ISANG PASULAT NA ULAT 

SINESOSYEDAD/PELIKULANG
PANLIPUNAN FILSOS 1115 

PANUNURING PAMPELKULA 
PELIKULANG PANLIPUNAN 

PAGSUSURI SA PELIKULANG 

MA’ ROSA

Ni 

MIKAELLA C. ANTONIO
BSED 4-5 

JACKSON A. PARCHAMENTO 
GURO 

MAIKLING PAGSUSULIT/GAWAING
1. PANIMULA-maikling paglalarawan hinggil sa pelikula.
Ang Ma’Rosa ay isang pelikulang Filipino sa direksyon ni Brillante Mendoza
noong taong 2016. Pinagbibidahan ni Jaclyn Jose bilang Rosa Reyes na kung
saan nakatanggap siya ng parangal bilang pinakamahusay na aktres sa Cannes.
Ang pelikula ay tumatalakay sa suliraning panlipunan na angkop at napapanahon
sa bansang Pilipinas. Ipinapakita rito ang magiging kahihinatnan ng mga
pagkakamaling nagawa ng mga magulang na sina Rosa at Nestor bilang drug
pusher. Samantala, ang kanilang mga anak ang siyang magsasakripisyo upang
makaipon ng pera kapalit ng kanilang mga magulang na hawak ng mga kurap na
pulis.

2. PAGBUBUOD-ibuod ang pelikula hinggil sa naging daloy ng istorya nito.

Maulang gabi na nang makarating si Rosa at ang anak nitong si Erwin
galing sa supermarket upang bumili ng kanilang paninda para sa sari-sari store.
Iyon ang hanapbuhay ng kanilang pamilya. Ngunit, sa isang maliit na kahon sa
kanilang tindahan ay may nakatagong ilegal na droga na kung saan ay
ibinebenta nila sa kanilang mga suki.
Sa gabi ding iyon ay kinulit ng isang lalaki na nagngangalang Bong Bong
si Rosa upang bigyan siya ng ilegal na droga. Noong una ay hindi niya ito
binigyan, ngunit dahil sa kakulitan ay binigyan na niya ito ng isang maliit na
pakete ng droga. Maya maya’y may mga lalaking pumasok sa bahay nila Rosa na
kung saan ay nagpakilalang mga pulis. Hinalughog ang kanilang bahay upang
humanap ng ebidensya na sila ay nagbebenta ng ilegal na droga. Sa ilang saglit
lang ay nakita nila ang isang maliit na kahon na naglalaman ng nakapaketeng
droga. Mariing itinatanggi ng mag-asawa na hindi sa kanila iyon ngunit agad-
agad na silang kinuha ng mga pulis. Dinala sila sa likod ng istasyon ng pulis na
kung saan walang makakakita sa kanila.
Nagmakaawa ang mag-asawa na ilabas sila ngunit hindi pumayag ang
mga pulis at sinabing ang pagbebenta ng ilegal na droga ay walang piyansa.
Kung kaya’t ang mga pulis ay nakipagnegosasyon upang sila’y makalaya.
 Tumawag si Rosa sa isang lalaki na nagngangalang Jomar upang makakuha muli
ng droga upang ibigay ito sa mga pulis. Sa kanilang pagkikita ay hinuli ng mga
pulis si Jomar at tumambad sa kanila ang mga pera at droga na nakalagay sa
bag nito. Ganoon din ang ginawa ng mga pulis kay Jomar, hiningian ng
dalawang daang libo kapalit ng paglaya nito.
Akala ng mag-asawang sina Rosa at Nestor ay makalalaya na sila kapalit
ng pagsuplong nito sa pinagkukuhanan nila ng droga ngunit hindi pala. Hiningian
sila ng limampung libo. Ibinilin nila sa kanilang mga anak kung saan sila
maaaring makakuha ng pera. Dali dali namang sumunod ang kanilang anak.
Ang panganay na anak na si Jackson ay nagbenta ng mga gamit nila sa
bahay tulad na lamang ng TV. Si Kerwin naman ay ginamit niya ang kaniyang
katawan kapalit ng pera. Sapagkat ito lamang ang alam niyang paraan upang
makatulong sa kaniyang mga magulang. Samantala, si Racquel naman ay
humingi ng tulong sa kaniyang mga kamag-anak. Kahit sinabihan siya ng mga
masasamang salita ay tinanggap na lamang niya ito. Pagkatapos mapagsama-
sama ang nakuhang pera ng magkakapatid ay dumiretso na sila kung nasaan
ang kanilang mga magulang. Nakabuo sila ng apatnapu’t anim na libo kung
kaya’t kulang pa ito. Pinalaya lamang ng mga pulis si Rosa upang makahanap pa
ng apat na libo upang mabuo ang limampung libo. Lumapit si Rosa sa isang
lalaki upang isangla ang selpon ng kaniyang anak sa halagang apat na libo.
Habang siya ay papunta sa kinaroroonan ng kaniyang asawa at mga anak ay
tumigil siya upang bumili ng fishball sa kanto at doon naisip ang hirap na
nararansan nila.
3. PAGTALAKAY HINGGIL SA ADBOKASI NA NAIS ISULONG NG PELIKULA
Ang pelikulang Ma’Rosa ay nagsusulong sa pag-iwas sa paggamit at
pagbebenta ng ipinagbabawal na gamot. Makikita sa pelikula kung anong hirap
ang dinanas ng pamilya Reyes upang makalaya ang mag-asawang si Rosa at
Nestor. Hindi madaling malutas ang ganitong sitwasyon sapagkat nabanggit dito
ang kaso na Illegal possession of prohibited drugs, R.A. 9165 Sec. 5 & 11 na
kung saan ay walang piyansa. Kung kaya’t iwasan ang paggamit nito lalo na sa
 mga kabataan na madaling makumbinsi at maakit sa mga ganitong bagay. Hindi
rin makatutulong ang pagbebenta nito bilang hanap buhay sapagkat kahit kailan
ay hindi ito marangal na trabaho.
Isa ring adbokasi na pinagtuunan ng pansin sa pelikulang ito ay ang mga
kurap na pulis na kung saan ginagamit ang kanilang mga posisyon upang
makalamang sa kapwa. Tama ang kanilang ginagawa na paghuli sa mga
nagbebenta ng ipinagbabawal na gamot ngunit maling mali ang paraan na
makipagnegosasyon sa mga ito. Makikita ang kawalang respeto sa batas na kung
saan sila ang gumagawa ng kanilang sariling batas.
4. MGA SULIRANING PANLIPUNAN NA NAKITA SA PELIKULA
Ang unang una na suliraning panlipunan na ipinakita sa pelikula ay ang
kahirapan. Ang mga bida sa pelikula ay nakatira lamang sa isang maliit at
masikip na bahay. Mayroon mang sari-sari store ay hindi ito sapat sa kanilang
pang araw-araw na gastusin kung kaya’t ang pagbebenta ng ipinagbabawal na
gamot ang isa pa nilang hanapbuhay. Maraming Pilipino ang nakakaranas ng
ganitong pamumuhay sapagkat walang regular na trabaho dahil hindi
nakapagtapos ng pag-aaral.
Pangalawa, ang korapsyon. Ang mga pulis na siyang dapat magpatupad
at sumunod sa batas ay siyang pang bumabaluktot nito. Imbis na bigyan ng
karapat dapat na parusa ang mga nagkasala ay nakikipagnegosasyon sila upang
makakuha ng pera. Napapanahon din ang suliraning panlipunan na ito sapagkat
may mga pulis na ginagamit ang kanilang posisyon upang makalamang sa tao.
Mayroon ding nahuhulihang gumagamit ng ipinagbabawal na gamot kung kaya’t
silang napapatalsik sa trabaho at naikukulong.
5. KONGKLUSYON-Paano nagwakas ang pelikula? Nakamit ba nito ang
kasagutan sa adbokasing kanilang ipinakita? Maglahad ng maikling
solusyon hinggil sa posibleng kasagutan sa suliranin ng pelikula.
Hindi pa rin naging maganda ang pagwawakas ng pelikula sapagkat wala
pa ring kasiguraduan kung ano ang magiging buhay nila kahit mabayaran ang
perang hinihingi ng mga pulis. Kung ipagpapatuloy pa rin ba nila ang pagbebenta
ng ipinagbabawal na gamot o mamuhay na lang ng marangal. Sa pamamagitan
ng adbokasi na nais isulong ng pelikula, sa aking palagay ay may malaki itong
tulong upang matuto o mamulat ang mga manunuod sa mga posibleng mangyari
kung papasok tayo sa isang bagay na alam naman nating illegal at hinding hindi
makatutulong upang umunlad ang pamumuhay.
Bilang solusyon sa mga suliranin na nabanggit, unang una ay piliin nating
gumawa ng tama at mamuhay ng marangal. Hindi man lahat ay nabibigyang
oportunidad upang makapag-aral at makapagtapos, hindi ito dapat maging
dahilan upang gumawa ng masama. Samantala, dapat bigyang aksyon din ang
mga pulis na umaabuso sa kanilang kakayahan sapagkat sila ang dapat na
salamin ng mga mamamayan ng bansa. Kung sila ay hindi sumusunod sa batas,
paano susunod ang mga nasasakupan nito. At bilang isang mamamayan ng
Pilipinas, dapat maging responsible tayo sa pagdedesisyon sapagkat dito
nakasalalay ang magiging buhay natin sa hinaharap.