SERMON RESSORT AEKKANOPAN
TOPIK: DI JOU LAHO MANGHAHOLONGI
JEREMIA 1, 4 – 10
1. Di tongatonga ni zaman na lumlam do dijou Debata si
Jeremia. Uju i tongon tarhapit do bangso Israel secara
politik. Nunga ditoru ni huaso ni harajaon Assur nasida.
Ala kepentingan politik, gabe dikorbankan angka
pemimpin ni bangso i do ugamona. Ai laho mambuat roha
tu raja ni Assur, olo ma Israel marsomba tu debata Baal ni
Assur; di bagas joro i pe dipajongjong ma langgatan
pamelean tu debata sileban ni Assur. Ala ni i ma, gabe lam
merosot ma moral, partondion ni bangso Israel; ndang
diharingkothon be parange na denggan, alai angka
namanomba baal, dohot persundalan nama diulahon. Tong
dope muse ala kepentingan politik, gabe laho do nasida
mangido pangurupion tu militer ni Mesir. Ndang Debata
Jahowa be dihaposi, alai nunga gogo ni Misir. Ditadingkon
nasida ma Jahowa. Di keadaan na songon i ma dijou
Debata si Jeremia. Jala tugasna ima laho patubegehon soara
ni Debata, mangulahon ulaon ni panurirang, laho manjou
bangso i, jala patuduhon tu nasida pilihan: Olo paubahon
roha asa malua, manang torus manundali Jahowa asa hona
rimas ni Jahowa. Mansai borat do ulaon ni si Jeremia. Di
ayat 10 didok, ia ulaonna ima: mangurati, maniaphon,
mangago, mangaloha (mencabut, merobohkan,
membinasakan, meruntuhkan), alai huhut muse ingkon
paulihon dohot manuan (membangun dan menanam). On
ma soara hapanurirangon na ingkon sisoarahonon ni huria.
On ma hahurangan ni huria di angka tingki na salpu. Di na
hehe angka industri jala hehe nang ilmu pengetahuan dohot
tehnologi, sai hohom huria ala lalap mangurus dirina, holan
na marbadai, ndang adong soara hapanurirangon (suara
nabiah). I ma mambahen gabe gok halumlamon i nuaeng.
On ma siulaon ni keluarga songon huria na metmet.
Natoras ingkon mansoarahon suara nabiah tu sundut na
umposo, mangajari, menegor, asa unang lilu nasida dibahen
hamajuon on, unang hona uhum nasida muse. Nang tu
angka na masa di masyarakat, ingkon barani do huria
menegor; memperjuangkan hak azasi, keadilan, membela
angka na tertindas. Tugasta ndada holan membangun
gareja, markoor, marminggu, alai dohot do manjamothon
pemimpin dohot masyarakat, unang sanga madabu rimas ni
Debata.
2. Dipatorang turpuk on do tu hita manang na piga hal
taringot tu ulaon ni panurirang, tanggungjawab ni
panurirang dohot resiko, alai huhut nang pandonganion ni
Debata di panurirang i. Naparjolo : Debata do na
mamillit. Ndada si Jeremia na manonsothon dirina asa
dipillit, alai sian roha ni Debata do na mamilllit. Keluarga
ni malim do nian ibana, mungkin malim na jonok tu
penguasa ima malim Abyatar. Alai ndang i manodo ibana
asa gabe panurirang, alai Debata sandiri do. Marhite on
dipaingot hita, asa unang adong manonsothon diri asa
dipillit. Paloas ma Debata mamillit, alai tutu, molo dung
ditodo, unang ho manjua. Jesus pe didok do: Ndada hamu
mamillit Ahu, alai Ahu do mamillit hamu (Joh. 15, 16).
Unang pola gabe marbadai hita sama hita ala so tarpillit,
songon na godang masa di angka huria. Alai, molo dung
diulahon ho pamillitonNa i, unang adong na
pajagojagohon, merasa diri na jumago. Alai dok ma:
Mauliate Tuhan dipillit Ho ahu gabe parhalado, gabe
panitia pembangunan, gabe dirigen ni koor, gabe an, gabe
on… goarMu ma na marsangap, unang goarhu.
Napaduahon: Ulaon na maol do ulaon i, ulaon na gok
resiko. Ingkon soarahononna ma uhum tu bangso na jogal
i. Hape somalna, jolma ingkon sipanggarpanggaron do
nang so tutu. Sogo do roha ni jolma molo nitudu
hasalaanna. Ala ni i gabe godang do na mangsogohon si
Jeremia, pola dongan sahutana sandiri naeng mamunu
ibana (bindu 11), ingkon sirang ibana sian angka donganna,
jala ditangkup Malim Pansur do ibana jala dihurungkon.
Ala ni hansitna i ma pola do sanga songon na mandele si
Jeremia, mogok kerja, mardandi (Tajaha di bindu 20, 7-9
dohot bindu 15, 11+18). Pola dihilala ibana hira na
dipaotooto Debata ibana. Sanga ma ndang olo be ibana
suruon ni Debata. Diboto si Jeremia do maol ni ulaon i sian
mulana. I do ala di ayat 6 marsidalian ibana. “Ndang
huboto manghatai, ai bajar/poso dope ahu”, ninna. Sarupa
songon i do nang pandok ni si Musa. Si Jesaya pe
marsidalian do mandok: Parbibir na ramun do ahu. Si Jona
pe menolak, gabe lari martabuni tu Tarsis. Songon i ma
molo pinake pertimbangan haportibion, molo gogonta
tapangasahon mangula ulaon ni Debata. I ma mambahen
torop mabiar. Pintor talu sebelum masuk perang. Di huria
pe sai masa do songon i. “Boha bahenon manuhuk i, ai
pogos do hami … partanitani do hami … karyawan na
metmet do hami …., dohot na asing”. I ma mambahen gabe
toho ma, laos so adong na boi taula manang aha. Laos
dipaingothon i do hita, mansai maol jala gok resiko do
mangoloi parsuruon ni Debata. Maol do gabe parhalado,
gabe panitia pembangunan, gabe siparbarita nauli, gabe
dirigen koor, dohot na asing. Sai jotjot do hita sitihaan,
gabe sihataan; godang angka tuduhan-tuduhan, godang
hatahata na so tabo begeon. Angka na burju marbarita
nauli, boi do gabe dihasogohon parugamo na asing, na deba
tahe gabe dipamate. Sitagamonta do angka i. I ma
mambahen na deba gabe mandele. Alai na deba gabe
marbadai. Ingot ma, gok resiko, gok hamaolon do mangoloi
parsuruon ni Debata. Na patoluhon: Jaminan
pandonganion ni Tuhanta do gogonta. Dung songon i
sidalian ni si Jeremia, didok Debata ma: “Unang ho mabiar,
ai sai Ahu do donganmu, paluahon ho” (ayat 8). Ndang hea
disuru Debata angka naposoNa so mardongan bagabaga
pandonganionNa. Tuhan Jesus pe di Mateus 28, 20, di na
disuru hita laho marbarita nauli, dilehon do jaminan
pandonganionNa: Sai na dongananKu do hamu ganup ari,
rasirasa ro ajal ni hasiangan on”. On ma mangalehon
gogo tu si Paulus. Ala tangkas do dihaporseai ibana
pandonganion ni Debata, gabe barani ma si Paulus mandok:
“Saluhutna do tarpatupa ahu, marhitehite Ibana na
margogoihon ahu” (Pilipi 4, 13), jala di 2 Korintus 12, 10
didok: Di hagaleonki do au margogo”. Boasa? Ala adong
pandongani, ima Debata. On ma nian ingkon tangkas
peoponta, asa unang mabiar hita patupa ulaon na denggan
dohot mangoloi parsuruon ni Debata. “Molo Debata
donganta, ise be alonta” ninna si Paulus di Rom 8, 31.
Angka na porsea di pandonganion ni Debata do na mampu
mandok songon nidok ni si Paulus nangkin: Saluhutna do
tarpatupa ahu, marhite ibana na mamargogihon ahu.
Naparpudi: Dijou do hita sude gabe Jeremia-jeremia na
imbaru, na barani menegor angka na sala. Sijamothononta
do asa unang hita songon panurirang pargapgap di zaman
ni si Jeremia on, na sai holan marhata lemeslemes, na
pageokgeok pinggol, holan paboahon na tabotabo; i ma
mambahen tarpodom bangso i di dosana. Alai Jeremia na
imbaru ingkon barani menegor hasalaan asa muba; ndang
menghakimi, ndang laho pailahon. Ingkon soarahononta do
torus hamubaon ni roha asa muba roha ni na umbegesa. On
do na borat i nuaeng. Sai godang do halak lomoan rohana
mambege jamita na lamotlamot, holan na tabotabo.
“Parhaladonami, holan na tabotabo i ma jamitahon hamu
… unang pola sai rungkari hamu dosanami ruas on, unang
 pakorashu jamitamuna i, sotung tersinggung annon ruas i,
sotung so dilehon hepengna i…. “ninna. Boha nama tutu
molo songon i. Adong do guna ni jamita na songon i? Hata
ni Debata songon api na marsigorgor do i, na manutung;
jala songon martil (Jer. 23,29) na mamuntar roha na koras.
Jamita na koras, na menegor, na mangurati, i do na boi
manjou roha ni jolma asa pauba roha, jala i do na boi
mamuntar roha na koras asa muba.
3. Gabe Jeremia na imbaru ingkon olo tampil beda. Ndang
songon nidok ni halak Batak: eme na masak digagat ursa, ia
i na masa i ma niula. Marjuji halak marjuji iba; martogel
halak martogel iba; korupsi halak dohot iba,dln. Jeremia na
imbaru berani tampil beda ala haporseaonna. Ala ni i,
ingkon jumolo hita pature diri, asa boi gabe tiruan. Dung i
gabe sira ma i, manirai jolma na humaliang. Perubahan
masyarakat dimulai dari perubahan diri orang Kristen di
masyarakat. Antong, dohot do hita dipillit Debata gabe
Jeremia-jeremia na imbaru laho patolhashon suara nabiah
ni Debata tu keluarga, tu masyarakatta. unang mauhom ho,
soarahon ma soara hasintongan ni Debata. Borat do ulaon i,
unang ho marsidalian. Pos ma roham, unang ho mabiar,
Debata do mandongani, margogoihon dohot patauhon ho.
AMEN.