Ang Debosyon ng mga Kabataan kay San Pedro Calungsod

Lahat: + Sa ngalan ng Ama, at ng Anak at ng Espiritu Santo. Amen.

Namumuno: Buksan mo Panginoon ko ang aming mga labi.

Lahat: At pupurihin ka ng aming dila.

Namumuno: Magmadali ka, Panginoon, sa pagsaklolo Mo sa amin.

Lahat: At dumating nawa sa Iyong tainga ang aming pagdaing.

Namumuno: Papuri sa Ama, at sa Anak, at sa Espiritu Santo.

Lahat: Kapara noong una, ngayon at magpasawalanghanggan. Amen

Ang Pagsisisi
Panginoon kong Hesukristo, Diyos na totoo at taong totoo, gumawa at sumakop sa akin,
pinagsisisihan kong lubos ang mga pagkakasala ko sa Iyo. Ikaw ang Diyos ko, Panginoon ko at
Ama ko na iniibig kong higit sa lahat. Gabayan mo ako habang ako’y nagsusumikap na hindi
na muling magkasala sa Iyo. Bigyan mo ako ng lakas ng loob at kapakumbabaan upang ako’y
makadulog sa Iyong Awa sa Sakramento ng Kumpisal. Patawarin Mo ako sa aking mga
kasalanan at pagkukulang, Ikaw na nagpakasakit at namatay sa Krus dahil sa akin. Amen.

Panalangin ng Pagtanggap
O pinakamamahal naming pintakasi, San Pedro Calungsod, kami ay nalulugod at
nagpupuri sa pagdalaw mong ito sa aming tahanan na iyong minarapat na maging pugad ng
iyong pag-ibig sa loob ng ilang araw na ipamamalagi mo sa aming piling. Igawad mo sa amin,
minamahal na pintakasi ng mga kabataang Pilipino, ang iyong pagkalinga. Basbasan mo
kaming lahat sa tahanang ito at huwag mong itulot na kami ay makagawa ng anumang
ikalulumbay mo. Tulungan mo kami upang aming higit na makilala, mahalin at
mapaglingkuran ang Diyos. Ingatan at ipamagitan mo kaming lagi kay Hesus na aming
pinaghahandugan ng aming puso at kaluluwa, ng lahat ng aming lakas at kakayahan, ng aming
buong buhay at pagkatao, ngayon at magpakailanman. Amen.

Ang Santo Rosaryo

Ang mga Misteryo ng Tuwa (tuwing Lunes at Sabado)
1. Ang Pagbabalita ng Anghel kay Maria
2. Ang Pagdalaw ni Maria kay Elisabet
3. Ang Pagsilang ni Hesus
4. Ang Paghahandog kay Hesus sa Templo
5. Ang Pagkawala at Pagkatagpo sa Batang Hesus sa Templo ng Herusalem
Ang mga Misteryo ng Liwanag (tuwing Huwebes)
1. Ang Pagbibinyag kay Hesus sa ilog Hordan
2. Ang Himalang ginawa ni Hesus sa kasalan sa Cana
3. Ang Pagpapahayag ni Hesus sa Kaharian ng Diyos at Pagtawag upang magbalik-loob
4. Ang Pagbabagong-anyo ni Hesus
 5. Ang Pagtatatag sa Banal na Eukaristiya sa Huling Hapunan
Ang mga Misteryo ng Hapis (tuwing Martes at Biyernes)
1. Ang Pananalangin ni Hesus sa Halamanan ng Hetsamani
2. Ang Paghagupit kay Hesus na natatali sa haliging Bato
3. Ang pagpuputong ng Koronang TInik kay Hesus
4. Ang pagpapasan ng Krus ni Hesus
5. Ang Pagkapako at Pagkamatay ni Hesus sa Krus
Ang Misteryo ng Luwalhati (tuwing Miyerkules at Linggo)
1. Ang Pagkabuhay na Magmuli ni Hesus
2. Ang Pag-akyat sa Langit ni Hesus
3. Ang Pagpanaog ng Espiritu Santo sa mga Apostol at sa Mahal na Birhen
4. Ang Pag-aakyat sa langit sa mahal na Birheng Maria
5. Ang Pagkokorona sa Mahal na Birheng Maria bilang Reyna ng Langit at Lupa

Ang Sumasampalataya
Sumasampalataya ako sa Diyos Amang makapangyarihan sa lahat, na may gawa ng
langit at lupa. Sumasampalataya naman ako kay Hesukristo, iisang Anak ng Diyos, Panginoon
nating lahat. Nagkatawang tao Siya lalang ng Espiritu Santo, ipinanganak ni Santa Mariang
Birhen. Pinagpakasakit ni Poncio Pilato, ipinako sa krus, namatay, inilibing. Nanaog sa
karoroonan ng mga yumao. Nang may ikatlong araw nabuhay na mag-uli. Umakyat sa langit,
naluluklok sa kanan ng Diyos Amang Makapangyarihan sa lahat. Doon magmumula at
paririto't maghuhukom sa mga nabubuhay at namamatay na tao. Sumasampalataya naman ako
sa Diyos Espiritu Santo, Sa Banal na Simbahang Katolika, sa kasamahan ng mga banal; Sa
kapatawaran ng mga kasalanan, Sa pagkabuhay na mag-uli ng nangamatay na tao, At sa buhay
na walang hanggan.  Amen. 

Ama Namin
Ama namin, sumasalangit Ka, sambahin ang ngalan Mo, mapasaamin ang kaharian Mo,
sundin ang loob Mo, dito sa lupa para nang sa Langit.
Bigyan Mo kami ngayon ng aming kakanin sa araw-araw. Patawarin Mo kami sa aming
mga sala para nang pagpapatawad namin sa mga nagkakasala sa amin. Huwag Mo kaming
ipahintulot sa tukso at iadya Mo kami sa lahat ng masama. Amen.

Aba Ginoong Maria

Aba Ginoong Maria, napupuno ka ng grasya. Ang Panginoong Diyos ay
sumasaiyo, bukod kang pinagpala sa babaeng lahat at pinagpala naman ang iyong Anak na si
Hesus. 
Santa Maria, Ina ng Diyos,  ipanalangin mo kaming makasalanan,  ngayon at kung kami y
mamamatay. Amen.

Luwalhati
Luwalhati sa Ama, at sa Anak, at sa Espiritu Santo.
Kapara noong una, ngayon at magpasawalanghanggan. Amen

Ang Panalangin ng Fatima

 O Hesus ko, patawarin Mo kami sa aming mga sala. Iligtas Mo kami sa apoy ng
impiyerno.  Hanguin Mo ang mga kaluluwa sa purgatoryo. Lalong-lalo na yaong mga walang
nakakaalaala.

Aba Po Santa Mariang Reyna

Aba Po Santa Mariang Reynai, Ina ng Awa. Ikaw ang kabuhayan at katamisan; Aba,
pinananaligan ka namin. Ikaw nga po ang tinatawag namin, pinapanaw na taong anak ni Eva.
Ikaw rin ang pinagbunbuntong-hininga namin ng aming pagtangis dito sa lupang bayang
kahapis-hapis. Ay aba, pinananaligan ka namin, ilingon mo sa amin,ang mga mata mong
maawain, 
at saka kung matapos yaring pagpanaw sa amin, ipakita mo sa amin ang iyong Anak na si
Hesus. Santa Maria, Ina ng Diyos, maawain, maalam at matamis na Birhen.

Namumuno: Ipanalangin mo kami, o Santang Ina ng Diyos

Lahat: Nang kami'y maging dapat makinabang ng mga pangako ni Hesukristong aming
Panginoon.

Panalangin
O Diyos, na ang bugtong na anak Mo ay siyang ipinagkamit naming ng kagalinga’t
kabuhayang walang hanggan, ipagkaloob Mo, hinihiling namin sa Iyo, na sa pagninilay namin
nitong mga misteryo ng Kabanal-banalang Rosaryo ng Kamahal-mahalang Birheng Maria, ay
hindi lamang matularan namin ang magagaling na halimbawang nalalarawan doon, kundi
naman makamtan naming ang mga kagalingang ipinangako sa amin, alang-alang kay
Hesukristong Anak Mo. Amen.

Dalit kay San Pedro Calungsod

Namumuno: Kami, na naglalakbay sa lupa, ay tumatawag sa Iyo, O masintahing pintakasi ng
kabataang Pilipino.

Tugon: *San Pedro Calungsod, tulungan mo kami.

Upang tulad mo, matutunan din naming ibigin ang Diyos at ana aming kapwa*

Upang tulad mo, matutunan din namin at maipaglaban ang mga katotohanan ng Simbahang
Katolika*

Upang tulad mo, kami rin ay magsikap na isabuhay ang pananampalatayang aming tinanggap sa
Binyag*

Upang tulad mo, kami rin ay maging masigasig sa aming pagbabahagi ng ating
pananampalataya sa aming kapwa*

Upang tulad mo, kami rin ay maging handang maghandog ng aming buhay at kakayahan sa
paglilingkod sa Simbahan*
Upang tulad mo, mapagtagumpayan din namin ang pagkahilig sa mga bagay na makamundo at
maging handang magbahagi sa aming kapwa*
Upang tulad mo, kari rin ay maging mapagbata sa pagharap sa mga pagsubok ng buhay alang-
alang sa pag-ibig sa Diyos*

Upang tulad mo, kami rin ay palaging manalangin upang hindi madaig ng tukso*

Upang tulad mo, amin ding mapanatili ang aming mga puso at katawan na malinis at maging
mga karapat-dapat na templo ng Espiritu Santo*

Upang tulad mo, kami rin ay makapagsisi sa aming mga kasalanan at palaging tumanggap sa
Sakramento ng kumpisal*

Upang tulad mo, matutunan din naming patawarin ang mga taong nakasakit sa amin*

Upang, tulad mo, kami rin ay maging tapat at mapagmahal sa aming mga kaibigan*

Upang tulad mo, kami rin ay magtaglay ng masidhing debosyon kay Maria, ang aming Ina*

Upang tulad mo, ibigin din namin at sambahin si Hesukristo sa Santissimo Sacramento*

Namumuno: Ipanalangin mo kami, O Pinagpalang Pedro Calungsod

Lahat: Upang kami’y maging dapat makinabang sa mga pangako ni Kristong aming Panginoon.
Amen.

Pangwakas na Panalangin at Panalangin sa Araw-Araw

San Pedro Calungosd, mag-aaral, katekista, misyonero, matapat na kaibigan at martir,
nakakapukaw ng damdamin at nakapagpapalakas ng aming loob ang iyong katapatan kay Kristo
sa harap ng matinding pagsubok, ang iyong kagitingan sa pagtuturo ng ating pananampalataya
sa kabila ng mga nakaambang panganib at ang iyong wagas napag-ibig sa Mabuting Balita na
naging sanhi ng pagdanak ng iyong dugo. Dinggin mo ang aming mga panalangin (Banggitin
ang iyong mga kahilingan) at ipamagitan mo kaming lagi sa harap ng luklukan ng Awa at Biyaya
upang sa aming pagtatamo ng tulong mula sa Langit, kami’y mahimok na laging isabuhay at
maipahayag ang Salita ng Diyos sa aming kapwa. Amen.

San Pedro Calungsod, Ipanalangin mo kami.

Panalangin ng Pamamaalam
Minamahal na San Pedro Calungsod, dumating na ang sandali ng iyong paglisan sa
aming tahanan na naging tahanan mo rin sa loob ng ilang araw na pananatili mo sa aming piling.
Hindi kayang banggitin ng aming mga labi ang kaligayahang nag-uumapaw sa aming mga puso.
Dulot ng iyong pagmamahal, minarapat mong makiisa sa amin kahit sumandali lamang.
Salamat, San Pedro Calungsod, salamat. Magbalik kang muli sa aming piling. Dito ay hihintayin
ka naming muli ng buong pananabik.Sa iyong paglisan, baunin mo ang aming pamamahal at ang
aming puso. Huwag mong ipahintulot na makalimot kami sa iyo o mawalay sa iyong
pagkalinga ngayon at magpakailanman. Amen

(Ama Namin, Aba Ginoong Maria, Luwalhati)

O kamahal-mahalang Puso ni Hesus,
Maawa ka sa amin

O kalinislinisang Puso ni Maria

Ipanalangin mo kami.

San Jose,
Ipanalangin mo kami.

San Pedro Calungsod,

Ipanalangin mo kami.