PRIJEVODI

Predikadur
(Prijevod starozavjetne knjige Propovjednik
na čakavski idiom Selaca s otoka Brača)

Nakon što sam u časopisu “Zadarska smotra” bio objavio na idiom svoje brač-
ke i selačke čakavštine vlastite mi prijevode nekih biblijskih knjigâ Novoga za-
vjeta (Evanđeje po Mati, 2018., Evanđeje po Markotu, 2018., Evanđeje po Luki,
2019., Evanđeje po Ivotu, 2019. i Meštrance od apoštolih, 2020.), te jednu iz ka-
nona Staroga zavjeta (Pisma nada sviman pisman ol Salamuna, 2020.); evo, u
ovoj prilici publici nudim i još jednu starozavjetnu knjigu: Predikadur.
Ova se prozna cjelina u izvornom hebrejskom jeziku Židova zove Kohelet,
grčka ju je Septuaginta (LXX) okrstila imenom Ekklesiastes, dok njezin titul
latinskog oblika Vulgate slijedi helenističko vrelo – Ecclesiastes.
Protokom stoljeća smatralo se kako je njezin autor kralj Salomon, što se ka-
snijim istraživanjima opovrgnulo, a pojavljivala su se i kolebanja koja su dovo-
dila u sumnju postojanje samo jednog pisca ove knjige. Ergo, bibličari smatraju
kako židovska riječ “kahal” (iz koje je deriviran izraz “kohelet”) nosi značenje
“skupio je”, pa je slijedom toga prevoditelj Ivan Matija Škarić ovu starozavjetnu
knjigu u svojem radu bio naslovio kao – Knjiga Sabiraoca. Budući da je rječnik
židovskoga jezika leksički relativno siromašan (cca 4000 riječi), svaka njegova
glosa ima širu paletu semantičkog polja. Stoga se Škarić i bio odlučio za ime Sa-
biraoc, smatrajući kako je to, po hijerarhiji značenja, tek četvrto u nizu što u sebi
sadrži spomenuti židovski termin (I. M. Škarić: Sveto pismo Staroga i Novoga
uvita, slog šesti, Beč, 1859., str. 143.).
Taj se pojam, dakle, odnosio na onoga koji je okupljao, sabirao u družbu, te
javno podučavao govoreći i propovijedajući. S obzirom na to da su se takvi su-
sreti održavali u svetim prostorima, hramovima iliti crkvama, jasan je put kojim
je došlo do zadržavanja riječi “propovjednik” u većini hrvatskih prijevoda ove
knjige. U idiomu moje selačke čakavštine taj izraz ima ekvivalent “predikadur”
(prema: “predika” – propovijed), pa otuda i ime same starozavjetne knjige u
mojem prijevodu – Predikadur.
Premda sam se u prevođenju vodio tekstom latinske Nove Vulgate (Bibliorum
sacrorum, Vatican, 1986.), zadržao sam organizacijsku podjelu teksta kakva je u
hrvatskoj Jeruzalemskoj Bibliji (“Kršćanska sadašnjost”, Zagreb, 1994.).

193
prijevodi ZADARSKA SMOTRA · 1–3 · 2022

Predikadur

1 Pensiri Predikadura, sina ol Davida, kraja u Jeruzolimu.

DIL PRVI

PROSLOVJE
2
Praznoća nada sviman praznoćan, besidi Predikadur, praznoća nada sviman
praznoćan, i sve je praznoća!
3
Kakova je korist čejadinu ol svega fatigavanja njegovega su kin se je fatiga
poda suncon?
4
Jedan đeneracijun gre ća, drugi dohodi, a zemja zanavik ostaje.
5
Sunac izahodi, sunac zapada i ondac priši ki svojen mistu iskle izahodi.
6
Vitar puše prama oštren i obrće na tremuntanu, vrteja sal vamo sal namo i
tornaje se u noven vrtejanju.
7
Sve rike tečedu u more i more se ne pripunja; isklen tečedu rike, namo se i
tornajedu kako bidu isponova zastavile svoje tečenje.
8
Sve je fatigano. Nikor ne moge reć da se joči nisu dosita nagledale i uši naslu-
šale koko spada.
9
Ča je bilo, jopeta će bit, i ča se je činilo, jopeta će se činit, i nima ničesa novega
poda suncon.
10
Je jema ičesa obo čen bi se moglo reć: “Nu gledaj, vo je novo!” Sve je jurve
oldavna prin nas bilo.
11
Ma, ol nega ča je pasalo ni ostalo ni spomena, ka ča ni pril namin neće bit
spominjanja na no ča će doć poslin.

1. Živjenje ol Salamuna

12
Ja, Predikadur, bi san kraj nada Israjilon u Jeruzolimu.
13
I pomuči san se da su prodencon pogledan i nadazdrijen sve no ča je pol
nebesiman; o, kako je grubi patimenat zada Bog siniman čovičanskiman.
14
Vidi san sve ča se čini poda suncon: kakove sve praznoće i kumpativanja od
anima!
15
Ča je išlo ukrivo, ne moge se zdricat;
česa nima, izbrojit se ne moge.
16
Reka san ondac sam sebi: “Gledaj, steka san veću prodencu vengo bilo ko
ol nih ča su bili prin mene u Jeruzolimu. Anim moj iskupi je velu prodencu i
inteliđencu.” 17Prodencu san pomnjivo izuči, a tako i glupariju i ludoriju, ma san
nadazdri da su to kumpativanja od anima.
18
Veleti prodence – veleti nevoje;
ča višje inteliđence, to višje patimentih.

194
ZADARSKA SMOTRA · 1–3 · 2022prijevodi

2 Ondac san reka u srcu svojen: “Daj da provan gušt i neka oćutin česagod
dobrega” – ma nu gledaj: i to je praznoća!
2
Obo smijanju san reka: “Ludorija je”; obo guštu: “Čen vaja?”
3
Odluči san se tilo pokripit su vinon, a srce posvetit su prodencon; zaželi san
se ćapat i budalašćinu, kako bi nadazdri je usrićije jude no ča pol nebesiman
činidu u dneviman izbrojeniman za svojega života.
4
Učini san vela dila: ugradi san sebi palace, nasadi san ložja; 5uredi san perivo-
je i ograde, usadi san u njiman vojkih svakakovih. 6Napravi san krakorine da iž
njih natapan plodovite sade.
7
Nakupova san se robov i robinj, jema san i šerve domaće, a tako i uvore kru-
pnega i sitnega zuba višje vengo ča je ikor prin mene jema u Jeruzolimu.
8
Zgrnu san arđentariju i zlatariju i misir ol krajih i konfinih, osigura san kan-
tadure i kantadureše i svake miline čovičanske, sve bavul na bavul.
9
I deventa san se u toko velo čejade, većje ol bilo koga prin mene u Jeruzolimu;
a ni me ni prodenca moja tradila.
10
I ča su mi god joči poželile, nisan nin uskrati, niti san brani srcu svojen
ikakove divertimente, vengo se je srce moje veselilo svaken fatigu mojen, i taka je
bila dobića svaken pribivanju mojen.
11
A ondac san košidera sva svoja dila, sve patimente ča san jih uloži kako bi
do njih doša – i nu gledaj, sve je to jopeta praznoća i kumpativanja od anima! I
ničesa nima valitega poda suncon.
12
Obrnu san ondac pensir svoj kako bi vidi prodencu svoju, glupariju i ludori-
ju. Jerbo, ča, stavmo, čini ni ki je kraja naslidi? No ča je jurve bilo učinjeno.
13
I nadazdri san da je boja prodenca od ludorije, ka ča je luminažitad boja ol
škurece.
14
Pametnen čejadinu su joči u glavi,
a nepametan šebeća u škureci.
Ma, inšoma, znan kako jelnega i drugega ćapaje ista svrha.
15
Zarad tega reka san sam u sebi: “Kakova je svrha ludonji, taka je i meni. Za-
rad česa ondac hupit za prodencon?” I reka san u srcu: “I to je praznoća!”
16
Jerbo zanavik neće ostat spominjanja ni nen pametnen ni nen nepametnen:
i jednega i drugega će poslin nikega vrimena pokodušit zaudabjanje! I, ajme, ni
pametni vada umre ka i ni brez pameti.
17
Ogadilo mi se je živjenje, jerbo mi se je učinilo grubin sve ča se događa poda
suncon: sve je praznoća i kumpativanja od anima.
18
Nenavidin sve za ča san se poda suncon fatiga i ča sadar ostavjan svojen ba-
šćiniku.
19
Ko zna oće on bit pametan oli lulav? Pa jopeta, on će bit gospodar svega
kumpativanja mojega u ko san uloži vas svoj patimenat i prodencu poda suncon.
I to je praznoća.
20
I sta san srcon fatigat se zarad velega patimenta su kin san kumpati poda
suncon.
21
Jerbo, čovik se fatigaje pametno i bogustvoreno i pomnjivo, pa sve to vada
ostavi u bašćinstvo drugen ki se kolo tega ni bi ni fatiga. I to je praznoća i vela
nenadinja.

195
prijevodi ZADARSKA SMOTRA · 1–3 · 2022

22
Jerbo, ča on dobije za vas svoj patimenat i fatigavanje ko je poda suncon bi
podni?
23
Jerbo, svi su dnevi njegovi za reć pravo fatigani, lavuri su mu puni penetra-
nja; ni obnoć srce njegovo nima pačifika. I to je praznoća.
24
Nima čejadinu druge sriće jurve jist i pit i bit kuntenat lavuron svojin. I to
je, vidin, dar ruke ȍl Boga.
25
Jerbo, ko bi moga jist, ko nekuntenat bit, osin po njemu. Pamet, nadazdri-
vanje, alegriju on darije nen ki mu je po voji, a grišniku meće lavur da skupja i
pribire za nega ki je po voji Bogu. I to je praznoća i kumpativanja od anima.

2. Smrt

3 Sve jema svoj štajun i svaki lavur pol nebesiman svoje doba.
2
Doba ol porajanja idoba od umiranja;
doba ol sađenja i
doba ol guljenja nega usađenega.
3
Doba od ubivanja i
doba od ličenja;
doba od obalivanja i
doba ol građenja.
4
Doba ol plakanja i
doba ol smijanja;
doba od avelivanja i
doba ol balanja.
5
Doba ol hićenja stinja i
doba ol kupjenja stinja;
doba ol grljenja i
doba kal se molaje grljenje.
6
Doba od išćanja i
doba ol gubjenja;
doba ol hranjivanja i
doba od olbacivanja.
7
Doba ol deranja i
doba ol krpjenja;
doba ol mučanja i
doba ol parlanja.
8
Doba ol jubjenja i
doba ol nenavidnosti;
doba ol gvere i
doba ol pačifika.
9
Ča ostaje čejadinu ol njegovih fatigavanjih?
10
Pensan obo obligamentu punen kumpativanja ča ga je Bog bi zada siniman
čovičanskiman.

196
ZADARSKA SMOTRA · 1–3 · 2022prijevodi

11
Sve ča je učini lipo je za svoje doba; ma neka je dâ čoviku pogledat u vike,
čovik ne moge nadazdrit dila ča jih je Bog bi učini ol postanka do svrhe.
12
Znan da ni druge sriće čoviku osin da se veseli i čini dobrega za svojega ži-
vjenja.
13
I kal čovik ji i pije i gušta u svojen rabotanju, i to je dar ȍl Boga.
14
I znan da sve ča čini Bog, čini zaposve. Ten se ničesa ne moge dožuntat niti
mu se moge vazest; a Bog čini tako da prı̏dādu pril njin.
15
Ča je, jurve je bilo, i ča će bit, jurve je bilo; a Bog rinovaje ča je propasalo.
16
Jošćec vidin di poda suncon zanamisto pošćenja guverna nepošćenje i zana-
misto pošćenjačine škanjažin.
17
Zarad tega san reka u sebi: “Bog će arbitrat i pošćenjačini i škanjažinu, jerbo
ovode jema vrime za svako smiranje i činjenje.”
18
Jošćec san reka u sebi: “Judi se vladadu tako da Bog moge pokaživat kakovi
su ustvari, da su jedan drugen koda beštijam.”
19
Jerbo za reć pravo, poginuće judih i beštijama jelno je isto. Kako ginedu ni,
tako ginedu i ne; i dišedu jelnakin dahon, i čovik ničin ne šuperaje beštijam,
jerbo je sve praznoća.
20
I jelni i drugi gredu na isto misto; svi su postali ol prašine i u prašinu se
tornajedu.
21
Ko zna je se dah juski penje gori, a dah beštijama je se skalaje doli ki zemji?
22
Nadazdrijen kako čoviku druge sriće nima osin alegrije u svojen dilu, jerbo
je to judska svrha. A ko će ga dovest do tega da dozna ča će bit poslin njega?

3. Živjenje skupa

4 Jopeta san sta gledat sva potvaranja ča se činidu poda suncon, i nu gledaj,
suze nih pošćenjačin, i nikoga nima da jih istre; i potvaranja iž ruke dušmanske,
a šalvadura olnikuda.
2
Zarad tega sritnin držin mrtvace ča su jurve pomrli, sritniji su ol živih ča jo-
šćec živedu. 3A od i jelnih i drugih sritniji je ni ki jošćec ni posta, ki ni vidi zlih
dilih ča se činidu poda suncon.
4
Daje, oćuti san da svako pribivanje i svako fatigavanje pribavja čoviku đeloži-
ju njegovega bližnjega. I to je praznoća i kumpativanja od anima.
5
Budalaš prikriži ruke
i objida samega sebe.
6
Boja je puna šaka u miru
vengo obedvi ruke pune fatiganega rabotanja i kumpativanja od anima.
7
I jošćec san jelnu poda suncon upana praznoću:
8
Čovik polpuno sam samcat – brez sina, brez brata, i jopeta nima svrhe
njegoven fatigavanju; joči mu se ne mogedu nasitit misira; a ne pensa: za koga se
ja šamaštrajen i uskraćijen sebi dobrega? I to je praznoća i zlo penetranje.
9
Boje je dvojici vengo jelnen, jerbo jemadu boju dobiću za svoj trud.
10
Je pade jedan, drugi će ga podišat; a samen jelnen, ja mu se radujen! Je pade,
ni koga da ga poldigne.

197
prijevodi ZADARSKA SMOTRA · 1–3 · 2022

11
Pa je se i spava u dvojicu, teplije je; a kako će se ni ča je sam samcat steplit?
12
I je ko udre na jelnega, dvojica ćedu mu se kontreštat; i konop u tri dupla
neće puknut lagahno.
13
Boji je momčujak siromašan, a pametan
vengo kraj star i lulav,
ki višje ne zna za svı̏ta.
14
Jerbo momčujak moge izlist iž katabuje i deventat se u kraja, neka se je bi
rodi ka prosjak u krajestvu svojen.
15
Adoća san kako svi ča živedu i gredu poda suncon pristajedu uza momčujka,
uza naslidnika ki ga je zamini.
16
On gazi na čelu pustih podanikov i ni kašnji đeneracijuni nisu se mogli za-
rad tega veselit. I to je, bićega, praznoća i kumpativanja od anima.
17
Kal greš u kuću ȍl Boga, vod računa obo koraciman svojiman. Prijdi kako
biš moga čut – posvetilišće je vajanije vengo prinišanje nih budalaših, jerbo ni i
ne znadu da činidu ča zlega.

5 Nemoj naglit justiman svojiman i nemoj prišit su besidan pril Bogon, jerbo
je Bog na nebesiman, a ti si na zemji; zarad tega šparenjaj beside svoje.
2
San dohodi ol pustih pensirih,
a lulava govorancija ol veleti besidih.
3
Kal se budeš ča zavitova Bogu, omar to učin, jerbo njemu nisu dragi budalaši.
Zarad tega ispun svaki svoj zavit.
4
Boje se je ne zavitovat, vengo se zavitovat i ne ispunit zavita.
5
Nemoj dat justiman svojiman da te tantadu na sagrišenje i nemoj kašnje reć
prid anđelon kako je to bilo nehoteć. Zarad česa davat Bogu priliku da se jidi na
besidu tvoju i deštriga dilo ol ruk tvojih?
6
Koko sanjanjih, toko i praznoće;
veleti besidih – kumpativanje od anima.
Zarad tega jemaj prpe prı̏l Bogon.
7
Je vidiš di faštidijadu siromaha i čepadu pošćenje i pravicu u zemji, nemoj se
ten čudit, jerbo i ni ča je na visočijen požicijunu jema nada sebon drugega, ki je
na jošćec višjen mistu.
8
Korist zemje je nada sven: i kraj ovisi obo zemji.

4. Šoldi

9
Ko šolde jubi, nikadare jih dosta nima;
ko misir jubi, nikadare mu ni dosta ploda njegovega.
I to je praznoća.
10
Di je veleti misira,
veleti je i nih ča ga jidu,
pa kakova je korist ol tega gospodaru, osin ča ga jočiman gleda?
11
Slalki je san težaka, ji on pinkicu oli vele, doklen misir ne da bogatunu
zaspat.

198
ZADARSKA SMOTRA · 1–3 · 2022prijevodi

12
I vidi san teško zlo poda suncon: skupjeni misir ča je na deštrig gospodaru
svojemu.
13
Jerbo se je zlon nesrićon deštriga taki misir, da sinu ki mu se je bi porodi ni
bilo ostalo ničesa.
14
Gol je izaša iz droba matere svoje i tako gol partit će kakov je i doša; ničesa
nima ol svega svojega truda za odnit.
15
I to je teško zlo ča tako gre ća kako je i došlo; pa kakova mu je korist ča se je
u vitar faštigava?
16
Sve dneve svoje živi je u škureci, nenadinji, penetranju, malatiji i nenavid-
nosti.
17
Vo, inšoma, zakjučijen: prava je srića čejadinu jist i pit i kuntenat bit sa svin
svojin trudon su kin se kumpati poda suncon za kratkega vika ča mu ga je da
Bog, jerbo mu je taka svrha arbitrana.
18
Pa, je Bog čoviku bi da misir i poces da jih jema i da bude kuntenat svojin
dilon – i to je dar ȍl Boga.
19
Jerbo, tadar barenko ne pensa vele obo dneviman svojega živjenja, kal mu
Bog daje da mu se srce veseli.

6 I adoća san: jema jošćec jelno zlo poda suncon i u obilanci šamaštraje jude.
2
Nikomu je Bog dodili misir i blago i pofaljenja, pa jema sve ča mu anim za-
želi, ma mu ni udili da u ten i gušta, vengo gušta furešt. To je praznoća i gruba
nenadinja.
3
I govorin: boje je mrtvo porojeno dite ol nega ki bi porodi sto dice i živi pusta
godišća, a sam se ne bi nasiti dobrega niti bi jema funerala;
4
jerbo je izvrgnuto dite zaništa arivalo
i u škurecu je išlo i ime mu je škurecon pokodušeno;
5
sunac jurve nĩ ni vidi ni nadazdri –
a mirnije je ol nega.
6
Pa kal bi taki živi i dvi ijade godišćih, a svejega dobrega ne bi uživa, a ne gredu
ondac obadva jelnako na isto misto?
7
Čejade se fatiga jurve kako bi ji,
a drob njegov nikadare da se nasiti.
8
Jerbo po čen je ni pametni boji ol nega lulavega i ča reć obo siromahu ki je
kapac držat se pril judiman?
9
Boje je jočiman vidit vengo animon lutat. I to je praznoća i kumpativanje od
anima.
10
Ča je jurve bilo, jema ime; i zna se ča je čovik; i on se ne moge stavjat su
sforcanijin ol sebe.
11
Ča je višje besid, to je veća i praznoća ol svega, i ka je korist ol tega čejadinu?
12
Ko zna ča je dobro čejadinu u živjenju njegoven, za no malo dnevih ča jih
tako ispražnjeno žive, ča mu prohodidu kako osin? Ko će reć čejadinu ča će bit
poslin njega poda suncon?

199
prijevodi ZADARSKA SMOTRA · 1–3 · 2022

DIL DRUGI

Proslovje
7 Boji je dobar glas vengo uje ol skupinje,
i dnev ol smrti vengo dnev ol porojenja.
2
Boje je poć u kuću ča je u korutu
vengo u kuću di se fraja,
jerbo je nonde svrha ol svakega čovika,
i ko je živ, neka primi ki srcu!
3
Boji je jid vengo smih,
jerbo pod obrazon ol žalosti srce je razveseljeno.
4
Srce je ol nih pametnih u kući ča je u koroti,
a srce nih nepametnih u kući od alegrije.
5
Boje je obadat karanje pametnega čejadina
vengo slušat faljenje kega lulavega.
6
Jerbo kakovo je pucketanje drače poda kotlon,
tako je i smijanje nih lulavih,
i to je praznoća.
7
Jerbo smijanje ol nih pametnih čini ne lulave
i alegrija kvari srce.

1. Vraćeno za učinjeno

8
Boja je svrha ol moljenja vengo njezino počelo
i boja je pacijenca od oholije.
9
Nemoj zanaglit u bis, jerbo bis počije u srcu nega lulavega.
10
Ne pitaj zarad česa su nikadašnja vrimena bila boja ol vih, jerbo to ni pame-
tan upit.
11
Pamet je pricinjeni misir, i nâ je na korist niman na ke sunac sja.
12
Jerbo ka ča su šoldi gandej, tako je gandej i pamet; a gre u favur pameti i to
ča na škapulaje nega ki je jema.
13
Nu pogledaj dila ȍl Boga; ko moge zdricat ča je on iskrivi?
14
U dobren vrimenu guštaj u no dobrega, a u zli dnev pensaj: Bog je stvori
jelno ka i drugo – da čovik ne olkrije ničesa ol nega ča ga čeka.
15
Svačesa san vidi u svojen nikakoven životu: pošćenjačina gre u deštrig neka
je bi ol pošćenja, a farmasun i daje žive neka je u svojon farmasuniji.
16
Nemoj bit pripošćen
i ne bud pripametan;
zarad česa da se deštrigaješ?
17
Ne bud prikovišje zal
i ne bud lulav;
zarad česa biš umri prin vrimena?
18
Dobro je da držiš jelno, ma ni no drugo ne molaj iž ruke, jerbo ko jema prpe
pril Bogon, škapulaje se ol svega.

200
ZADARSKA SMOTRA · 1–3 · 2022prijevodi

19
Pamet nih pametnih veću forcu daje mistu vengo deset glavarih.
20
Na zemji nima pošćenjačine ki, čineć ča dobrega, ne bi nikadare sagriši.
21
I jošćec jelno: ne obadaj petegulavanja; čut ćeš brž da te šerva tvoj pridava;
22
a zna srce tvoje da si i ti špešo druge pridava.
23
Sve san to su pamećon tašta. Pensa san da san pametan, ma tu svoju pamet
nisan bi nadazdri.
24
No ča je, lontunano je i profundano, toko profundano – ko da to i najde?
25
I jošćec jedan put prova san proštudirat i nadazdrit pamet i smisal, da na-
dazdrijen maliciju kako ludoriju, a ludoriju kako nepamet.
26
Olkri san da jema ništo žuklije ol smrti – žena, na je trapula, srce non je
mriža, a ruke veruge;
ko je Bogu drag, izmaknije non se,
a grišnik je njezin sužanj.
27
Etoga, to san sve u sven olkri, govori Predikadur.
28
I jošćec san išća, ma brez da san uspi.
Naša san čovika – jelnega od ijadu,
a ženu meju sviman nisan naša nijednu.
29
Olkri san vo: Bog je stvori čejadina sempličitadega
a on snije puste imbroje.

8 Ko je ka ni pametni?
Ko jošćec zna špjegat no sve ča je?
Su pamećon se iluminaje čejadinu lice
i minja njegova namrđena faca.
2
Zarad tega govorin: slušaj krajev befel akonto Božjega kunjenja.
3
Ne priš je prikršit: ne bud teštardast kal ni smisal dobar, jerbo on čini kako
njemu gre u favur.
4
Jerbo, besida je ol kraja najžešća, i ko ga je kapac zapitat: “Ča činiš?”
5
Ko se drži befelih, ne poznaje nenadinje, i ni pametni zna i za vrime i za ar-
bitranje.
6
Jerbo, jema i vrime i arbitranje za sve, i čejade vele inkargaje grubo dilo nje-
govo
7
jerbo on ne zna ča će bit; a ko mu moge reć kal će ča bit?
8
Vitar nikor ne moge šuperat, niti zagospodarit nada dnevon ol smrti, niti
jema pripomišćanja u gveri; niti malicija škapulaje nega ča je čini.
9
Sve vo vidi san atento gledajuć na sve no ča se čini poda suncon, kal čejade
guverna nada čejadinon na njegovu nenadinju.
10
Daje san vidi kako ne pokvarene nosidu na kopošantu, i judi iž posvećenega
mista izahodidu da jih se fali zarad tega svega ča su tako činili. I to je praznoća.
11
Kal nima žvelte šentence za zlo dilo, jusko je srce užano činit česagod zlega.
12
I grišnik ki čini zlega i sto putih, vele žive. Ja perfin znan da ćedu bit sritni ni
ki jemadu prpe pril Bogon, jerbo pridadu pril njin.
13
Ma dežgracijun neće bit sritan i neće prolongat dneve svoje ni ko osin, jerbo
ne prida pril Bogon.

201
prijevodi ZADARSKA SMOTRA · 1–3 · 2022

Ma je na zemji praznoća i pošćenjačine ćapaje svrha nih malicijožastih, a

14

malicijožaste svrha ol pošćenjačin. Govorin van: i to je praznoća.

15
Zarad tega fešteđajen alegriju, jerbo ni čejadinu sriće poda suncon vengo u
manjativi, piću i guštanju. I neka ga to kumpanja u njegovon muci u životu ča
mu ga je Bog da poda suncon.

2. Jubav

16
Poslin svih pribivanjih, kako bi kapi no pametnega, prova san nadazdrit ča
se čini na zemji. Za reć pravo, čejade ne nahodi pačifika ni obdan ni obnoć.
17
Gledan svo dilo ol Boga: i za reć pravo – nikor ne moge kapit no ča se do-
gađa poda suncon. Jerbo, ma koko se čovik fatiga da olkrije, nikadare ne moge
olkrit. Pa ni ni pametni to ne moge olkrit, neka pensa da zna.

9 Pensa san obo sven ten i kapi san kako su i pošćenjačine i ni pametni, su
diliman svojiman, u ruci ol Boga; i čovik ne kapije ni jubav ni nenavidnost, i za
nje su obedvi praznoća.
2
Sviman je ista svrha, i pošćenen ka i nen pokvarenen, i čisten i nen šporken,
nen ki žrtvuje i nen ki ne čini posvetilišća; jelnako nen dobren ka i grišniku, nen
ki se kune ka i nen ki jema prpu ol kunjenja.
3
Najgore je ol svega ča je poda suncon vo: ista je svrha sviman, jusko je srce kr-
cato nega zlega, ludorija je u srciman judih doklen živedu, a kašnje se kuštajedu
ki mrtviman.
4
Jerbo ni ki je meju živiman, jema ufanja: i kućin na dundaru višje vaja vengo
krepani lijun.
5
Ni živi barenko znadu da ćedu umrit, a ni mrtvi ne znadu ničesa niti jemadu
višje dobiće, jerbo se zaudabja i spomenuće na njih.
6
Oldavna je ižvampila i jubav njihova, i nenavidnost, i himba, i višje nimadu
dila ni u čen ča je poda suncon.
7
Zarad tega s alegrijon jij kruha svojega
i razveseljenega srca pij vino svoje,
jerbo se je Bogu jurve prin bilo svidilo dilo tvoje.
8
U svaka doba nos vešte bile
i uja neka ne pofali na tvojon glavi.
9
Guštaj u životu sa ženon ku jubiš u sve dneve svojega vika ispražnjenega ča
ti ga Bog daje poda suncon, jerbo je to tola tvoja u životu i fatigavanju su kin se
pribiješ poda suncon.
10
I čagod namisliš učinit, učin doklen mogeš, jerbo nima ni dila ni filožofira-
nja, ni nadazdrivanja, ni pameti u Paklu di greš.

202
ZADARSKA SMOTRA · 1–3 · 2022prijevodi

3. Slučaj

11
Osin tega, vidi san poda suncon: ne dobijedu utrkivanje ni žvelti, niti gveru
ni kapaci; nima kruha za nega pametnega, niti misira za ne inteligente, ni sama-
ritanšćine za naučne, jerbo jih vrime i svrha svih ćapaje.
12
Čejade ne poznaje svojega momenta: ka ribe ćapane u furbaston mriži, i ka
tičice pol ploku ćapane, tako se ćapajedu sini juski u vrime ol nenadinje ča jih je
najedanput spopala.
13
Jošćec san vidi poda suncon i vu “pamet” ča mi se je učinila velon:
14
Bilo je jelno malo misto i u njemu pinku svita, a na nje je udri veli kraj, opasa
ga je i ugradi kolo njega vele mire i kaštile.
15
Ma se je u njemu naša čovik siromašan i pametan ki je šalva misto svojon
pamećon, a poslin se nikor ni spominja tega čejadina.
16
Pa jopeta, ja pravjan: boja je pamet vengo forca, ma ni na cini pamet siroma-
hov i ne obadajedu njegove beside.
17
Flake se beside ol nih pametnih boje čujedu, vengo vikanje vojvod nada ni-
man lulaviman.
18
Pamet višje vaja vengo ardenje ol gvere, ma jedan jedini grišnik pokvari ve-
leti nega dobrega.

10 Krepana muha usmrdi uje uzvonjajuće, a i pinku ludorije žešće je ol pameti

i ol fale.
2
Ni pametni gre puten pravin,
a ni lulav nin krivin.
3
Dosta je da ni lulavi gre puten: a kako nima pameti, svakomu pokažije da je
lulav.
4
Je se na te poldigne bis ol guvernata, ne napušćaj svojega mista, jerbo karitad
brisi vela sagrišenja.
5
Jema zlega ča san ga bi upana poda suncon ka falimenat ča dohodi ol guver-
nata:
6
ludorija se poldiže na ne najvišje podeste, a bogatuni zapasajedu nizoka mi-
sta.
7
Vidi san šerve na konjiman, a cesare di gredu nanoge kako šerve.
8
Ko kopa jamu, u nje upada;
i ko obalije mĩr, ubode ga guja.
9
Ko lomi stinje, no ga zledi;
ko cipa drivje, moge nastradat.
10
Kal se istupi gvozdo i ne projde mu se bruson priko jila, ondac vada bude
višje force; a dobića ol pameti je ol koristi.
11
Je guja ubode prin uroka, nikakove koristi ondac ni ča čara nima.
12
Krcate su miline besid iž justijuh nih pametnih,
a nega nepametnega deštrigajedu pešnje njegove.
13
On počima svoje beside ludošću i deštrigaje jih su polpunon nepamećon.
14
Ni lulavi prikoviše parla: čejade ne poznaje no ča gre, i ko mu moge reć ča će
poslin njega bit?

203
prijevodi ZADARSKA SMOTRA · 1–3 · 2022

15
Nê lulave mori njihovo fatigavanje;
ko ne poznaje progadure, ne moge u misto.
16
Kal ti je kraj primlad i cesari omar izjutra feštadu, zemjo, ja ti se radujen.
17
Blago ga se tebi, zemjo, kal ti je kraj samaritan i cesari ti u prava doba jidu
kako bidu se pokripili, a ne da se opijedu.
18
Su linošćon se krividu grede,
zarad nehajanja protapanaje kuća.
19
Ma su fešte zarad divertimentih i vino razveselije živjenje, a šoldi zgrćedu
sve.
20
Ni u svojen pensanju nemoj gadit kraja,
niti u svojon kamari nemoj petegulat bogatuna,
jerbo ćedu tičice odnit glas
i no ča krila jema obznanit će besidu.

11 Bac kruh svoj na vodu i nać ćeš ga poslin veleti vrimena.

2
Razdil njiman sedan oli njiman osan, jerbo ne znaš kakovo će zlo snać zemju.
3
Poklen se oblaci napunidu dažjon, izlijedu ga na zemju, a je pade drivo na
oštro oli na tremuntanu, sve isto: di pade, nonde i ostaje.
4
Ko vodi računa obo vitru, ne sije,
i ko gleda u oblake, ne žanje.
5
Ka ča ne znaš ni ki je put animu ni kako se učini košće u drobu noseće žene,
tako ne znaš ni dila ol Boga ki je sve stvori.
6
Izjutra sij sime svoje,
a svečera neka ti ruka ne počije.
Jerbo ne znaš oće bit boje vo oli no, oli će jelno i drugo bit jelnako dobro.

4. Starost

Slalka je luminažitad i lipo je jočiman adoćat sunac.

7

Ma, je čejade žive i veleti godin, neka vavik bude u alegriji, a i neka se spome-
8

ne kako će škurih dnevih bit depju. Praznoća je sve ča će arivat.

9
Zarad tega se divertij, mladiću, u svojon mladosti,
i divertij se u dneviman ol svoje junošćitadi;
hod progaduriman ol srca svojega
i slid hotinja ol jočijuh svojih;
ma, jemaj na pameti da će ti za sve to arbitrat Bog.
10
Reteraj ražalošćenje iž srca svojega
i lontunaj faštidij ol tila svojega.
Jerbo, ditinjstvo i mladost su praznoća.

12 I spominj se svojega Stvoriteja u dnevima mladosti svoje prin vengo ča

dojdedu zli dnevi i arivadu godišća kal ćeš reć: “Ne sviđadu mi se.”
2
I prin vengo poškuri sunac i luminažitad,
luna i zvizde,

204
ZADARSKA SMOTRA · 1–3 · 2022prijevodi

i tornadu se oblaci poslin dažja.

3
U dnev kal budedu drćat gvardije ol kuće
i stanedu šebećat judi prijaki
i dangubit ne ča mejedu
jerbo jih je malo,
i poškuridu ni ki gledadu kroz ponistre;
4
poklen se zatvoridu vrata ol kale,
stiša se zvuk žrvnja,
kal se poldigne pivotanje tičic
i zamuknedu ćere ol pivanjih.
5
Kal je hođenje uzbrdo patimenat
i svako izahođenje pritnja;
a umendula se infjorala,
i škakavci se potežedu,
i frut ol kopra puče,
jerbo čovik gre u svoj dom vikovišnji!
A narikače jurve gredu po kalan.
6
Prin vengo ča pukne kurdila ol slebra
i feral ol zlata se ruvina
i razbije se vrč na pišćini
i islomi timun na gustirni;
7
i torna se prah u zemju ka ča je iž nje i doša, a anim se torna ki Bogu ki ga je
bi i dâ.
8
Praznoća nada sviman praznoćan, pravja Predikadur, i sve je praznoća.

Na svrhu

9
A osin tega ča je sami Predikadur bi pametan, on je i puk adukava obo pameti
pa je omiri, ispita i sastavi vele pametnih glendih. 10Fatiga se je Predikadur nać
prave beside i dreto-šćeto reć no ča je pravo.
11
Beside su pametnih judih kako kolci i kako duboko zabodeni brokvuni: čo-
ban jih dupera za na dobro svojega blaga.
12
I na svrhi, sinko moj, jemaj na pameti da tuka veleti fatigavanja kako bi se
zdata libar, i da depju adukacijuna pritrudi tilo.
13
Čujmo ol svega besidu ol svrhe: «Jemaj prpe pril Bogon, obadaj befele
njegove, jerbo – to je svo čejade.» Jerbo, sva će sakrivena dila, bila ol dobrega oli
ol zlega, Bog izvest prid tribunal.

Preveo:
Siniša Vuković

205