KOMUNIKASYON AT PANANALIKSIK SA WIKA AT KULTURANG PILIPINO

(HANDOUTS)

UNANG KWARTER
WEEK 9
KASAYSAYAN NG PAMBANSANG WIKA
______________________________________________________________________________
Inihanda nina: Bb. Melanie Camille Ellazar
Bb. Ma. Myrsal Felizarte
Bb. Kristi Rose Jorge
Bb. Ma. Josefa Loy
Bb. Jakelyn Pacificador
Bb. Melanie Pasaylo
________________________________________________________________________
Learning Competency:
Pagkatapos ng aralin, ang mga mag-aaral ay:
● Nakasusulat ng sanaysay na tumatalunton sa isang partikular na yugto ng kasaysayan ng Wikang
Pambansa

____________________________________________________________________________________

PANAHON NG 1987 HANGGANG SA KASALUKUYAN

PEBRERO 2, 1987
● Nang naging pangulo ng bansa si Corazon C. Aquino noong 1986, pinawalang-bisa niya ang
Saligang Batas ng 1973 at isinagawa ang isang bagong Saligang Batas ng Pilipinas.
● Nabuo ang Komisyong Konstitusyonal na pinamunuan ni Cecilia Munoz Palma. Pinagtibay ng
Komisyon ang Konstitusyon at dito’y nagkaroon muli ng seksyon ang tungkol sa wika.

AGOSTO 12, 1986

● Nilagdaan ng Pangulong Corazon Aquino ang Proklamasyon Blg. 19 na kumikilala sa Wikang
Pambansa ng Pilipinas na gumawa ng napakahalagang papel sa himagsikang pinasiklab ng
kapangyarihang bayan na nagbunsod ng bagong pamahalaan.
● Pagpapatibay ng pagdiriwang ng Linggo ng Wikang Pambansan tuwing ika-13 hanggang ika-19 ng
Agosto alang-alang sa pagbibigay-pugay sa araw ng kapanganakan ng “Ama ng Pambansang
Wika” na si Manuel L. Quezon. Ito ay dapat ipagdiwang ng lahat ng mga mamamayan sa buong
bansa, sa pangunguna ng mga nasa pamahalaan at mga paaralan.
 ANG WIKANG FILIPINO SA ATING 1987 KONSTITUSYON

Konstitusyon ng Pilipinas 1987, Artikulo XIV Seksyon 6

SEKSYON 6. Ang wikang Pambansa ng Pilipinas ay Filipino. Samantalang nililinang, ito ay dapat
payabungin at pagyamanin pa salig sa umiiral na wika sa Pilipinas at sa iba pang mga wika.
Alinsunod sa itinadhana ng batas at sang-ayon sa nararapat na maaaring ipasya ng Kongreso, dapat
magsagawa ng mga hakbangin ang Pamahalaan upang ibunsod at puspusang itaguyod ang paggamit ng
Filipino bilang midyum ng opisyal na komunikasyon at bilang wika ng pagtuturo sa sistemang pang-
edukasyon.
Dahil ang Pilipinas ay isang multicultural at multilinggwal na bansa dahil sa heyograpikal na katangian
nito, hindi isinantabi ng batas ang pangangailangan sa pagpapaunlad ng iba pang wikang umiiral sa Pilipinas o
mga katutubong wika (indigenous languages) kasabay sa paglinang ng ating pambansang wika.
Nakasaad din sa seksyong ito na bukod sa pagtataguyod ng paggamit ng Filipino bilang opisyal na wika
sa pakikipagtalastasan ay kailangang itaguyod din ang paggamit nito bilang wikang panturo.

ENERO 30, 1987

● Nagpalabas ng Kautusang Tagapagpaganap Blg. 112 ang Pangulong Corazon Aquino kung saan
ipapasailalim ang Surian ng Wikang Pambansa sa Kagawaran ng Edukasyon, Kultura at Isports.
Binago rin ang pangalan ng ahensya bilang Linangan ng mga Wika sa Pilipinas o Institute of
Languages.

AUGUST 6, 1987
● Kaugnay ng itinadhana ng Konstitusyon ng 1987 hinggil sa patuloy na pagpapayabong at
pagpapayaman ng Filipino bilang pambansa at pampamahalaang wika, at pag-ayon pa rin sa
Patakaran sa Edukasyong Bilingguwal ng 1987 at pagtugon sa mabilis na pagbabago, pag-unlad at
paglaganap ng wikang pambansa, ang Linangan ng mga Wika sa Pilipinas (dating Surian ng Wikang
Pambansa), sa tulong ng mga lingguwista/dalubwika, manunulat, propesor/guro at mga samahang
pangwika, ay nagsagawa ng reporma sa alpabeto at sa mga tuntunin ng ortograpiyang Filipino.
AGOSTO 14, 1991
● Nilagdaan ni Pangulong Corazon Aquino ang Republic Act Blg. 7104 bilang pagsunod sa
itinatadhana ng Konstitusyon. Nakasaad din na ang dating Linangan ng mga Wika sa Pilipinas ay
tatawaging Komisyon sa Wikang Filipino (KWF) at ipapailalim sa Tanggapan ng Pangulo ng
Pilipinas.

1996
● Nagpalabas ang Komisyon sa Wikang Filipino ng resolusyon: Resolusyon Blg. 1-92 (Mayo 13) na
sinusugan naman ng Resolusyon Blg. 1-96 (Agosto, 1996) hinggil sa pagbibigay ng depinisyon ng
wikang Filipino…
“…ang katutubong wika na ginagamit sa buong Pilipinas- bilang wika ng komunikasyon ng mga
etnikong grupo. Katulad ng iba pang wikang buhay , ang Filipino ay dumaraan sa proseso ng paglinang sa
pamamagitan ng mga paghihiram sa mga wika ng Pilipinas at mga di-katutubong wika at sa ebolusyon ng iba’t
ibang barayti ng wika para sa iba’t ibang sitwasyon, sa mga nagsasalitang sosyal, at para sa mga paksa ng
talakayan at iskolarling pagpapahayag.”

HULYO, 1997
● Nilagdaan ni Pangulong Fidel V. Ramos ang Proklamasyon Blg. 1041 na nagtatakda na ang buwan
ng Agosto ay Buwan ng Wikang Pambansa at nagtatagubilin sa iba’t ibang sangay/ tanggapan ng
pamahalaan at sa mga paaralan na magsagawa ng mga gawain kaugnay sa taunang pagdiriwang
tuwing buwan na ito.

2001
● Tungo sa mabilis na istandardisasyon at intelektwalisasyon ng wikang Filipino, ipinalabas ng
Komisyon sa Wikang Filipino ang 2001 Revisyon sa Alpabeto at Patnubay sa Ispeling ng Wikang
Filipino (Kautusang Pangkagawaran Blg. 45).
● Walang naganap na pagbabago sa mga alpabeto ngunit may mga tuntuning binago hinggil sa
paggamit ng walong (8) dagdag na letra. Naging mitsa ito ng di matapos-tapos na usapan at
kalituhan sa ortograpiya.

2006
Nagkaroon ng Kautusang Pangkagawaran Blg. 42 na pansamantalang nagpapatigil sa implementasyon
ng 2001 Revisyon sa Alfabeto at Patnubay sa Ispeling ng Wikang Filipino dahil sa naganap na kalituhan
hinggil dito. Nagtakda ng pansamantalang paggamit at pagsangguni sa 1987 Alpabeto at Patnubay sa Ispeling
habang ang KWF ay nagsagawa ng mga konsultasyon at pag-aaral hinggil dito.

MAYO, 2008
Ipinalabas ang pinal na burador ng Gabay sa Ortograpiya ng Wikang Pambansa na ang pinagbatayan
ay 1987 Patnubay sa Alpabeto at Patnubay sa Ispeling upang matapos na ang pagkalito sa maluwag na
paggamit ng walong (8) dagdag na letra ng 2001 Revisyon sa Alfabeto at Patnubay sa Ispeling ng Wikang
Filipino.
________________________________________________________________________________________
 WIKANG FILIPINO, ANO ANG PAGKAKAIBA SA WIKANG PILIPINO AT TAGALOG?

ANG WIKANG TAGALOG

● Dr. Pamela Constantino- kilalang propesor; naglathala ng aklat na “Kabayan” noong 2000 kung saan
inilahad dito ang mga paliwanag tungkol sa dayalektong Tagalog.
⮚ ayon sa kanya, ang Tagalog ay wikang ginagamit sa Bulacan, Batangas, Rizal, Laguna, Quezon,
Cavite, Mindoro, Marinduque at ilang parte ng Nueva Ecija, Puerto Princesa at Metro Manila.
⮚ Tinagurian itong wikang natural dahil sa ito ay may sariling mga katutubong tagapagsalita at partikular
na wika na ginagamit ng mga etnolingguwistikong pangkat.
⮚ Ito ang naging batayan ng Wikang Pambansa noong panahon ng Komonwelt

ANG WIKANG PILIPINO

a. Tinawag itong wikang opisyal at wikang pampagtuturo at asignatura noong ipasa ang Department Order
No.7 ng Kagawaran ng Edukasyon.
b. Ito ay may pagkakatulad sa Tagalog sa nilalaman at istraktura nito.
c. Ito ang opisyal na tawag sa Pambansang Wika noong 1959

ANG WIKANG FILIPINO

a. Ito ang naging Wikang Pambansa alinsunod sa isinasaad ng Konstitusyon ng 1987.
b. Batay ito sa maraming wika sa Pilipinas kasama na ang Tagalog, Espanyol at Ingles.