Maaaring ganapin ito tuwing Pagbubukas ng Taong Panuruan o kaya
ay sa mga panahong nauugnay sa pagdiriwang ng pagiging guro. Panginoong Hesukristo, ikaw ang Pinakadakilang Guro. Ipinagpapasalamat namin ang patuloy Mong pag-gabay sa amin sa mga landasing aming tinatahak sa bawat araw, sa halimbawa ng iyong pagsasakripisyo. Ipinapanalangin namin ngayon ang mga guro. Kalugdan mo, O Panginoon, ang kanilang pagpapagal na ibahagi ang kaalaman sa bawat mag-aaral. Pagkalooban mo sila ng malusog na pangangatawan, panatag na kaisipan, at ng diwa ng ng kapakumbabaan. Pagpalain mo sila sa kanilang pagtuturo, upang aming matunghayan ang mga bagay sa mahirap na pagkakaton, bilang kagandahan ng sangnilikha. Nawa’y ang kanilang pagpapagal ay maging patuloy na hakbangin tungo sa pagkatuklas, pagkatuto, at lalo’t higit ay kasunuran sa Iyong Banal na Kalooban.
Hinihiling namin ito sa pamamagitan Mo, kasama ng
Espiritu Santo, nabubuhay at naghahari, magpasawalang hanggan. Amen Wiwisikan ng Pari ang mga Guro ng Banal na Tubig. PANALANGIN NG BAYAN
Tinuruan tayo ng Panginoong Hesukristo na manalangin. Manalangin tayo
sa Amang nasa langit na mayroong ganap na pananalig sa kanya. AMA, DINGGIN MO ANG IYONG BAYAN 1. Ang Simbahan sa buong daigdig nawa’y magpahayag ng malalim na pananalig sa pagdating ng Kaharian ng pag-ibig, katarungan, at kapayapaan ng Ama. Manalangin tayo sa Panginoon. 2. Sa gitna ng mga pagsubok sa buhay, nawa’y patuloy tayong nagdarasal at hindi magpadaig sa anumang tukso. Manalangin tayo sa Panginoon.
3. Tayo nawa’y magkaroon ng sapat na makakain sa araw-araw na
pangangailangan at magkaroon ng dakilang puso upang patawarin ang ating mga kaaway. Manalangin tayo sa Panginoon.
4. Para sa ating Unibersidad, lalo’t higit sa mga guro, upang maibahagi
nila ang kaalaman nang may kahinahunan at pagkalinga sa mga mag-aaral. Manalangin tayo sa Panginoon.
5. Ang mga maysakit at ang mga nakararanas ng paghihirap sa buhay
nawa’y matulungan ng kanilang kapwa sa pagpapasan ng kanilang krus. Manalangin tayo sa Panginoon.
6. Ang mga yumao nawa’y makita ang Panginoon nang harapan sa
kanyang walang hanggang tahanan sa paraiso. Manalangin tayo sa Panginoon.
Ama naming nasa Langit, pinasasalamatan ka namin sa iyong pakikinig sa
aming mga panalangin. Tulungan ninyo kaming manalig palagi sa iyong pagmamahal at tanggapin ang iyong kalooban sa aming buhay. Hinihiling namin ito sa pamamagitan ni Kristong aming Panginoon. Amen.