Thulu: A Manpha leh Khiatna nei Letsong

LST: John 3:16, Matthew 2:1-2,10-11

Hihbang in hun hoih hunpha ongpia i biak Pasian tung ahi zongh in, Pasian kammal pulaak theih
nading in ong vaihawm sak siate, makai te tung ah zongh ka lungdamna kong pulak masa nuam
hi. Topa’n mimal kim thupha ong pia ta hen. Tunitak ii hun tomno khat la in ii lungngaih ding aa
kong teel Laisiangtho mun nih ong sim nuam ingh.

“Pasian in a Tapa khatbek apiak dongin leitung mite a it hi. Tua Tapa a um mikhempeuh in kisia
lo a, nuntak tawntungna a ngah nading ahi hi.”

“Judah gam Herod kumpi pa a maan lai tak in, Bethlehem khua ah Zeisu a suah khit ciang in,
mipil te in nisuahna gam lam pan in Jerusalem khuapi ah tung uh-a, tulaitak a suak Judah kumpi
pa koi lai takah om hiam? Nisuahna gam lampan ama aksi ka muzo uh hi. Abia dingin ah
kongpai uh hi ci in adong uh hi.”
“Mi pilte in tua aksi a muh uh ciangin nuam mahmah uh a, innsung a lut uhleh, naupang leh
anu Mari amuh uh ciangin a bia uh hi. Amau van a suah khit uh ciangin kham leh paknamtui
leh mirrah apia uh hi.”

I sim khiat Pasian kammal a za, angai mimal kim ading in Topa’n thupha ong piaksak ta hen.

Tu hun, tu kha pen December kha ahih mah bang in Zeisu suah lungdam pawi ibawl hunzongh
ong nai mahmah ta hi. I khua hun zui in tukum Lungdam bawl pen kumdang bang in suakta tak
leh nuamsa tak in kibawl thei lo ding ahih man in ii lungsim sung ah a kigen khia theilo
lungzuanna, thanem na, leh launa lung hihmawhna te in mun ong la kha thei ding hi. A hi zongh
in kumdang bang in suakta tak leh nuamtak in ibawl kha kei phial zongh in tukum Zeisu suah
lungdam bawl hun sung in ilungsum sung ah ii thak suah sak ding, ii mangngilh loh ding, ii
lungngaih ding ahi, den a ii sim khiat Pasian kammal mah lungngai in, tha ilaak khop ding in
kong zawn nuam hi.

Tunitak Laisiangtho tungtawn in ii lungngaih ding kong teel thulu in ahih leh “A Mannei leh
Khiatna nei Letsong” cih ahihi. Christmas hun ahih mah bang in innkuan sung ah ahi zongh in,
lawm leh gual te tawh ahi zongh in, anai a gamla a om ii innkuan pih, lawm leh gual te tawh khat
leh khat letsong kipia in, itna kilak in, Christmas hun ong tun ding bang ii ngak lah phial hi.

Letsong ii cih ciang in midang tungpan ii ngah letsong zongh om a, ei mahmah in midang tungah
ii piak letsong zongh om hi. Tua a hih leh ii ngah letsong te, ahih keileh ii piak letsong te in man
nei takpi leh khiatna anei takpi hiam cih lungngai kik le hang, tam pi pi man napi khiatna leh ki
mangna a om khol lo letsong zongh tampi tak om hi. Bek tham lo in tampipi a mat khol loh hang
in khiatna nei in manpha ii sak mahmah letsong zongh pawl khat om leuleu hi. Pasian in vantung
pan a ong piak Christmas letsong in mannei in khiatna nei ahih leh ama tungah ii piak kik letsong
te in man nei takpi in khiatna a nei hiam cih ii lungngaih ding ong zawn nuam ka hihi. Tua ahih
man in den a ii sim khiat Laisiangtho mun te bulphuh in thu (2) khawng ii lungngaih khop ding a
deih ka hihi.

1. Pasian’ ong piak Letsong (John 3:16)

A masa a ii sim Laisiangtho tungtawn in ii lungngaih ciang in Pasian in ei leitung mite tung ah
ong piak a lian mahma letsong khat om in tua letsong lian pen banghiam icih leh Pasian in a
Tapa neih sung ahi Zeisu leitung mawhnei mite ading in ong piak letsong lianpen mah ahihi.

A tung a ii vawh ii thulu mah tawh tehkaak kik ding hi le hang Pasian kiang pan a ii ngah,
Pasian’ ong piak Letsong in aman nei leh khiatna nei, deihna nei Letsong mah hiam cih ii lung
ngai kik ding hi.

Naa ahih keileh van khat peuh ii manphatna pen tua van in bangzah man, sumtang bangzah pai a
lei cihtawh ciam teh hi hang. Tua ban ah tua van pen kua te’ bawl, bang gam pan in kibawl hiam
cih in zongh thu tampi gen hi. Tua ahih leh Pasian in vantung pan a ong piak letsong in bangzah
taktak man dinghiam? Zeisu ii man phat na, a ma ii liatna leh thupit na teh ding hilehang
tehzawh in om lo ding hi. John 1:1-5 na sung ah nungzui John in Zeisu thu a at na ah “ A kipat cil
in thu a om hi. Thu in Pasian tawh a omkhawm hi. Thu in Pasian ahi hi. A mah in a kipatcil in
Pasian tawh a omkhawm hi. Thu tawh na khempeuh a ki piangsak hi. A ki piangsak khempeuh
lakah, Thu lo in a kipiangsak khat beek a om kei hi. A masung ah nuntakna a om hi. Tua
nuntakna in leitung mite ading khuavak ahi hi. Tua khuavak in khuamial lakah taang a,
khuamial in a mah a zozo kei hi.” ci-in na gelh hi. Thu tawh na khempeuh kipiangsak hi. A ki
piangsak khempeuh lakah, Thu lo in a ki piangsak khat beek a om kei hi ci hi. Tua ahih leh
Pasian ong piak letsong ahi Zeisu ii aman phat na zah agen ding hile hang gen khuan na ngawn
om nawn lo hi. Bang hang hiam cih leh na khempeuh a piangsak PA ahih man hi. Na khempeuh
ii kipat na, a piangsak pa leh a nei pa in ei te tung a ong ki pia Letsong lian penpen ahihi. A ma ii
manphatna, aman zah gending cile hang patna vet om lo ding hi.

Tua zah tak a manpha ahi Pasian ongpiak letsong in khiatna (ahkl) deihna anei takpi mah hiam
cih lungngai to lai ni. A tamman na khempeuh in khiatna/ ki mang na nei gai khol lo hi. A
zenzen in kumtam khin nupi, papi tungkhat ah Christmas letsong ci in a tam man mahmah
naupang kimawlna khat va pia le teh a tam mat mahmah hang a ma ading in a khiatna nei khol
lo ding hi.

A hi zongh in Pasian in vantung pan a ong piak ii letsong lianpen ahi Zeisu ong kipiak na ahang
om a, tua letsong in deihna leh khiatna nei hi. Tua vantung pan a Pa Pasian ong piak letsong in
Pasian leh mawhnei mi te ki lem kik sak hi. Tua lehsong in leitung mi, mawh nei mi nang leh kei
ii ki lawm man ahi lo, hanciam zawhman ahilo, hoihna leh ki cing man ahilo, hehpihna hang
bekbek in mawhnei mi, mawhna thaman sihna a thuak ding mi kim lai alian pen Pasian tapa,
tanu ong suak sak hi.

Pasian in tua letsong ong piakna khiatna anei mah hiam ii cih leh nei mah hi. Tua ong piak
letsong lianpen ahi Zeisu hang in Pasian ta te ii suak thei hi. A deihna leh a khaitna kician
mahmah hi. Tua bang in itna sangpen tawh ong it in a Tapa neihsung Zeisu, leitung mite’
mawhna pan gum khia ding in ong pia i biak Pasian in minthan na leh pahtawina tang tawn
tung ta hen. Thu nihna ki kum to lai ni.

2. Pasian tung i piak Letsong (Matthew 2:10-11)

Den a isim Laisiangtho nihna ong sim kik nuam ingh. “Mipil te in nisuahna gam lam pan in
Jerusalem khuapi ah tung uh-a, tulaitak a suak Judah kumpi pa koi lai takah om hiam?
Nisuahna gam lampan ama aksi ka muzo uh hi. Abia dingin ah kongpai uh hi ci in adong uh
hi.Mi pilte in tua aksi a muh uh ciangin nuam mahmah uh a, innsung a lut uhleh, naupang leh
anu Mari amuh uh ciangin a bia uh hi. Amau van a suah khit uh ciangin kham leh paknamtui
leh mirrah apia uh hi.”

I sim Laisiangtho sungah nisuahna lampan a mipil te in a suak thak kumpi ahi Zeisu abia ding in
ongpai uh hi cih kimu hi. Aban ah simsuk suak le hang abia ding in a pai kawm in a suak Zeisu
tungah letsong nam 3 pia uh cih kimu thei hi. Tua letsong nam 3 te in khamh, paknamtui leh
mirrah (pak namtui kha) pia uh hi. A tunga ii vawh thulu tawh kituak in lungngai kik dih hi. Hih
mipil te in Zeisu apiak uh letsong te in manpha (man nei) leh khiatna a nei tak pi mah hiam? Nei
takpi mah hi.

Khat veivei ulian khat peuh ahih keileh ei tawh kisai mi khat peuh letsong ii piak ciang in
piakloh ding kilawm sam kei e ci in a kilawmsakna in ii piak peuh om thei hi. Ahi zongh in hih
mipil te in a Zeisu apiak uh letsong te pen a kilawmsak na in a keng uh, ahih keileh apaina lampi
ah apai kawm in a lei tawm uh hilo dinghi. Kiging sa in apuak uh letsong ahih lam kilangh hi.
Bang hanghiam cih leh hih a piak letsong te pen deih hun hun in mun khempeuh ah baih no tak
in ki ngah ziau thei nate hilo hi. Mipil te’ piak letsong nam 3 ahi khamh, paknamtui leh mirrah
te’ bang hang in manpha hiam ii cihleh a ngah nading haksa, hun tampi leh tha tampi bei hi.
Banghang in manpha hiam icih leh a kingah theih nading haksa ahih man hi. Hih mipil te in a
piak uh letsong te pen Laisiangtho hun lai bek hilo tu hun mahmah in zongh man nei hi. Tam pi
man hi. Mi khempeuh in nei zolo hi. Tua ahih man in mipil te’ piak letsong te in mannei ahih
keileh manpha takpi mah hi. Tua aman nei, a manpha letsong te in khiatna ahih keileh khiatna
anei takpi mah hiam? Nei mah hi. A tom kim ding in kikum to lai ni.

Thuciamlui hun hi taleh thuciamthak hun te ah hih mipil te’ piak letsong te a kizatna leh a
khiatna, adeihna pen kimtak in kimu thei hi.
Letsong masa ahi Khamh ahih leh asuak Zeisu pen kumpi taktak ahih na kipsakna hi. Tuni
iimuak ongsuak Zeisu pen kumpi taktak hi. Amah pen kumpi te’ Kumpi, to te’ Topa hi. Zeisu
kumpi taktak ahih na koici bang in kilang hiam? Mipil te in azuih uh aksi pi pen Judah kumpi pa’
aksi hi cih den a ii sim Laisiangtho mun ah kimu thei hi. Kumpi hihna pen Zeisu ii hihna taktak
hi. A suahlai in Kumpi mah in ong suak hi. Ei te’ mawhna thaman tang in sihna ong thuak ciang
in zongh a kikhai na singlamteh tungah mawhsakna lai (banghang in thahna thuak) cih a
kigelhna tung ah Hih pa in Judah te’ Kumpi pa Jesu hi ci in kisuang hi (Matthew 27:37). Anih
veina ong pai kik ciang in zongh Kumpi mah in ong pai kik ding pa hi. Tua bek tham lo in Zeisu
pen atawntung in Kumpi te’ Kumpi, To te’ Topa in mang tawntung dinghi. Zeisu pen kumpi in
suak a, kumpi in si in, kumpi in ong pai kik ding leh a tawntung in amang tawntung ding Kumpi
pa ahi hi.
Kumpi ahih man in ukna, thuneihna, vangliatna khempeuh ama aa ahi hi. Tua ahih man in mipil
te’ piak letsong masa ahi khamh in Zeisu kumpi ahih na etsakna ahih mah bang in tu ni in nang
leh kei in zongh ii nuntakna te tua kumpi Zeisu tungah thuneihna, ukna khempeuh ii piatak pi
hiam? Na nuntakna ah nang deihna nial in Zeisu deihna kicing sak a, tua Zeisu na nuntakna ah
ukna leh thuneihna na piak takpi leh mipil te’ piak khamh tawh abia, khamh letsong apia na
hipah hi.

Letsong nihna ahi Paaknamtui in Zeisu pen Siampi lian pen taktak hi cih etsakna ahi hi.
Tuaban ah hih Paaknamtui in Zeisu pen Pasian ahihna etsakna zongh ahihi. Laisiangtho
sungah siampi nasep lianpen in ahih leh mipi te’ tang in Pasian maai ah ading, taang mi ahihi.
Tua ban ah siampi nasep in biakpiakna tawh kisai nasep te vaipuak in nei uh hi. Hebrew
Laisiantho at pen in siampi lian Zeisu ong sepsak sa, a zawhsa nasepna hang leh a ma sisan hang
in Pasian mai ah hangsan tak in ii din theih nathu Hebrew 10:19-22 na sungah hihbang in na gelh
hi. “Tua ahih ciang in ute naute aw, Zeisu’ pumpi ahi dalna puantawh tua Topa in eite ading a
hon, nuntakna lampi thak ah eite in Mun Siangtho Bel sungah Zeisu’ si suang in ii tum nading
launa omlo a, Pasian innpi a-uk siampi uk pa om ahih ciang in, eite in lungsim kisuanna a om
loh nading in kitheh a, tui siangtho tawh ii pumpi ii sil khit ciang in, up khialhna om lo, upna kip
in dikna tawh adim lungsim nei in Pasian kiang ah nai ni.” ci in na gelh hi. A tom in ci le hang,
siampi lianpen a hi Zeisu sisan suang in Pasian kiang naai in, a mah tawh kikhawl khawm in, ki
ho lim in, hunla in ii om sial in mipil te in Paaknam tui letsong Zeisu tung ah apiak mah bang in
Pasian maai ah namtui, asaan tak paaknamtui letsong apia ihi hi. Ki suangna omlo in Zeisu hang
in Pa Pasian tawh naitak ki kholh khopna in Pasian tunga ii piak paaknamtui letsong hipah hi.

Ahi zongh in alang khat ah, siampi lianpi ahi Zeisu ong sepsaksa, a kizo khin ama ong sepsak
nate suanglo in, ahih keileh manglo in ei mah ii hanciamna, hahkatna, mihing ii hihtheihna leh
thatang suangna tawh ii sep na khempeuh pen Pasian saan ahi Zeisu ii sepna ii pualam ahih man
in tua te khempeuh in Pasian lungkim saklo bek tham lo in hehsak in thukhenna tawh kizom lai
ding hi. Tua ahih man in Zeisu a kihel lo, Zeisu a ki suang lo ii sepna khempeuh te nusia in
siampi lian Zeisu ii ong sepsak sa tungah ki nga in Pasian mai ah mai ngal tak in, dik kisakna
angah, a ma misiang tho, ama tate bang in ii nuntak ding ahi hi.

Athumna leh atawpna letsong ahi Mirrah letsong in Zeisu mi bang in ong piang in
gentheihna leh sihna athuakna ding ahih na etsak na hi. Hih Mirrah a kici paaknamtui kha pen
ling anei singkung nam khat pan in kingah hi a adiakdiak in Zeisu ii gimthuakna, gen theihna,
leh mihing a ongpiang in a si ding in ong paina thu etsakna zongh hipah hi. Hih letsong in Zeisu
leitung ahong paina a thu teltak in ong lak hi. Zeisu leitung mawhnei mi te’ tang ding in ong
sihna in mawhmai theih nading

Mipil te in letsong dang apiak ma un a lungsim uh pia khin hi. Nang zongh piakding
bangmah na neih loh hang na lungsim pia thei hi teh.