Bismillahirrahmaanirrahiim

Assalamu’alaikum wr.wb.
Innal hamdalillaahi nahmaduhu wanasta’iinuhu wanastaghfiruhu wanu’minubihii
wanatawaqqaltu’alaih wana’udzubillahi min syururi anfusinaa wamin sayyiaati a’maalina
mayyahdihillaahu falaa mudhillalahu wa mayyudhlilhu falaa haadiyah, shalatu wassalam ‘ala rasuulil
anbiyaai walmursalin , Sayyidinaa Muhammadin wa’ala aalihii washohbihii ajma’in. amma ba’du
Sininna tau mateppe’na Puang Allah Ta’ala iya engkae riammasei nenniya ripakalebbi ri Puang Allahu
Ta’ala. Alhamdulillaah, engka siki muttamaki subuh maduana uleng ramalang nasibawai ajjappa-
jappang adising-disingeng makkutoparo engkanna mupa teppe mattugengkeng pada engkaki hadere
pangoloi atitta lao ri Puang seuwae iyanaritu Puang Allah Ta’ala. Shalawat nenniya mappassalama
sukku lao ri Nabitta, Nabi iya engkae passu’I passalama’I rupa taue pole ripettanna akaferekeng e nalao
ri tajanna passeuwwang e.
Sining umma selleng ya engkae riammasei ri Puang Allahu Ta’ala, narampei Nabitta ri siddie hadist
narimakkadanna “at-thuhuru syatrul iman”, niyya appepccing e tawaduannai teppe. Bettuanna ada
narekko engka tau napoji mappepaccing engkanitu maddibola rilalenna atinna tawaduanna teppe’e.
engka na engka Nabitta Muhammad SAW makkinyareng I sibawa sahabatna. Wettunna mattenngang
makkinyareng laloi toi Nabitta duae kubburu. Wettunna nalaloi iyaro duae kubburu teppa luppe I
nyarenna Nabitta. Wettunna luppe makkutanai Nabitta
“e…sahabatku, degah taissengi niga kubburu iye?”
mappebali sahabat “iye deto kupahangi surona Puang Allah Ta’ala, maga memeng I surona Puang
Allah Ta’ala?”
makkadai Nabitta “ e..sahabatku, iye tau ilalenna kuburu’e ricallai kesi. Ricallai ri Puang Allah Ta’ala.”
“agamemeng gah atassalanna natakko icallai rilalenna kubburu’e?”
Jaji iyatu paccallang’e rilalenna kubburue luar biasa. Narekko ricallai taue nengkalingai sininna tau
ripancajinna Puang Allah Ta’ala sangadinna jin e nenniya rupataue. Iyaro onnange ricallai nateppa
luppe anyaranna Nabitta,bettuanna nengkalingai icalla. “Aga kira-kira pangkaukenna iye surona Allah
Ta’ala riwettunna tuo rilebo’na iye tanah e naricalla?” makkadai Nabitta “ iyaro ceddie napoji mappau
pau rimunri, wettunna tuo rilebo’na iye tanah e mabbalibolai mabbalibola nacaritai ja’na padanna
rupatau. Iyatosiro ceddie napoji narekko makkebbiang I yarega narekko temei depa namakessing
tetti’na temena mabbissani. Iyanaro nassabari naricalla, maasyaa Allah. Demi namakessing tetti’na
temena na ricalla, magani kira-kira iyaro taue dena nabissa yagani kira-kira? Nulle kapang ripeco-peco.
Pa mabiasa ladde tuh kejadian narekko temeki depa namakessing tetti’na teppa mabbissani, iyepa matu
nappa mitti cappa’na narekko sujudki. Ai taroni apa cedde’mi, iyana nassabari naricalla. Iyatu cedde’e
maderi makkasolang. Engka waeta sikaca ipalenne’I rimejang’e na denaritokko, takko engkamani
ana’cicca’ makkebbiang hajja’ persis tamai rilalenna kacae, cedde’ bawang tapi lomuki gah kira-kira
minung’I? padahal dema na malugga’? aro cedde bawang naekkiya makkasolang.
Iyanaro onnange nassabari naricalla akibat karna de namakessing batena makkebbiang hajja’ bettuanna
depa namatetti’ iyaro cappa’ temena ro nabbissa nassabari na ricalla.
Hadirin yang dimuliakan dan dirahmati oleh Allah SWT, jadi iyenaro agamata betul-betul napanonno’I
Puang Allah Ta’ala rilebo’na iye tanah e demi untuk passalama’ manengki idi rupataue. Denalorengki
Puang Allah Ta’ala macilaka, denalorengki Puang Allah Ta’ala ricalla matu. Iyanaro napaggurung
manengki. Jadi iyatu agamae tenniatu sempajang bawang. Apa engkatotu makkada yang penting
massempajangna makessinna, iyaro lain-lain e denaisseng i. padahal iyaro agamae sininna atuo
tuongengna rilalenna iye lino napaggurungeng manengki, engka maneng iyaro lao-laona iyaro rilalenna
agamae agi-agi isappa engka maneng kulalenna agamae.
Iyana ripammula dasar tujunna appepaccing’e. jadi risambungisi ripatterrusi bicaratta. Luar biasa
agamata.
Jadi iyaro appepaccing’e onna wennie purani sihubungeng riolo purani irampe sambungenna ritujunna
pappepaccing lahireng e engka riaseng “at-thaharatu minannajsi wat-thaharatu minal hadatsi”
Yang pertama at-thaharatu minannajsi, mappepaccing pole ri najisi. Yaseng e najisi iyanaro sininna
rota-rota ya engkae nassabari na denaessah sempajang e. narekko engka yaro ri lanro aleta na
massempajakki, detu na essah sempajang e. narekko de naessah sempajang e, madosaki. Narekko
madosaki, tamaki ranaka. Narekko tamaki ranaka, ricallaki. Narekko ricallaki, tentuni mapeddi’.
Narekko detalo mapeddi, pakessingi culinge’nah.
Hadirin yang dimuliakan dan dirahmati Allah, jadi iyaro ritella’e najisi maega ladde rupanna tetapi
anregurutta nabagei ritellu tawang e. engka yaseng najis mughallazah, engkato riaseng e najis
mutawassitah, engkato ritella najis mukhaffafah. Naiye najis tellu rupae, tellu tingkatan tellu totuh
carana pekkogi palesangi. Uppanna-uppanna denamakessing bateta mappalesang berarti detu
namapaccing. Denamapaccing, majjenneki desi naessah jenneta deto naessah sempajangta.
Hadirin yang dimuliakan dan dirahmati Allah, yang pertama yaitu najis mughallazah, najisi battoa.
Iyanae najis kaminang mawere’, tegaena contohna yaseng e mawere’? iyanaritu najisina bawie sibawa
asu. Jadi iyanaro rekko nakennaki najisi pole ri bawie nennia asue, iyaro carana palesangi makkadai
Nabitta “tuhuru inaai ahadikum idzaa walaghatiihilqolbu ayyabtilahu sab’a marraatin ulaahunna
bitthuro” naiya apaccingenna onrong-onrongmu sala seuwammu tu mennang, narekko nagessai asu
yarega narekko nalepe’I asu yarega nakennai najisi na bawie iyanaritu majeppu bissaiwi wekka 7
makkuling sala seuwanna nasaba tanah. Igana missengi engka asutta kibolata takko engka onrong-
onrongta yarega nalepe’I witita yarega ajeta mappakkuturo carana bissaiwi wekka 7 iyanaro yaseng
risertui. Wekka 7 ribissai wekka ciceng nasaba tanah. Idimani bawang loki pammulai nasaba tanah
yarega pabutennganna tanah,iyaro wekka 6 e nasaba uwae. Tapi ajana tanah paccappureng pa marota’I
tuh.
Magi na tanah namegamo makkukkue sabun, engka manenni rupanna sabun e magi natennia yaro?
Polei nateliti seddie tokoh tau acca siddie dottoro. Natelitiwi nabacai hadistna Nabitta makkada aga
kira-kira hikmahna na narampei Nabitta tanah. Berarti iyaro Nabitta ketinggalan jaman, denaisseng I
makkada matu ricappa wettu maega ladde rupanna sabun. Ternyata natelitiwi, iyaro pale najisina asue
sibawa bawie dememengto nullei lesang namo sabun aga ripake, narekko tennia nasaba tanah.
Ko purani pale tanah nappa lokkano sabungi bara mawangi wangi tosi, dema namagaga yang penting
engka tanah. Okkoniro makkada luar biasa tongengtu yaro agae pura narampe Nabitta, de narampe
bawang I Nabitta. Parellu diperhatikan iyewe, pa biasa wita ro ku desa desa engka maneng asu
ribolana. Makessing kessing moi pangulutta imam syafi’I narekko nalepe’ki asu risertui, rekko
pangulutta imam malik narekko nalepe’I asu nasepa’I nalengi piso nasepa’I jukuna. Maringeng-ringeng
mo cedde idi, tapi onro terrengna pangulutta imam malik narekko nalepe’I asu alengi bangkung
nasepa’I purae nalepe asu. Onro nini’naro rekeng siddie topanrita passalenna riasenge najisi.
Yang kedua engka riasenge najis mutawassita, najis lalo tenngah. Iye najis mutawassita tabbage dua,
engka yaseng e najis ainiyah engkato yaseng e najis hukumiyah. Yaseng e najis ainiyah iyanaritu najisi
kaitange tekkena, tappana, nennia baunna. Pada-padanna na rekeng kotoran manusia, kotoran hewan
termasuk maneng iyatu najis ainiyah narekko engka mupi tekkena. Pekkogi carana bissaiwi?
Ripalesangi tekkena,ripalesangi rasana,ripalesang toi baunna. Pada narekko puraki makkebbiang hajja’.
Napaggurungekki tomatoatta,iyatu tomatoae wii luar biasa. Tongeng I rekeng de namatanre sikolahna
tapi malamu pahanna. Makkadai narekko meloki mabbissa rilapiki kaci jaritta. Bettuanna ada rilapiki
kaci narekko melo ikarawa iyaro laleng hajja’ta ro isirangi jolo wae jaritta, insyaa Allah narekko
purairo malemma’I tallegga baunna. Nappai narekko mappepaccingko iyapa mupaja gosok I narekko
kiki’ annyarang e ko mekkah. Bettuanna ada iyapa naripaja gosok I narekko marekke’ni iyanatu kiki’.
Naiyaro ukuranna anregurutta, appaggurunna tau riolota ajja mupaja gosok I narekko de nakiki’
annyarange narekko kiki’ni ajana uemmaui mu pakkadange loko lepe’I ajatona mubata-bata,
mapaccinni tuh.
Hadirin yang dimuliakan dan dirahmati oleh Allah SWT, yang kedua iyanaritu najis hukumiyah.
Iyatosi najis hukumiyah dena iritai tekkena, yakinkanmi bawang makkada oooh purai sedding engka
tau teme kuhe tap deniga tekkena. Carana paccingi risirangmeni bawang. Igana missengi umpamanya
makkada ooh engka pura teme kuro tehele e na lo yonroi massempajang, isirang meni bawang nappa
isussu’ purani.
Hadirin yang dimuliakan dan dirahmati oleh Allah, yang ketiga engka ritella najis muhaffafah,najis
maringeng. Tegatosi yaro termasuk najis maringeng? Iyanaritu temena anak lolo burane depa nanre
sangadinna ASI. Narekko umpamanya engka anana lolo burane bangsana idi tomatoae purani mabbaju
teppa kerra’I analolo ta rigendong-gendong si wii teme laloi naloni lokka massempajang natemeisiki.
Iyanarekko ananalolo urane pekkuga carana? Ripecci’-peccikimi bawang. Alani wae yeppi-eppi’. Tapi
narekko anana makkunrai muttamai tu rinajisi mutawassitah ako anana lolo makkunrai. Sisalah tu,
jakki ripappada padai, detu na mapaccing. Ribolo pah narekko ananalolo makkunrai.
Hadirin yang dimuliakan oleh Allah, iyanae ritujunna pappepaccinna riaseng e najisi yang terdiri dari 3
macam tellu to rupanna carana bissaiwi.
Hadirin yang dimuliakan dan dirahmati Allah SWT, yang kedua iyanaritu appepaccing pole ri
haddase’e. iyasi haddese’e tabbage duai, haddese’ battoa nennia haddese’ biccu. Haddese’ battoa
dipalesangi nasaba cemme, haddese’ biccu dipalesangi nasaba jenne’. Jadi persoalannasi cemmewe,
penting ladde. Anregurutta KH.M.Sanusi Baco, Lc. Ketuana MUI Sul-sel engka na engka nacceramang
I iye persoalan cemme junub di televisie mabbere kuliah subuh. Wettunna nacerita nengkalingai
mahasiswana, lettui rikampus e egapa mahasiswana duppaiwi, “wee gurutta onna subuh e nappanna
sedding engka ceramahna ketinggalan jaman, manengka pakkero dicerita di televisie, cemme aga
dicerita.” Singkat cerita, angka na engka gurutta meloi tama riwajo, leppangi di camba. Nonno na pole
ku otoe ri camba teppa engka meni tomatoa rook-roko’ duppaiwi gurutta nemmaui jarinna “wiii
terimakasih banyak puang, terimakasih banyak nappaki sedding wita tau” hii nappaka muita tau iyaro
riolo muita agaka? Muita tai ka? “bettuanna ada puang onnange subuh e witaki macceramah nappai
wisseng makkada engka pale yaseng e cemme junub na siagani eppoku denengka ucemme junub”
magani kira-kira sempajanna tau bangsana iye? Na akko nakenna haddese battoaki na tomajjenne dena
essah jenne’ta deto na essah sempajangta. Magani kira-kira iyaro? Tapi yako denaissengi loyagai.
Puang Allah Ta’ala denacallai atanna narekko denaissengi. Tapi narekko makkukkue narekko
makkadaki ai ajana rissengi, tarona madde iya bara dewissengi, ooh detosi nawedding. Iyaro de
naissengi makkada demetto nengka nengkalinga. Jaji makkukkue agana kira-kira halangiki na
detomagguru? Degaga ustadz umpamanya, engka televise. Degaga televise, engka radio. Idimani
bawang. Tapi setanna makkukkue maasyaa Allah. Narekko acara macceramah ai palette magatti.
Riputarai radioe kebetulan nagalai sengkang macceramahsi palette ketu dengdut e. iputarai kebetulan
engkai macceramah si ustadz yusuf mansyur ai palecce gatti sappa ketu peterpan e. au magani?
Hadirin yang dimuliakan dan dirahmati oleh Allah, jaji iyena parellu toi diperhatikan riaseng e cemme
junub. Maega ladde to tuh tau melo laddeni botting namuto cemme junub deto nissengi. Na iyaro
cemmewe gampangmi duami bawang rukunna, dua bawang carana. Cemme mappepaccing arega
cemme palesangi haddese battoae. Pa engkatu tellu mpajikengi cemme. Yang pertama narekko purai
siruntu antara suami dengan istri, narekko purai sigessa duae anre piso narekko mappasigessai waji’I
cemme. Yang kedua, narekko massu’I manni’e ajunnukeng toi asenna baik disengaja maupun tidak
disengaja yarega mannippiwi waji’I cemme. Yang ketiga yang wajib mandi junub idi makkunraie
narekko napoleiki darah uleng-puleng, engka tamutta pole ri jepang. Menrei bendera jepang e. rekko
madde’ni topole ta, cemmeki. Yarega addara uteki, puraki memmana’, darah nifas biasa jangkanya 40
hari purata memmana’ biasatu mapaccinni, ko purani ro cemmeni magatti. Wajib cemme, uppanna-
uppanna deto cemme na tomassempajang dena essah sempajang ta. Iyato tu mpajikengi cemme iyanatu
mate, tapi iyaro matewe tenniatu tau mate wajib cemme, tau tuoe wajib cemmei tau mate. Pa jakki tosi
engkai tau mate ta teppa moto lotokka cemme, ah ajjana moto iko. Atinrono bawang, iya’pa cemmeko.
Jaji magi kira-kira passabarenna na ricemme iyero tau matewe? Apa denullei cemme riale. Pa bennengi
nulle cemme riale paddeppereng bawanni wae na cemme riale, ne denullei. Jadi iyanaro onnange,
uppanna-uppanna engka sala seuwanna pole ro onnange riteppu wajib cemme taue. Uppanna-uppanna
de nacemme berarti de nalesang haddese battoana. Pekkogani carana iyaro cemme taue? Engka dua
rukunna, yang pertama annia’ki. Jadi narekko cemmeki namuni sabun aga tapake ako de tamannia’ de
naessa cemmeta. Pekkogai niatna? “ nawaitul gushla lirof’il hadatsil akbari lillaahita’ala” wakkatta
cemme junnu patarakka haddese battoaku karna Puang Allah Ta’ala, jajini ko metto’I rilalenna atitta
appakkoro. Tapi masero lebbi narekko yulle mato mapala’I iyaro arabna nasaba pede megaitu ripugau
namuni sunna’ pede mega to appalanna. Rukun madua iyanaritu ipatassanrana uwaie risininna lanro ale
mappammula cappa gemme lettu cappa palekaje. Jakki umpamanya deyelo ricaki gemmeta pa
kebetulan I umpamanya poleki ribotting e engka mopi sanggul e na engka mopa botting baja, namala
kesempatan I bapakna. Aih nala deceng mawangi-wangi mopi tu emmana laoni mai. Pa riolona ko
degaga botting desedding nengka mumawangi-wangi. Pa katongeng to jetu makkunrai iyaro ko monroi
ko bolae maasyaa Allah iyamatoro dasterna napake massering, iyamatoro dasterna napake mannasu,
iyamatoro dasterna napake mappeco-peco iyamato ro napake matinro. Makkadani lakkainna agaje iye
wewa matinro nasu bale gah agatuh. Jadi tabbuluko naseng pole bottinge laono mai. Waaah sisenna
subuh I denelo mpicaki iyrao kondena pa lompi lokka botting e si matu aii desi nessa cemmeta,
rupannami bawang nabollo. Pa iya konde kammai yako lokkai salon e ta dua jam, de bawang risseng
tanrai ko messui pole salon e pa egapah rupanna warnana pappada lebba ni televise berwarna joppa-
joppa. Narekko cemmeki na denaribolo iyaro konde lebba’ta ro dena essah cemme ta. Ajana iyaro
konde lebba’, sininna lebbo’-lebbo’ yaengkae parellu manengitu ripakennai uwae. Parellu maneng ri
perhatikan narekko cemme wajib ki kalebbo-kalebbona doccilitta, yawana alepa’ta,yawana kanukutta
ipaccingi maneng iyaro. Wajib maneng nakenna uwae. Apa sininna tu lanro ale ajunnukeng maneng.
Iyatu tomatoa rioloe malamu pahanna. Tomatoa rioloe narekko ajuunnukengi denelo majjakka pa kalo
majjakkai rontok gemmena. Ku rontok I gemme’na depa nacemme berarti junnukengi ro. Yarega ko
purai matinro takko moto’I iyaro pertama nasappa ku angkangulunge majjeppe, ko engka napulungi
naiinappa napakessingi singkeru’na nappa nasappeangi okko palapa uttie. Yako cemmei matu nalatoi
pa sininna tu lanro ale ajunnukeng maneng.
Jadi hadirin yang dimuliakan dan dirahmati Allah SWT, jaji iyamiro onnange duae. Perhatikangi
narekko cemmeki pakessingi niatta, yang kedua ipatassanrai uwae ri sininna lanro ale, narekko
mappakkuni essahni cemmeta. Ooh gampang laddemi ple magi pale na marejjing ladde. Iyamitu
namarejjing ako derissengi. Ko rissenni na malemma ladde tu agamae, idi tommi tu biasa sussa sussai
alewe. Macceritai anre gurutta imam al-gazali, engka seddi tau ripannippi nitai tau rilalenna kubburu,
natanai makkada agatu kareba, magi tu na manrasa-rasa laddeki? Wii ajana maddeppe. Magai?
Makkukkue ripappakeika ri Puang Allah Ta’ala waju pole ri apinna ranaka na wii temmaka sessaku.
Aga memeng kajajiang? Engka na engka seuwa wettu haddesekeng battoaka na de ucemme.
Na’udzubillaah tsumma na’udzubillaah.
Gara gara denacemme na ricalla rilalenna kubburu. Tapi sebaliknya, maccerita tosi anregurutta engka
seddie topanrita kebetuulan mannippi. Mannippi mi iye, dema nattungkai. Tapi makkadaki denre
yattungka toggi yaregi deyattungkai yang penting ajunnukeng ki wajib cemme. Lokkai ku onrong waie
wii mattedde waie maccekke. Berusahani peppa’I gangkanna maccolo iyanaro nacemme gangkanna
cedde mate nataro cekke. Tapi lotoi cemme apa napahangi makkada ako dena cemme lebbipih bahayae.
Sisenna wenni pemeng mannippi sih, lokkasih cemme pada-padasi ro nalolongeng si waie temmaka
cekke’na gangkanna cemmesi pemeng gangkanna marenne. Sisenna talingei mengkalingai sadda
“insyaa Allah naselleiwi Puang Allah Ta’ala anrasa-rasammu nasaba pappenyameng. Maasyaa Allah.
Manrasa-rasai bungena tetapi setelah manrasa-rasai lolongeng I janci pole ri Puang Allah Ta’ala
apporio nennia pappenyameng. Narekko Puang Allah Ta’ala na purioki maasyaa Allah, narekko Puang
Allah Ta’ala janciki pappenyameng maasyaa Allah. Sedangkan lagi padatta rupatau janciki
temmattentu tongenna, biasaki mateppe kalamanna monripi natolebbo, apalagi narekko Puang Allah
Ta’ala jangciki. Narekko Puang Allah Ta’ala janciki lebbi pastiwi naiya omporenna matanna essoe
baja. Okkoniro perhatianna ritujunna pappepaccinge. Jadi sebagai kesimpulan untuk sementara nasaba
eloni mompo matanna essoe, subuh pemeng pasi risambungi. Yang pertama onnange pekkoga engkaki
perhatikangi narekko nakennaki najisi baik najisi battoa, tennga, makkutoparo najisi maringeng
engkaki paccingiwi sebagaimana caranya mappepaccing. Yang kedua narekko natujuki haddese battoa
engka laloki paccingi nasaba cemme, rukunna cemme yang pertama niat, yang kedua ipatassanrai waie
lao ri sininna lanro aleta mappammula cappa gemme lettu cappa palekaje. Mammuarei
napabbarakkakeng ki Puang Allah Ta’ala na leppe’ki pole ri appesussana aderenna tomapaccing matu
riesso rimunrinna mappammula rikubburu e lettu matu riesso rimunrinna Puang Allah Ta’ala.
Ada benarnya dari Allah, ada salahnya dari kami manusia biasa yang tak luput dari kesalahan.
Wabillaahi taufiq wassa’aada, wassalaamu’alaikum wr.wb.