Sinubok ng Pandemya, Pinagtibay ng Pagmamahalan

ni: Ginalyn M. Medes

“Pandemya ka lang,Pilipino kami!”

Nagpapatunay ang katagang ito na ano mang pagsubok at hamon ang dumating sa buhay
ng mga Pilipino,tayo ay mananatiling matatag at ang pagmamahalan ay lalong umiigting at
tumitibay.
Nalalapit na ang ikalawang taong anibersaryo mula ng umatake ang Covid 19 sa buong
mundo. Ang virus na gumambala at walang habas na gumulo sa tahimik at masayang
pamumuhay ng mga tao. Ang virus na kumitil na ng napakaraming buhay at nagdala ng
maraming pasyente sa mga pagamutan. Ang virus na nagpahinto sa maraming manggagawa at
pansamantalang nagpatahimik sa maiingay na lansangan,pagawaan,pasyalan,palaruan at maging
sa mga paaralan. Ang virus na sumubok sa kakayahan at eksperto ng mga nilalang sa larangan ng
medisina.
Pagsubok nga ba ito ng Diyos? Isa ba ito sa kanyang paraan upang muli niyang
mapanumbalik ang pananampalatayang Kristiyano at hindi na lang puro pera,karangyaan at
kasiyahan ang naiisip ng mga tao?
Ayon sa homiliya ng isang alagad ng simbahan sa kanyang pagmimisa, “Noong
nagsimula ang pandemya at ipinagbawal ang pagpasok ng mga tao sa mga simbahan upang
sumamba, labis ang katuwaan ni satanas! Subalit nagkamali siya, sapagkat lalong pinagtibay ng
Diyos ang pananampalataya ng mga tao sapagkat muling nagsama-sama ang pamilyang dati rati
ay walang panahon sa isa’t isa sa labis na pagpapahalaga sa trabaho at sa napakaraming bagay”.
Nang dahil nga naman sa pandemya, muling nagkasabay-sabay at nagkaharap sa hapag-
kainan ang mag-anak, muling nakapag kwentuhan tungkol sa kanilang mga buhay-buhay at higit
sa lahat nagkaroon ng pagkakataong makapagsimba ng magkakasama sa pamamagitan ng online
masses. Lalong tumatag ang pagmamahalan sa loob ng tahanan dahil sa pagkakaroon ng sapat na
panahon sa isa’t isa. Nagkaroon ng napakahabang “family bonding” at may pabunos pang “with
God” na napakatagal na inasam at naipagkait ng tadhana higit lalo na sa mga taong walang ibang
hangad kundi ang mabigyan ng magandang buhay ang pamilya at mga mahal sa buhay.
Subalit tunay nga na “God is good all the time”. Muling napatunayan na ilang bagyo,
baha at delubyo mang maituturing ang virus na ito ang sumubok na pahinain ang mga Pilipino,
lalo naman nitong pinaiigting ang pagbabayanihan at pagmamahalan sa puso ng bawat isa. Ano
mang hamon, mapagtatagumpayan natin ito nang dahil sa Dakilang Pananalig at Dalisay na
Pagmamahalan.