Namo tassa Bhagavato Arahato Sammā Sambudhassa (3x)

Buddha Vandana

Itipi so bhagavā arahaṁ, sammāsambuddho,

vijjācaraṇasampanno, sugato, lokavidū,
anuttaro purisadhammasārathi,
satthā devamanussānaṁ, buddho, bhagavā.

Evaṁ navahi guṇehi, lokahmi kitti byāpitaṁ.

Atulaṁ dhammarājānaṁ, vandāmi tīhi sādaraṁ.

Dhamma Vandana

Svākkhāto bhagavatā dhammo, sandiṭṭhiko,

akāliko, ehipassiko, opaneyyiko,
paccattaṁ veditabbo viññūhī

Iccevaṁ chahi guṇehi, pākataṁ jina pūjitaṁ.

Saṁpatti dāyakaṁ dhammaṁ, vandāmi tīhi sādaraṁ.

Saṅgha Vandana

Supaṭipanno bhagavato sāvakasaṅgho,

ujuppaṭipanno bhagavato sāvakasaṅgho,
ñāyappaṭipanno bhagavato sāvakasaṅgho,
sāmicippaṭipanno bhagavato sāvakasaṅgho,
yadidaṁ cattāri purisayugāni aṭṭhapurisapuggalā
esa bhagavato sāvakasaṅgho,
āhuneyyo, pāhuneyyo, dakkhiṇeyyo,
añjalikaranīyo, anuttaraṁ puññakkhettaṁ lokassa.

Evaṁ navahi guṇehi, lokahmi vissutaṁ gaṇaṁ.

Sāsanaṁ cira dhātāraṁ, vandāmi tīhi sādaraṁ.

Paritta parikamma

Samantā cakkavāḷesu atrāgacchantu devatā

saddhammaṁ Munirājassa suṇantu saggamokkhadaṁ:

Dhammassavanakālo ayaṁ bhadantā! (3x)

Namo tassa Bhagavato Arahato Sammāsambuddhassa (3x)

Ye santā santacittā, tisaraṇasaraṇā, ettha lokantare vā,

bhummā bhummā ca devā, guṇagaṇagahaṇā, byāvaṭā sabbakālaṁ,
ete āyantu devā, varakanakamaye, Merurāje vasanto,
santo santo sahetuṁ Munivaravacanaṁ sotumaggaṁ samaggaṁ.
Sabbesu cakkavāḷesu yakkhā devā ca brahmano,
Yaṁ amhehi kataṁ puññaṁ sabbasampattisādhukaṁ
Sabbe taṁ anumoditvā samaggā sāsane ratā,
Pamādarahitā hontu ārakkhāsu visesato.
Sāsanassa ca lokassa vuḍḍhī bhavatu sabbadā,
Sāsanam-pi ca lokañ-ca devā rakkhantu sabbadā.
Saddhiṁ hontu sukhī sabbe parivārehi attano,
Anīghā sumanā hontu, saha sabbehi ñātibhi.

Rājato vā, corato vā,

manussato vā, amanussato vā,
aggito vā, udakato vā,
pisācato vā, khāṇukato vā,
kaṇṭakato vā, nakkhattato vā,
janapadarogato vā, asaddhammato vā,
asandiṭṭhito vā, asappurisato vā,
caṇḍa-hatthi-assa-miga-goṇa-kukkura-ahivicchika-maṇisappa-dīpi-accha-taraccha-sukara-
mahisa-yakkha-rakkhasādīhi
nānā bhayato vā, nānā rogato vā,
nānā upaddavato vā, ārakkhaṁ gaṇhantu.

Metta Sutta

Yassānubhāvato yakkhā neva dassenti bhīsanaṁ,

yamhi cevānuyuñjanto rattindivam-antandito

sukhaṁ supati sutto ca pāpaṁ kiñci na passati -

evam-ādiguṇopetaṁ, parittaṁ taṁ bhaṇāmahe.

Karaṇīyam-atthakusalena, yan-ta’ santaṁ padaṁ abhisamecca:

sakko ujū ca suhujū ca, suvaco cassa mudu anatimānī,

santussako ca subharo ca, appakicco ca sallahukavutti,

santindriyo ca nipako ca, appagabbho kulesvananugiddho,
na ca khuddam-ācare kiñci yena viññū pare upavadeyyuṁ.
“Sukhino va khemino hontu, sabbasattā bhavantu sukhitattā!

Ye keci pāṇabhūtatthi tasā vā thāvarā v’ anavasesā,

dīghā vā yeva mahantā, majjhimā rassakā aṇukathūlā,

diṭṭhā vā ye va adiṭṭhā, ye va dūre vasanti avidūre,

bhūtā va sambhavesī vā sabbasattā bhavantu sukhitattā!”

Na paro paraṁ nikubbetha, nātimaññetha katthaci na’ kañci,

byārosanā paṭighasaññā nāññam-aññassa dukkham-iccheyya.

Mātā yathā niyaṁ puttam-āyusā ekaputtam-anurakkhe,

evam-pi sabbabhūtesu mānasaṁ bhāvaye aparimāṇaṁ.

Mettañ-ca sabbalokasmi’ mānasaṁ bhāvaye aparimāṇaṁ,

uddhaṁ adho ca tiriyañ-ca, asambādhaṁ averam-asapattaṁ.

Tiṭṭhaṁ caraṁ nisinno va, sayāno vā yāvatassa vitamiddho,

etaṁ satiṁ adhiṭṭheyya, brahmam-etaṁ vihāram-idha-m-āhu.

Diṭṭhiñ-ca anupaggamma, sīlavā dassanena sampanno,

kāmesu vineyya gedhaṁ, na hi jātuggabbhaseyya’ punar-eti.

Bojjhaṅga Sutta

Saṁsāre saṁsarantānaṁ sabbadukkhavināsane

Sattadhamme ca Bojjhaṅge Mārasenapamaddane.

Bujjhitvā ye cime sattā tibhavā muttakuttamā,

Ajātim-ajarābyādhim amataṁ nibbhayaṁ gatā.

Evam-ādiguṇūpetaṁ anekaguṇasaṅgahaṁ
Osadhañ-ca imaṁ mantaṁ: Bojjhaṅgañ-ca bhaṇāmahe.

Bojjhaṅgo sati-saṅkhāto dhammānaṁ vicayo tathā,

Vīriyaṁ pīti-passaddhi Bojjhaṅgā ca tathā-pare,

Samādhupekkha-bojjhaṅgā: satte te Sabba-dassinā

Muninā sammad-akkhātā, bhāvitā bahulī-katā
Saṁvattanti abhiññāya Nibbānāya ca Bodhiyā:
Etena sacca-vajjena sotthi te hotu sabbadā!

Ekasmiṁ samaye Nātho Moggallānañ-ca Kassapaṁ

Gilāne dukkhite disvā, Bojjhaṅge satta desayi,

Te ca taṁ abhinanditvā rogā mucciṁsu taṅkhane:

Etena sacca-vajjena sotthi te hotu sabbadā!

Ekadā Dhamma-rājā pi gelaññenābhipīḷito,

Cundattherena taṁ yeva bhaṇāpetvāna sādaraṁ,

Sammoditvāna ābādhā tamhā vuṭṭhāsi ṭhānaso:

Etena sacca-vajjena sotthi te hotu sabbadā!

Pahinā te ca ābādhā tiṇṇannam-pi Mahesinaṁ

Magga-hatā-kilesā va pattānupatti-dhammataṁ:
Etena sacca-vajjena sotthi te hotu sabbadā!

Paccavekkhaṇā (Requisites)

Paṭisaṅkhā yoniso cīvaraṁ paṭisevāmi,

yāvad-eva sītassa paṭighātāya, uṇhassa paṭighātāya,
ḍaṁsamakasavātātapasarīṁsapasamphassānaṁ paṭighātāya,
yāvad-eva hirikopīnappaṭicchādanatthaṁ.

Paṭisaṅkhā yoniso piṇḍapātaṁ paṭisevāmi,

neva davāya, na madāya, na maṇḍanāya, na vibhūsanāya,
yāvad-eva imassa kāyassa ṭhitiyā yāpanāya,
vihiṁsūparatiyā brahmacariyānuggahāya,
iti purāṇañ-ca vedanaṁ paṭihaṅkhāmi,
navañ-ca vedanaṁ na uppādessāmi,
yātrā ca me bhavissati, anavajjatā ca phāsuvihāro ca.

Paṭisaṅkhā yoniso senāsanaṁ paṭisevāmi,

yāvad-eva sītassa paṭighātāya, uṇhassa paṭighātāya,
ḍaṁsamakasavātātapasarīṁsapasamphassānaṁ paṭighātāya,
yāvad-eva utuparissayavinodanapaṭisallānārāmatthaṁ.

Paṭisaṅkhā yoniso gilāna-paccaya-bhesajja-parikkhāraṁ paṭisevāmi,

yāvad-eva uppannānaṁ veyyābādhikānaṁ vedanānaṁ paṭighātāya
abyāpajjhaparamatāya.

Metta bhavana

Ahaṁ avero homi, abyāpajjā homi,

anīgho homi, sukhī attānaṁ pariharami,

Sīmaṭha saṅgho avero hotu, abyāpajjo hotu,

anīgho hotu, sukhī attānaṁ pariharatu.

Sīmatha devata avera hontu, abyāpajjā hontu,

anīghā hontu, sukhī attānaṁ pariharantu.

Amhakaṁ gocaragāme khetthakamanussā avera hontu, abyāpajjā hontu,

anīghā hontu, sukhī attānaṁ pariharantu.

Amhakaṁ gocaragāme manussā avera hontu, abyāpajjā hontu,

anīghā hontu, sukhī attānaṁ pariharantu.

Puratthimāya disāya, pacchimāya disāya,

uttarāya disāya, dakkhiṇāya disāya,
puratthimāya anudisāya, pacchimāya anudisāya,
uttarāya anudisāya, dakkhiṇāya anudisāya,
heṭṭhimāya disāya, uparimāya disāya.
Sabbe sattā, sabbe pāṇā, sabbe bhūtā,
sabbe puggalā, sabbe attabhāvapariyāpannā,
sabbā itthiyo, sabbe purisā,
sabbe ariyā, sabbe anariyā,
sabbe devā, sabbe manussā, sabbe vinipātikā,
averā hontu, abyāpajjā hontu, anīghā hontu,
sukhī attānaṁ pariharantu,

Uddhaṁ yāva bhavaggā ca adho yāva avīcito

samantā Cakkavāḷesu, ye sattā pathavī carā,
abyāpajjā niverā ca niddukkhā cānupaddavā.

Uddhaṁ yāva bhavaggā ca adho yāva avīcito

samantā Cakkavāḷesu, ye sattā udake carā,
abyāpajjā niverā ca niddukkhā cānupaddavā.
Uddhaṁ yāva bhavaggā ca adho yāva avīcito
samantā Cakkavāḷesu, ye sattā ākāse carā,
abyāpajjā niverā ca niddukkhā cānupaddavā.

Yaṁ pattaṁ kusalaṁ, tassa ānubhāvena pāṇino,

sabbe Saddhammarājassa ñatvā Dhammaṁ, sukhāvahaṁ,

pāpuṇantu visuddhāya, sukhāya paṭipattiyā,

asokam-anupāyāsaṁ, Nibbānasukham-uttamaṁ.

Ciraṁ tiṭṭhatu Saddhammo, Dhamme hontu sagāravā,

sabbe pi sattā, kālena sammā devo pavassatu.

Yathā rakkhiṁsu porāṇā Surājāno, tathevimaṁ

Rājā rakkhatu dhammena attano va pajaṁ pajaṁ.

Sabbe saṅkhārā aniccā’’ti,

yadā paññāya passati;
Atha nibbindati dukkhe,
esa maggo visuddhiyā.

Sabbe saṅkhārā dukkhā’’ti,

yadā paññāya passati;
Atha nibbindati dukkhe,
esa maggo visuddhiyā.

Sabbe dhammā anattā’’ti,

yadā paññāya passati;
Atha nibbindati dukkhe,
esa maggo visuddhiyā.

Tathāgatapacchimavācā (Last Words of the Buddha)

Appamādena bhikkhave sampādetha:

Buddhuppādo dullabho lokasmiṁ,
manussattā paṭilābho dullabho,
dullabhā saddhā sampatti,
pabbajitabhāvo dullabho,
Saddhammasavanaṁ atidullabhaṁ.
Evaṁ divase divase ovādī:
“Handa dāni bhikkhave āmantayāmi vo vayadhammā saṅkhārā,
appamādena sampādetha!”

Sharing merit

Ettavatā ca amhehi sambhataṁ puññasampadaṁ,

sabbe devā’numodantu sabbasampatti siddhiyā.

Dānaṁ dadantu saddhāya, sīlaṁ rakkhantu sabbadā,

bhāvanābhuratā hontu, gacchantu devatā’gatā.

Sabbe Buddhā balappattā, paccekānañca yaṁ balaṁ,

arahantānañca tejena, rakkhaṁ bandhāmi sabbaso.

Imāya Dhammānu-dhammapaṭipattiyā Buddhaṁ pūjemi,

imāya Dhammānu-dhammapaṭipattiyā Dhammaṁ pūjemi,

imāya Dhammānu-dhammapaṭipattiyā Saṅghaṁ pūjemi,

addhā imāya paṭipadāya jātijarābyādhimaraṇamhā parimuccisāmi.