"Kultura: Pamana ng Nakaraan, Regalo ng Kasalukuyan at Buhay ng Kinabukasan"
na likha ni Pat Villafuerte.
Ang tulang ito ay isinulat ni G. Pat V. Villafuerte na naglalaman ng kanyang pananaw sa
papel na ginagampanan ng kultura bilang isang pamana na kailanma'y hindi mawawala sa buhay ng isang tao. Ipaliwanag niya na sa ating bawat paghakbang, mayroon tayong patutunguhan o mararating. Lahat ng bagay na ating tinatahak, dala-dala natin ang kulturang atin. Anumang proseso o propesyon ang gagawin, patuloy na mamumukadkad ang mayamang kulturang ipinamana. Marami mang digmaan, pagod at pawis ang napagdaanan, patuloy na mamamayagpag sa ating puso't diwa ang kahalagahan at kagandang taglay nito. Ang kulturang ipinamana ng nakaraan ay siyang bunga ng ating paghakbang.
Sa ikalawang saknong, ito ay naglalaman ng kahalagahan ng kultura bilang biyaya sa
kasalukuyan. Tayo ay sinubok ng panahon, maraming panibagong lahi at pagkakakilanlan ang umusbong subalit ang kultura ay patuloy na nagtutulay tungo sa ating pagkakaisa. Ipinaliwanag niya na anumang hamon na ating haharapin sa buhay ay hindi kailanman mabubura sa ating puso't isipan ang kagandahan ng kulturang ipinamana. Sa simpleng pagsamba't prusisyon, ito ay kulturang sumasalamin sa pasko't pistang bayan na patuloy nating sinusunod at isinasakatuparan. Mananataling gabay ang kultura sa ating pagkakaisa at patuloy na uunlad at uusbong ang kulturang pamana sa kasalukuyan.
Ang huling saknong ay naglalarawan sa kultura bilang buhay ng kinabukasan. Inihabilin ng
may akda na ang kulturang mana ng nakaraan at regalo ng kasalukuyan ay karapat-dapat na buhayin ng kinabukasan na syang mananatiling repleksyon ng kabutihan at kagandahang taglay ng kultura. Patuloy na ipamalas ang pagiging magalang sa bata't matanda, babae't may kapansanan at ipagpatuloy ang nasimulang ugali ng pagbabayanihan at pagtutulungan. Paunlarin ang kulturang nasimulan upang makilala ang ating lahi sa pagiging magiting, kapuri-puri at marangal.