FIRE PREVENTION MONTH 2023

Ammoyo kadi a ti bulan ti Marso iti tunggal tawen ket isu ti naituding a tiempo tapno obserbaran
ti publiko ti makunkuna a Fire Prevention Month. Babaen iti Proklamasyon Bilang 115-A a
pinirmaan daydi sigud a president Ferdinand E Marcos Sr., naiyetnag ti nadakamat a linteg tapno
maisuro dagiti tattao iti umno a pamuspusan no adda rumsua nga uram ken tapno maipalagip
kadakuada ti importansiya ti kanayon a panagannad, panagridam ken panagpanunot.
Manipud iti San Juan Fire Station nga idadauluan ni SINSP EDGAR C CULATON, Municipal
Fire Marshal, umaymi ipalagip dagiti rumbeng nga aramiden tapno maliklikan ti uram, agsipud
pay ta kaadwan nga uram ket rumrumsua iti daytoy a bulan.
Anya kadi dagiti rumbeng nga aramiden?
1. No kaya ti bulsa, mangikabit iti smoke alarm iti tunggal kadsaaran ti pagtaengan,
mangisagana met iti fire extinguisher ken siguradwen met ti kaadda ti suplay ti danum
tapno adda nakasagana a maaramat in kaso nga rumsua ti apoy.
2. Planuen ti kasayaatan a ruta a rumwar manipud iti maur-uram a pagtaengan, isuro daytoy
kadagiti myembero ti pamilya, ken sagpaminsan nga aramiden tapno saan a malipatan.
3. Kanayon a kitaen dagiti waya ti kuryente ken pagsaksakan a nakakabit iti uneg ti
pagtaengan, ket siguden a sukatan no man bilang adda dagiti alanganen a pasetna.
4. Liklikan a mapunno dagiti pagsaksakan wenno extensions ta mabalin daytoy a
pagrugyanan ti uram.
5. Iyadayo dagiti lighters wenno posporo kadagiti lugar a magaw-at dagiti ubbing tapno
maliklikan ti panangabalbalayda kadagitoy.
6. No agusar iti kandila, iyadayo daytoy kadagiti banbanag a nalaka a mapuoran kas iti
kurtina ken pappapel. Siguradwen nga iddepen dagitoy sakbay a maturog wenno
rumwar iti pagtaengan.
7. Bantayan dagiti malutluto a taraon.
8. No met rumwar manipud iti pagtaengan, siguradwen met nga awanen ti nakasaksak
nga alikamen, ken nakaserran dagiti tangke ti LPG.
9. Kangrunaanna, i-save ti numero ti San Juan Fire Station kadagiti celphones tapno
sigud a makadawat iti tulong in kaso a rumsua ti apoy.

Kas tay kunada, nalaklaka ti matakawan ngem ti mauraman. Awan ti naragsak a mauraman, isu a
tapno nasaysayaat ti panagbiag, kanayon nga agannad.

HAPPY FIRE PREVENTION MONTH 2023!