Papel ng Hiraya

Ni Gladys Faith Roxas

“Ni-review ko naman ito… Bakit hindi ko maalala?”

Kamay sa isang gilid ng ulo. Nakapikit. Tinatahak ang isip at naghahanap ng sagot. Pilit
pinipiga ang mga huling inaral. Papel at lapis—kung saan nakataya ang mga mithiin. Mga
mithiing bubuo ng kinabukasan. Sa paglipas ng panahon, ating mapagtatanto na tayo ay hindi na
mga musmos… tayo ay tumatanda na at nadadagdagan ang pasaning responsibilidad.

Panahon na ng paghahanda para sa mga nalalapit na entrance exams, karamihan sa mga

naghahanda para rito ay ang mga tutungtong ng ika-11 baitang at kolehiyo. Pinahihintulutan sa
mga eskuwelahan at unibersidad ang pagkuha ng entrance exams upang ang mga estudyante ay
makapasok sa ninanais na paaralan. Hindi katanggi-tangging nakakakaba ang pagkakataong ito
ngunit dapat nating isantabi ang bagabag at isaalang-alang ang kakayahan at sigasig na mag-aral
nang mabuti at ipasa ang mga pagsusulit na ito. Kung ikaw ay isa sa mga naghahanda para sa
entrance exams, natitiyak akong para sa iyo ang mga tip na ito!

Gumawa ng plano sa pag-aaral. Alamin ang saklaw ng pagsusulit at gumawa ng study

plan. Dapat ding isaalang-alang ang oras sa pag-aaral kaya’t gumawa ng iskedyul upang
mabalanse ang oras sa iba’t ibang gawain.

Tiyakin ang iyong mga kalakasan at kahinaan. Tasahin ang saklaw ng pagsusulit at
hati-hatiin ang mga asignatura batay sa iyong kalakasan at kahinaan. Maglaan ng oras at punyagi
sa mga asignaturang hindi mo gaanong kapa ngunit huwag kaligtaan ang mga asignaturang tiyak
mo na.

Gumamit ng mga makabuluhang aklat. Hindi mo kailangang basahin ang iyong mga
aklat noong unang baiting. Mayroong mga aklat na mas bago at mas buod ang mga aralin,
mapapadali nito ang iyong pag-aaral. Huwag ding kalimutan aralin ang iyong mga tala noon.

Huwag magkabisa, intindihin lamang nang mabuti. Hindi pagkakabisa ang

pinakatiyak na paraan upang matandaan ang mga inaral. Ang nararapat mong gawin ay intindihin
at aralin nang mabuti ang leksyon.

Sagutan ang mga nakaraang pagsusulit. Maaaring makatulong ang pagsasagot sa

nagdaang mga pagsusulit. Magsisilbi itong reviewer at susubukin ang iyong kaalamn. Huwag
ding kalimutan na sagutin ito sa limitadong oras.

Kumain nang masusustansyang pagkain. Pinaka-esensiyal ang pagkain ng mga prutas

at gulay na napupuno ng sustansya. Mas gaganahan tayong mag-aral kung may laman ang utak
natin ng sustansya.

Magsanay nang magsanay. Mahigit kalahati ng paghahanda para sa entrance exams ay

ang pagsasanay. Pagkatpos magbasa at magtala, subukang sagutan muli ang mga pagsusulit
bilang pagsasanay. Maaari ring mag-imbita ng mga kaibigan upang sama-sama kayong mag-aral,
kumbaga ay isang group study!

Ilagay sa tamang kondisyon ang sarili. Bago magsagot para sa pagsusulit, tiyaking
handa ang katawan, mapa-pisikal, mental, at emosyonal. Sabihin sa sarili na “Kaya ko ‘to!”
araw-araw upang mapagaan ang iyong karamdaman.

Habang nagsasagot naman ng pagsusulit, huwag mataranta, huminga lamang nang

malalim. Ang pagkataranta ay makakaantala sa iyong pagsasagot. Gumamit ng paraan ng
eliminasyon, kung sa iyong palagay ay hindi tiyak ang isang sagot, tanggalin ito sa iyong
pagpipilian, sundin lamang ang edukadong hula o ang sa iyong palagay ay ang tamang sagot sa
katanungan. Basahin din nang mabuti ang mga katanungan, huwag agad magsasagot kung unang
tatlong salita pa lamang ang iyong nababasa, hangga’t maaari ay basahin nang dalawang beses
ang tanong. Pamahalaan nang maayos ang iyong oras, pinakamahalaga ang oras dahil ito ay
tumatakbo, at sa pagtakbo nito ay tumatakbo rin ang mga oportunidad natin.

Matapos sagutan ang pagsusulit, huwag mo itong alalahanin nang lubos. Iwasang
pagtuunan ng pansin ang mga negatibong kaisipan. Matiyagang hintayin ang resulta, ilang oras,
araw, linggo, at buwan pa ang lilipas. Atin lamang tandaan na ginawa natin ang lahat ng
makakaya. Magsisilbi tayong kabataang may kusang-palo.

Lumilipas ang panahon, umiinog ang mundo, ating mapagtatanto na bumibigat na ang
responsibilidad na inaaatang sa atin. Ang tanging tumatakbo sa isip ay makapag-aral at
makapagtrabaho ngunit ating itaga sa bato na i-ayon natin sa ating kakayahan at silakbo ng
damdamin ang mga desisyong gagawin. Ang desisyon sa kasalukuyan ay lubhang makaaapekto
sa kinabukasan. Ikaw, ako, tayo, ay puno ng hiraya. Hiraya—mga mithiing nais makamtan. At sa
papel na sasagutan ay nakasalalay ang hiraya—ang papel ng hiraya.