RAMOS, Czarina Francine M.

GERPHIS [ Y13 ]

Ang Kasaysayan bilang Disiplina

1. Bigyan ng sariling pagpapakahulugan ang "Kasaysayan" base sa iyong karanasan. Ibangga ito

sa mga kahulugan na iyong nabasa o napanood sa mga naka-upload na learning materials o

online materials. Tukuyin ang naging mga pagkakatulad o pagkakaiba. Sumasalungat o

sumasang-ayon ba ang iyong sariling kahulugan sa mga materyales na iyong binasa? Bigyang

liwanag. (300 words minimum)

Para sa akin, ang kasaysayan ay ang mga pangyayari mula sa nakaraan. Ito ay ang mga

pangyayari bagaman simple man sa mata ng iba pero mahalaga pa rin para sa atin — na kung

saan tayo ay may natutunan. Ito ay isang kasangkapang makatutulong upang mas mapaglayong

paunlarin ang isang bansa. Ang kasaysayan ay para sa tao. Ito ay isang bagay na maaaring

gamitin bilang sandata ng mga ito. Ayon naman sa mga materyales na aking nabasa at napanood,

ang kasaysayan ay mga salaysay na may saysay para sa mga tao. Ang kasaysayan ay hindi

lamang basta-bastang kuwento. Sa halip, ito ay mayroong metodo.

Ang pagkakatulad ng aking sariling pagpapakahulugan sa “kasaysayan” at ng tiyak na

kahulugan sa aking mga napanood at nabasa ay ang mga sumusunod: (1) ito ay pangyayari sa

nakaraan; (2) ito ay pangyayari na mayroong kabuluhan o saysay; (3) ito ay para sa tao – para sa

atin.
 Ang pagkakaiba ng aking sariling pagpapakahulugan sa “kasaysayan” at ng tiyak

kahulugan sa aking mga napanood at nabasa ay ang mga sumusunod: (1) hindi ito basta-basta

kuwento lang; (2) mayroon itong sinusunod na metodo.

Bagamat mayroong iilang pagkakaiba, ang aking pansariling depinisyon ng kasaysayan

ay sumasang-ayon sa tiyak na kahulugan nito. Siyang tunay, ang kasaysayan ay mga salaysay o

kuwento na may saysay para sa tao. Kung ito ay may saysay, ibig sabihin ay ito ay isang bagay

na maaari nating mapakinabangan. Kaya naman ito ay maaaring magsilbing sandatang

makatutulong upang mas mapaglayong paunlarin ang isang bansa. Ang kasaysayan ay para sa

tao. Sa kabilang banda, marapat lamang na bigyang linaw at diin at pakatandaan na ang

kasaysayan ay “hindi” basta-bastang kuwento lamang — na mayroon itong metodo.

Samakatuwid, ang kasaysayan ay hindi dapat hinahalintulad sa isang “chismis”. Ang kasaysayan

ay dumaraan sa isang proseso. Maraming babasahin, papel, at maging mga di-naksulat na batis

ang isinasang-alang-alang ng mga historyador upang mapag-aralan ang ating kasaysayan.

2. Tukuyin ang mga mahahalagang dahilan kung bakit natin kailangang pag-aralan ang

kasaysayan. (300 words minimum)

Ang kasaysayan ay mahalaga sapagkat ito ang gabay para malaman ang mga pangyayari

sa nakaraan at maunawaan ang kasalukuyan. Ito ay isang malaking tulong upang mas magawang

intindihin ang lipunan. Sa pamamagitan nito, magagawa nating harapin ang kasalukuyan nang

tama at walang pag-aalinlangan. Sa tulong nito, magagawa nating makapaghanda para sa

kinabukasan — makagagawa tayo ng mga hakbang para sa hinaharap na maaaring magsilbing

gabay para sa mga susunod na henerasyon. Sa madaling salita, ang kasaysayan ay susi para sa

isang masaganang kinabukasan sapagkat ito ang makatutulong upang magbigyang sagot ang mga

isyu ng lipunan sa kasalukuyan tulad ng terorismo, kurapsyon, at kahirapan.

Ito ay sumasalamin ito sa ating mga kuwento at kaisipan. Mahalagang maging maalam

tayo rito upang mapanatili ang ating identidad bilang mga Filipino. Mahalagang alam natin na

mayroon tayong sariling atin — na bago pa tayo masakop ng mga dayuhan, kaya na nating

tumayo sa sarili nating mga paa. Ito ang nagsisilbing paalala na tayo ay Filipino. Ito ay mahalaga

upang mapanatili natin ang sariling atin — mula sa ating kultura, tradisyon, lengguwahe,

kabuhayan, at iba pa. Hindi tayo pagmamay-ari ng ninoman. Sa madaling sabi, ito ang

nagpapakilala at nagtatanim sa atin ng damdaming makabayan.

Mahalaga ito upang mapanatili ang kuwento ng nakaraan na dapat maisalin sa mga

susunod na henerasyon. Dagdag pa rito, ito ay nakapagbibigay inspirasyon. Ang mga kuwento na

ito ng nakaraan ay mahalaga upang maging bukas ang ating mga mata at isipan sa mga
kaganapang nagdaan. Mahalaga ito upang matuto tayo sa mga pagkakamali ng iilan at maging sa

mga tamang nagawa rin ng mga ito. Sa pamamagitan ng mga kaalamang mapupulot natin sa

nakaraan, mas makapag-iisip tayo ng epektibong mga solusyon na kapaki-pakinabang hindi

lamang sa kasalukuyan kundi maging sa hinaharap.

3. Ano ang kaugnayan ng pag-aaral ng kasaysayan sa iyo bilang mamamayan at isang

mag-aaral? May halaga o gamit ba ito para sa iyong kurso? Pangatwiranan. (300 words

minimum)

Bilang isang mamamayan, masasabi kong ang kaugnayan ng pag-aaral ng kasaysayan sa

akin ay ito ang nagsisilbing daan upang mas mapagtibay ang aking pagka-Filipino. Ito ang

nagsisilbing daan para mas makilala ko ang aking bansa at makatulong upang ito ay mapaulad.

Bilang isang mag-aaral, ang kaugnayan ng pag-aaral sa kasaysayan sa akin ay ito ang

nagiging tulay upang mas maintindihan ko ang mga pangyayari sa kasalukuyan. Ito rin ang

nagmumulat sa aking mga mata upang magawang makita at kilanlanin ang mga ugat ng

problema at makaisip ng paraan upang ito ay mapuksa.

Samakatuwid, ang pag-aaral sa kasaysayan ang siyang nag-uudyok upang ako ay mas

maging kapakipakinabang bilang isang indibidwal na naninirahan sa aking bansa. Sa madaling

sabi, kung alam ko ang kasaysayan ay magagawa kong maanalisa at maikonsidera ang mga dapat

sa hindi dapat; ang mga makatutulong at hindi makatutulong; ang mga hindi na dapat ulitin at

mga dapat na isagawang muli. Matututo ako sa mga pagkakamali sa nakaraan at magagawa kong

iwasan ang pag-ulit sa mga kamaliang hindi na dapat maisagawang muli.

Sa kursong sikolohiya, masasabi kong may halaga at gamit pa rin ang kasaysayan

sapagkat malaking kapakinabangan ang pagiging maalam dito upang magawang mas mapaunlad

pa ang field of psychology at makapagsagawa ng mga pag-aaral upang mas paunlarin at

pagtibayin pa ang mga nauna na. Ang kasaysayan ng mga naunang pag-aaral ang siyang

magsisilbing pundasyon para sa mga isinasagawa at isasagawa pa lamang na mga pananaliksik

sa susunod pang mga taon. Sa tulong ng kasaysayan ay maitatala ang mga gumana at hindi

mairerekomenda na mga proseso o pamamaraan — na siya namang makatutulong upang

makapagsagawa ng mas masistema, malaman, at epektibong pag-aaral hinggil sa pag-iisip at

kilos ng isang indibidwal. Dahil sa mga nabanggit, mas magkakaroon ng direksiyon ang

pag-aaral at mas mabibigyang pokus ang mga mahahalagang bagay na mas dapat pagtuunan ng

pansin. Magiging mas matiwasay ang mga pag-aaral sapagkat maiiwasan nang ulitin ang mga

pagkakamaling nagawa ng mga nauna. Dagdag pa sa nasabi, mas magagawa pang paunlarin ang

mga nauna nang pag-aaral.