Professional Documents
Culture Documents
A Prosa Entre 1936 e 1976
A Prosa Entre 1936 e 1976
A guerra civil supuxo unha ruptura na narrativa galega e ata os anos 50 a actividade literaria en
galego vaise desenvolver no exilio, sobre todo en Bos Aires. Será nesta década cando comece o
proceso de recuperación da nosa literatura, grazas fundamentalmente ao traballo desenvolvido
pola Editorial Galaxia.
1. Continuación da prosa da Xeración Nós: esta é a orientación que segue Carballo Calero en A
xente da Barreira (primeira novela publicada na posguerra), ao reconstruír a historia da
degradación dunha familia fidalga. Otero Pedrayo retoma na posguerra o seu labor con obras
como O señorito da Reboraina ou O espello no serán. A temática é a decadencia da fidalguía.
2. A indagación no conto popular: o realismo popular de Ánxel Fole. A súa obra narrativa está
constituída por relatos que xeralmente obedecen a unha mesma técnica: a do conto contado.
Son relatos narrados por personaxes onde outros personaxes escoitan e entre os que con
frecuencia se establece un diálogo.
A Galicia rural é a protagonista. O autor coñeceuna detalladamente: a paisaxe, os costumes, o
xeito de vivir, etc.
Fole incorpora aos seus textos técnicas, recursos e a linguaxe da narrativa oral. Deste xeito as
historias adoitan comezar cunha fórmula introdutoria que marca unha localización temporal ou
espacial, desenvólvense de forma linear e rematan cunha sentenza de carácter didáctico.
Tamén fai unha constante mestura de humor e medo, e tamén de realidade e elementos
fantásticos ou máxicos.
A lingua que emprega é a que se fala nas terras luguesas.
- Á lus do candil, Contos a carón do lume. Son catorce relatos escritos coa técnica
tradicional do conto oral, de temática baseada na mitoloxía popular de lobos,
aparecidos, meigallos...de ambientación rural e lingua dialectal do Courel.
- Outras obras súas son Terra brava, de características parecidas á anterior e Contos da
néboa, de ambientación urbana.
3. A imaxinación como fuxida ou evasión, manifestada no realismo fantástico de Álvaro
Cunqueiro. Nas súas obras predomina a fantasía, pero sempre entrelazada coa realidade e
achegando á nosa cultura mitos externos. Combina lingua culta e lingua popular e o seu estilo
está influenciado polas narracións tradicionais.
- Merlín e familia. Máis que unha novela é unha sucesión de episodios contados por
Felipe de Amancia, paxe do mago Merlín cando este estivo en terras de Miranda, a onde
acoden xentes moi diversas. O Merlín... é unha recreación episódica da materia de
Bretaña desde unha perspectiva galega.
- As crónicas do Sochantre. A acción transcorre na Bretaña francesa e o Sochantre de
Pontivy (músico da capela) actúa como fío condutor da narración (sobe a unha carroza
que o leva a uns funerais, onde viaxan unha compañía de mortos que contan as súas
propias historias).
- Se o vello Sinbad volvese ás illas é considerada como unha novela de personaxe. Sinbad,
personaxe de As mil e unha noites, xa retirado, conta nas xuntanzas as súas raras
aventuras de mariño e decide volver embarcar. O proxecto fracasa e culmina coa
cegueira do personaxe e coa perda da súa capacidade de fabular ou soñar.
- Dentro dos retratos inclúese a triloxía formada por: Escola de menciñeiros, Xente de aquí
e de acolá e Os outros feirantes. Son breves retratos de personaxes populares con toda a
aparencia de seres reais.
4. O realismo social de Blanco Amor. Toda a súa obra narrativa está concentrada nun mesmo
ambiente, Auria: O Ourense de fins do século XIX e comezos do XX. Trátase de revivir a través
do recordo a sociedade na que o autor se criara e que abandonou sendo mozo. Pero debemos
ter en conta que non se trata de obras autobiográficas.
2
- Xente ao lonxe é unha radiografía do Ourense de principios de século a través da
experiencia dun grupo de traballadores, vinculados a organizacións de carácter obreiro e
sindical. Técnica e tematicamente é a máis complexa das súas obras xa que ten un
enfoque polifónico, de perspectiva múltiple, pois mestura diferentes narradores. O
principal é Suso, neno de 12 anos que vai madurando ao longo da obra.
5. O realismo crítico de Neira Vilas. Máis novo que os anteriores, coincide cronoloxicamente cos
membros da Nova Narrativa Galega (Xeración dos 50) pero a súa produción afástase da destes
autores tanto na técnica como na temática. As súas obras caracterízanse principalmente pola
constante presenza do mundo rural galego de posguerra, dominado pola miseria e no que os
protagonistas manteñen unha conflitiva relación co medio debido á situación de opresión que
padecen. Memorias dun neno labrego é a súa obra máis coñecida, forma parte do coñecido
como ciclo do neno xunto a Cartas a Lelo e Aqueles anos do Moncho.
Nas narracións de protagonista adulto, como por exemplo Xente no rodicio, intensifica a pintura
negra da sociedade campesiña; os personaxes parecen incapaces de escapar do seu mundo de
atraso onde mandan condicionantes políticos e relixiosos. En Historias de emigrantes hai unha
visión dos problemas xerados a causa do éxodo forzoso: angustia, saudade da terra, dificultade
de adaptación ó mundo urbano.