Pagtanggap sa mga LGBT

Nararapat na ligtas na lugar para sa lahat ang mga paaralan. Pero sa Pilipinas, madalas na
dumadanas ng bullying, diskriminasyon, kawalan ng akses sa impormasyon tungkol sa LGBT, at sa ibang
kaso, may pisikal at sexual na pananakit sa eskuwelahan ang mga estudyanteng lesbian, gay, bisexual, at
transgender (LGBT).

Nitong mga nakaraang taon, kinilala ng mga mambabatas at administrador ng eskuwelahan sa

Pilipinas na seryosong problema ang bullying ng kabataang LGBT, at gumawa ng mga interbensiyon
upang tugunan ito. Noong 2012, ang Kagawaran ng Edukasyon (Department of Education o DepEd), na
namamahala sa elementarya at high school, ay nagsabatas ng Child Protection Policy na layuning
tumugon sa bullying at diskriminasyon sa eskuwelahan, kasama na ang ayon sa oryentasyong sexual at
identidad sa kasarian ng mga bata.

Ngunit itong mga patakaran, maganda man sa papel, ay hindi naipapatupad nang husto. Sa
kawalan ng epektibong implementasyon at pagsubaybay, maraming kabataang LGBT ang patuloy na
nakakaranas ng bullying at harassment sa paaralan. Ang masamang trato sa kanila ng mga kaedad at
guro ay pinapalubha pa ng patakarang mapagbukod na nagpapababa at dumedehado sa mga
estudyanteng LGBT, pati na rin ang kakulangan ng impormasyon at resources tungkol sa isyung LGBT sa
mga eskuwelahan.

Ang pagmamaltratong kinakaharap ng mga estudyante sa paaralan ay napapalubha ng

patakaran at gawaing mapanghusgang nagpupuwera sa kanilang lumahok sa buhay sa eskuwelahan.
Nagdidikta ang mga paaralan ng mahigpit na pamantayang pangkasarian sa mga estudyante sa
maraming paraan—tulad ng makakasariang uniporme o pananamit, pagbabawal sa haba ng buhok,
makakasariang C.R., klase at aktibidad na magkaiba ang para sa babae at lalaki, at pagmanman sa
pagkakaibigan at pakikipagrelasyon ng parehong kasarian.

Kung titingnan ang mga isyung ito sa perspektibo ng aming paaralan, mas konti ang record ng
bullying at diskriminasyon ukol sa LGBT. Malaya ang mga estudyanteng ipakita kung ano sila habang
sinusunod ang ipinapatupad na pamantayang pangkasuotan sa loob ng paaralan. Samakatuwid
naipapakita lamang na tanggap at nirerespeto sa loob ng kampus ang mga miyembro ng LGBT.

Kung tutuosin, madalas na yaong mga maraming talentong ipinapakita ay mga miyembro ng
LGBT. Sila ang nangunguna sa mga magagaling sumayaw, kumanta at maging sa larangan ng fashion at
pagpapaganda. Walang rason upang ilayo natin ang ating mga sarili sa kanila.

Hindi maiiwasan na may pagkakataon na nakakaranas ng hindi kaaya-ayang pakiramdam ang

mga miyembro sa LGBT. Halimbawa nalang ang pagtawag ng “bayot” o “bakla” bilang palayaw o di
kaya’y “tomboy”, “tibo” o “double blade” para sa mga bisexual. Nakakaramdam sila ng diskriminasyon
na ipinapakitang sila ay naiiba.

Sa kabila ng mga maling kuro-kuro, kapag pinapahalagahan natin ang ating mga sarili, lahat ng
mga balang itatapon sa atin ay hindi makakapinsala sapagkat nakasuot na tayo ng panangga.
Masasaktan man ngunit hindi nito matitinag ang pader na ginawa nating panangga. Isa na rito sa LNNHS,
na kung saan may mga gays na nakasuot ng make up at mga lesbians na may gupit panlalaki na may
palagay ang loob na pumasok sa loob ng paaralan.

Sa kabila ng malawakang pagtanggap sa mga miyembro ng LGBT, nararapat pa ring siguraduhin

ang kanilang kaligtasan laban sa mga di kaaya-ayang karanasan sa loob ng paaralan. Nararapat na
pagtibayin ang mga patakarang kontra-bullying at kontra-diskriminasyong magsasama sa oryentasyong
sexual at identidad sa kasarian, na magpapaliwanag sa mga estudyante kung paano magsusumbong ng
mga insidente ng bullying, at tukuyin talaga kung ano ang pananagutan kapag nang-bully.

Kilala ang Pilipinas sa isa sa mga bansang sumusuporta sa mga miyembro ng LGBT. Napatunayan
na ito ng Mataas na Paaralan ng Las Nieves. Kung nagagawa ito ng aming paaralan, bakit hindi sa inyo?