1

Noa A Ningbaw Ningla Kasi

Chyum laika na shinggyim masha ni a labau hta shinggyim a ni a n hkru n hkra ai
lam, ga ningtsa e kaba la ai hte myit kraw lawang na maw mamaw gaw tut tut n shawp ma ai
majaw, Karai Kasang gaw shinggyim masha ni hpe ga ningtsa e hpan tawn da ai hpe myit
malai lu nna, Shi a kraw lawang e yawn wu ai (Ningpaw Ninghpang 6:5-6). Rai tim Noa
chyawm gaw, ding hpring ai hte, dai prat na ni hta hkum tsup ai wa rai nna, a Kasang hte rau
hkawm rau sa nga ai hte Yehowa a man e myi man pa wu ai (N.N 6:8-9).
Dai rai nna, Karai Kasang gaw Shi hpan da ai shinggyim masha ni e ga ningtsa na
atsai a wai di kau na masing jahkrat ai shaloi, Shi a masing hpe shadik na matu Noa hpe
ningbaw ningla kasi hku magam bungli shatsam ai re.
Noa a ningbaw ningla kasi hpe lawu na lam ni hku sharin la lu ga ai.
(1) Noa gaw Karai Karai hpe kam sham ai wa re (Noah was godly): N.N 6:8 hta Noa
chyawm gaw ‘Karai Kasang a man e myi man pa nga ai’ ngu nna, Karai Kasang sharawng
awng ai masha re lam tsun da nga ai. Hpa majaw nga yang Noa gaw kaji kawa ni kawn hkam
la lu ai makam hkring htawng hpe ngang ngang kang kang hkan nang hkan sa nna, Karai
Kasang sharawng awng ai lai kyang shingni hte hkrak asak hkrung ai wa rai wu ai. Dai rai
nna, chyum laika hta Noa gaw dinghpring ai hte, dai aprat na ni hta hkum tsup ai wa, Karai
Kasang hte rau a hkawm a sa nga ai wa re ngu tsun tawn da ai re (N.N 6:9). Dai majaw, Noa
a ningbaw ningla kasi hta Karai Kasang hpe kam sham ai hte Karai Kasang sharawng awng ai
matsun maroi tara ni hpe asak hkrung lam hta bu hpun sumli let, n hkru n shawp ai masha ni
a lapran hta Karai shatsam ai lit ni hpe kangka sadi dung let gun hpai ai hpe mu mada lu ga
ai.Tengman kangka ai ningbaw ningla gaw, Karai Kasang hpe kam sham ai hte Karai a
matsun maroi ga hte maren lai kyang shingni gaw gap ai ni rai ma ai.
(2) Noa gaw hkungga la ra madat mara ai wa re (Noa was a man of obedience) : Karai
Kasang sanghpaw li shachyaw na matu matsun ai shaloi ningdang ai lam, aput apai nga ai
lam, shingra byin da masa lam hpe maram yu nna n mai byin ai bungli (sh) lachyum n pru ai
bungli ngu nna ninghkap ai lam n galaw ai sha, Karai a ga hpe hkungga la ra madat mara wu
ai. Dai majaw N.N 6:22 hta ‘Noa gaw shingrai galaw wu ai; Karai Kasang shi hpe hkang da
wu ai hte maren, lam shagu shi galaw wu ai’ ngu tsun da ai re. Noa gaw, Karai Kasang a
matsun maroi ga hpe hkungga la ra madat mara ai, tup hkrak hkan nang hkan sa ai, kabu gara
myit hte galaw gun hpai ai lam gaw, Karai Kasang hpe teng sha kam sham ai ngu ai kum la/
asi re. (Kam sham ai hte Noa gaw garai nmu yu ai arai ni a lam shadum shahprang ai hkam la
lu ai rai nna, shi a nta masha ni hpe hkye hkrang la na matu, hkrit hkungga ai myit hte
sanghpaw li shachyaw wu ai; shing rai kam sham ai hte shi mungkan ga hpe jeyang nna,
makam maasham hte seng ai ding hpring ai a sali wunli hkam la ai wa, rai wa ai (Heb 11:7).
De a mahtai gaw, Noa shi a nta masha ni hpe hkye hkrang la ai chyeju lu la hkra woi awn
ningshawng lu wu ai ( N.N 7:7; 8: 16-19; I Petru 3:20). Tengman kangka ai ningbaw ningla
gaw, Karai Kasang a matsun maroi ga hpe hkungga la ra madat mara ai, tup hkrak hkan nang
hkan sa ai, kabu gara myit hte galaw gun hpai ai ni re.
(3) Noa gaw galai kashai n nga ai dingtawng dingyang re ai wa re (Noa was consistent):
Noa gaw Karai matsun ai lam hpe hkrak tup galaw gun hpai ai re. Shaning law law n-gun dat,
atsam dat, aten jaw, myit galu let sanghpaw li shachyaw ai hte Karai sharawng awng ai asak
hkrung lam a lam htawn tsun ai re. Kaga masha ni a jahpoi asawng ai, mana ngu nna tsun
katut ai, a ngawk ai wa ngu nna shatan hkrum ai. Hki ba lit li ai lam hkrum ai. Salu salat hte
n-gun dat ra ai. Kaga masha ni lu len shalen, hkrup mara, n shawp n kaup pyaw len nga a
ten, n hkring n sa bungli galaw shakut ra ai. Shi dinghku masha ni sha shi ga hpe madat ai.
 2

Kaga masha ni kadai mung shi htawn tsun ai Karai mungga hpe n madat ai, hkan nang hkan
sa ai lam n nga ai. (moi moi na Mungkan ga hpe mung lahpawt lam n di ai sha ding hpring ai
tara hkaw dan ai sara Noa hte masha sanit hpe makawp maga la nhtawm, tara n hkungga ai ni
a Mungkan ga a ntsa e shau shaing dat wu ai the;… II Petru 2:5). Rai tim, myit daw myit hten
lam, Karai Kasang a matsun ga n tsa n hten ai lam n nga wu ai.
(4) N hkru n shap ai ni a lapran hta n law la ai shanhte dinghku n ta masha ni makam
ngang na matu woi awn ai (Noa stands strong in the minority): Makau grup yin na masha
yawng wa n hkru n shawp ai lam hkan tim Noa n hkan ai. Shi a nta masha ni hpe makam
ngang na matu woi awn ai. Kaga masha ni jahpoi ahpyak asawng ai lam shani shagu hkrum
tim Yehowa a man e mi man pa hkra asak hkrung ai. Karai Kasang shau shaing na, sang
hpaw li shachyaw u ngu ai shaloi, shawng de galoi n byin ga ai, shi a aten hta mung byin na
zawn n san ai, shi hte shi a nta masha ni sha Karai a matsun maroi ga hkan nang ai aten re.
Rai tim, Noa masha ni a ga hpe n madat ai sha, Karai a ga hpe madat ai. Shingra tara maka
hpe n yu ai sha, shingra tara hpe hpan da ai wa a ga hta asak hkrung lam gaw gap ai.
Mungkan pyaw lam hpe pyaw hpa lam hku n hkam la ai sha, Karai a ga madat mara hkan
nang hkan sa lu ai kaw myit pyaw myit dik ai. Karai a ga kadai n madat tim ngai madat na.
Karai a matsun ga hpe kadai n kam tim ngai kam sham na. Karai sharawng awng ai lam hpe
kadai n hkan nang tim ngai hkan nang na, ngu ai myit jasat, laikyang shing ni rawng ai wa re.
Dai myit jasat hte laikyang shingni ni gaw dai ni na Hkristan ningbaw ningla ni yawng hta
nga ra ai myit jasat, lai kyang sat lawat ni rai nga mali ai.

Gin len shalai ai,

Lahphai Awng Li (Ph.D)

Professor, MIT.