Gnomologia Latina Seu, Fons Argumentorum Uberrimus, Complectens Sententias Et Breves Narrationes, Congestas e Praecipuis Classicis Latinis, Tam Prosaicis, Quam Poeticis (1835)
Thomas VALLAURIUS, Historia Critica Litterarum Latinarum, ex officina Asceterii
Salesiani, Augustae Taurionarum 1872, pp. 202.
Historiam Criticam Latinarum Litterarum inde ab obscuris et remotis
originibus ad usque collapsum Romanum Imperium neminem ante illum Thomasum Vallaurium latine conscripsisse constare videtur, qui cum latinam eloquentiam apud Universitatem Studiorum Taurinensem doceret atque huiusmodi opus auditoribus suis erudiendis desiderari adverteret, enchiridion de hac materie concinnavit. Tractatus est omnis divisus in libros quattuor, ratione temporis servata. Liber enim primus a vetustissimis latini sermonis vestigiis initium facit et ad Lucii Cornelii Syllae dictatoris obitum, anno 78 a.C.n., pervenit. Secundus autem liber hinc procedens ad excessum Augusti extenditur. Deinde liber tertius eam aetatem complectitur quae inter Augusti mortem et Hadrianum imperatorem viguit. Postremus autem seu quartus ab Hadriano usque ad Urbem ab Odoacre expugnatam. Neque quisque liber sua caret intestina subdivisione, nam Vallaurius noster decursu singulorum librorum non auctores, sed genera litterarum pro capitulis praesentat: videlicet, poesin dramáticam, épicam, didacticam, bucólicam, lyricam, satyras, opera histórica, oratória, philosophica, grammatica necnon ea quae de iurisprudentia tractant. Lector igitur in unoquoque capitulo inveniet eos auctores qui id genus opera contexuerunt. Unde persaepe contingit ut nonnulli auctores, generibus variis usi, pluribus capitulis appareant. Primo libro origo latini sermonis exponitur. Primum, quorumdam virorum doctorum sententiam secutus Italiae Graeciaeque populos fuisse cognatos affirmat magnamque ostendit inter eas vigere similitudinem. Deinde aggreditur monumenta illa vetustíssima quae linguae testimonia afferunt. Quo breviter peracto, ad prima opera primosque latini sermonis auctores transit eosque secundum scriptorum genus distribuit. Secundo autem libro, antequam de ipsis auctoribus agitare incipit, causas cur aetate Augusti litterae politiores sint redditae inquirit: praeter influxum graecorum doctorum qui Romam, Graecia capta, adducti sunt, auctor noster mentionem quoque facit de bibliothecis quae eo tempore extructae sunt. Capitulo vero tertio, eandem methodum secutus atque in capitulo superiori, tres causas cur litterae tunc temporis defici coeperit proponit, peregrinorum videlicet in urbem affluentiam, herilem Caesarum dominatum necnon luxuriem socordiamque. Postremo tandem libro, adductis rationibus cur litterae praecipiti cursu ad vitia desciverint, auctores in genera divisos collocat. Attamen christianos omnes ea aetate florentes in unum genus conicit. Nemo dubitet quin difficile sit argumentum tam vastum tractare. Quapropter inceptum Vallauri procul dubio est laudandum. Praeterea, cum manuale suum tironibus imprimis destinaret quo auctorum latinorum conspectum haberent, illud est etiam consecutus ut homines periti haud pauca inde colligere possent, praesertim iudicium de auctoribus eorumque operibus quod Vallaurius sive vitia exprobando sive ingenium honestando aperte profert. Attamen, quamquam propositum nostri auctoris erat conspectum generalem efficere, lector dolebit opus nimis ieiunum esse, nam materies tam longa CC circiter paginis continetur. Desiderantur, exempli gratia, testimonia ex ipsis auctorum operibus deprompta ad iudicia sua firmanda, nam si latinitas post Augustum excessum videtur paulatim corrumpi postque Hadrianum praecipiti cursu decisci, tamen lector haud docetur qualia sint illa vitia seu mutationes: utrum ad morphologiam, vel ad syntaxim, vel ad aliam provinciam pertineant. Opus enim quod ‘criticum’ nuncupari praesumitur, etiam si iudicia vera a viroque doctore proferantur, nullo pacto omittere potest testimonia et subtilia, quae non solum iudicia solident, sed et lectoribus – maximeque tironibus, rem illustrare valeant. Ceterum, auctores christiani in unum locum seu capitulum coacti, presse et perfunctorie inspiciuntur. Cum de latinitate eorum decernit, eos “barbarum atque horridum scribendi genus” plerumque usurpasse affirmat, quae quidem sententia, etiamsi aliquid veri prae se ferat, haudquaquam de christianis scriptoribus in universum praedicari potest. Questio illa, ‘qua latinitate christianus auctor uti debeat’, quae máxime Augustini studium movit, a Vallauro omnino est relicta. Ut paucis verbis rem complecti possimus, dicendum est opus Vallauri magni momenti esse cum primum huius generis latine sit conscriptum multumque iuvare possit quisquis notitias Romanorum Scriptorum habere voluerit. pro capitulis
Gnomologia Latina Seu, Fons Argumentorum Uberrimus, Complectens Sententias Et Breves Narrationes, Congestas e Praecipuis Classicis Latinis, Tam Prosaicis, Quam Poeticis (1835)