PARTURE NI PARMINGGUON

MINGGU XVI DUNG TRINITATIS

HURIA KRISTEN BATAK PROTESTAN
(HKBP)
PETUKANGAN RESORT PETUKANGAN

“Marasi ni roha tu angka na

martihas”
 (2 Samuel 9 : 1 - 8)
Jakarta,
Minggu, 27 September 2020 (Pukul 09.30 WIB)
~~ Tingki na hohom ~~
(S.L. mangendehon BE. No. 695 Jesus Tuhanhu di Ho ma au on)
Jesus Tuhanhu di Ho ma au on, asa mangihut tu Ho au tongtong.
Gohi rohangku ingani au on, sonang di Ho tongtong.
O Tuhan togu ma au, o Tuhan togutogu ma au.
Gohi rohangku ingani au on, sonang di Ho tongtong.
01. MARENDE BE No. 10 : 1 - 3 Hupuji hupasangap Ho
Hupuji hupasangap Ho Amang pardengganbasa.
Ai jadijadian-Mu do sude angka na masa.
Ditompa Ho do sasude, daginghu ro di tondi pe; pinuji ma goar-Mu.
Saluhut na tinompa-Mi naeng sonang di roha-Mu.
Arian dohot borngin pe disarihon roha-Mu.
Nang uhum digomgoman-Mi na tigor, na sintong do i; pinuji ma goar-Mu.
~ jongjong ~~
Ndang dung tartading bangsoMi naung pinillit-Mu jolo.
Sai Ho do haporusan ni sude na ro, na olo.
Ditogu Ho do sasude asa tu hangoluan be; pinuji ma goar-Mu.
02. VOTUM – INTROITUS – TANGIANG
L: Marhitehite Goar ni Debata Ama, dohot Goar ni Anak-Na,
Tuhan Jesus Kristus, dohot Goar ni Tondi Parbadia, na
tumompa langit dohot tano on. Amen. Dihorhon
haporsuhonnami na satongkin jala na neang i do hasangapon na
sumurung, na lumobi hamuliaon na salelenglelengna tu hami,
hami angka na so tumailihon angka na tarida angka na
tumailihon angka na so tarida; ai na martingki do anggo angka
na tarida, alai na salelenglelengna do angka na so tarida.
Haleluya.

1
 H: (Mangendehon) Haleluya, Haleluya, Haleluya!
L: Martangiang ma hita. Ale Tuhan Debata! Asi ma rohaM di
hami, ai ndang tarbahen hami mambahen manang aha, molo so
Ho dongannami. Dibahen i, sai lehon ma di hami roha banua
ginjang, asa tau hami manimbangi dohot mangulahon lomo ni
roha-M. Sai dongani ma hami, asa mian hami di bagasan Ho
dohot di bagasan HataM, marhitehite Anak-Mu, Tuhan Jesus
Kristus, Tuhannami. Amen.
~~ hundul ~~
03. MARENDE BE No. 213 : 1 + 4 Dung sonang rohangku
Dung sonang rohangku dibaen Jesus i, porsuk pe hutaon dison.
Na pos do rohangku di Tuhanta i, dipasonang tongtong rohangkon.
Sonang do, sonang do; dipasonangtongtong rohangkon.
Mangolu nang mate di Jesus do au, Ibana haporusanhi.
Hata-Na sambing do partogi di au, ai na tau haposanhu do i.
Sonang do, sonang do; dipasonangtongtong rohangkon

04. PATIK
L: Tangihon hamu ma Patik ni Debata di Minggu XVI dung
TRINITATIS sadari on, i ma na tarsurat di 1 Petrus 4: 10.
Songon on ma didok disi: Masipatureturean ma hamu ganup
marguru tu asiasi na jinalona, songon angka juara bagas
na burju di ragamragaman ni asiasi ni Debata.
I do sahatna. Antong, rap mangido gogo ma hita tu Debata laho
mangulahon na hombar tu Patik-Na i.
H: Ale Tuhan Debata, sai pargogoi ma hami mangulahon na
hombar tu Patik-Mi. Amen.
05. MARENDE BE No. 394 : 1- 2 Dapothon ma Jesus
O Jesus Tuhanki, sihophop au!
Masihol au di Ho, naeng Ho di au!
Tanda do holong-Mi, sonang ma rohangki;
maniop tangan-Mi, na lambok i.
2
 ~~ jongjong~~
Dosangku sasude na dokdok i. Na huarsakhon do, sai sesa i.
Sai pargogoi au on mangalo rohangkon.
Roha portibi i, taluhon i.

06. MANOPOTI DOSA

L: Tatopoti ma dosanta. Martangiang ma hita. Ale Tuhan Debata,
Pargogo na so hatudosan jala Ama Parasiroha! Ndang lomo
rohaM mida hamatean ni pardosa; mulak ma nian parjahat i
tumadingkon dalanna, asa mangolu ibana, i do dipangido
rohaM. Ala ni i umbahen hupangido hami; sai sundati ma
torutoruM asa unang mangonai be tu hami. Sai sesa sude
dosanami, asa mangolu hami di bagasan asi ni rohaM. Sai
pargogoi ma hami, asa margogo hami, marhitehite Tuhan Jesus
Kristus Tuhannami. Amen.
SL (Mangendehon) BE. No. 701 : 1 Tu Ho do au marpadan
Baen ma pangkilalaan, di au O Tuhanki,
Donok do Ho O Tuhan, mandopang musungki.
Ragam do pangunjunan, di hasiangan on,
Ho partanobatoan, di paraloankon.
L: Tabege ma bagabaga ni Debata taringot tu hasesaan ni dosanta.
Ala ni pangalaosionta do umbahen tartullang Kristus,jala
binahen ni hajahatonta do Ibana mabungang. Ampe tu Ibana
pinsangpinsang parhitean ni hasonanganta, jala binahen ni
bungangNa malum itahilala. Hasangapon ma di Debata na
di ginjang!
L+H: Amen. ~~hundul~~
07. MARENDE BE No. 427 : 3 - 4 Marserep marunduk
Maniop Tuhanhu mardame, mangolu sandok tondingki.
Huboto naung sesa dosangku, tung i do nuaeng ngolungki.
Dihophop Ho au Tuhan, dilehon Ho do hosaM.

3
 Pasaehon dosangku sude, sai togu, rajai hami be.
Urupi au on, o Tuhanhu, pagomos rohangku tongtong.
Sai suru TondiM na badia, pangolu pasonang au on.
Dihophop Ho au Tuhan, dilehon Ho do hosaM.
Pasaehon dosangku sude, sai togu, rajai hami be.

08. E P I S T E L
L: Hata ni Debata turpuk di bagasan minggu sadari on dienet sian
Lukas 14 : 12 - 14. Tajaha ma marhite responsoria: “Didok ma
huhut tu na mamio Ibana: “Jumpa dibahen ho pesta manang
haroan, unang ma pio tusi angka alealem, manang hahanggim,
manang hulahulam, manang hombar bagasmu pe, angka na
gabe, asa unang nasida muse mamio ho, gabe dibalos i tu ho.
H: Alai jumpa mambuat sipanganon ho, pio ma angka na
pogos, angka na martihas, na pangpang dohot na mapitung.
L : Jadi martua ma ho disi, aindang tarbalos nasida i tu ho: alai
marbalos do i tu ho sogot di haheheon ni angka partigor.
L: I do sahatna. Martua ma angka na tumangihon Hata ni Debata
jala na umpeopsa. Amen.
09. MARENDE BE No. 716 : 1 + 3 Di na mamolus sandok ngolu on
Di na mamolus sandok ngolu on, gok do na marsak, gale.
Boan sinondang tu na holom i, asa margogo muse.
Bahen ma ahu parhiteanMu pasumpasuM ma baor ma i.
Ale Tuhanhu patupa ma au baen pasupasu tu dongan sude.
~~ jongjong~~
Ula na denggan tu halak sude, songon binaenNa tu ho.
Ingot, urupi luhut na gale, gabe parholong ma ho.
Bahen ma ahu parhiteanMu pasumpasuM ma baor ma i.
Ale Tuhanhu patupa ma au baen pasupasu tu dongan sude.
10. MANGHATINDANGHON HAPORSEAON

4
 L: Tahatindangkon ma haporseaonta i, songon na hinatindangkon
ni donganta sahaporseaon di sandok portibi on. Rap ma hita
mandok:
H: Ahu Porsea ... ~~ hundul ~~
11. TINGTING

12. MARENDE BE No. 467: 1 - 2 Asi ni rohaM hupuji

Asi ni rohaM hupuji ala Ho manobus au.
Dipaias Ho rohangku, gabe soranganMu au.
IngananMu rohanami, TondiMi manggohi i.
Pangke dohot ngolunami gabe ulaulaMi.
Sai ramoti ma rohangku asa boi gohanMu au.
Sai mabaor ma pasupasu nang marhitesian au.
IngananMu rohanami, TondiMi manggohi i.
Pangke dohot ngolunami gabe ulaulaMi.
13. JAMITA 2 SAMUEL 9: 1 - 8
(PDT. YAHAZIEL PANJAITAN, M.SI)
9 : 1 Dung i ninna si David ma manangkasi: “Adong dope ulaning
jolma tading-tadingan ni Raja Saul, asa hubahen asi ni roha tu
ibana, ala si Jonatan?”
9 : 2 Jadi adong ma sada naposo isi ni bagas ni si Saul nahinan, na
margoar si Siba, gabe tarjou ibana tu jolo ni si David. Dung i
ninna raja i ma mandok ibana: “Atehe ho do si Siba?” “Naposom
do ahu,”ninna ibana.
9 : 3 Dung i didok raja i ma: “Atehe adong dope jolma tadingtadingan
ni si Saul, asa hubahen tu ibana asi ni roha sian Debata?” Jadi
ninna si Siba ma mandok raja i: “Adong dope sada anak ni si
Jonatan, pangpang patna duansa.
9 : 4 Dung i ninna raja i ma mandok ibana: “Di dia ibana?” Gabe
didok si Siba mandok raja i: “Ida ma, di Lodebar do ibana,
sorang tu si Makir, anak ni si Ammiel."

5
9 : 5 Dung i disuru Raja David suruanna mangalap ibana sian bagas
ni si Makir, anak ni si Ammiel di Lodebar.
9 : 6 Jadi dung sahat si Mepiboset, anak ni si Jonatan, tubu ni si
Saul, tu jolo ni si David, manungkap ma ibana tu tano
marsomba. Alai nina si David ma: “Ale Mepiboset!” Gabe didok
ibana ma: “Dison do ahu naposom.”
9 : 7 Dung i didok si David muse tu ibana: “Unang ho mabiar, ai
ingkon bahenonhu tu ho asi ni roha; ala ni si Jonatan
amangmu, ingkon paulahonhu tu ho sude golat ni si Saul,
ompumi, jala ingkon tongtong ho sapanganan dohot ahu.”
9 : 8 Jadi marsomba ma ibana, huhut didok: “Tung ise ma pola ahu
naposom, umbahen pola dompakhononmu biang na mate
songon ahu on?”
14. MARENDE BE No. 720 : 1 Naeng marsinondang ngolungku
(Pasahat Pelean: Ia + Ib + II)
Naeng marsinondang ngolungku diigil Jesus i,
manang di dia pe ahu tongtong hu ingot i.
Tiur marsinondang i do niigil ni Jesus,
tongtong marsinondang, panondang do au tutu.
~~ musik ~~
Ingkon hobas mangurupi angka na gale i.
Jala burju manghobasi songon Tuhanta i.
Tiur marsinondang i do niigil ni Jesus,
tongtong marsinondang, panondang do au tutu.
~~ musik ~~
Tuhan urupi ma ahu, sai jaga rohangki.
Asa marsinondang ahu, Ho naeng tiruonhi.
Tiur marsinondang i do niigil ni Jesus,
tongtong marsinondang, panondang do au tutu.
17. TANGIANG PANUTUP

6
 Sude Pandita dohot Parhalado
HURIA KRISTEN BATAK PROTESTAN (HKBP)
PETUKANGAN RESORT PETUKANGAN
Pasahathon:
“SELAMAT ARI MINGGU”

Jamita Minggu XVI dung Trinitatis

2 Samuel 9:1-8
“Marasi ni roha tu na martihas”
Huria na hinaholongan ni Tuhan Jesus. Adong sada pandohan di hata
Indonesia mandok songon on, “Air susu dibalas dengan air tuba”,
lapatanna pambahenan na denggan dibaloshon dongon pambahenan
na jahat. Pandohan on borhat sian na tutu masa di tongatonga ni
parsaoranta. Somal do masa songon i jumpangta di angka parsaoranta.
Alai marasing do na taida sian turpukta sadari on. Balik ni pandohan i
do jumpangta ai didok do, “Air tuba dibalas dengan air susu”, na jahat i
dibaloshon marhite na denggan. I do na pinatuduhon ni si Daud, na
pinabangkit ni Debata gabe raja gumomgom Israel singkat ni si Saul
marhite na marasi ni roha ibana tu pinompar ni si Saul, na sai martahi
na jahat dompak si Daud uju manggomgomi ibana.
Na tubu do roha pangimburuon di si Saul uju i di na ditaluhon si Daud
si Goliat, sahalak na bolon sian parangan ni halak Palistim. Digotap si
Daud do ulu ni si Goliat laos i ma tandana na gabe talu halak Palistim
maralohon Israel. Di hamumulak ni si Daud rap dohot parangan ni
Israel tu Jeruslaem, marsaringar ma angka ende pamujion di si Daud.
Gok hariburon ma tingki Jesrulem.
Sian i ma tubu roha pangimburuon dohot sogo ni roha ni Saul marnida
si Daud. Marulakulak sai diuji si Saul laho mambahen si Daud marmara
jala naeng bunuonna. Alai, tung hea do tubu di roha ni si Daud laho
mambaloshon na jahat na binahen ni si Saul i. Di sada tingki adong do
sada partingkian na boi si Daud mambunu si Saul uju modom ibana di
7
bagasan undungundungna. Alai holan rambu ni ulos ni si Saul i do
disseat ibana. Boasa ndang manigor bunuon ni si Daud ibana disi? Ala
ditanda si Daud na miniahan ni Debata do si Saul, raja i. Ndang olo
ibana lalu tangan tu sahalak na miniahan ni Debata. Sangap do di
rohana si Saul jala biar do rohana mida Debata.
Huria na hinaholongan.
Hinorhon ni biar ni rohana mida Debata gabe ndang oloanna mambunu
si Saul i. Tarbahen sahalak na biar mida Debata do laho mangorom
dirina sian na mangulahon na jahat manang mambaloshon hajahaton
dohot hajahaton. Alai sabalikna do, ia halak na so adong biar ni rohana
mida Debata ingkon ndang parduli ibana di manang ise pe siadopanna,
nang tu dirina sandiri pen dang parduli ibana. Ingkon sai dituntun do
lomona dohot emosina ujungna gabe terjebak ibana di dosa. Alai,
ndang songon i ia si Daud. Diorom rohana do laho mambaloshon
hajahataon ni si Saul.
Ditingki mangarajai si Daud gumomgom Israel mangganti si Saul, di
bagasan hadumaon do Israel. Tarsunggul ma tu roha ni si Daud
taringot tu si saul dohot sude angka pinomparna naung mate uju
marporang na jolo maralohon halak Palistim. Umbahen na diingot
ibana pe si Saul dohot angka pinomparna i ima ala parpadananna
dohot si Jonatan, anak ni si Saul, padan ni angka na maraleale. Holong
do roha ni si Daud tu si Jonatan songon i nang si Jonatan pe tung
holong do rohana tu si Daud nang pe mansai sogo do roha ni amana si
Saul tu si Daud. Asa dijou ibana ma suruanna laho mangalului atik
adong dope jolma tadingtadingan ni si Saul i. Disangkap rohana naeng
mambahen asi ni roha tu nasida ima asi ni roha na sian Debata dohot
ala ni holongna tu si Jonatan.
Di na mangalului i nasida jumpangnasida ma sada naposo isi ni bagas
ni si Saul na margoar Siba. Dijou ma si Siba tu jolo ni raja i. Disungkun
ma tu ibana atik adong dope jolma tadingtadingan ni si Saul. Laos
dialusi si Siba ma paboa adong dope pinompar ni si Saul, ima sada anak
8
ni si Jonatan na margoar Mepiboset. Sahalak ibana na ma na tinggal
sian pinompar ni si Saul jala na pangpang patna duansa. Umbege i
mansai las situtu roha ni si Daud jala disuru ma laho manogihon ibana
tu jolo ni raja i.
Dung sahat di jolo ni raja i, manungkap ma ibana tu tano marsomba di
jolo ni raja i. Alai diapuli si Daud ma ibana asa unang mabiar. Dung i
didok ma tu ibana paboa naeng patupaonna asi ni roha tu si Mepiboset
ala ni holongna tu amana si Jonatan dohot parpadanan ni nasida. Boha
do dalanna naeng patupaon ni si Daud marasi ni roha tu si Mepiboset?
Didok si Daud do, “ingkon paulahonhu tu ho sude gulat ni si Saul,
omumi, jala ingkon tongtong ho sapanganan dohot ahu” (ay.7).
Umbege i diulakhon si Mepiboset do marsomba di jolo ni raja i huhut
didok ibana ma, “Tung ise ma pola ahu naposom, umbahen pola
dompakhononmu biang na mate songon ahu on?” (ay.8). Sada
panindangion taringot tu na so tama ibana manjalo asi ni roha ni raja. i
do umbahen dipatudos ibana dirina songon ‘biang na mate.’
Huria ni Tuhan na hinaholongan.
Asa songon i ma dipatupa rja i marasi ni roha tu si Mepiboset, sahalak
na pangpang, sahalak disabilitas. On ma na nidok balik ni pandohan na
somal nangkin, “Air tuba dibalas dengan air susu.” Marhite na
binahenna i naeng dipatuduhon si Daud do holong ni Debata tu si
Mepiboset.

Asa, dia ma na gabe sipahusorhusoronta sian turpuk on?

1. Unang ma mabiar hita ala dihaholongi Tuhan i do hita. Marhite
turpuk on didok si Daud do tu si Mepiboset asa unang mabiar ibana.
Ndang na laho mambaloshon na jahat na binahen ni ompungna tu si
Daud i umbahen na dijou ibana. Alai ala naeng jaloonna do holong ni
roha ni si Daud marningot parpadananna dohot amana si Jonatan.
Disungguli barita on do tu hita pambahenan ni Debata maradophon
hita. Ai pardosa do hita jala silaosi patikNa, ndang tama tajalo holong
9
ni roha ni Debata alai ndang tarsoadahon Debata diriNa laho
mangholongi hita. Marhite hamamate dohot hahaheon ni AnakNa,
Jesus Kristus i dipatupa do di hita panobusion dohot hasesaan ni angka
dosa huhut diain hita bahen angka anakNa, sitean harajaon ni Debata.
Dibahen i, marsihohot ma hita mian marparsaoran di bagasan hasatiaon
di joloNa.
2. Mian ma hita di bagasan serep ni roha di jolo ni Debata. Angka
siasian do hita di jolo ni Debata. Nunga tajalo asi ni rohaNa songon si
Mepiboset naung manjalo asi ni roha sian si Daud. Ndang tama hian
hita manjalo asi ni roha ni Debata, songon biang na mate i do hita, alai
dihaholongi Debata do hita. Dipatupa si Daud pe marasi ni roha tu si
Mepiboset na marningot do ibana di holong ni Debata na tu ibana
naung pabangkithon ibana gabe raja gumomgom Israel. Asa, mangolu
di bagasan serep ni roha

10