Propeta Isaias, kabanata pito, nagsisimula sa talata sampu hanggang labing-pito
Ito naman ang ipinasasabi ni Yahweh kay Acaz:
“Humingi ka sa akin ng palatandaan, maging sa kalaliman ng Sheol o sa kaitaasan ng langit.” Sumagot si Acaz: “Hindi po ako hihingi. Hindi ko susubukin si Yahweh.” Sinabi ni Isaias: “Pakinggan mo, sambahayan ni David, kulang pa ba ang galitin ninyo ang mga tao na pati ang aking Diyos ay inyong niyayamot? Kaya nga’t ang Panginoon na rin ang magbibigay ng palatandaan: Maglilihi ang isang dalaga at manganganak ng lalaki at ito’y tatawaging Emmanuel. Ang kakainin niya’y gatas at pulot pag siya’y marunong nang umiwas sa masama at gumawa ng mabuti. Sapagkat bago matuto ang bata na umiwas sa masama at gumawa ng mabuti, ang lupain ng mga haring kinatatakutan mo ay magiging ilang. Ang bayan mo at ang sambahayan ng iyong ama ay ipasasakop niya sa hari ng Asiria. Pagdaranasin ka nito ng paghihirap na kailanma’y hindi naranasan mula nang tumiwalag sa Juda ang Israel.
Ito ang mga Salita ng Panginoon
Disyembre 21, 2019 Misa De Gallo 6 (O Rex Gentium) 1st Reading ( Isaias 9:5-7)
Reader: Pagbasa mula sa Lumang Tipan hango sa
Aklat ni Propeta Isaias, kabanata siyam, nagsisimula sa talata lima hanggang pito.
Sapagkat ang panyapak ng mga mandirigma,
ang lahat ng kasuutang tigmak sa dugo ay susunugin. Sapagkat ipapanganak ang isang sanggol na lalaki at siya ang mamamahala sa atin. Siya ang Kahanga-hangang Tagapayo, ang Makapangyarihang Diyos, Walang Hanggang Ama, ang Prinsipe ng Kapayapaan. Malawak na kapangyarihan at walang katapusang kapayapaan ang ipagkakaloob sa trono ni David at sa katarungan at katwiran ngayon at magpakailanman. Isasagawa ito ng Makapangyarihang si Yahweh.
Mga kapatid, Ito ang salita ng Panginoon
Disyembre 21, 2019 Misa De Gallo 6 (O Rex Gentium) 2nd Reading Roma 1:1-7
Reader: Mula sa Bagong Tipan hango sa Sulat ni
Apostol Pablo sa mga taga-Roma, unang kabanata nagsisimula sa unang talata hanggang pito. Mula kay Pablo na alipin ni Cristo Jesus, tinawag upang maging apostol at hinirang upang mangaral ng Mabuting Balita ng Diyos. Sa inyong lahat na minamahal ng Diyos na nangariyan sa Roma, na tinawag upang maging mga banal: Sumainyo nawa ang pagpapala at kapayapaan mula sa Diyos na ating Ama at sa Panginoong Jesu-Cristo. Ang mabuting Balitang ito, na ipinangako niya noon pang una sa pamamagitan ng mga propeta at nasasaad sa mga banal na kasulatan, ay tungkol sa kanyang Anak, ang ating Panginoong Jesu-Cristo. Sa kanyang pagiging tao, siya’y ipinanganak mula sa lipi ni David, at sa likas na kabanalan ng kanyang espiritu, ipinahayag siyang Anak ng Diyos sa pamamagitan ng makapangyarihang gawa- ang kanyang muling pagkabuhay. Sa pamamagitan niya, tinanggap namin sa Diyos ang kaloob na maging apostol upang ang lahat ng bansa ay akayin sa pananampalataya at pagsunod sa kanya. Kabilang din kayo sa mga tinawag na maging tagasunod ni Jesu-Cristo. Mga kapatid, Ito ang mga Salita ng Panginoon.