Kilala ang Eastern Samar National Comprehensive High school bilang tahanan ng mga kampyon dahil sa mga parangal na natatanggap nito sa iba’t-ibang mga larangan at kompetisyon. Isa sa mga ipinagmamalaki ng paaralan ay ang ESNCHS marching band na humakot na rin ng maraming awards. Ika-7 ng Septyembre 2018 ng mapanalunan nila ang 1st Provincial Interschool Marching Band Competition, kalakip nito ang tumataginting na 40, 000 cash. Ang bawat isa sa atin ay may kanya-kanyang taglay na talento. May ibang nagtatagumpay sa larangang pang-akademiko, isports, pamamahayag, musika at iba pa. Sa paaralan, malaya mong maibabahagi ang iyong mga kakayahan. Dito tinutulungan ang mga mag-aaral na hubugin ang kanilang mga natatagong talento na maaring makatulong sa kanilang kinabukasan. Sa ESNCHS ay mayroong mga organisasyong naglalayong tulungan ang mga kabataan na maibahagi ang kani-kanilang mga talento. Isa na rito ang marching band kung saan maraming kabataan ang nahuhumaling na sumali. Masaya, nakaaaliw, magarbo at makulay, ganyan kung ilarawan ng mga tagapanood ang marching band ng ESNCHS. Makikita sa paghahanda ng banda ang kanilang dedikasyon at pagmamahal sa kanilang ginagawa kaya naman nagbubunga ito ng maganda. Ayon sa mga dating miyembro nito, sa una ay nakakakaba ngunit kalaunan din ay nasanay na kami sa mga patakaran na ipinapatupad ng mga tagapangasiwa nito. Itinuturing din ng mga miyembro ang kanilang kasamahan bilang pangalawang pamilya. Dito nabuo ang maraming pagkakaibigan at malalim na samahan kung kaya’t hindi na nila masyadong inaalintana ang pagod sa bawat pagsasanay dahil alam nilang nariyan sila para sa isa’t-isa. “Sulit ang hirap at pagod sa pagsasanay lalo na kung hawak na naming ang tropeyo” banggit ng isang miyembro ng banda. Para sa banda ng ESNCHS mahalagang matuto ang bawat miyembro ng tamang pamumuno, pagiging disiplinado, respeto sa mga kasapi lalo na sa lider, pakikinig, pakikibahagi at marami pang mga katangiang taglay ng isang mabuting miyembro. Sa pagsali sa mga ganitong gawain ay natutulungan ang bawat mag-aaral na iangat ang kanilang tiwala sa sarili. Mahalaga ito hindi lamang sa paghubog ng talento kundi maging sa pagkatao ng mga miyembro. Mula sa pakikisalamuha sa mga tao, pagsunod sa mga utos, pagiging disiplinado, pagpapahalaga sa paggawa, at pagtitiyaga, natututo silang maging mabuting miyembro. Bawat kasapi ng banda ay naglalayong maghatid ng pag-asa sa mga tao sa pamamagitan ng mga musikang kanilang nalilikha. Libo-libong mga mag-aaral ang natigil sa pag-aaral dahil sa ipinatupad na enhanced community quarantine noong Marso 17, 2020. Dahil, dito matagal-tagal ding nakakulong ang mga kabataan sa kani-kanilang mga tahanan. Wala tayong magawa kundi alalahanin ang mga masasayang kaganapan noon gaya ng mga parada at kompetisyon. Alam nating lahat na nakakamiss mag-abang sa mga parada sa kanto tuwing piyesta. Marami na rin ang mga napanalunan ng ESNCHS marching band sa mga band competition kaya lagi itong inaabangan ng mga manonood. Sa muling pagbabalik ng in-person classes unti-unti ng nabubuhayan ang banda. Sa kasalukuyan ay muli silang nagrerecruit ng mga mag-aaral na nagnanais na sumali. Marami ang nasasabik sa muling pagbabalik ng ESNCHS marching band at matunghayang muli ang kanilang mga pagtatanghal.
Sa kabuuan, ang pagiging miyembro ng banda ay nangangailangan ng matinding pasensya, pagtitiyaga,
pagmamahal sa ginagawa at sakripisyo. Marami ang pagsubok na pagdaraanan ng mga kasapi nito ngunit ang reaksiyon ng mga tao partikular ang mga ngiti na nakaguhit sa kanilang mga mukha ay sapat nang pampawi sa hirap na kanilang pinagdaanan. Patuloy na naghahanda ang ESNCHS marching band para sa mga kompetisyon at kaganapang kanilang lalahukan sa hinaharap. Buong puso namang handang sumuporta ang mga taong nakapaligid sa kanila bilang pasasalamat sa pag-asang hatid ng kanilang musika.
Epekto NG Kolonyal Na Mentalidad Sa Pagtangkilik NG Musika Sa Mga Mag-Aaral NG Baitang Labing-Isa NG Our Lady of Perpetual Succor College Sa Taong Aralan 2018 - 2019