Ang kahirapan ay isang isyu o suliranin na kinakaharap ng ating bansa at ito ay
hindi na bago sa ating mga Pilipino. Masasabi nating hindi lang ang kahirapan ang pinaka malalang problema sa ating lipunan, nariyan ang korapsyon, pagbebenta ng mga droga, pagkakaroon ng mababang antas ng edukasyon, pag nanakaw, mga polusyon at marami pang iba, ngunit hindi bat ang kahirapan din ang syang pangunahing dahilan kung bakit nariyan ang mga problemang aking nabanggit? Ang kahirapan ang isa sa mga problema sa lipunan na hindi matapos tapos at hindi rin mabigyan ng solusyon magpasahanggang ngayon. Nang dahil sa kahirapan, maraming mga bata ang hindi nabibigyan ng pagkakataon na makapag aral, paano na ang mga kataga ni Dr. Jose Rizal na “Ang kabataan ang pag asa ng bayan” kung marami ang hindi nakakapag aral dulot ng kahirapan. Nang dahil rin sa kahirapan, marami ang nalulong sa masamang bisyo at nakakagawa ng krimen gaya ng pagnanakaw, ito marahil ay dala na rin ng kakapusan sa pera at ng kahirapan sa buhay. Isa sa pangunahing dahilan nito ay ang mga korap na opisyal ng gobyerno. Ninanakaw nila ang mga kaban o pondo ng ating bansa na para sana sa ika-uunlad ng mamamayang Pilipino, ngunit napupunta sa sariling bulsa ng mga opisyales, kung kaya naman mas ramdam natin ang krisis. Paano tayo makararanas ng isang matiwasay na pamumuhay kung ang mga pangunahing pangangailangan pa nga lang ay hindi na natin kayang tustusan? Ang kahirapan ang nag hihila sa atin pababa, ang nagdudulot sa atin na gumawa ng masama at sa araw-araw ay gutom ang pinapadama. Ngunit kung mas pakasusuriin pa nating mabuti, nasa ating mga kamay ang kapalaran ng ating buhay at ang kapangyarihan na baguhin ang hirap na pinag dadaanan, dahil tayo mismo ang susi upang tayo’y magtagumpay. Hindi pa huli ang lahat, ang kahirapan ang gawing lakas upang makalaya sa madilim na landas. Oo, mahirap ang maging mahirap ngunit kaya pa, samahan mo lang ng sipag at diskarte ay magtatagumpay ka. Ako bilang isang kabataan, ako’y magsisikap makapagtapos ng pag-aaral nang sa gayon ay magkaroon ng magandang kinabukasan. Lahat tayo ay may magagawa para sa kinabukasan ng ating bayan, magsikap tayo habang maaga pa upang umunlad ang ating buhay pati na rin ang inang bayan.