndafise
buno bwenge azoba yishuye ngo ndatinya Uhoraho, ndakunda Uhoraho, Imana, ndakunda
igitabo c’Imana. Mbega burondererwa hehe ? burondererwa ku Mana ngo « ibubikira
abagororortsi kumurongo w’indwi » jewe igihe nata karangamuntu nagiye kuyirondera aho
mu kanyosha noku declara, kuko nzi ko ariho ironkeka, buno bwenge niwicara ngo
wiyumvire umunsi umwe ngo uze usanga ngo bwaraje, ikigega cabwo ni Imana yoi nyene
ubwayo, umurongo windwi. Buva hehe ? buva ku Mana. none kumwanditsi wa zaburi ariko
atubwira ngo tuburondere birakunda ? neza cane. Ngo ibubikira abagorortsi. Mwumvirize,
abantu barondera buno bwenge ni ababa barabuhawe. Ntamuntu yipfuza kurya canke
kunywa ku kintu atarumva ngo kimutere inzara canke inyota. Niko n’umuntu atararonka
buno bwenge adashobora kuburondera. Mugabo, inkabuzo yo kuburondera ni Imana
yonyene iba yarabuteretse mu muntu. Ubu bwenge ni ubwenge bukiza nubwenge
bubonekera muri Kristo Yesu. Twaje guhimbaza Imana uno munsi, bubonekera mu gitabo
c’Imana bibiliya. Ico gitabo kitubwira Kristo umwana w’Imana yaje kuducungura we bwenge
bw’Imana itaboneka we bwenge buboneka bw’Imana itaboneka. Abikorinto bambere igice
cambere umurongo wa mirongo itatu havuga ngo Kristo yaducikiye ahejejeje kuducungura
no kutweza yaducikiye ubwenge buva ku Mana kugira ngo duhabwe kugenda twama mu
munezero, mugutinya, Imana. Uwo niwe twaje gihimbaza. Nimba uri ngaha nuhumure,
bantu b’Imana, mwese mwakijijwe, bantu muje gukoranira muri kino kibanza, Kristo
yaramaze kudupfira ngo aduheshe iki kintu co kubaho umutima uhengamiye kuri we. Ngo
aduheshe kubaho kino kintu co kumurongo w’icenda co kubugororotsi butava muri twebwe
ariko buva muri we. Ngo aduheshe kubaho ubuzima bugenda bwezwa, mugutandukanya
ikibi n’iciza. Sivyo gusa, iyadukiza akatubwira ati muzokwama muri ino si irimwo amagorwa,
ntaco vyomaze namba na agatoyi ariko yadukijije afise iyo adutwaye, ariko adutwara hehe ?
mw’ijuru, mu buruhukiro bw’ibihe bidashira, inguvu zumuntu wese yaje gutazira ngaha
nizive muri rino sezerano ry’akaruhuko k’ibihe bidashira tubone akari inyuma y’urupfu
kabonerwa mu bwenge Imana yatanze ari we Kristo Yesu. Inkuru mbi nuko, nimba umuntu
atarahabwa uyu mutima wo guhimbara Imana uyo ibimurongora yabitubwiye, ni umubiri
wiwe, ni nkamere kiwe n’isi ; uyo muntu ngo inzira ziwe zirahengamye, ntazokwigera namba
na gatoyi ararwa igihugu ariryo juru, uburuhukiro bw’ibihe bidashira. None nimba waje muri
kino kibanza, ukumva Imana yakugiriye neza gurtyo, harikintu ciza kiruta ico ? mbega
ugutazira tugiye gutazira, umuntu yobanza kuguhagurutsa canke kukwinginga ? kuwubufise
ntiyingingwa, ariko n’uwutaraburonka, inkuru nziza irahari, Yesu ntiyaguhamagaye ngo
agutsinde muri kino kibanza agomba kuguha ubugingo,ubwenge gukira. Reka nsenge Imana

« Data wa twese wo mw’ijuru, ndasenga ngo uduhe ubuzima bwiyeguriye Ijambo ryawe,
ubuzima bugukunda, ubuzima butora akaruhuko, amahoro n’umunezero mu Mwana wawe
Yesu Kristo, we bwenge buzima buva ku Mana, Amina. »