Ժամանակակից գիտության մեջ ազգերի ձևավորման և ժառանգորդության հարցերի
վերաբերյալ կա երկու հիմնական մոտեցում` «պրիմորդիալիստական» և
«կոնստրուկտիվիստական» (կամ «մոդեռնիստական»): Պրիմորդիալիստական մոտեցումը ազգերի արմատները հասցնում է մինչև հազարամյակների խորքերը, իսկ կոնստրուկտիվիստականը՝ դիտում է ազգերին որպես նոր դարաշրջանին բնորոշ երևույթներ:
Հին հայերենի ազգ բառի մեզ հետաքրքրող նշանակությունները կենտրոնանում են մեկ
անձից ձագման վրա՝ «մեկ նահապետից սերված ժողովուրդ՝ մարդիկ» իմաստով: Հատկանշական է, որ ավանդաբար ազգ է կոչվել հենց մեկ նահապետից սերող հայկական ավանդական նահապետական ընտանիքը:
Հայերենը հնդեվրոպական լեզու է: Հնդեվրոպական մայր լեզուն պետք է խոսվեր որոշակի
դարաշրջանում, մի ինչ-որ տարածքում` «նախահայրենիքում»: Պետք է նշել, որ հնդեվրոպական հայրենիքի տեղադրության խնդիրը դոռևս միարժեք լուծում չունի: Ներկայումս առավել ընդունված են հնդեվրոպական նախահայրենիքի տեղայնացման երկու տեսակետներ՝ պոնտկասպյան և կենտրոնաանատոլիական: Հնդեվրոպացիների հայաստանյան տեղայնացման վարկածն առաջ է քաշվել խորհրդային գիտնականների՝ Թամազ Գամկրելիձեի և Վյաչեսլավ Իվանովի կողմից, որը երբեք լայն ընդունելիություն չի գտել արևմուտքում (ի միջի այլոց, ըստ Գամկրելիձեի և Իվանովի, վաղնջահայերը ձևավորվել են իրենց առաջարկած նախահայրենիքից արևմուտք ընկած տարածքներում, հետո միայն անցել արևելք՝ Հայկական լեռնաշխարհ): Այժմ լայնորեն տարածված է Մարիա Գիմբուտասի կողմից 1958թ. առաջ քաշված «կուրգանային» նախահայրենիքի տեսությունը (պոնտկասպյան), ըստ որի՝ նախնական հնդեվրոպական հասարակությունը ծագել է մերձվոլգյան տափաստաններում: Այս տեսությունը մինչև այժմ ունի առավել շատ հեղիանակավոր կողմնակիցներ:
Պատմագիտության մեջ «եկվոր» և «տեղաբնիկ» տերմինների օգտագործումը գիտական չէ:
Մարդկության պատմությունը սկսվել է Աֆրիկայում, մոտ 5 միլիոն տարի առաջ, իսկ ժամանակակից մարդու տեսակը՝ Homo sapiens-ը կամ բանական մարդը, համաձայն գիտության կողմից ընդունված տեսակետի՝ Աֆրիկա մայրցամաքից Եվրասիա է անցել մոտ 70 000 տարի առաջ և հետևաբար բոլոր ազգերը «եկվոր» են: