1

DOMINGO DE RAMOS

Pasion ni Jesucristong Kagurangnan

na sinurat ni San Lucas.
22:14-23:56 ( C )
 2

PADI: An Pasion ni Jesucristong Kagurangnan na sinurat

ni San Lucas.

GABOS: Kamurawayan sa Saimo. Kagurangnan.

EUCARISTIA
Parasaysay: Pag-abot kan oras, si Jesus nagtukaw sa lamesa
kaiba an mga apostoles, asin nagsabi sainda:

Jesus : Kanigoan na gayo an sakuyang pagmawot na

makapamanggi kaining pasko sa kaibahan
nindo, bago ako magtios! Sinasabi ko saindo;
dai na ako makakan kaini sagkod na mautob
sa kahadean nin Dios.

Parasaysay: Kinua an kaliz, nagpasalamat asin nagsabi:

Jesus : Akoa nindo ini asin ihiras sa lambang saro

saindo: Sinasabi ko saindo: poon ngonian dai
na ako mainom kan bunga nin ubas sagkod na
dumatong an kahadean nin Dios.

Parasaysay : Kinua an tinapay, nagpasalamat, binaak, itinao

sainda asin nagsabi:
 3

Jesus : Ini an sakuyang hawak na idodolot para

saindo: giboha nindo ini sa pagromdom sa
sako.

Parasaysay: Siring man, pakapamanggi, kinua an kalis asin

nagsabi:

Jesus : An caliz na ini iyo an Bagong Tipan sa

sakuyang dugo, na pinabulos para sa saindo.
Alagad uya sa kataed ko sa lamesa an kamot
kan nagpapasaluib sako. An Aki nin Tawo
nagsusunod sa itinalaan saiya. Alagad, herak
man sa nagpapasaluib saiya!

Parasaysay: Nagporoon sinda paghapot kun siisay daw sa

sainda an magibo kaiyan. An mga apostoles
nagpasuruhay kun siisay sa sainda an orog
kadakula. Sinabihan sinda ni Jesus:

Jesus : An mga hade nin mga banwaan nakakasakop

sainda, asin an mga nagkakapot nin
kapangyarihan gustong pag-apodon na mga
parasurog. Sa saindo, bakong siring kaiyan;
 4

kundi an orog kadakula saindo magin siring sa

ngohod, asin an namamayo siring sa
naglilingkod. Siisay an orog kadakula: an nasa
lamesa? Alagad uya ako saindo siring sa
naglilingkod. Kamo nakidamay sako sa
sakuyang mga kasakitan, asin itinatao ko
saindo an kahadean siring na iyan itinao sako
kan sakuyang Ama. Sa sakuyang kahadean
kamo makakan asin mainom sa sakuyang
lamesa, asin matukaw kamo sa mga trono,
asin saindong huhukuman an kagduwang
tribu sa Israel.

(Si Pedro Manegar sa Kagurangnan)

Jesus : Simon, Simon! Hinagad ni Satanas na saligsigon

ka siring sa trigo. Alagad ipinangadie taka na dai
magluya an saimong pagtubod. Asin pakapagsolsol
mo, pasariga an saimong mga tugang.

Parasaysay: Si Pedro nagsimbag:

Pedro : Kagurangnan, kaiba mo, andam ako na ilaog

sa bilanggoan o darahon sa kagadanan.
 5

Parasaysay: Si Jesus nagsabi:

Jesus : “Sinasabi ko saimo, Pedro, na ngonian man

sana, bago magturaok an manok, makatolo
kang masabi na dai mo ako midbid.”

(Bolsa, Sopot, Espada)

Parasaysay : Asin nagsabi sa gabos:

Jesus : “Kan sinugo ko kamo na daing bulsa, ni supot,

ni sapin, nagkulang daw kamo nin ano man?

Parasaysay: Simbag ninda:

Disipulos : Dai.

Parasaysay: Dangan nagsabi:

Jesus : Ngonian kun may bulsa, darahon; siring man,

kun may supot. An daing espada, ipabakal an
alikboy, asin magbakal nin sarong espada.
Huli ta sinasabi ko saindo, kaipuhan na
maotob sakuya an nasusurat: “Ibinilang na
sarong tulisan.” An manonongod sakuya
matatapos na.
 6

Parasaysay: Nagsabi sinda:

Disipulos : Kagurangnan, igwa digdi nin duwang espada.

Parasaysay: Si Jesus nagsimbag:

Jesus : Tama na.

(Pasion)

Parasaysay: Dangan nagluwas asin siring sa kinaugalian,

nagpasiring sa bukid nin mga Olivo. Alagad
sinunod kan mga disipulos. Pag-abot duman,
nagsabi sainda:

Jesus : Mamibi kamo nganing dai madaog nin sogot.

Parasaysay: Suminiblag sa sainda, sa harayo na

madadaklag nin gapo, luminuhod asin namibi:

Jesus : Ama, kun boot mo, pakirayoan sako an caliz

na ini. Alagad koyogon bako an boot ko,
kundi an boot mo.
 7

Parasaysay: Nagpahiling an sarong anghel hale sa langit na

nagpapakusog saiya. Inabtan nin makuring
sakit, namibi nin orog na malodok. Gan-ot na
garong dugo na nagtuturo, buminolos sagkod
sa daga.
Pakapamibi, nagbangon, dinolok an mga
disipulos asin naabtan na nagkakaturog huli sa
kamundoan. Nagsabi sainda:

Jesus : Tadaw ta nagtuturog kamo? Bangon na kamo

asin mamibi tanganing dai madaog nin sogot.

(Pinasaluiban asin Dinakop)

Parasaysay: Nagtataram pa si Jesus, kan dumatong an mga

tawo. Si Judas, saro sa Doce, an nangenotan
asin nagrani sa paghadok ki Jesus. Si Jesus
nagsabi saiya:

Jesus : Judas, sa sarong hadok, pinapasaluiban mo an

Aki nin Tawo?

Parasaysay: Kan maisihan kun ano an mangyayari, an mga

kaibahan niya nagsabi:
 8

Disipulos : Kagurangnan, ano tigbason mi kaining

espada?

Parasaysay: Saro sainda sa sarong tigbas napalong an

toong talinga kan sorogoon kan halangkaw na
padi.
Si Jesus nagsabi:

Jesus : Itugot nindo iyan sainda.

Parasaysay: Dangan kinua an talinga asin binulong. Nagsabi

sa mga poon nin kapadian, sa mga oficiales kan
simbahan asin sa mga poon sa banwaan na
nagduman sa pagdakop saiya:

Jesus : Nagpadigdi kamo, may darang mga espada

asin pamakol; garo kamo madakop nin sarong
tulisan. Aroaldaw, yaon ako saindo sa
simbahan asin dai ako nindo dinadakop.
Alagad, ini an oras nindo: oras kan
kapangyarihan nin kadikloman.
 9

(Si Jesus Pinagnegaran ni Pedro)

Parasaysay: Si Jesus dinakop asin dinara ninda. Dinara sa

harong kan halangkaw na padi, asin si Pedro
nagsunod sa harayo. Nag-aramak nin kalayo sa
tahaw kan patio, nagturukaw sa palibot asin si
Pedro nakikidangdang kaiba ninda. Sarong
sorogoon na babae, pagkahiling saiya na
nakikidangdang, minasdan asin sinabihan:

Babae : Ini man, kaibahan niya.

Parasaysay: Si Pedro nagnegar:

Pedro : Babae, dai ko siya midbid.

Parasaysay: Dai nahaloy, nahiling siya nin saro pang

surugoon asin sinabihan:

Babae : Ika man, saro sa sainda.

Parasaysay: Si Pedro nagsimbag:

Pedro : Bako. Bakong ako.

 10

Parasaysay: Pakalihis nin sarong oras, may nagsabi saiya:

Babae : Totoo, ini man kaibahan niya. Galileo man!

Parasaysay: Si Pedro nagsabi:

Pedro : Dai ko aram an sinasabi mo.

Parasaysay: Nagtataram pa siya kan padaling nagturaok an

manok. An Kagurangnan nagsalingoy asin
nahiling si Pedro. Dangan nagiromdoman ni
Pedro an sinabi saiya nin Kagurangnan:
“Bago magturaok an manok ngonian,
makatolo mo akong pagnenegaran.” Asin
pakaluwas, si Pedro nagtangis nin mapaiton.

(Pinag-olog olog asin Sinuntok)

Parasaysay: Si Jesus pinag-olog-olog asin sinuntok kan mga

lalaki na nagbabantay saiya sa bilanggoan.
Tinakpan an saiyang mga mata asin sinabihan:

Soldados: Ukoda daw, profeta, kun siisay an nagsontok

saimo.
 11

Parasaysay: Asin dakul pang mga paglalanghad an sinabi

ninda saiya.

(Sa Atubang kan Sanggunian)

Parasaysay: Pagka-aga, nagtiripon an mga poon sa

banwaan, an mga poon nin kapadian asin mga
escribas. Si Jesus dinara ninda sa atubang kan
Sanggunian asin sinabihan:

Escriba : Kun ika an Mesias, sabihon mo samo.

Parasaysay: Sinimbag niya sinda:

Jesus : Kun sabihon ko na ako, dai kamo matubod.

Kun ako maghapot saindo, dai kamo
masimbag. Alagad poon ngonian, an Aki nin
tawo mahihiling nindo na nakatukaw sa too
nin Dios na makakamhan.

Parasaysay: Gabos nagsabi:

Escribas : Kun siring, ika an Aki nin Dios?
Parasaysay: Sinimbag:
Jesus : Iyo man nanggad: ako iyo iyan.
 12

Parasaysay: Nagsabi sinda:

Escribas : Dai ka nagkakaipo nin ibang mga saksi.

Nadangog na niato hale sa saiya man sanang
ngoso.

(Sa Atubang ni Pilato)

Parasaysay: An bilog na Sanggunian nagtindog asin dinara

si Jesus sa atubang ni Pilato. Pinagsumbong
siya ninda na an sabi:

Escribas : Namasdan mi na an tawong ini nagpaparibok

sa satong banwa; nagpapangalad na magtao
nin buwis ki Cesar asin nagsasabi na siya
Mesias asin Hade.

Parasaysay: Si Pilato naghapot:

Pilato : Ika an hade kan mga Judio?

Parasaysay: Si Jesus nagsimbag:

Jesus : Iyo siring sa sinabi mo.

 13

Parasaysay: Si Pilato nagsabi sa mga poon nin kapadian

asin sa mga tawo.

Pilato : Dai akong nakuang kasalan sa tawong ini.

Parasaysay: Nag-orog an saindang pagsumbong:

Escribas : Pinariribok niya an banwa huli kan saiyang

katukdoan sa bilog na rona, poon sa Galilea
sagkod digdi.

(Sa Atubang ni Herodes)

Parasaysay: Kan ini madangog ni Pilato, naghapot kun baga

si Jesus taga-Galilea. Kan naaraman na sakop ni
Herodes, ipinadara saiya na kan aldaw na idto
yaon duman sa Jerusalem. Naogma si Herodes
kan mahiling niya si Jesus. Haloy nang
pinagmawot niya na mahiling siya, huli ta dakul
an nadangog niya dapit saiya asin man huli ta
boot niyang mahiling an milagro na saiyang
ginigibo. Pinaghapot niya dapit sa dakul na
bagay, alagad si Jesus dai nagsimbag. An mga
poon nin kapadian asin mga escriba yaon
 14

duman; ipinagsusumbong siya ninda nin

makuri. Pinagbasang-basang asin pinag-olog-
olog ni Herodes asin nin saiyang mga soldados.
Ginubingan nin magayon dangan ipinabalik ki
Pilato. Kan aldaw na idto, nagin katood si
Herodes asin si Pilato; bago kaidto magkaiwal
sinda.

(Hinatolan na Gagadanon)

Parasaysay: Pinaapod ni Pilato an mga poon nin kapadian,

mga poon sa banwa asin mga tawo, dangan
sinabihan:

Pilato : Dinara nindo sako an tawong ini; sabi nindo

na siya nagpaparibok sa banwa. Hinapot ko
siya sa atubang nindo asin dai ko nakua na an
tawong ini nagkasala sa mga
ipinagsusumbong nindo laban saiya. Siring
man si Herodes, kaya ibinalik siya sato.
Nahiling na nindo na an tawong ini dai
nakagibo nin anoman na magin dahelan na
siya ipagadan. Kaya, siya sakong
padudusahan asin pabubutasan.
 15

Parasaysay: Alagad sinda gabos dorongan na nagkurahaw:

Banwa : Halea an tawong ini asin itao samo si

Barabas.

Parasaysay: Si Barabas nabibilanggo huli ta nagparibok sa

banwaan asin huli man ta nakagadan nin tawo.
Giraray nagtaram si Pilato, huli ta boot niyang
pabutasan si Jesus. Alagad sinda nagkurahaw:

Banwa : Ipako sa cruz! Ipako sa cruz!

Parasaysay: Giraray nagtaram si Pilato sainda:

Pilato : Anong karatan an ginibo kan tawong ini? Dai

akong nakuang dahelan kun tadaw ta siya
ipagadan. Kaya siya sakong padudusahan asin
pabubutasan.

Parasaysay: Alagad sinda nagpirit. Hinagad sa makusog na

kinurahaw na siya ipako sa krus. Asin an
saindang kinurahaw nautob. Sa pagboot ni
Pilato, binutasan an saindang hinagad, an
nabibilanggo ta nagparibok asin ta nakagadan,
 16

asin si Jesus itinao sainda tanganing gibohon

saiya an anoman na boot ninda.

Parasaysay: Kan si Jesus saindang ilinuwas, dinakop ninda

si Cireneo na nagpupuli hale sa oma asin
ipinapasan ninda saiya an cruz sa hudyan ni
Jesus. Dakul na tawo an nagsusunod saiya asin
dakul na babae an nagtangis asin nanambitan
huli saiya. Si Jesus nagsalingoy asin nagsabi
sainda:

Jesus : Mga babae sa Jerusalem, dai ako nindo

pagtangisan. Pagtangisan nindo an saindo
man sana asin an saindong mga aki, huli ta
maabot an aldaw na masabi sinda: “Paladan
an mga bawas, an mga tulak na daing aki
asin an mga daghan na daing pinapasoso.” Sa
mga bulod masabi sinda: “Pukanan nindo
kami!” Sa mga bukid masabi sinda:
“Tambonan nindo kami!” Kun ini ginigibo
ninda sa kahoy na berde, ano daw an
gigibuhon sa alang?
 17

Parasaysay: Duwa pa katawo, na mga tulisan, ilinuwas

ninda tanganing gadanon sa kaibahan niya.
Pag-abot ninda sa lugar na inaapod Calvario,
ipinako ninda si Jesus sa cruz asin man an mga
tulisan: saro sa wala asin saro sa too. Si Jesus
nagsabi:

Jesus : Ama, patawara sinda; dai ninda aram an

saindang ginigibo.

Parasaysay: An saiyang gubing pinagbaranga asin

pinagripahan ninda. An mga tawo
nagmamasid. An mga poon sa banwaan nag-
oolog-olog saiya asin nagsabi:

Banwaan : Ilinigtas niya an iba; iligtas man niya an

saiyang sadiri kun siya an Mesias nin Dios, an
Pinili.

Parasaysay: An mga soldados nagrani sa pag-olog-olog man

saiya. Dinolotan siya nin suka asin sinabihan:

Soldados : Kun ika an hade kan mga Judio, iligtas mo an

saimong sadiri!
 18

Parasaysay: Duman sa itaas kan krus nasusurat: INI AN

HADI KAN MGA JUDIO. Saro sa mga tulisan na
nabibitay sa krus nag-olog-olog saiya asin
nagsabi:

Tulisan : Bakong ika an Mesias? Ligtasan an saimong

sadiri asin ligtasan man kami.

Parasaysay: Alagad sinaway siya kan kapwa niya tulisan

asin sinabihan:

Dimas : Dai ka natatakot sa Dios, mantang ika

nasisilo-tan nin siring? An satong silot
matanos, maninigo sa satong sala, alagad ini
daing sala na ginibo.

Parasaysay: Dangan nagsabi:

Dimas : Jesus, giromdoma man ako kun yaon ka na sa

saimong kahadean.

Parasaysay: Si Jesus nagsimbag:

Jesus : Totoong sinasabi ko saimo, ngonian man

sana, maiba ka sako sa paraiso.
 19

(Si Jesus Nagadan)

Parasaysay: Odto na kan magdiklom an aldaw asin an bilog

na rona sagkod sa alas tres nin hapon. An
kortina sa simbahan nagisi sa tahaw. Sa
makusog na tingog, si Jesus nagsabi:

Jesus : Ama, sa saimong kamot idinodolot ko an

sakong Espiritu.

Parasaysay : Pakasabi kaini, nautsan. An kapitan, na

nakahiling kaining mga pangyayari, nag-omaw
sa Dios asin nagsabi:

Centurion : Totoo man nanggad, an tawong ini daing sala!

Parasaysay: An mga tawo na nagtiripon sa paghiling kaini,

kan nahiling an nangyayari, nagpuli sa banwa,
tinuturumbok an saindang mga daghan. An
saiyang mga kamidbid asin man an mga babae
na nagsunod saiya poon sa Galilea, nagtirindog
sa harayo asin saksi kaini gabos.
 20

(Si Jesus Ilinobong)

Parasaysay: Sarong lalaki na an ngaran Jose, kaayon sa

Sanggunian, marahay asin matanos na tawo,
bakong oyon sa ginibo kan mga Judio. Siya
taga-Arimatea, banwa sa Judea. Naghahalat
man siya kan kahadean nin Dios. Ini nagduman
ki Pilato asin hinagad an bangkay ni Jesus.
Tinanggal, pinatos sa tamong asin ibinugtak sa
lolobngan na tinuki sa gapo. Dai pa nin
ilinobong duman. Aldaw idto kan pag-andam
asin magsasabado na. An mga babae na kairiba
niya poon sa Galilea nagsunod sa paghiling kan
lolobngan asin kun paano ilinaog an bangkay.
Pagpuli, nag-andam nin mga pahamot asin
mga panlahid.

AN MARHAY NA BARETA KAN SATONG KAGURANGNAN.