Ang Wika ng Edukasyon sa isang Multilingguwal na Nasyon
Ang bansang Pilipinas ay isang multilingguwal na nasyon, at ang bawat
mamamayan ay nakapagsasalita ng dalawa o higit pang wika. Ang Pilipinas ay isang kapuluang binubuo ng iba’t-ibang pangkat ng mga Pilipinong gumagamit ng iba’t-ibang wika at diyalekto. Humigit-kumulang 150 wika at diyalekto ang umiiral sa ating bansa. Karamihan sa atin ay nakapagsasalita at nakauunawa ng Filipino at Ingles. Ang kalagayang ito ang naging dahilan kung bakit kinakailangang magkaroon tayo ng isang wikang mauunawaan at masasalita ng karamihan sa mga Pilipino. Kung saan ang wikang ito ang magiging daan upang tayo ay magbuklod at magkaunawaan. Sa kabila nito, ang wikang Filipino at Ingles ang ginagamit na wikang panturo sa mga paaralan.
Ngunit kahit na wikang Filipino at Ingles ang ginagamit na wikang panturo
nananatili pa rin sa nakararaming batang Pilipino ang paggamit ng unang wika sa halip na wikang Filipino at Ingles. Kaya, ayon sa saligang batas ng 1987, Artikulo XIV, Seksiyon 7, na ang pangunahing wika ng komunikasyon sa Pilipinas ay Filipino at Ingles. Sa bawat rehiyon naman ay puwedeng gamitin ang kanilang lengguwahe kagaya ng Bisaya, Bicolano at Ilocano at marami pang iba kung saan ito ang magsisilbing pantulong na mga wika sa pagtuturo. Kaya sa pagpapatupad ng DepEd ng K-12 kurikulum, ang Mother Tongue o unang wika ng mga mag-aaral ay naging opisyal na wikang panturo mula Kindergarten hanggang Grade 3 sa mga paaralang publiko at pribado man. Ito ay tinawag na Mother Tongue-Based Multi-Ligual Education (MTB- MLE). Ang wikang Filipino at Ingles naman ay itinuturo bilang magkahiwalay na asignatura. Sa ikalawa hanggang ikaanim na baitang ay bibigyang-diin ang iba’t-ibang komponent ng wika tulad ng pakikinig, pagsasalita, pagbasa at pagsulat. Sa mas mataas na baitang ay Filipino at Inlges pa rin ang mga gagamiting pangunahing wikang
panturo.
Isang magandang hakbang ang ginawa ng ating bansa sa pagkakaroon ng
pambansang polisiya para sa multilingguwal na edukasyon. Kahit na marami pa ring edukador ang hindi lubusang tumatanggap sa ganitong sitwasyon o sistema, ang pagkakaroon ng ganitong batas at pamantayan na sinusunod ng mga paaralan, pribado man o pampubliko ay nakatutulong ng malaki upang higit na malinang at umunlad ang unang wika ng mga mag-aaral gayundin ang wikang Filipino, kasabay ng pagkatuto ng wikang Ingles. Makatutulong din ito sa mga mag-aaral upang higit na matutunan at maunawaan ang mga paksang kanilang pinag-aaralan. Inaasahang higit nilang mauunawaan at kalulugdan ang mga aralin kung ito’y ituturo sa wikang matatas na sila at lubos na nilang mauunawaan.