Ṭhatnain Sual Chu Ngam Zawk Rawh

(Rom 12:20-21)

Rev. Dr. Vanlalmalsawma

Thuthlung Hlui dan chuan, “Miin a ṭhenawm a tihhmelhem chuan a tih ang tak chuan a
chungah tih ve tur a ni; ruh tliak aiah ruh tliak, mit aiah mit, ha aiah ha; mi a tihhmelhem angin a
chungah pawh tih ve tur a ni,” a ti a (Lev. 24:19-20). Nimahsela, Thuthlung Thar dan erawh chuan,
“Ṭhatnain sual chu ngam zawk rawh,” a ti a (Rom 12:21). Hetah hian Sinai tlang dan leh Kalvari
tlang dan danglamna a lang chiang hle. Sual, sual vêka thungrulh chuan buaina a tikiang lo va, a
tipung zawk ṭhin. Tin, sual leh sual an inbeih chuan a hneh zawk a awm theih loh; sual leh ṭha an
inbeih erawh chuan ṭhain a hneh zel. Thim chu engin a hneh a, zan chu chhunin, dik lohna chu
diknain; chutiang zelin sual chu ṭhain a hneh a ni.

Ṭum khat pawh Abraham Lincoln-a chu America President nihna chuh tura a campaign
laiin Stanton-a an tih, mi pakhat hian a dodal nasa hle a. Stanton-a rilru chu Abraham Lincoln-a
huatna hlirin a khat a. Lincoln-a tihmualpho tumin a châng reng a, hun remchang a neih apiangin
mipui hmaah a timualpho ṭhin. Nimahsela, Abraham Lincoln-a chu President-ah thlan tlin a ni ta
tho va. Tichuan, Lincoln-a chuan a cabinet member tur a thlang chhuak a, nihna chi hrang hrang a
bel hlawm a. A tawp berah chuan nihna pawimawh ber, ral beihna lama mawhphurhna sang ber
(Secretary of War) hna thawk turin amah haw em emtu Stanton-a chu a thlang ta a. A ṭhuihhruaiten
mak an ti hle a, “I tisual let der a ni, ani hi chu i hmelma lian ber a ni a, a tichhe vek ang che,” an
ti a. Lincoln-a chuan, “He pa hian min hua tih ka hria e, mahse ani aia ṭha he dinhmun luah thei
kan ramah an awm lo, chuvangin ka thlang mai a ni,” a ti a. A hmelma lian ber pawh nihna sang
ber a hlan thei a, chu chuan rah ṭha tak a chhuah a, America ram mipuite rilru puthmang a siam
ṭha nasa hle a ni.
Miten kan chungah thil ṭha lo tak ti mah se, thil ṭhain kan rul let tur a ni. Chu chu thil harsa
tak angin lang mah se, ringtute chuan Pathian chakna rinchhanin kan ti thei a ni. Sual, sual veka
thungrulh chu mihringte ril rem zawng tak a ni a. Mahse, kan hmelmate chu an rilru nen lama kan
hneh loh chuan taksa hnehna chauh chu hnehna tluantling a ni ngai lo. Taksa inhneh aiin rilru
inhneh a pawimawh zawk. Abraham Lincoln-a pawhin Stanton-a kha ngaihdamna leh ṭhatnain a
rilru a hneh a, Lincoln-a hmelma lo ni tawh ṭhin mah se, a tana sipai rinawm ber a lo ni ta a.
Stanton-a chuan Lincoln-a ruang bulah dingin hetiang hian thlahna thu a sawi a, “Khawvel tung
chhova kal hring fate zingah i ropui ber e, tunah chuan hun zawng zawng neitu i lo ni ta e,” tiin.
Lincoln-a chuan a hmelma lian ber pawh a tana rinawm berah a siam thei a, hei hi a ni ṭhatnaa sual
ngam awmzia chu. Kan hmelmate sualna chu thungrul mai lo va, kan ngaihdam a, duhsakna kan
hlan chuan ṭhatnain sual kan ngam tihna a ni.
America rama mi dum leh mi ngo inthliarna a nat em em hun lai khan ṭum khat chu mi
dumho hlir telna, basket ball team pakhat chuanna motor chu Southern Highway-ah a accident
hlauh va. An zinga pathumte chuan hliam na tak an tuar a. Damlo phur motor (Ambulance) an ko
nghal a, rei lovah a lo thleng mai a. Nimahsela, a khalhtu chu mi ngo a nih avangin, “Mi dum ka
phur ngai lo,” tiin a kalsan ta mai a. An mangang hle a! Chutih lai tak chuan car pakhat a rawn tlan
a, an lo phar ding thei hlauh va. Chu car chuan damdawi in an pan nghal vang vang a. Tichuan,
damdawi in hnai ber an han thleng ta a, luhpui nghal an tum mek laiin anmahni lo dawngsawngtu
Nurse-te chuan, “He damdawi inah mi dum kan enkawl thei lo,” an lo ti bul hmak a! Beidawng
takin an tlan chhuak leh ta a, mi dum enkawl theihna damdawi in an thlen hmain an zinga pakhat
chu a lo thi der tawh a. Tin, a dang pahnihte pawh minute 30 hnuah pakhat, minute 50 hnuah a
dang pakhat a thi leh a. An pathumin an chhan hman ta lo!
Chutiang khawp chuan mi dumhovin harsatna an lo tawk a. Tun hma phei chuan, mi ngo
chauh kai theihna school te, mi ngo chauh inkhawm theihna Biak In te, mi ngo chauh zun theihna
zun in te, mi ngo chauh luh theihna thingpui dawr te, mi ngo chauh chuan theihna rel (train) te a
lo awm a. Hetih hun lai hian mi ngote chuan mi dum thluak chu mi ngo thluak aiin a te deuhah an
ngai hial a. Tin, mi dumte chu mi ngote aia hnuaihnung zawka siamah an ngai nghet hle bawk.
Chutianga hmuhsit leh endawng ni mah se, mi dumte hnam pa leh hruaitu ropui Martin Luther
King Jr. chuan mi ngote hi kan haw tur a ni lo va, mi dum an huatna thinlung zawk hi kan haw tur
a ni. Mi dumte an hmuh dan dik lo tak mai hi an pi leh pute atanga an rochun a ni a, an sual vang
hrim hrima mi dumte hmusit an ni lo; an thlahtute aṭanga ngaih dan dik lo tak an rochun zel vang
zawk a ni. Chuvangin, anmahni hi kan haw tur a ni lo va, phuba kan la tur a ni hek lo. Anmahni
bawih bettu, an ngaih dan dik lo tak lak ata an zalen theih nan kan ṭanpui zawk tur a ni, a ti a. Hei
hi ṭhatnaa sual hneh dan chi khat a ni. Miten kan chunga an thil tihsual chhan zir chiang hmasa zet
ila, chumi hnuah an tihsual tawh loh nan theih tawpin ṭanpui ila. Chu chu ṭhatnaa sual hneh dan
pawimawh tak a ni bawk âwm e.
Aw le, Lal Isuan amah khengbettute chu, “Ka pa, anni hi ngaidam rawh; an thiltih hi an
hre lo a nih hi,” a ti a (Lk. 23:34). Amah khengbettute leh ‘khengbet rawh’ tia autute chu an
nihphung rengah mi sual an nih lohzia Lal Isuan a hmu chiang hle a, an hriat lohna (mitdelna)
avang chauhva sual khawih an nihzia a hmu fiah hle a ni. Lal Isua kha Pathian Fapa a ni tih hria
se chuan an khengbet hauh lo vang. An hriat loh tlat avang leh chung lam thupek zawma khengbet
mai an nih avangin Isuan thiam loh a chantir lo va, ngaihdam a dilsak zawk a ni. Chutiang zelin,
kan chunga thil tisualtute hian an hriat loh vangin an tisual tlangpui a. Ngun taka kan ngaihtuah
chuan ngaih dan dik lo emaw thil hriat sual palh emaw vanga kan chunga thil tisual an ni tih kan
hre thei ang. Chuvangin, anmahni kan haw tur a ni lova an rilru dik lo leh ngaih dan dik lo zawk
chu kan haw tur a ni.
Tin, miin kan chunga thil an tihsualin phuba la mai lo ila, a ṭul chuan Lalpan min laksak
mai dawn a ni. Lal Saula pawh kha Israel lal atana Pathian thlan ni mah se, Pathian duh dana rawng
bawl lova ama duh dana rawng a bawl tlat avangin Pathian chuan Saula chu a hnawl a, a aiawha
lal turin Davida chu zawlnei Samuela hriak a thihtir ta a. Saulan chu chu a thîk a, thah tumin a
chang khiau va, a veh a veh ta mai a. Davida erawh chuan Saula tihhlum theihna hun remchang
tam tak nei mah se, Pathian hriak thih chunga kutthlak chu a duh lo va, Pathian kutah a dah ta
zawk a. Tichuan, Lalpan a hun takah Saula nunna chu hmelmate a laktir mai a ni. Chutiang zelin,
miten kan chunga thil an tihsualin phuba kan la tur a ni lo va, Pathian kutah kan dah mai tur a ni.
A tawp ber atan chuan Paula thu sawi hi vawng tlat ila, “Duh takte u, in phuba la suh ula, Pathian
thinurna kian zâwk rawh u, “Phuba rêng rêng keima lâk tûr a ni, keiman ka thungrûl ang,’ Lalpain
a ti,” tih ziak a ni si. Chuvângin, i hmêlma a rilṭâm chuan ei tûr pe rawh, a tuihâl chuan in tûr pe
rawh: chutiang i tih chuan a lu chungah meiling i chhêk khâwm a ni ang. Sual ngam chein awm
suh la, ṭhatnain sual chu ngam zâwk rawh (Rom 12:19-21). Lalpan a thu malsawm rawh se.