Gung Manik : "Dayu Sri, jagi lunga kija?

Mih jeg sakadi selem-seleman jukut undis, bangkit kuahne,

ngiring dumun mararian numbas wedang, dayu"

Dayu Sri : "Nggih, kanggeang Gung Manik sampun pidan rauh saking Jawi, Gung cingak tiange taler buka
buah manggise ?"

Gung Manik : " Hahaha dayu, jeg sautina masih sesenggakan tiange, nggih sampun kalih raina"

Dayu Sri : "Sami sametone budal Gung?"

Gung Manik : "Inggih sami, santukan benjang jagi wenten karya ring Merajan"

Jero Dagang : "Napi ambilang Dayu?"

Dayu Sri : "Ambilang wenten rauhing sanganan pisang goreng, bu"

Gung Manik : "Dayu, ring dija mangkin ngranjing?"

Dayu Sri : "Iriki ring STKIP Agama Hindu Singaraja, kanggeang ten mresidayang kuliah doh-doh, buka
anake mabantun buluan, ngutsahayang dewek peragan gung"

Gung Manik : "ah sampun becik nika dayu, sampun semester kuda mangkin?"

Dayu Sri : "Tiang wau semester tiga, kewala tusing nyak cara di sisine maukir di tengahne ngusamba, jeg
cara paya nasak gung"

Gung Manik : "Bah ten ja kenten dayu , tiang taler pait kewala dereng tasak dayu, punapiang men
kanggeang tiang tuah kuliah ring STAHN Mpu Kuturan Singaraja, Jurusan Sastra Bali, buka genite bakat
gesgesa, menawi piagam prestasine dayu, pun kenten uning ring Md. Ratih tamatan saking PGA Negeri
Denpasar?"
Dayu Sri : "Inggih uning, sareng titiang ipun ngranjing, kuliah kadi mangkin nak akeh gegodan gung, buka
yehe di don candunge"

Gung Manik : "ah...dayu tiang taler kenten apa buin masan covid, misi online jeg terus pun makita malali
gen pikayunane dayu, nggih elingan ndikain mangda rauh mariki, santukan wenten rerepi sawitranipun"

Dayu Sri : "Inggih benjang jagi simpangin tiang, apang ten anake mati magantung maklentung"

Gung Manik : " Ah dayu, apang sing kulkule masuara kenten? Ngguh dayu mangkin jagi lunga kija?
Nenten ngranjing?"

Dayu Sri : "Tiang ngrajing sore. Mangkin tiang jagi ka gedung Kirtia nyelang buku"

gung Manik : "Jero dagang indayang etang makasami, akuda tiang naur?"

Dayu Sri : "Banggeang Gung, tiang sampun makta jinah"

Gung Manik : "Niki sampun anggen naur, kadong nembenin kapanggih"

Dayu Sri : "Suksma Gung, mangda nenten iraga sakadi luas mabaju gadang teka mulih mabaju kuning,
cara biu masekeb, patut iraga nyelehin indik buku lan lontar Baline, apabuin di Gedong Kirtya"

Gung Manik : "Ngiring dayu, tiang cumpu pisan lan ngiring sampun mangkin ka Gedung Kirtya, sareng-
sareng ngajak titiang dayu"