YOHANE III

I. Fangowai Yohane Gayo andrõ.

II. Faʼomuso dõdõnia, me itõrõ lala si sõkhi Gayo, ba me ahakhõ dõdõnia zi numana.
III. Mangarõngarõ ia ba khõ Dioterefe andrõ, ba isuno Demeterio.
IV. Fangoʼozui sura.
1. Satua andrõ zanura daʼe, khõ, Gayo niʼomasiʼõ somasi ndraʼo, si ndruhundruhu.
2. He yaʼugõ niʼomasiʼõ! Fefu hadia ia khõu, ba omasido, na ohahau dõdõu, ba na lõ fõkhõu, si mane faʼohahau
dõdõu ba nosou.
3. No omuso sibai dõdõgu, me so dalifusõ andrõ, samaduhuʼõ si duhu andrõ, khõu, wa õtõrõ lala zi duhu
4. Fondrege waʼomuso dõdõgu daʼõ, na urongo, latõrõ lala zi duhu iraono khõgu.
5. He yaʼugõ niʼomasiʼõ! Satulõ nilaumõ ba dalifusõ andrõ, mendrua manõ, me no niha bõʼõ ira,
6. samaduhuʼõ faʼomasiu, ba zi so banua, ba sõkhi, na õtolo ira, ba wofanõ, si nangea ba khõ Lowalangi.
7. Bõrõ sa dõi andrõ, wa mofanõ ira, ba lõ lahalõ hadia ia ba niha baero.
8. Andrõ moʼõmõ ita, tatolo zi mane yaʼira andrõ, enaʼõ sanolo ba halõwõ ita, ba zi duhu andrõ.
9. So zi no usura ba mbanua; ba lõ itemaga Dioterefe andrõ, somasi na sebuara ia.
10. Andrõ ufasugi ba dõdõnia mbuabuania, na sodo, nilaunia, wamatou yaʼaga, fehede si lõ sõkhi; ba ambõ na daʼõ,
lõʼõ gõi ifaʼamõi khõra dalifusõ andrõ, ba itenawa zedõna mamaʼamõi yaʼira menaʼõ, iʼefaʼõ ira banua.
11. He yaʼugõ niʼomasiʼõ! Bõi oʼõ zi lõ sõkhi, si sõkhi oʼõ. Moroi ba Lowalangi zolau si sõkhi; solau si lõ sõkhi, ba
lõ irai iʼila Lowalangi.
12. Dozi lafaduhuʼõ Demeterio andrõ, ba ifaduhuʼõ gõi ia si duhu; ba yaʼaga gõi, ba mafaduhuʼõ ia, ba no õʼila, wa
no si duhu wamaduhuʼõma.
13. Oya nisuragu khõu enaʼõ, ba lõ edõnado ufake dawa ba fanura, ba wanura yaʼia khõu;
14. udõnadõna, alio falukha ita, ba fahuhuo ita dania.
15. Yaʼohahau dõdõu! Laʼowai ndraʼugõ si fahuwu andrõ. Owai zi fahuwu, õtõtõi dõira.

HAKUNA MATATA
 https://www.bible.com/id/bible/109/3jn.1_1.nia

HAKUNA MATATA